རྟེན་ཁྱད་འཕགས་ལ་སྙན་ཤལ་སོགས་དང་དགེ་འདུན་ལ་ན་བཟའ་ཕུལ་བའི་བསོད་ནམས་ཀྱང་བསྟན་པ།

༈ ཡང་སྟོན་པ་མཉན་ཡོད་དུ་བཞུགས་ཏེ། གྲོང་ཁྱེར་ལ་བསོད་སྙོམས་སུ་གཤེགས་པ་ན། དགོས་པའི་དབང་གི་ན་བཟའ་ཅུང་ཟད་རྡོལ་བ་ཞིག་བཞེས་ཏེ་ཕྱིར་ཕེབས་པ་ན། དེ་བྲམ་ཟེ་ཞིག་གིས་མཐོང་ནས་དད་པའི་སེམས་ཀྱིས་རང་གི་ཁྱིམ་ནས་རས་དཀར་པོ་ཞིག་ཡོད་པ་ལ་དུམ་བུ་གཅིག་བཅད་ནས། རས་ཀྱི་དུམ་བུ་འདི་ན་བཟའ་ལ་ལྷན་པར་མཛོད་ཅིག་ཅེས་ཕུལ་བ་བཅོམ་ལྡན་འདས་ཀྱིས་དགྱེས་བཞིན་དུ་བཞེས་ཏེ། བྲམ་ཟེ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་བརྒྱ་འདས་ནས་མངོན་པར་འཚང་རྒྱ་སྟེ། མཚན་ཡང་མངོན་པར་ཤེས་པ་བཟང་པོ་ཞེས་བྱ་བ་སྟེ་སྟོབས་བཅུ་རྫོགས་པར་འགྱུར་རོ་ཞེས་ལུང་བསྟན་ཏོ། །དེའི་ཚེ་ཡུལ་གྱི་སྐྱེ་བོ་རྣམས་ངོ་མཚར་དུ་གྱུར་ཏེ་སོ་སོ་ནས་རས་དཀར་པོ་བཤམ་ནས། དེ་བཞིན་གཤེགས་པའི་ན་བཟའ་རྣམ་པ་སྣ་ཚོགས་པ་བྱས་ཏེ་སངས་རྒྱས་ལ་ཕུལ་ལོ། །དེའི་ཚེ་ཀུན་དགའ་བོས་བཅོམ་ལྡན་འདས་ཀྱིས་སྔོན་དགེ་བའི་རྩ་བ་ཅི་ཞིག་མཛད་ན་ཐམས་ཅད་ཀྱིས་ན་བཟའ་མང་པོ་ཕུལ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ་སྔོན་འདས་པའི་དུས་བསྐལ་པ་གྲངས་མེད་པའི་ཕ་རོལ་ན་སངས་རྒྱས་རྣམ་པར་གཟིགས་འཇིག་རྟེན་ཏུ་བྱོན་ཏེ་དེའི་ཚེ་རྒྱལ་པོ་བན་དུ་ཞེས་བྱ་བའི་བློན་པོ་གཅིག་གིས་སངས་རྒྱས་དགེ་འདུན་དང་བཅས་པ་ཟླ་བ་གསུམ་གྱི་བར་དུ་སྤྱན་དྲངས་ནས་ཞལ་གྱིས་བཞེས་པ་དང་། དེའི་འོག་ཏུ་རྒྱལ་པོས་ཀྱང་སངས་རྒྱས་འཁོར་བཅས་ཟླ་བ་གསུམ་དུ་སྤྱན་དྲངས་པས་སྔར་བློན་པོ་ལ་ཞལ་བཞེས་ཟིན་པས་མ་གནང་བས། རྒྱལ་པོས་བློན་པོ་དེ་ལ་ཁྱོད་རེ་ཞིག་སྡོད་ཅིག ངས་སྔོན་ལ་སྤྱན་དྲང་བར་བྱའོ། །ཞེས་བསྒོ་བ་དང་། བློན་པོས་ཀྱང་། དེའི་བར་ལ་བདག་གི་ལུས་སྲོག་ཀྱང་མི་ཉེས་ཤིང་དེ་བཞིན་གཤེགས་པའང་བཞུགས་པ་དང་རྒྱལ་པོའི་ཡུལ་ཡང་བདེ་ཞིང་ཡེ་འགྲོག་མི་འབྱུང་བར་ཞལ་གྱིས་བཞེས་ཤིང་དམ་བཅའ་བར་སྤྱོད་ན་རེ་ཞིག་བསྡད་དོ་ཞུས་པས། རྒྱལ་པོས་དེ་ལྟར་མ་ནུས་ནས་ཉིན་རེས་མོས་ཀྱིས་སྤྱན་དྲངས་ཏེ་གཉིས་ཀའི་རེ་བ་བསྐངས་སོ། །དེའི་ཚེ་བློན་པོ་དེས་དེ་བཞིན་གཤེགས་པ་ལ་ཆོས་གོས་སྨད་གསུམ་ཕུལ་ནས་དགེ་སློང་གི་དགེ་འདུན་སྟོང་ཕྲག་དགུ་བཅུ་རྣམས་ལ་ཡང་ཆོས་གོས་བདུན་པ་རེ་སྦྱར་ཏེ་ཕུལ་ལོ། །དེའི་དུས་ཀྱི་བློན་པོ་དེ་ནི་ད་ལྟའི་ང་ཡིན་ཏེ། ང་ནི་སྐྱེ་བ་ཐམས་ཅད་དུ་བསོད་ནམས་བྱེད་པ་ལ་སྐྱོ་བ་མེད་པས་དེ་དག་ཐམས་ཅད་ཀྱི་རྣམ་པར་སྨིན་པ་ཡང་མྱོང་ནས་ཆུད་མ་ཟོས་སོ། །ཞེས་གསུངས། འདིས་ནི་རྟེན་ཁྱད་འཕགས་ལ་སྙན་ཤལ་སོགས་དང་དགེ་འདུན་ལ་ན་བཟའ་ཕུལ་བའི་བསོད་ནམས་ཀྱང་བསྟན་པ་ཡིན་ནོ། །