སངས་རྒྱས་ཀྱི་སྐུ་གཟུགས་བཞེངས་ཤིང་མཆོད་པ་དང་སྦྱིན་པ་སོགས་ཀྱི་བསོད་ནམས་བསྟན་པ།
༈ ཡང་སྟོན་པ་འཁོར་དང་བཅས་པ་མཉན་ཡོད་ཀྱི་གྲོང་ཁྱེར་དུ་བསོད་སྙོམས་ལ་གཤེགས་པ་ལས། ལམ་ཁ་ཞིག་ན་བྱིས་པ་དག་ཅིག་ས་ལ་ཁང་བུ་དང་བང་མཛོད་དང་། རིན་པོ་ཆེར་བསྔོས་ནས་བརྩེ་ཞིང་འཁོད་དོ། །དེར་བྱིས་པ་གཅིག་གིས་བཅོམ་ལྡན་འདས་རྒྱང་རིང་པོ་ནས་གཤེགས་པ་མཐོང་ནས་རབ་ཏུ་དགའ་སྟེ། སྦྱིན་པར་བསམས་ནས་བང་མཛོད་དུ་བཅོས་པའི་ས་ལས་སྙིམ་པ་གང་བླངས་ཏེ་སངས་རྒྱས་ལ་འབུལ་བར་བརྩམས་པ་ན། ཁྱེའུ་ཆུང་ཆེས་པས་མ་བསླེབས་ནས། གྲོགས་པོ་ཁྱེའུ་གཅིག་ལ་ཁྱོད་ས་ལ་སྒུ་ཞིག ང་ཁྱོད་ཀྱི་སྟེང་དུ་འགྲེང་སྟེ་ལྷུང་བཟེད་དུ་བླུགས་སོ། །ཞེས་སྨྲས་ཏེ། དེས་ཀྱང་དེ་བཞིན་བྱས་ནས་ས་སྙིམ་པ་གང་སངས་རྒྱས་ལ་ཕུལ་ལོ། །སངས་རྒྱས་ཀྱིས་ཀྱང་ལྷུང་བཟེད་དུ་བཞེས་ཏེ། ཀུན་དགའ་བོ་ལ་གཏད་ཏེ་གཙུག་ལག་ཁང་ལ་བསྐུ་བར་མཛད་དོ། །དེར་བཅོམ་ལྡན་འདས་ཀྱིས་ཁྱེའུས་དད་པའི་སེམས་ཀྱིས་ད་ལྟར་ང་ལ་ས་ཕུལ་བ་བཞེས་ཏེ་ལྷ་ཁང་ལ་བསྐུས་པའི་བསོད་ནམས་ཀྱིས་ང་མྱ་ངན་ལས་འདས་ཏེ་ལོ་བརྒྱ་ལོན་པའི་འོག་ཏུ་རྒྱལ་པོ་ཨ་ཤོ་ཀ་ཞེས་བྱ་བར་འགྱུར་རོ། །དེའི་གྲོགས་བྱེད་པའི་ཁྱེའུ་དེ་ཡང་བློན་པོར་འགྱུར་ཏེ། འཛམ་བུའི་གླིང་ལ་དབང་བྱེད་ཅིང་དཀོན་མཆོག་གསུམ་གྱི་ཡོན་ཏན་རྒྱ་ཆེར་བསྒྲགས་ནས་རིང་བསྲེལ་ཅན་གྱི་མཆོད་རྟེན་བརྒྱད་ཁྲི་བཞི་སྟོང་ཅིག་ཆར་དུ་བྱེད་པར་འགྱུར་རོ་གསུངས་པས། ཀུན་དགའ་བོ་ངོ་མཚར་དུ་གྱུར་ནས། དེ་བཞིན་གཤེགས་པས་སྔོན་བསོད་ནམས་ཅི་ཞིག་མཛད་ནས་རིང་བསྲེལ་ལ་ཡང་མཆོད་རྟེན་དེ་སྙེད་བགྱིས་པར་འགྱུར་ཞུས་པས། སྟོན་པས་བཀའ་སྩལ་པ། སྔོན་འཛམ་བུའི་གླིང་འདིར་རྒྱལ་པོ་གསལ་ཐུབ་ཅེས་བྱ་བ་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བྱེད་པ་ཞིག་བྱུང་སྟེ། དེའི་ཚེ་སངས་རྒྱས་སུར་ཤ་ཞེས་བྱ་བ་འཇིག་རྟེན་དུ་བྱོན་པ་ལ་རྒྱལ་པོས་མཁོ་བའི་ཡོ་བྱད་བཞི་སྦྱར་ཏེ་སངས་རྒྱས་དགེ་འདུན་དང་བཅས་པ་ལ་ཕུལ་ཞིང་། མཐའ་འཁོབ་ཀྱི་རྒྱལ་ཕྲན་དང་ཡུལ་མི་རྣམས་ཀྱི་བསོད་ནམས་བསགས་པའི་ཆེད་དུ་སངས་རྒྱས་ཀྱི་སྐུ་གཟུགས་བྲིས་ཏེ་བཀྲམ་པར་འདོད་ཀྱང་། རི་མོ་མཁན་རྣམས་ཀྱིས་འབྲི་བར་མ་ནུས་པས། སངས་རྒྱས་ཉིད་ཀྱིས་ཚོན་རྩི་སྦྱར་ནས་སྐུ་གཟུགས་བྲིས་ཏེ། དེ་ལ་དཔེར་བྱས་ནས་རི་མོ་མཁན་གྱིས་སངས་རྒྱས་ཀྱི་སྐུ་གཟུགས་མཚན་དང་ལྡན་པ་བརྒྱད་ཁྲི་བཞི་སྟོང་བྲིས་ནས་རྒྱལ་ཕྲན་རེ་ལ་སྐུ་གཟུགས་རེ་བསྐུར་ཏེ་རྒྱལ་པོ་དང་ཡུལ་མི་རྣམས་ལ་མཆོད་པ་བྱེད་དུ་བཅུག་ནས་དགེ་བའི་རྩ་བ་བསྐྱེད་དོ། །དེའི་དུས་ཀྱི་རྒྱལ་པོ་དེ་ནི་ད་ལྟར་ང་ཡིན་ལ། རྒྱུ་དེས་གང་དང་གང་དུ་སྐྱེས་ཀྱང་མཐོ་རིས་སུ་བརྒྱ་བྱིན་ལྷའི་དབང་པོར་སྐྱེས་ཏེ། བྱད་གཟུགས་བཟང་བ་དང་། མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་ཐོབ་སྟེ་མངོན་པར་སངས་རྒྱས་སོ། །མྱ་ངན་འདས་ནས་ཀྱང་རིང་བསྲེལ་ལ་མཆོད་རྟེན་བརྒྱད་ཁྲི་བཞི་སྟོང་སྙེད་བྱེད་པར་འགྱུར་རོ་གསུངས། འདིས་ནི་སངས་རྒྱས་ཀྱི་སྐུ་གཟུགས་བཞེངས་ཤིང་མཆོད་པ་དང་སྦྱིན་པ་སོགས་ཀྱི་བསོད་ནམས་བསྟན་པ་ཡིན་ནོ། །