སངས་རྒྱས་ཀྱི་བསོད་ནམས་ཀྱི་མཐུ་བསྟན་པ།

༈ ཡང་བཅོམ་ལྡན་འདས་རྒྱལ་པོའི་ཁབ་ནྱ་གྲོ་དྷའི་ཚལ་ན། ཚངས་པ་དང་བརྒྱ་བྱིན་དང་ཤཱཀྱའི་རིགས་ཀྱི་ཁྱེའུ་ལྔ་བརྒྱ་ལ་སོགས་པའི་འཁོར་གྱིས་བསྐོར་ཅིང་བཞུགས་པ་ལས། སྟོན་པའི་སྐུའི་མཚན་དཔེའི་ཡོན་ཏན་གྱིས་ཐམས་ཅད་ཟིལ་གྱིས་མནན་པས་འཁོར་རྣམས་ཡ་མཚན་དུ་གྱུར་ནས་མངོན་པར་བསྟོད་པ་ན། བཀའ་སྩལ་པ། ད་ལྟར་འབའ་ཞིག་ཏུ་འཁོར་ཀུན་ལས་འཕགས་ཏེ་གཙོ་བོར་གྱུར་པ་མ་ཡིན་གྱི། སྔོན་འདས་པའི་དུས་ན་ཡང་འདི་དག་ཀུན་ལས་འཕགས་ཏེ་གཙོ་བོར་གྱུར་པ་ནི། སྔོན་བསྐལ་པ་གྲངས་མེད་བསམ་གྱིས་མི་ཁྱབ་པའི་ཕ་རོལ་ན། འཛམ་བུ་གླིང་འདིར་རྒྱལ་པོ་ཆེན་པོ་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བྱེད་པ་ཞིག་བྱུང་སྟེ། དེ་ལ་སྲས་ལྔ་བརྒྱ་ཡོད་དོ། །དུས་ཕྱིས་ཞིག་ན་བཙུན་མོ་རྒན་པ་ལ་བུ་གསེར་གྱི་མདོག་ཅན་སྐྲ་མཐོན་མཐིང་ལྟ་བུ་ལག་མཐིལ་དུ་འཁོར་ལོ་རྩིབས་སྟོང་དང་ལྡན་པ་རྐང་མཐིལ་དུ་རྟ་དང་གླང་པོའི་རི་མོ་ཡོད་པ་བསོད་ནམས་དང་ལྡན་པ་ཞིག་བཙས་པས། མིང་ཡང་མེ་ལོང་གདོང་དུ་བཏགས་སོ། །དེར་ཡང་རྒྱལ་པོ་ནད་ཀྱིས་བཏབ་ནས་ཚེ་ཡི་དུས་བྱེད་དུ་ཉེ་བ་ན། བློན་པོ་རྣམས་ཀྱིས་སྲས་འདི་རྣམས་ཀྱི་ནང་ནས། རྒྱལ་སྲིད་དུ་གང་དབང་བསྐུར་ཞེས་དྲིས་པ་དང་། རྒྱལ་པོ་དེས་ལུས་ཀྱི་མདོག་གསེར་ལྟ་བུ་ལ་སྐྲ་མཐོན་མཐིང་དུ་འདུག་པ་དང་། ལག་པ་གཉིས་ཀྱི་མཐིལ་ན་འཁོར་ལོའི་མཚན་དང་ལྡན་པ་དང་། རྐང་པ་གཡས་པའི་མཐིལ་ན་གླང་པོ་ཆེའི་རི་མོ་ཡོད་པ་དང་། རྐང་པ་གཡོན་པའི་མཐིལ་དུ་རྟའི་རི་མོ་ཡོད་པ་དང་། རྒྱལ་པོའི་གོས་གྱོན་པ་ན་ལུས་ལ་འཚམ་པ་དང་། སྟན་ལ་འདུག་ན་གཟི་བརྗིད་དང་མཐུ་དང་ལྡན་པ་དང་། རྒྱལ་ཕྲན་རྣམས་ཀྱིས་བསྙེན་བཀུར་ཆེར་བྱེད་ཅིང་བཙུན་མོ་དང་ཕོ་བྲང་གི་འཁོར་གྱིས་ཀྱང་དེ་ལ་དགའ་ཞིང་ཕྱག་བྱེད་པ་དང་། ལྷ་རྟེན་གྱི་དྲུང་དུ་ཁྲིད་ན་ལྷ་རྣམས་ཀྱིས་ཕྱིར་ཕྱག་བྱེད་པ་དང་། ཡོན་ཏན་དང་བསོད་ནམས་ཀྱི་མཐུས་རིན་པོ་ཆེ་སྣ་བདུན་གྱི་ཆར་འབེབས་ཤིང་ཐམས་ཅད་ཀྱི་ཡིད་ཚིམ་པར་བྱེད་པ་དང་། བཙུན་མོ་ཆེན་མོ་ལས་སྐྱེས་པ་སྟེ། ཡོན་ཏན་དང་མཚན་རྣམ་པ་བཅུ་པོ་འདི་དག་དང་གང་ལྡན་དེ་རྒྱལ་པོར་ཆུག་ལ་དབང་སྐུར་ཅིག་ཅེས་བསྒོའོ། །དེ་ནས་ཡབ་རྒྱལ་པོ་གཤེགས་ཏེ་རྒྱལ་བུ་དང་བློན་པོ་རྣམས་འདུས་ནས་སྲས་ལྔ་བརྒྱ་པོ་རྣམས་ཀྱི་ཆེ་རིམ་ནས་བཟུང་ཐམས་ཅད་ལ་བརྟགས་པས་ཡོན་ཏན་གྱི་ཁྱད་པར་དེ་དག་གང་དང་ཡང་མི་ལྡན་ཞིང་། སྲས་ཐ་ཆུང་འབའ་ཞིག་ལ་ཡོན་ཏན་དེ་དག་ཐམས་ཅད་ཚང་བར་ཤེས་ནས་རྒྱལ་ཕྲན་དང་བློན་པོ་རྣམས་ཀྱིས་རྒྱལ་པོར་དབང་བསྐུར་ཏེ། ཚེས་བཅོ་ལྔའི་ཉིན་པར་ཉི་མ་ཐོག་མར་ཤར་བ་ན། གསེར་གྱི་འཁོར་ལོ་རྩིབས་སྟོང་དང་ལྡན་པ་ཆེ་ཁྱད་དཔག་ཚད་གཅིག་ཡོད་པ་ཤར་ཕྱོགས་ནས་འོངས་ཏེ། དེ་ལ་པུས་མོ་བཙུགས་ནས་བདག་ཡོན་ཏན་དང་ལྡན་ཏེ་རྒྱལ་པོར་འགྱུར་ན་འཁོར་ལོ་འདི་བདག་གི་དྲུང་དུ་ཉེ་བར་ཤོག་ཅིག་ཅེས་སྨྲས་པ་དང་ནམ་མཁའི་ཕྱོགས་ནས་ཉེ་བར་འོངས་སོ། །གླང་པོ་རིན་པོ་ཆེ་ནི་རི་སྤོས་ཀྱི་ངད་ཅན་ལས་འོངས་ཏེ་མཇུག་མ་ནོར་བུས་བརྒྱན་པ། རྒྱལ་པོ་དེ་ལ་ཞོན་ནས་ནམ་མཁའ་ལ་འཕུར་ཏེ་ཉི་མ་ཕྱེད་ཀྱིས་གླིང་བཞི་འཁོར་ནུས་ལ། གལ་ཏེ་རྐང་པས་སོང་ན་རྗེས་རྣམས་ཀྱང་གསེར་གྱི་བྱེ་མར་འགྱུར་རོ། །རྟ་རིན་པོ་ཆེ་ནི་ཁ་དོག་མཐིང་ག་ལ་རྔ་རྔོག་དམར་བ་དེ་ལས་རིན་པོ་ཆེ་སྣ་བདུན་འབབ་པ་རྒྱལ་པོས་ཞོན་ན་ཟན་གཅིག་ཟ་བའི་ཡུན་ཙམ་གྱིས་གླིང་བཞི་འཁོར་ཏེ་མི་ངལ་ཞིང་མི་དུབ་བོ། །ནོར་བུ་རིན་པོ་ཆེ་ནི་མཚན་མོ་རྒྱང་གྲགས་ཉི་ཤུ་ཚུན་ཆད་འོད་ཀྱིས་ཉིན་མོ་བཞིན་དུ་སྣང་བར་བྱེད་ཅིང་རིན་པོ་ཆེ་སྣ་བདུན་ཆར་བཞིན་དུ་འབེབས་ཤིང་ཐམས་ཅད་ལ་སྦྱིན་པར་བྱེད་དོ། །བུད་མེད་རིན་པོ་ཆེ་ནི་བཟང་བ་མཛེས་པ་རྒྱལ་པོའི་ཡིད་ཚིམ་པར་བྱེད་དོ། །ཁྱིམ་བདག་རིན་པོ་ཆེ་ནི་རྒྱལ་པོའི་རིན་པོ་ཆེ་སྣ་བདུན་ཅི་དགོས་པ་ཡིད་བཞིན་དུ་སྦྱར་ཏེ་ཟད་མི་ཤེས་པར་བྱེད་དོ། །བློན་པོ་རིན་པོ་ཆེ་ནི་རྒྱལ་པོས་དཔུང་རྣམ་བཞི་བགོས་ན་བལྟས་པ་ཙམ་གྱིས་དཔུང་གི་ཚོགས་འདུས་ཏེ་རྩལ་དང་མཐུར་ལྡན་ནོ། །དེ་ལྟར་རིན་པོ་ཆེ་སྣ་བདུན་དང་ལྡན་པ་ན། ཐབས་འདི་ལྟ་བུ་ཡང་སྔོན་གྱི་བསོད་ནམས་ལས་སྐྱེས་ཀྱིས་རྒྱལ་པོའི་གདུང་རྒྱུད་མི་ཆད་པར་བྱའོ་སྙམ་དུ་བསམ་ནས། རྒྱལ་པོ་དེས་སྤོས་ཆུས་ཁྲུས་བྱས་ཏེ་གོས་གསར་པ་གཙང་མ་བགོས་ནས་ལག་ན་སྤོས་ཕོར་ཐོགས་ཏེ། ཤར་ཕྱོགས་ལོགས་སུ་པུས་མོ་བཙུགས་ནས། ཤར་ཕྱོགས་ན་སྐྱེས་བུ་འཕགས་པ་བཞུགས་པ་རྣམས་བདག་གིས་གསོལ་བ་བཞིན་དུ་གཤེགས་སུ་གསོལ་ཞེས་སྨྲས་པ་དང་། ཤར་ཕྱོགས་ནས་རང་སངས་རྒྱས་ཉི་ཁྲི་སྙེད་རྒྱལ་པོའི་ཕོ་བྲང་དུ་གཤེགས་སོ། །ལྷོ་དང་ནུབ་དང་བྱང་གི་ཕྱོགས་སུའང་དེ་བཞིན་དུ་གསོལ་པ་དང་། དེ་དག་སོ་སོ་ནས་ཀྱང་རང་སངས་རྒྱས་ཉི་ཁྲི་སྙེད་རྒྱལ་པོའི་ཕོ་བྲང་དུ་གཤེགས་སོ། །དེ་ནས་རྒྱལ་པོ་དང་བློན་པོ་ལ་སོགས་པའི་སྐྱེ་བོ་རྣམས་ཀྱིས་ཡོ་བྱད་རྣམ་པ་བཞི་སྦྱར་སྟེ་རང་སངས་རྒྱས་དེ་རྣམས་ལ་ལོ་བརྒྱད་ཁྲི་བཞི་སྟོང་གི་བར་དུ་མཆོད་པར་བྱས་པས། ཐམས་ཅད་ཚེ་འཕོས་པ་ན་མཐོ་རིས་ཀྱི་ལྷར་སྐྱེས་སོ། །དེའི་དུས་ཀྱི་རྒྱལ་པོ་མེ་ལོང་གདོང་ཅན་ནི་ད་ལྟར་ང་ཡིན་ནོ། །རྒྱལ་པོ་དེའི་ཕ་ནི་ཡབ་ཟས་གཙང་མ་དང་། བཙུན་མོ་དེ་ནི་ཡུམ་ལྷ་མཛེས་མ་དང་། རྒྱལ་བུ་ལྔ་བརྒྱ་ནི་ཤཱཀྱའི་རིགས་ལྔ་བརྒྱ་འདི་ཡིན་ཏེ། དེའི་དུས་ནའང་ཐམས་ཅད་ཀྱི་གཙོ་བོར་གྱུར་ཏེ་ད་ལྟ་སངས་རྒྱས་ནས་ཀྱང་མཚན་དང་ལྡན་པའི་མཆོག་གཙོ་བོར་གྱུར་ཏོ་གསུངས། འདིས་ནི་སངས་རྒྱས་ཀྱི་བསོད་ནམས་ཀྱི་མཐུ་བསྟན་པའོ། །