སངས་རྒྱས་ཀྱི་ཐུགས་བསྐྱེད་དང་བྱམས་སྙིང་རྗེའི་ཕན་ཡོན་དགེ་བཅུ་སྤྱོད་པའི་འབྲས་བུ་ཡང་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཀུན་དགའ་བོས། ཀཎྜི་ནྱ་སོགས་དགེ་སློང་ལྔ་སྡེ་ལས་ཅི་བགྱིས་པས། ཐོག་མར་ཆོས་ཀྱི་བདུད་རྩིས་ངོམས་པར་གྱུར་སྙམ་དུ་བསམ་ནས་བཅོམ་ལྡན་འདས་ལ་ཞུས་པས་བཀའ་སྩལ་པ། དགེ་སློང་ལྔ་པོ་དེ་སྔོན་ཡང་བདག་གི་ཤ་དང་ཁྲག་གིས་ཚིམས་པར་བྱས་པས་ད་ལྟར་མངོན་པར་རྫོགས་པར་སངས་རྒྱས་ནས་ཀྱང་། སྔོན་དུ་རྣམ་པར་གྲོལ་བ་ལ་བཀོད་པ་ཡིན་ཏེ། སྔོན་བསྐལ་པ་གྲངས་མེད་པ་འདས་པའི་ཕ་རོལ་ན། འཛམ་བུ་གླིང་འདིར་རྒྱལ་པོ་བྱམས་པའི་སྟོབས་ཞེས་བྱ་བ་བྱུང་སྟེ། དེ་ནི་བྱམས་པ་དང་སྙིང་རྗེར་ལྡན་ཏེ་ཚད་མེད་པ་བཞི་སྤྱོད་ཅིང་འབངས་འཁོར་རྣམས་དགེ་བ་བཅུའི་ལམ་ལ་བཀོད་པས། ལོ་ལེགས་པ་དང་འབྱོར་པ་ཕུན་སུམ་ཚོགས་པ་དང་ལྡན་ཞིང་། སྒོ་གསུམ་གྱི་ལེགས་པར་སྤྱད་པའི་མཐུས་འབྱུང་པོ་དང་ཡི་དྭགས་གདུག་པ་ཅན་དག་གིས་ཀྱང་འཚེ་བར་མི་ནུས་སོ། །དེའི་ཚེ་གནོད་སྦྱིན་ལྔ་ཞིག་རྒྱལ་པོའི་མདུན་དུ་འོངས་ནས། བདག་ཅག་གི་ཟས་ནི་མི་ཡི་མདངས་དང་ཁྲག་ལ་ལྟོས་ཏེ་ལུས་སྲོག་འཚོ་བ་ལས། རྒྱལ་པོས་བཀར་བཏགས་ཏེ་ཐམས་ཅད་དགེ་བཅུ་ལ་གནས་པས། བདག་ཅག་ཟས་སྐོམ་མ་རྙེད་དེ་འཆི་ལ་ཐུག་པས་ཐུགས་རྗེས་བཟུང་འཚལ་ཞུས་པས། རྒྱལ་པོས་ཀྱང་དེ་དག་ལ་བརྩེ་བའི་ཕྱིར། རང་གི་ལུས་ཀྱི་ཡན་ལག་ལྔ་ལས་རྩ་ལྔ་བཅད་དེ་གནོད་སྦྱིན་ལྔ་པོ་ཁྲག་གིས་ཚིམས་པར་བྱས་ནས། དེ་དག་མགུ་བ་དང་། དགེ་བ་བཅུ་ལ་ཅི་ནུས་སུ་སྤྱོད་ཅིག་ཅེས་བསྐུལ་ཞིང་། ད་ལྟར་ངའི་ཁྲག་གིས་ངོམས་ཤིང་བདེ་བར་བྱས་པ་ལྟར། ཕྱིས་མངོན་པར་སངས་རྒྱས་ནས་ཆོས་ཀྱི་སྐུའི་ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་ཀྱིས་ཁྱོད་ཀྱི་དུག་གསུམ་བསལ་ཏེ་མྱ་ངན་ལས་འདས་པ་ལ་འགོད་པར་ཤོག་ཅིག་ཅེས་སྨྲས་སོ། །དེའི་དུས་ཀྱི་རྒྱལ་པོ་བྱམས་པའི་སྟོབས་ནི་ད་ལྟར་ང་ཡིན་ལ། གནོད་སྦྱིན་ལྔ་ནི་དགེ་སློང་ལྔ་པོ་འདི་ཡིན་ནོ། །ངས་གང་ནས་གང་དུ་སྐྱེས་པར་དེ་དག་ཐོག་མར་བསྒྲལ་བར་སྨོན་ལམ་བཏབ་བོ། །རྒྱུ་དེས་ངས་ཐོག་མར་ཆོས་བསྟན་མ་ཐག་ཏུ་རྣམ་པར་གྲོལ་བར་གྱུར་ཏོ་གསུངས། འདིས་ནི་སངས་རྒྱས་ཀྱི་ཐུགས་བསྐྱེད་དང་བྱམས་སྙིང་རྗེའི་ཕན་ཡོན་དགེ་བཅུ་སྤྱོད་པའི་འབྲས་བུ་ཡང་བསྟན་ནོ། །