གཞན་དགེ་ལ་བསྐུལ་བ་དང་མཆོད་རྟེན་ཞིག་རལ་གསོས་པ་སོགས་ཀྱིས་ཕན་ཡོན་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ལྷོ་ཕྱོགས་ཀྱི་ཡུལ་གསེར་གྱིས་ས་ལ་ཞེས་བྱ་བ་ན། རྒྱལ་པོ་ཀ་བྱི་ལ་ཞེས་བྱ་བའི་སྲས། ཀ་བྱི་ལ་ཆེན་པོ་རྒྱལ་སྲིད་ལ་འཁོད་དེ། དེ་ནི་བློ་གསལ་ལ་ཡིད་གཞུངས་པ། དཔའ་ཞིང་རྟུལ་ཕོད་པ། དམག་གི་ཚོགས་ཏེ་དམག་མི་སྡེ་ཚན་ཆེན་པོ་སྟོང་ཕྲག་སུམ་ཅུ་རྩ་དྲུག་ཡོད་པ། ཕས་ཀྱི་རྒོལ་བ་ཐམས་ཅད་ལ་མི་ཐུབ་པ་མེད་པ། རྒྱལ་ཕྲན་ཁྲི་ཕྲག་སུམ་ཅུ་རྩ་དྲུག་ལ་དབང་བྱེད་པ་ཞིག་ཡོད་དེ། འོན་ཀྱང་ཡུལ་དབུས་དང་འགྲིམ་བྱེད་པ་ནི་མེད་དོ། །སྐབས་དེར་མཉན་ཡོད་ཀྱི་ཚོང་པ་འགའ་ཞིག་ཡུལ་དེར་ཕྱིན་ནས། རས་བཟང་པོ་ཡུག་ཆེན་བཞི་རྒྱལ་པོ་ལ་ཕུལ་བས། རྒྱལ་པོས་ཡུལ་དབུས་ཞེས་བྱ་བ་ཅི་ཞེེས་དྲིས་པ་ན། ཡུལ་དབུས་ནི་མཉན་ཡོད་དང་རྒྱལ་པོའི་ཁབ་ལ་སོགས་པའོ། །དེར་ཀ་བྱི་ལ་ཆེན་པོ་ངས་ཡུལ་ཐམས་ཅད་དབང་དུ་བྱས་ན་དེ་ཅིའི་ཕྱིར་ཕྱག་འཚལ་དུ་མི་འོང་། ད་ནི་མངའ་འོག་ཏུ་གཞུག་པར་བྱའོ་སྙམ་ནས། ཡུལ་དབུས་ན་རྒྱལ་པོ་སུ་ཆེ་དྲིས་པས་མཉན་ཡོད་གྱི་རྒྱལ་པོ་ཆེ་ཞེས་བྱས་སོ། །དེར་ཀ་བྱི་ལས་རྒྱལ་པོ་གསལ་རྒྱལ་ལ་ཕོ་ཉ་བཏང་སྟེ། ངའི་མཐུ་དང་བྱིན་གྱིས་འཛམ་བུ་གླིང་ན་གཏོགས་པ་ཐམས་ཅད་ལ་དབང་བྱེད་ན་ཁྱོད་ཅིའི་ཕྱིར་ཕོ་ཉ་ཡང་འགྲུལ་བར་མི་བྱེད། ད་སྟེ་ཞག་བདུན་ན་ང་དང་ཕྲད་པར་ཤོག་ཅིག གལ་ཏེ་མ་འོངས་ན་དམག་དྲངས་ཏེ་ཁྱོད་ཀྱི་ཡུལ་མེད་པར་བྱའོ། །ཞེས་སྤྲིངས་པས། རྒྱལ་པོ་གསལ་རྒྱལ་སྐྲག་སྟེ་བཅོམ་ལྡན་འདས་ལ་ཞུས་པས། ཕོ་ཉ་བ་དེ་ངའི་དྲུང་དུ་སྲིངས་ཤིག་གསུངས་པ་ལྟར། རྒྱལ་པོས་ཕོ་ཉ་བ་དེ་ལ། དབུས་ཀྱི་རྒྱལ་པོའི་ནང་ནས་ཆེ་བ་ནི་ང་མ་ཡིན་གྱི། ཆེས་ཆེ་བའི་འཕྲུལ་གྱི་རྒྱལ་པོ་ཞིག་འདི་དང་མི་རིང་བ་ན་བཞུགས་པས་དེའི་དྲུང་དུ་སོངས་ཤིག དེའི་ཚེ་བཅོམ་ལྡན་འདས་ཀྱིས་རྒྱལ་བྱེད་ཀྱི་ཚལ་ནི་འཁོར་ལོས་སྒྱུར་བའི་ཕོ་བྲང་ཆེན་པོར་སྤྲུལ། སྟོན་པ་ཉིད་འཁོར་ལོས་སྒྱུར་བའི་རྒྱལ་པོ་དང་། མོའུ་འགལ་གྱི་བུ་བློན་པོ་རིན་པོ་ཆེའི་རྣམ་པར་བྱས་ཤིང་། ཇི་ལྟར་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོའི་དཔུང་དང་། གཡོག་དང་ལོངས་སྤྱོད་ཐམས་ཅད་སྤྲུལ་ལོ། །དེར་ཕོ་ཉ་བ་ཕྱིན་པས་ཤིན་ཏུ་ཞུམ་པར་གྱུར་མོད། རྒྱལ་པོའི་ཕྲིན་གྱི་ཡི་གེ་ཕུལ་ལོ། །འཕྲུལ་གྱི་རྒྱལ་པོ་དེས་ཡི་གེ་དེ་རྡོག་པས་མནན་ཏེ། ང་ནི་གླིང་བཞི་ལ་དབང་བའི་རྒྱལ་པོ་ཡིན་ན། རྒྱལ་པོ་གླེན་པ་དེ་ལ། ད་སྟེ་ཞག་བདུན་ན་ཕྱག་འཚལ་དུ་འདིར་ཤོག་ཅིག གལ་ཏེ་མ་འོངས་ན་ཁྲིམས་དང་སྦྱར་རོ། །ཞེས་སྤྲིངས་པས། ཕོ་ཉ་དེ་ཕྱིར་སོང་སྟེ་ལོ་རྒྱུས་རྒྱས་པར་བཤད་པས། རྒྱལ་པོ་ཀ་བྱི་ལ་ཆེན་པོ་དེ་རབ་ཏུ་སྐྲག་ཅིང་འགྱོད་པར་གྱུར་མོད། ད་དུང་ཅུང་ཟད་ཉམས་སད་བྱའོ་སྙམ་སྟེ། བདག་རྒྱལ་ཕྲན་སུམ་ཁྲི་དྲུག་སྟོང་དང་ལྷན་ཅིག་མཆིའམ་དེའི་ཕྱེད་དང་ལྷན་ཅིག་མཆི་ཞེས་སྤྲིངས་པས། དེར་རྒྱལ་ཕྲན་ཕྱེད་དང་ལྷན་དུ་ཤོག་ཅིག་ཅེས་བྱུང་ངོ་། །དེ་ནས་རྒྱལ་པོ་ཀ་བྱི་ལ་ཆེན་པོ་རྒྱལ་ཕྲན་ཁྲི་བརྒྱད་སྟོང་གིས་བསྐོར་ཏེ། མཉན་ཡོད་དུ་བཅོམ་ལྡན་འདས་འཁོར་ལོས་སྒྱུར་རྒྱལ་གྱི་ཚུལ་འཛིན་པའི་དྲུང་དུ་ལྷགས་ཏེ་སྤྱན་སྔར་ཕྱག་བྱས་ཏེ། རྒྱལ་པོ་འདིའི་བྱད་གཟུགས་ནི་བདག་བས་ཆེས་ལྷག་མོད། སྟོབས་ཅི་འདྲ་སྙམ་པ་དང་། བློན་པོ་རིན་པོ་ཆེ་ལ་ཁྱོད་ཀྱི་གསེར་པའི་རྒྱལ་པོ་ལ་གཞུ་བྱིན་ཅིག་གསུངས། དེས་ཀྱང་བྱིན་པ་ན་རྒྱལ་པོས་ལག་གིས་ཀྱང་མ་ཐེག་རྒྱུད་ཀྱང་མ་བསྒྱུར་རོ། །དེ་ནས་འཕྲུལ་གྱི་རྒྱལ་པོས་གཞུ་དེ་ཕྱག་ཏུ་བཞེས་ཏེ། གཞུ་རྒྱུད་སྦྲེང་བ་ཙམ་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་དུ་ས་གཡོས་ཤིང་། མདའ་གཅིག་འཕངས་པས་མདའ་ལྔར་གྱུར་པའི་རྩེ་མོ་ལས་འོད་ཟེར་གྲངས་མེད་པ་བྱུང་ནས། འོད་ཟེར་རེ་རེའི་རྩེ་མོ་ན་པདྨ་ཤིང་རྟའི་འཕང་ལོ་ཙམ་རེ་བྱུང་ཞིང་། པདྨ་རེ་རེ་ལ་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་ཚོགས་དང་བཅས་པ་རེ་རེ་བྱུང་། དེའི་འོད་ཟེར་གྱིས་རེག་པས་ལམ་རྒྱུད་ལྔའི་སེམས་ཅན་རྣམས་སོ་སོའི་སྡུག་བསྔལ་དང་བྲལ་བདེ་བ་དང་ལྡན་ཞིང་འབྲས་བུ་ཐོབ་པ་སོགས་ཀྱི་ཆོ་འཕྲུལ་མཐའ་ཡས་པ་བསྟན་ཏོ། །དེར་རྒྱལ་པོ་དེ་འཁོར་དང་བཅས་པའི་ང་རྒྱལ་ཆག་ཅིང་སེམས་རབ་ཏུ་དད་པར་གྱུར་པ་ན། ཆོ་འཕྲུལ་བསྡུས་ཏེ་སངས་རྒྱས་དགེ་འདུན་གྱི་འཁོར་དང་བཅས་པ་སྐུ་དངོས་སུ་བསྟན་ཅིང་ཆོས་གསུངས་པས་ཐམས་ཅད་ཀྱིས་རྒྱུན་དུ་ཞུགས་པ་ཐོབ་བོོ། །རྒྱལ་པོ་ཀ་བྱི་ལ་ཆེན་པོ་ཉིད་སྟོན་པས་ཚུར་ཤོག་གིས་རབ་ཏུ་བྱུང་ཞིང་བསྙེན་པར་རྫོགས་ནས་རིང་པོར་མ་ཐོགས་པར་དགྲ་བཅོམ་པའི་འབྲས་བུ་མངོན་དུ་བྱས་སོ། །དེའི་ཚེ་ཀུན་དགའ་བོས་ལས་ཀྱི་རྒྱུ་ཞུས་པ་ན་སྔོན་སངས་རྒྱས་འོད་སྲུང་འཇིག་རྟེན་དུ་བྱོན་ནས་མྱ་ངན་ལས་འདས་པ་ན། ཁྱིམ་བདག་གཅིག་གིས་མཆོད་རྟེན་བརྩེགས་ཏེ། དགེ་འདུན་གྱི་གནས་ཁང་བྱས་ནས་འཚོ་བའི་ཡོ་བྱད་ཀྱང་སྦྱར་ནས་ཡུན་རིང་ཞིག་ལོན་པ་ན། མཆོད་རྟེན་དེ་ཡང་ཞིག འཚོ་བའི་ཡོ་བྱད་རྣམས་ཀྱང་མེད་པར་གྱུར་པ་ན། ཁྱིམ་བདག་དེ་ལ་བུ་དགེ་སློང་ཞིག་ཡོད་པ་དེས་མི་མང་པོ་ལ་ཆོས་བཤད་དེ་ཕྱིར་ཡང་མཆོད་རྟེན་གསོས་ནས། གོས་དང་མལ་ཆ་བཟའ་བཏུང་ཁྲི་སྟན་སོགས་ཀྱི་ཡོ་བྱད་སྦྱར་ཏེ། མི་དེ་དག་དང་སེམས་མཐུན་པར་བདག་ཅག་མ་འོངས་པའི་དུས་ན་བཙན་ཞིང་ཕྱུག་པ་དང་། ཚེ་རིང་བ་དང་། སངས་རྒྱས་དང་མཇལ་ཞིང་ཆོས་ཐོས་ནས་འབྲས་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་དགེ་སློང་དེ་ནི་རྒྱལ་པོ་ཀ་བྱི་ལ་ཆེན་པོ་ཡིན་ལ། དེས་ཆོས་བསྟན་ཏེ་མཆོད་རྟེན་གསོས་པ་དང་། འཚོ་བའི་ཡོ་བྱད་བསྟབ་པ་རྣམས་ནི་རྒྱལ་ཕྲན་ཁྲི་བརྒྱད་སྟོང་སྙེད་ཡིན་ནོ་གསུངས། འདིས་ནི་གཞན་དགེ་ལ་བསྐུལ་བ་དང་མཆོད་རྟེན་ཞིག་རལ་གསོས་པ་སོགས་ཀྱིས་ཕན་ཡོན་བསྟན་ཏོ། །