བྱང་ཆུབ་སེམས་དཔའ་དཀའ་སྤྱད་དང་བསོད་ནམས་ཀྱི་སྟོབས་རྣམས་དང་ལེགས་པར་བསླབ་པ་ལ་མི་ཉན་པའི་ཉེས་དམིགས་ཀྱང་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། གྲོང་ཁྱེར་གྱི་མི་རྣམས་ཆོས་ཉན་དུ་ཆས་པ་དང་། གྲོང་དེ་ན་བྲམ་ཟེ་ལོང་བ་གཅིག་ལམ་ཀ་ན་འདུག་པ་ལས་མི་མང་པོ་སོང་བ་ལས་ཁྱེད་རྣམས་མྱུར་བར་གར་འདོང་ཞེས་དྲིས་པས། མི་རྣམས་ཀྱིས་ཁྱོད་ཀྱིས་མ་ཐོས་སམ། དེ་བཞིན་གཤེགས་པ་འཇིག་རྟེན་དུ་བྱོན་ཏེ། ད་ལྟར་ཡུལ་འདི་ན་བཞུགས་ཤིང་ཆོས་སྟོན་པས་བདག་ཅག་ཆོས་ཉན་དུ་འགྲོའོ་ཟེར། བྲམ་ཟེ་དེ་ནི་སྐད་བརྒྱད་ལ་ཤིན་ཏུ་མཁས་པ་ཞིག་སྟེ། སྐད་དུ་ཕྱུང་བ་ཙམ་གྱིས་དབང་ཐང་དང་ཚེ་རིང་ཐུང་སོགས་ཤེས་པར་ནུས་ཏེ། སྐད་བརྒྱད་ནི། བྱ་བང་གི་སྐད་དང་། ཁྭ་ལྟ་བུའི་སྐད་དང་། སྐད་འཛེར་འཛེར་པོ་དང་། གླང་པོ་ཆེའི་སྐད་དང་། རྔའི་སྐད་དང་། འབྲུག་གི་སྐད་དང་། དྲིལ་གྱི་སྐད་དང་། ཚངས་པའི་སྐད་དང་བརྒྱད་དོ། །དེའི་ཚེ་བྲམ་ཟེ་དེས་མི་རྣམས་ལ་བདག་ནི་སྐད་ལ་ཤིན་ཏུ་མཁས་ཏེ་ཡང་དག་པར་སངས་རྒྱས་ཡིན་ན་ཚངས་པའི་སྐད་དང་ལྡན་པར་རིགས་ཀྱི། ཁོ་བོ་ཡང་ཁྲིད་ལ་འགྲོགས་ཏེ་འདོང་ངོ་། །དེ་དག་གིས་ཀྱང་ཁྲིད་དེ་སོང་བ་ལས། ཕྱོགས་དེར་ཉེ་བར་གྱུར་ཏེ། སངས་རྒྱས་ཀྱི་གསུང་དབྱངས་དེ་ཐོས་ནས་ལོང་བ་དགའ་མགུ་རངས་ནས་དད་པ་སྐྱེས་ཏེ། མིག་གཉིས་ཀྱང་རང་བྱེར་གྱུར་ནས་སངས་རྒྱས་ཀྱི་མཚན་དཔེའི་སྐུ་མངོན་སུམ་དུ་མཐོང་ཞིང་། དེར་ཆོས་བསྟན་པས་རྒྱུན་དུ་ཞུགས་པའི་འབྲས་བུ་ཐོབ་ནས་རབ་ཏུ་བྱུང་བར་གསོལ་པ་དང་། སྟོན་པས་ཚུར་ཤོག་གིས་བསྙེན་པར་རྫོགས་ནས་རིམ་གྱིས་དགྲ་བཅོམ་པར་གྱུར་ཏོ། །དེར་ཐམས་ཅད་ངོ་མཚར་དུ་གྱུར་ནས་ཀུན་དགའ་བོས་དེའི་དོན་གསོལ་པ་ན། བཀའ་སྩལ་པ། བྲམ་ཟེ་ལོང་བ་འདི་ལ་དུས་འདི་འབའ་ཞིག་ཏུ་མིག་བྱིན་པར་མ་ཟད། འདས་པའི་དུས་ན་ཡང་མིག་བྱིན་ཏེ། སྔོན་འདས་པའི་དུས་བསྐལ་པ་གྲངས་མེད་པའི་ཕ་རོལ་ན། འཛམ་བུ་གླིང་འདིར་ཡུལ་སུ་ཀ་ལ་ད་ཞེས་བྱ་བ་ན། རྒྱལ་པོ་མིག་འབྱེད་ཅེས་བྱ་བ་ཞིག་ཡོད་དེ། དེས་བྲག་དང་རྩིག་པ་ལ་ཡང་ཐོགས་པ་མེད་པར་དཔག་ཚད་བཞི་བཅུ་ཚུན་ཆད་མཐོང་བས་མཚན་དེ་སྐད་དུ་བཏགས་ཏེ། འཛམ་བུ་གླིང་གི་རྒྱལ་ཕྲན་བརྒྱད་ཁྲི་བཞི་སྟོང་ཀུན་ལ་དབང་བྱེད་དོ། །རྒྱལ་པོ་དེ་ལ་བཙུན་མོ་དང་ཕོ་བྲང་གི་སླས་ཉི་ཁྲི་ཡོད་དེ། རྒྱལ་བུ་ལྔ་བརྒྱ་ཡོད་དོ། །རྒྱལ་ཚབ་ནི་ཚུལ་ཁྲིམས་བཟང་པོ་ཞེས་བྱ་སྟེ། རྒྱལ་པོ་དེ་ཚུལ་བཞིན་དུ་རྒྱལ་པོ་བྱེད་པས། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སེམས་ཏེ། དེའི་མཐུས་དུས་སུ་ཆར་བབས་ཤིང་ལོ་ལེགས་ཏེ་ཡུལ་ཁམས་ཐམས་ཅད་བདེ་ཞིང་སྐྱིད་དོ། །དེར་རྒྱལ་པོ་དེས་འདི་སྙམ་དུ། བདག་ཚེ་སྔོན་མའི་བསོད་ནམས་ཀྱི་མིའི་རྒྱལ་པོར་གྱུར་ཏེ། ནོར་བུ་རིན་པོ་ཆེ་དང་ལོངས་སྤྱོད་ཆེན་པོ་དང་ལྡན་ཞིང་ཐམས་ཅད་ཀྱི་ངག་ཉན་མོད། ཚེ་འདི་ལ་ཕྱི་མའི་འབྲས་བུ་མ་བསྐྱེད་ན་སྡུག་བསྔལ་བར་འགྱུར་བས་བསོད་ནམས་བསགས་པར་རིགས་སོ་སྙམ་ནས་དཀོར་མཛོད་ཐམས་ཅད་སྦྱིན་པར་བཏང་ཞིང་། རྒྱལ་ཕྲན་བརྒྱད་ཁྲི་བཞི་སྟོང་ལའང་དེ་བཞིན་དུ་བསྒོའོ། །དེའི་ཚེ་མཐའ་འཁོབ་ཀྱི་རྒྱལ་ཕྲན་ས་ལ་ད་བར་ནེ་ཞེས་བྱ་བ་ཞིག་རྒྱལ་པོ་དེའི་བཀའ་མི་ཉན་ཞིང་ཆོས་མ་ཡིན་པས་རྒྱལ་སྲིད་བྱེད་དོ། །རྒྱལ་ཕྲན་དེ་ལ་བློན་པོ་མཁས་པ་བློ་གྲོས་དང་ལྡན་པ་ལོ་ད་ར་བྱ་བ་ཞིག་ཡོད་དེ། དེས་རྒྱལ་པོའི་བཀའ་ནི་གཅོག་ཏུ་མི་རུང་ངོ་ཞེས་གྲོས་བྱས་ཀྱང་མི་ཉན་པར་བློན་པོ་དེ་ལ་ཕྱིར་ཞིང་ཁྲོའོ། །དེ་ནས་བློན་པོ་དེས་འདི་ཉིད་མེད་པར་བྱའོ་སྙམ་ནས་གྲོས་བྱས་པ་ལས་གསང་ཤོར་ནས་རྒྱལ་པོའི་དམག་གིས་བློན་པོ་དེ་ཉིད་འཛིན་དུ་བྱུང་བ་ན་བློན་པོ་དེ་རྟ་མགྱོགས་པ་ལ་ཞོན་ནས་བྲོས་ཏེ་དཔུང་གིས་རྗེས་སྙེགས་པ་ན་བློན་པོ་དེ་འཕོང་སྐྱེན་པ་ཞིག་པས་མི་བཅོ་ལྔ་མདའ་འཕངས་ཏེ་བསད་ནས། རྒྱལ་པོ་མིག་འབྱེད་ཀྱི་དྲུང་དུ་ཕྱིན་ཏེ་ཕྱག་འཚལ་ནས་གཏམ་བྱས་པས་རྒྱལ་པོ་ཡང་དགའ་ནས་བློན་པོར་བ ཅུག་གོ ། དེ་ནས་བློན་པོ་དེས་དཔུང་གི་ཚོགས་བསྡུས་ཏེ། རྒྱལ་ཕྲན་དེ་དབབ་པར་གསོལ་བ་དང་། རྒྱལ་པོས་ཀྱང་གནང་སྟེ་དེ་ཉིད་ཀྱིས་དཔུང་གིས་ཚོགས་བསྡུས་པ་ན། གཏམ་དེ་རྒྱལ་ཕྲན་དེས་ཐོས་ནས་སེམས་ཤིན་ཏུ་མི་དགའ་བར་གྱུར་པ་ལ། ཡུལ་དེ་ན་ཡོད་པའི་བྲམ་ཟེ་མ་རུངས་པ་ཞིག་ཡོད་པ་དེས་གྲོས་བྱས་ནས་རྒྱལ་པོ་མིག་འབྱེད་དེ་ཕ་མ་མ་གཏོགས་པ་གཞན་ཅི་ལ་ཡང་མི་ཆགས་ཏེ་སྦྱིན་པ་བྱེད་དོ་ཞེས་ཐོས་ནས། དེའི་མིག་སློང་སྟེ་བྱིན་ན་དམག་ཀྱང་མི་འདྲེན་པར་འགྱུར་རོ་སྨྲས་ནས། ཡུལ་དེ་ན་བྲམ་ཟེ་ལོང་བ་ཞིག་ཡོད་པ་དེ་རྒྱལ་པོའི་སྤྱན་སློང་དུ་བཏང་ངོ་། །དེའི་ཚེ་མིག་འབྱེད་ཀྱི་ཡུལ་དུ་ལྟས་ངན་པ་སྣ་ཚོགས་བྱུང་ཞིང་། བྲམ་ཟེ་ཡང་མཐར་གྱིས་ཡུལ་དེར་ཕྱིན་ནས་རྒྱལ་པོ་ལ་སྤྱན་སྩོལ་བར་གསོལ་བ་བཏབ་པས། རྒྱལ་པོ་རབ་ཏུ་དགའ་ནས་ཞག་བདུན་ནས་སྦྱིན་པར་ཁས་བླངས་ཏེ། དེའི་བར་ལ་དྲིལ་བསྒྲགས་ནས་རྒྱལ་ཕྲན་བརྒྱད་ཁྲི་བཞི་སྟོང་སྙེད་ལ་སྦྲན་ནོ། །དེར་ཐམས་ཅད་འདུས་ནས་བློན་པོ་དང་། བཙུན་མོ་དང་། ཕོ་བྲང་གི་སླས་དང་། རྒྱལ་བུ་ལྔ་བརྒྱ་སྙེད་བཅས་ཀྱིས་སྤྱན་མི་སྦྱིན་པར་གསོལ་བ་བཏབ་ཅིང་། རྒྱལ་ཚབ་ཚུལ་ཁྲིམས་བཟང་པོས་ཀྱང་། རྒྱལ་པོའི་སྤྱན་གྱི་ཚབ་ཏུ་བདག་གི་མིག་སྦྱིན་པར་གསོལ་བ་ན། རྒྱལ་པོས་རྒྱལ་ཕྲན་ལ་སོགས་པའི་འཁོར་གྱི་ཚོགས་དེ་དག་ལ། ཁམས་གསུམ་གྱི་རྒྱུད་དྲུག་ཏུ་འདོད་ཆགས་དང་། ཞེ་སྡང་དང་། གཏི་མུག་གི་དབང་གིས་རྡུལ་ཕྲ་མོ་སྙེད་ཀྱི་ལུས་དང་མིག་ཆུད་ཟོས་ན་ལན་འགའ་ཡང་སྦྱིན་པར་མ་བྱས། སངས་རྒྱས་ཀྱི་བྱང་ཆུབ་བཙལ་མ་མྱོང་བར་དེ་དག་རུལ་ཞིང་འཇིག་པར་གྱུར་པས། ད་རེས་ཤ་ཡི་མིག་འདི་བྱིན་ལ་སངས་རྒྱས་ཀྱི་རྣམ་པ་ཐམས་ཅད་མཁྱེན་པ་ཉིད་ཀྱི་སྤྱན་ཐོབ་པར་བྱའོ། །ནམ་ངའི་སྨོན་ལམ་འདི་གྲུབ་ན་ཁྱོད་ལ་ཡང་རྣམ་པར་དག་པའི་ཆོས་ཀྱི་མིག་སྦྱིན་པར་བྱའོ། །ཁྱེད་ངའི་བླ་ན་མེད་པའི་བྱང་ཆུབ་ཀྱི་སེམས་ཀྱི་བར་དུ་མ་གཅོད་ཅིག་ཅེས་བསྒོས་ནས་མི་ཞིག་བཙལ་ཏེ། དེའི་ལག་ཏུ་གྲི་བྱིན་ཏེ། ངའི་མིག་ཕྱུངས་ཤིག་ཅེས་བསྒོ་ནས། དེས་ཀྱང་ཕྱུང་སྟེ་རྒྱལ་པོའི་ལག་ཏུ་བཞག་པ་དང་། མིག་དེ་ཉིད་ཐོགས་ཏེ། བདག་གི་མིག་སྦྱིན་པ་བྱིན་པ་འདིས་མངོན་པར་རྫོགས་པར་འཚང་རྒྱ་བར་ཤོག་ཅིག གལ་ཏེ་མངོན་པར་རྫོགས་པར་འཚང་རྒྱ་ན་བྲམ་ཟེ་ལོང་བས་ངའི་མིག་ཐོབ་མ་ཐག་ཏུ་མཐོང་བར་གྱུར་ཅིག ཅེས་སྨོན་ལམ་བཏབ་སྟེ་བྲམ་ཟེའི་མིག་ཏུ་བཅུག་པས་དེའི་མོད་ལ་མཐོང་བར་གྱུར་ནས། བྲམ་ཟེས། རྒྱལ་པོའི་སྤྱན་འདིར་མཐོང་བར་གྱུར་ཏེ། མཐོང་བ་འདིས་འཚལ་གྱིས་ཡ་གཅིག་ནི་མི་འཚལ་ལོ་ཞེས་གསོལ་ཏོ། །རྒྱལ་པོས་ཁོ་བོའི་མིག་གཉིས་ཁྱོད་ལ་སྦྱིན་པར་བྱས་པས་ཡ་གཅིག་བཞག་ན་སྔར་སྨྲས་པ་དང་འགལ་ལོ་ཞེས་བསྒོ་ནས་མིག་ཡ་གཅིག་ཀྱང་སྔ་མ་བཞིན་དུ་སྨོན་ལམ་དང་བཅས་ཏེ་བཅུག་པས་བྲམ་ཟེའི་མིག་གཉིས་ཀས་མཐོང་བར་གྱུར་ཏོ། །དེའི་ཚེ་ས་གཡོས་པའི་རྐྱེན་གྱིས་བསྐུལ་ནས། ལྷ་རྣམས་སྟེང་གི་ནམ་མཁར་ལྷགས་ཏེ། ལྷ་རྫས་ཀྱི་མེ་ཏོག་དང་སྤོས་ཀྱིས་མཆོད་ནས་ལེགས་སོ་ལེགས་སོ་ཞེས་བསྟོད་དོ། །བརྒྱ་བྱིན་ཡང་དེར་འོངས་ནས་བྱང་ཆུབ་སེམས་དཔའ་ལ་ཤིན་ཏུ་སྤྱད་པར་དཀའ་བའི་ལས་འདིས་རྣམ་པར་སྨིན་པ་ཅི་ཞིག་འདོད། བྱང་ཆུབ་སེམས་དཔས། ཁམས་གསུམ་གྱི་བདེ་བ་འདོད་པ་མ་ཡིན་གྱིས། བསོད་ནམས་འདིས་མངོན་པར་བྱང་ཆུབ་ནས་སེམས་ཅན་ཐམས་ཅད་མྱ་ངན་ལས་འདས་པའི་བདེ་བ་ལ་འགོད་པའི་ཕྱིར་རོ། །བརྒྱ་བྱིན་གྱིས། འདི་ལྟར་མིག་ཕྱུང་བས་སྡུག་བསྔལ་བར་གྱུར་ན་འགྱོད་པའམ་ཁྲོ་བའི་སེམས་མ་བྱུང་ངམ། བྱང་ཆུབ་སེམས་དཔས། བདག་གི་མིག་སྦྱིན་པ་འདི་ལ་འགྱོད་པ་ཡང་མེད་ལ། བླ་ན་མེད་པའི་བྱང་ཆུབ་ཐོབ་པར་འགྱུར་ཞེ་ན་བདེན་པར་སྨྲ་བ་འདིས་བདག་གིས་མིག་གཉིས་སྔོན་བཞིན་དུ་མཐོང་བར་གྱུར་ཅིག ཅེས་སྨྲས་མ་ཐག་ཏུ་སྔར་བས་ཀྱང་གསལ་བར་གྱུར་པས་ལྷ་མི་ཐམས་ཅད་རབ་ཏུ་དགའ་བར་གྱུར་ཏོ། །དེ་ནས་རྒྱལ་པོས་བྲམ་ཟེ་དེ་ལ། ངས་མིག་བྱིན་པས་ཁྱོད་ཀྱང་མཐོང་བར་གྱུར་གྱི། ནམ་སངས་རྒྱས་པ་ན་ཡང་ཁྱོད་ལ་ཆོས་ཀྱི་མིག་སྦྱིན་པར་བྱའོ། །རིན་པོ་ཆེ་འདི་དག་ཀྱང་ཁྱེར་ལ་ཕྱིར་སོང་ཤིག ཅེས་རིན་པོ་ཆེ་ཡང་མང་དུ་བྱིན་ཏེ། དེ་ཉིད་ཕྱིར་འཁོར་བ་ན། རྒྱལ་ཕྲན་དེས་ཀྱང་བསུས་ཏེ། ཇི་ལྟར་གྱུར་པའི་གཏམ་རྒྱས་པར་བཤད་པས། དེ་ཉིད་དུ་སྙིང་གས་ཏེ་ཚེ་འཕོས་སོ། །དེའི་དུས་ཀྱི་རྒྱལ་པོ་སྤྱན་འབྱེད་ནི་ང་ཡིན་ལ། ས་ལ་ད་བར་ནི་ལྷས་བྱིན་དང་། བྲམ་ཟེ་མིག་སློང་བ་དེ་ནི་ད་ལྟར་གྱི་བྲམ་ཟེ་འདི་ཡིན་ཏེ། སྔར་ཡང་མིག་བྱིན་ད་ལྟར་གྱི་བར་དུ་ཤེས་རབ་ཀྱི་མིག་བྱིན་ཏེ། ཁྱེད་ཀྱི་ཕྱིར་སྐྱེ་བ་ཐམས་ཅད་དུ་དཀའ་བ་སྤྱད་ནས་མངོན་པར་སངས་རྒྱས་སོ། །ཁྱོད་ཀྱང་འབྱུང་བའི་ལམ་ལ་རྩོམ་པར་གྱིས་ཤིག་ཅེས་བཀའ་སྩལ་ཏོ། །འདིས་ནི་བྱང་ཆུབ་སེམས་དཔའ་དཀའ་སྤྱད་དང་བསོད་ནམས་ཀྱི་སྟོབས་རྣམས་དང་ལེགས་པར་བསླབ་པ་ལ་མི་ཉན་པའི་ཉེས་དམིགས་ཀྱང་བསྟན་པ་ཡིན་ནོ། །