རབ་ཏུ་བྱུང་བ་རྣམས་ལ་ངན་སེམས་བསྐྱེད་པའི་རྣམ་སྨིན་དང་གུས་པར་བྱས་པའི་ཕན་ཡོན་རྣམས་བསྟན་པ།

༈ ཡང་བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་བཞུགས་སོ། །དེའི་ཚེ་ལྷས་བྱིན་གྱིས་བཅོམ་ལྡན་འདས་ལ་རྟག་ཏུ་ངན་སེམས་བསྐྱེད་ནས་དེ་བཞིན་གཤེགས་པ་མེད་པར་བྱས་ལ་ལྷ་བྱིན་ཉིད་སངས་རྒྱས་ཡིན་ནོ་ཞེས་བསྒྲགས་པའི་ཕྱིར། རྒྱལ་བུ་མ་སྐྱེས་དགྲ་ལ་ཕ་གསོད་དུ་བཅུག་ནས། སངས་རྒྱས་གསར་པ་དང་། རྒྱལ་པོ་གསར་པས་ཡུལ་སྲིད་བཅས་ན་ལེགས་སོ་ཞེས་སྨྲས་པ་དང་། རྒྱལ་བུ་མ་སྐྱེས་དགྲས་ཉན་ཏེ་ཕ་བསད་ནས་བདག་ཉིད་རྒྱལ་པོར་ཞུགས་པའི་ཚེ། ཡུལ་མི་རྣམས་དགེ་སློང་ཀུན་ལ་ངན་སེམས་བསྐྱེད་ནས་མཐོང་ཡང་མི་འདོད་པར་གྱུར་སྟེ། བསོད་སྙོམས་སློང་དུ་སོང་བ་རྣམས་ལྷུང་བཟེད་སྟོང་པར་ཕྱིར་ལོག་དགོས་པར་གྱུར་ཏེ། དེའི་ཚེ་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སེམས་ཅན་གང་ཞིག་དགེ་སློང་ངུར་སྨྲིག་གྱོན་པ་ལ་ངན་སེམས་བསྐྱེད་ན། མི་དེ་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་དང་། རང་སངས་རྒྱས་དང་། དགྲ་བཅོམ་པ་ལ་ངན་སེམས་བསྐྱེད་པ་ཡིན་པར་རིགས་པར་བྱའོ། །དེ་ལྟར་དུས་གསུམ་གྱི་འཕགས་པ་ལ་ངན་སེམས་བསྐྱེད་པས། སྡིག་པའི་ལས་ཁ་ན་མ་ཐོ་བའི་འབྲས་བུ་ཚད་མེད་པ་སྨིན་པར་འགྱུར་རོ། །དེ་ཅིའི་ཕྱིར་ཞེ་ན། ཆོས་གོས་ངུར་སྨྲིག་ནི་དུས་གསུམ་གྱི་འཕགས་པའི་རྒྱལ་མཚན་ཡིན་ཏེ་སེམས་ཅན་གང་ཞིག་སྐྲ་དང་ཁ་སྤུ་བྲེགས་ཏེ། ཁ་དོག་བསྒྱུར་བའི་གོས་གྱོན་ན། བསོད་ནམས་དཔག་ཏུ་མེད་པ་ཐོབ་པར་འགྱུར་རོ། །ཀུན་དགའ་བོ། །ང་ཡང་སྔོན་རབ་ཏུ་བྱུང་བའི་ཆོས་གོས་ཁ་དོག་བསྒྱུར་པ་གྱོན་པ་ལ་དད་པའི་སེམས་སྐྱེས་ཏེ། བསྟི་སྟང་བྱས་པས་མངོན་པར་སངས་རྒྱས་སོ། །སྔོན་འདས་པའི་དུས་བསྐལ་པ་ཚད་མེད་པ་གྲངས་མེད་པའི་ཕ་རོལ་ན། འཛམ་བུ་གླིང་འདིར་རྒྱལ་པོ་ཆེན་པོ་དེ་བྱི་ཞེས་པ་རྒྱལ་ཕྲན་བརྒྱད་ཁྲི་བཞི་སྟོང་ལ་དབང་བྱེད་པ་ཞིག་བྱུང་སྟེ། དེའི་ཚེ་འཇིག་རྟེན་ན་སངས་རྒྱས་ཀྱི་ཆོས་ནི་མེད། རང་སངས་རྒྱས་དག་གིས་སེམས་ཅན་གྱི་དོན་མཛད་དོ། །དེར་སེང་གེ་ཡི་དམ་བརྟན་པ་ཞེས་བྱ་བ་ལུས་ཀྱི་སྤུ་གསེར་གྱི་མདོག་ལྟར་འཚེར་བ། ཟས་སུ་འབྲས་བུ་དང་རྩ་བ་ཟ་ཞིང་སེམས་ཅན་ལ་མི་འཚེ་བ་ཞིག་ཡོད་པ་ལས། དེ་རྔོན་པ་ཞིག་གིས་མཐོང་ནས། འདི་བསད་ནས་པགས་པ་རྒྱལ་པོ་ལ་ཕུལ་ན་བྱ་དགའ་ཆེན་པོ་ཐོབ་པར་འགྱུར་རོ་སྙམ་དུ་བསམ་སྟེ། དུས་གཞན་ཞིག་ན་སྐྲ་བྲེགས་ཆོས་གོས་གྱོན་མདའ་གཞུ་མཆན་དུ་བཅུག་སྟེ་སོང་ནས། སེང་གེ་དེ་ཉིད་གཉིད་དུ་སོང་བ་ལ་དུག་མདས་བསྣུན་ནོ། །དེར་གཉིད་སད་ནས་རྔོན་པ་བསྙེགས་པ་དང་། ཆོས་གོས་གྱོན་པར་མཐོང་ནས། འདི་ལ་གནོད་པ་བྱས་ན་དུས་གསུམ་གྱི་འཕགས་པ་ལ་ངན་སེམས་བསྐྱེད་པ་ཡིན་ནོ་བསམ་སྟེ་གསོད་པའི་སེམས་བཏང་སྟེ་ཡ་ལ་ལ་བ་ཤ་ས་སྭཱ་ཧཱ། ཞེས་སྨྲས་ཏེ་ཚེ་ཡི་དུས་བྱས་སོ། །དེའི་ཚེ་གནམ་ས་ཀུན་གཡོས་ནས་སྤྲིན་མེད་པར་ཆར་བབ་སྟེ་ལྷ་རྣམས་ཀྱང་སྟེང་གི་ནམ་མཁའ་ལ་འོངས་ནས་མེ་ཏོག་གི་ཆར་ཕབ་ནས་སེང་གེའི་རོ་ལ་མཆོད་པ་བྱས་སོ། །དེ་ནས་རྔོན་པས་པགས་པ་བཤུས་ཏེ་རྒྱལ་པོ་ལ་ཕུལ་ནས་བྱ་དགའ་གསོལ་པ་དང་། རྒྱལ་པོས་བསམ་པ། ཡི་གེ་དང་གཙུག་ལག་ལས། དུད་འགྲོ་གང་གི་སྤུ་མདོག་གསེར་ལྟར་འདུག་ན། ངེས་པར་བྱང་ཆུབ་སེམས་དཔའ་སྐྱེས་བུ་ཆེན་པོ་ཡིན་ནོ་འབྱུང་བས། བདག་གིས་འདི་ལ་བྱ་དགའ་སྦྱིན་ན་བདག་ཀྱང་གསོད་པ་དང་ཐ་མི་དད་དོ་སྙམ་མོ། །དེར་རྔོན་པས་ཡང་ཡང་བསྐུལ་བས། རྒྱལ་པོས་ཀྱང་ཉུང་ཟད་ཅིག་བྱིན་ནས། འདི་གསོད་པའི་ཚེ་ངོ་མཚར་བའི་ལྟས་ཅི་བྱུང་དྲིས་པས། སྔར་གྱི་ཡིག་འབྲུ་བརྒྱད་པོ་དང་ལྟས་རྣམས་བཤད་པས། རྒྱལ་པོ་ཤིན་ཏུ་མི་དགའ་སྟེ་དད་པའི་སེམས་བསྐྱེད་ནས་ཡིག་འབྲུ་བརྒྱད་པོའི་དོན་ཀུན་ལ་དྲིས་ཀྱང་ཤེས་པ་མ་བྱུང་ནས། གནས་དབེན་པ་ཞིག་ན་དྲང་སྲོང་ཤ་མ་ཞེས་བྱ་བ་མཁས་པ་རིག་པ་དང་ལྡན་པ་ཞིག་ཡོད་པ་དེ། རྒྱལ་པོས་སྤྱན་དྲང་ནས་དྲིས་པས་དྲང་སྲོང་དེས། ཡ་ལ་ལ་ཞེས་པའི་དོན་ནི་སྐྲ་བྲེགས་ལ་ཆོས་གོས་ཁ་དོག་བསྒྱུར་བ་གྱོན་པ་འབའ་ཞིག་སྐྱེ་ཤི་ལས་མྱུར་དུ་ཐར་རོ་ཞེས་སོ། །བ་ཤ་ས་ཟེར་བ་ནི་སྐྲ་བྲེགས་ཏེ་ཆོས་གོས་ཁ་དོག་བསྒྱུར་བ་གྱོན་པ་ཐམས་ཅད་འཕགས་པའི་མཚན་མ་ཡིན་ཏེ། མྱ་ངན་ལས་འདས་པ་དང་ཉེའོ། །ཞེས་ཟེར་རོ། །སྭཱ་ཧཱ་ཞེས་བྱ་བའི་དོན་ནི་སྐྲ་བྲེགས་ཏེ་ཆོས་གོས་ཁ་དོག་བསྒྱུར་པ་གྱོན་ན་ལྷ་དང་མི་དང་། འཇིག་རྟེན་དང་བཅས་པ་ཐམས་ཅད་ཀྱིས་བཀུར་སྟི་བྱའོ། །ཞེས་པའི་དོན་ཏོ། །ཞེས་སྨྲས་པས། རྒྱལ་པོ་རབ་ཏུ་དགའ་བས། རྒྱལ་ཕྲན་བརྒྱད་ཁྲིི་བཞི་སྟོོང་ཀུན་བསྡུས་ནས། རིན་པོ་ཆེ་སྣ་བདུན་གྱི་ཤིང་རྟའི་ཁྲི་ལ་སེང་གེའི་པགས་པ་བཞག་སྟེ་ཐམས་ཅད་ཀྱིས་མཆོད་པར་བྱས་ཤིང་སླར་གསེར་གྱི་སྒྲོམ་དུ་བཅུག་ནས་མཆོད་རྟེན་ཡང་བྱས་སོ། །དེའི་ཚེ་མི་མང་པོ་དགེ་བར་སེམས་པ་ཐམས་ཅད་ཚེ་འཕོས་ནས་མཐོ་རིས་ཀྱི་ལྷར་སྐྱེས་སོ། །ཀུན་དགའ་བོ་དེའི་ཚེ་དེའི་དུས་ན་སེང་གེ་དེས་ཆོས་གོས་ཁ་དོག་བསྒྱུར་བ་གྱོན་པའི་མི་ལ་དགེ་བའི་སེམས་བསྐྱེད་པས། བསྐལ་པ་ཁྲི་ཕྲག་བཅུའི་བར་དུ་འཁོར་ལོས་སྒྱུར་བའི་རྒྱལ་པོ་བྱས་ནས། སེམས་ཅན་ཀུན་ལ་བདེ་བ་བྱིན་ཏེ་བསོད་ནམས་ཀྱི་ལས་རྒྱས་པར་བྱས་ནས་མངོན་པར་སངས་རྒྱས་སོ། །དེའི་དུས་ཀྱི་སེང་གེ་ཡི་དམ་བརྟན་པ་ནི་ད་ལྟར་ང་ཡིན་ནོ། །དེའི་དུས་ན་རྒྱལ་པོ་དེ་བྱིས་སེང་ལྤགས་ལ་མཆོད་པ་བྱས་པས་བསྐལ་པ་ཁྲི་ཕྲག་བཅུའི་བར་དུ་ལྷ་དང་མིའི་མཆོག་ཏུ་གྱུར་ནས། དགེ་བ་ཀུན་བྱས་པ་དེ་ནི་བྱང་ཆུབ་སེམས་དཔའ་བྱམས་པ་ཡིན་ནོ། །དེའི་དུས་ཀྱི་དྲང་སྲོང་ནི་ཤཱ་རིའི་བུ་དང་། རྔོན་པ་དེ་ནི་ལྷས་བྱིན་ཡིན་ནོ། །ཞེས་གསུངས་པས་འཁོར་རྣམས་རབ་ཏུ་དགའ་ནས་འགྱོད་ཚངས་ཀྱང་ཕུལ་ལོ། །འདིས་ནི་རབ་ཏུ་བྱུང་བ་རྣམས་ལ་ངན་སེམས་བསྐྱེད་པའི་རྣམ་སྨིན་དང་གུས་པར་བྱས་པའི་ཕན་ཡོན་རྣམས་བསྟན་པ་ཡིན་ནོ། །