གཞན་གྱི་ཆོས་བྱེད་པ་ལ་མཐུན་རྐྱེན་སྦྱར་བའི་ཕན་ཡོན་དང་སྨོན་ལམ་གྱི་ཁྱད་པར་ཡང་བསྟན་པ།

༈ ཡང་སྟོན་པ་འོད་མའི་ཚལ་ན་བཞུགས་པའི་ཚེ། ཡུལ་ཀོ་ས་ལ་ན། ཁྱིམ་བདག་དམ་ཤིང་ཙིར་ཞེས་པ་ཆེ་ཞིང་བཙན་ལ་ཕྱུག་ཅིང་ནོར་མང་བ་ཞིག་གི་ཆུང་མ་ལ། ཁྱེའུ་བལྟ་ན་སྡུག་པ་ཞིག་བཙས་ཏེ། མིང་དན་བྱི་ལ་ཞེས་པར་བཏགས། དེ་ཉིད་ཆེར་སྐྱེས་ཏེ་ཕ་ཤི་བའི་འོག་ཏུ་ཁྱིམ་གྱི་བདག་པོར་གྱུར་པ་ན། ཁང་ཁྱིམ་ཀུན་རིན་པོ་ཆེ་སྣ་བདུན་དུ་གྱུར་ཅིང་ཡོད་བྱད་ཀྱི་ཚོགས་དཔག་ཏུ་མེད་པ་དང་ལྡན་པར་གྱུར་ཏེ། དེའི་ཚེ་རྒྱལ་པོ་གསལ་རྒྱལ་གྱི་བུ་བཻཌཱུཪྱ་བྱ་བ་ཚད་ནད་ཀྱིས་ཐེབ་པ་ལ་སྨན་པ་རྣམས་ཀྱིས་ཙནྡན་གོར་ཤི་ཤའི་ལྡེ་གུས་ལུས་བཀྲུས་ན་ཕན་ཞེས་སྨྲས་པས། རྒྱལ་པོས་ཀུན་ཏུ་བཙལ་ཏེ་གསེར་སྲང་སྟོང་སྦྱིན་པར་སྨྲས་ཀྱང་སྟེར་མཁན་མ་བྱུང་ནས་ཁྱིམ་བདག་དན་བྱི་ལའི་ཁྱིམ་ན་མང་དུ་ཡོད་པར་ཐོས་ནས་རྒྱལ་པོ་རང་ཉིད་སློང་དུ་ཕྱིན་པ་ན། ཁྱིམ་བདག་གི་ནང་དུ་བསུ་བའི་ཚེ། སྒོ་དང་པོ་དངུལ་ལས་བྱས་པའི་ན ང་དུ་དངུལ་གྱི་ཁྲི་ལ་བུད་མེད་ལྟ་ན་སྡུག་པ་ཞིག་གིས་དངུལ་གྱི་སྐུད་པ་འཁལ་ཞིང་ན་ཆུང་བཟང་མོ་བཅུས་གཡོག་བྱེད་པར་མཐོང་ནས། རྒྱལ་པོས་ཁྱིམ་བདག་ལ་འདི་ཁྱོད་ཀྱི་ཆུང་མ་ཡིན་ནམ་དྲིས་པས་མ་ཡིན་ཏེ་སྒོ་སྲུང་གི་བྲན་མོའོ་སྨྲས་སོ། །ཡང་ཕྱིན་པས་སྒོ་བར་མ་བཻཌཱུཪྱའི་སྒོའི་ནང་དུ་ན་ཆུང་བཟང་མོ་སྔ་མ་བས་ཀྱང་ལྷག་པ་གཡོག་ན་ཆུང་སྔ་མ་བས་ཕྱེད་ཀྱིས་མང་བ་མཐོང་ངོ་། །ཡང་ཕྱིན་པའི་སྒོ་ནང་མ་གསེར་གྱི་སྒོའི་ནང་དུ་སྔ་མ་བས་ཀྱང་བཟང་བའི་བུད་མེད་གཅིག་གསེར་གྱི་ཁྲི་ལ་འདུག་ནས་གསེར་གྱི་ཐགས་འཐག་པ་ལ་གཡོག་སྔ་མ་ལས་ཀྱང་ཤིན་ཏུ་མང་བར་མཐོང་ནས། སྔར་ལྟར་དྲིས་ཀྱང་མ་ཡིན་ནོ། །ཞེས་ཟེར། དེ་ནས་ཁྱིམ་གྱི་ནང་དུ་ཕྱིན་པ་ན། འོག་གཞི་ཀུན་བཻཌཱུཪྱ་ལས་བྱས་པ། ཤིན་ཏུ་གསལ་བ་ཆུའི་མདོག་ལྟ་བུ་ལ་སྟེང་གི་གཟུགས་བརྙན་རྣམས་འཆར་ཞིང་གཡོ་བ་མཐོང་ནས་ཆུ་ཡིན་ནམ་སྙམ་སྟེ་རྒྱལ་པོ་འགྲོ་མ་ནུས་པ་ལ། ཁྱིམ་བདག་གི་སོར་གདུབ་འཕང་བས་གདོད་ཆུ་མ་ཡིན་པར་ཤེས་ནས་ནང་དུ་ཕྱིན་ཏེ་རིན་པོ་ཆེ་སྣ་བདུན་གྱི་ཁང་པའི་ནང་དུ་བཻཌཱུཪྱ་མཐོན་མཐིང་གི་ཁྲི་ལ་རྒྱལ་པོ་བཞུགས་སུ་གསོལ་ལོ། །ཁྱིམ་བདག་གི་ཆུང་མ་ཡང་དེ་ན་འདུག་པ་ལས་མིག་ནས་མཆི་མ་བྱུང་བ་དང་། རྒྱལ་པོས་ཅིའི་ཕྱིར་མིག་ནས་མཆི་མ་བྱུང་། ང་འོང་བ་ལ་མི་དགའ་འམ་ཅི་ཉེས་དྲིས་པས་རྒྱལ་པོ་འདིར་གཤེགས་པ་ནི་ལེགས་ཏེ་དགའ་ན། རྒྱལ་པོའི་ན་བཟའ་ལ་དུད་པའི་དྲི་མ་འདུག་པས་དེས་མཆི་མ་ཤོར་རོ་ཟེར། རྒྱལ་པོས་ཁྱེད་ཀྱི་ཁྱིམ་ན་མེ་མི་འབུད་དམ། མེ་མ་མཆིས་སོ། །འོ་ན་ཁ་ཟས་ཇི་ལྟར་གཡོ་བསམ་པ་ཙམ་གྱིས་ཁ་ཟས་རོ་བརྒྱ་དང་ལྡན་པ་འབྱུང་ངོ་། །མཚན་མོའི་མུན་པ་གང་གི་སེལ། ནོར་བུ་རིན་པོ་ཆེས་སྣང་བར་འགྱུར་ཏེ། སྒོ་བཅད་ཀྱང་སྐར་ཁུང་ནས་ནོར་བུ་རིན་པོ་ཆེའི་འོད་ཀྱིས་ཉིན་པར་དང་འདྲ་བར་སྣང་ངོ་ཟེར། དེར་རྒྱལ་པོས་ཙན་དན་བསྐུར་དགོས་གསུངས་པས་ཁྱིམ་བདག་དགའ་ནས། རྒྱལ་པོ་ཉིད་བང་མཛོད་དུ་གཤེགས་པར་གསོལ་ནས། རིན་ཆེན་སྣ་བདུན་ལ་སོགས་པ་ནོར་གྱི་ཁྱད་པར་ཐམས་ཅད་བསྟན་ནས། ཙནྡན་གྱི་ཕུང་པོའང་ཚད་མེད་པ་བསྟན་ནས་ཅི་འདོད་པ་བཞེས་ཤིག དེར་རྒྱལ་པོས་ཙནྡན་སྲང་གཉིས་བསླངས་ནས། སླར་གཤེགས་པ་དང་། ཁྱིམ་བདག་དེ་ལ་ཁྱོད་སངས་རྒྱས་མཇལ་དུ་སོངས་ཤིག་ཅེས་བསྒོས་པས། ཁྱིམ་བདག་གི་སྔར་སངས་རྒྱས་མ་ཐོས་ནས། སངས་རྒྱས་ཞེས་པ་ཅི་ལྟ་བུ་ཞེས་དྲིས་པས། རྒྱལ་པོས་སངས་རྒྱས་ཀྱི་ཡོན་ཏན་ཞིབ་པར་བཤད་པས། ཁྱིམ་བདག་དེ་ཤིན་ཏུ་དད་པའི་སེམས་སྐྱེས་ནས་སངས་རྒྱས་ཀྱི་སྤྱན་སྔར་ཕྱིན་པ་དང་། ཆོས་བསྟན་པས་རྒྱུན་དུ་ཞུགས་པ་ཐོབ་པར་གྱུར་ཏེ། རབ་ཏུ་བྱུང་བར་གསོལ་པས། སྟོན་པས་ཚུར་ཤོག་གིས་བསྙེན་པར་རྫོགས་ཏེ་འཕགས་པའི་བདེན་པ་བཞིའི་ཆོས་བསྟན་པས། སེམས་རྣམ་པར་གྲོལ་ཏེ་དགྲ་བཅོམ་པའི་གོ་འཕང་ཐོབ་བོ། །དེའི་ཚེ་ཀུན་དགའ་བོས་ལས་ཀྱི་རྒྱུ་ཞུས་པ་ན། བཀའ་སྩལ་པ། སྔོན་བསྐལ་པ་དགུ་བཅུ་རྩ་གཅིག་འདས་པའི་ཕ་རོལ་ན་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་ནས་སྐུ་མྱ་ངན་ལས་འདས་ནས་ཀྱང་བསྟན་པ་གཟུགས་བརྙན་ཙམ་དུ་གྱུར་པའི་ཚེ། དགེ་སློང་ལྔ་བརྒྱ་ཙམ་དབེན་པར་གནས་བཅས་ཏེ། ཡིད་མཐུན་པའི་དགེ་སློང་གཅིག་ལ་བསོད་སྙོམས་སློང་བར་གསོལ་པས། དེས་ཀྱང་ཁས་བླངས་ནས། རྟག་ཏུ་གྲོང་དུ་སོང་སྟེ་སྦྱིན་བདག་མང་པོ་ལ་ཆོས་བསྟན་ནས་བསོད་སྙོམས་བསླངས་སོ། །དེའི་ནང་ནས་དགེ་སློང་བཞིས་ཞག་དགུ་བཅུ་ལོན་པ་འབྲས་བུ་ཐོབ་པར་གྱུར་ཏེ། དགེ་སློང་བསོད་སྙོམས་ཀྱིས་འཚོ་བ་སྦྱོར་པ་པོ་དེ་ལ། ཁྱོད་ཀྱི་དྲིན་གྱིས་བདག་ཅག་རབ་ཏུ་བདེ་ཞིང་ཏིང་ངེ་འཛིན་ཀྱང་ཐོབ་པས་ཅི་འདོད་པའི་སྨོན་ལམ་ཐོབ་ཅིག་དང་རེ་བ་བསྐང་ངོ་ཞེས་སྨྲས་པས། དེ་ཡང་རབ་ཏུ་དགའ་སྟེ། བདག་ནི་མ་འོངས་པའི་དུས་སུ་ལྷའམ་མིར་སྐྱེས་ཀྱང་ཕྱུག་ཅིང་ལོངས་སྤྱོད་དང་ལྡན་ཏེ་ཅི་དགོས་པ་ཐམས་ཅད་ཆེད་དུ་མ་བྱས་པར་ཐམས་ཅད་རང་སྐྱེས་པར་གྱུར་ཅིག སློབ་དཔོན་འཕགས་པ་དང་ཕྲད་ནས་ཁྱོད་པས་ཀྱང་བརྒྱ་འགྱུར་སྟོང་འགྱུར་དུ་ཆོས་ཐོས་ནས། སེམས་ཡོངས་སུ་དག་ཅིང་འབྲས་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །རྒྱུ་དེས་བསྐལ་པ་དགུ་བཅུ་རྩ་གཅིག་གིས་བར་དུ་ལྷ་དང་མིའི་ནང་ནས་ཆོ་རིགས་བཙུན་པར་སྐྱེས་ཏེ། དབུལ་ཞིང་ཕོངས་པའི་རིགས་སུ་མ་སྐྱེས་སོ། །ད་ལྟ་ཡང་ང་མཐོང་བ་ཙམ་གྱིས་དད་པ་ཐོབ་པར་གྱུར་ཏོ་གསུངས། འདིས་ནི་གཞན་གྱི་ཆོས་བྱེད་པ་ལ་མཐུན་རྐྱེན་སྦྱར་བའི་ཕན་ཡོན་དང་སྨོན་ལམ་གྱི་ཁྱད་པར་ཡང་བསྟན་པ་ཡིན་ནོ། །