བསླབ་གཞི་བསྲུང་ཞིང་གཙུག་ལག་ཁང་བཞེངས་པ་སོགས་ཀྱི་ཕན་ཡོན་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཁྱིམ་བདག་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་དེ་སེམས་ཅན་དང་ལྡན་པར་གྱུར་པ་ན། འཕགས་པ་མ་འགགས་པས་དེ་ཉིད་རང་གི་འདུལ་སྐལ་དུ་གཟིགས་ནས་ཁྱིམ་བདག་དེ་དད་པར་བྱས་ཤིང་སྐབས་ཤིག་དེའི་གམ་དུ་གཡོག་མེད་པར་གཅིག་པུར་བྱོན་པ་ན། དེས་འཕགས་པ་ལ་ཞབས་འབྲིང་མ་མཆིས་སམ་གལ་ཏེ་བདག་གི་ཆུང་མ་འདི་ལ་བུ་ཞིག་སྐྱེ་བར་གྱུར་ན་འཕགས་པ་ལ་འབུལ་བར་བགྱིའོ་ཞུས། དེ་ནས་ཟླ་དུས་ཚང་བ་དང་ཁྱེའུ་གསེར་གྱི་མདོག་ཅན་ལྟ་བས་ཆོག་མི་ཤེས་པ་ཞིག་བྱུང་སྟེ། མིང་རྫོགས་བྱེད་དུ་བཏགས་སོ། །དེ་ཆེར་སྐྱེས་པ་ན། འཕགས་པ་མ་འགགས་པས་ཕ་མ་གཉིས་ལ་སྔར་གྱི་དམ་བཅའ་དེ་དྲན་པར་བསྐུལ་ནས་བུ་བསླངས་ཏེ། གཙུག་ལག་ཁང་དུ་ཁྲིད་ནས་རབ་ཏུ་བྱུང་བ་དང་བསྙེན་པར་རྫོགས་སུ་བཅུག་སྟེ་ཆོས་བསྟན་ཅིང་། དེས་ཀྱང་བརྩོན་འགྲུས་བརྩམས་ཏེ་གནས་པ་ན་ནད་དྲག་པོས་ཐེབས་ཏེ། དེ་ཕ་མས་ཐོས་ཏེ་ནད་གཡོག་བྱ་བའི་ཕྱིར་ཁྱིམ་དུ་ཁྲིད་ཆོག་པར་ཞུས་པས། མ་འགགས་པས་མངོན་ཤེས་ཀྱིས་གཟིགས་པས། ཁྱིམ་དེ་ཉིད་དུ་དགྲ་བཅོམ་པ་ཐོབ་ཅིང་ཕ་མ་སོགས་ཁྱིམ་གྱི་མི་རྣམས་བདེན་པ་ལ་འགོད་པར་མཐོང་སྟེ་ཇི་དགའ་བར་གནང་ངོ་། །དེར་ཁྱིམ་དུ་ཁྲིད་དེ། དགེ་སློང་དེས་ཀྱང་ཁྱིམ་དེ་ན་ནད་ཀྱིས་སྐྱོ་བར་གྱུར་ནས་བརྩོན་འགྲུས་བརྩམས་པས་དགྲ་བཅོམ་པའི་གོ་འཕང་ཐོབ་སྟེ་ཕ་མ་ལ་སོགས་པའི་ཁྱིམ་གྱི་མི་རྣམས་ལ་ཆོས་བསྟན་པས་ཐམས་ཅད་ཀྱིས་རྒྱུན་ཞུགས་ཀྱི་འབྲས་བུ་ཐོབ། དགེ་སློང་རང་ཉིད་ཀྱི་སྔོན་གྱི་གནས་རྗེས་སུ་རྟོགས་པར་བྱས་པས། ཚེ་རབས་ཐམས་ཅད་དུ་མི་ནས་མིར་སྐྱེས་ཀྱང་ཐམས་ཅད་དུ་ནད་མང་བ་དང་ཚེ་ཐུང་བ་འབའ་ཞིག་ཏུ་མཐོང་ནས་ད་ནི་ཞི་བའི་དབྱིངས་སུ་འཇུག་པར་བྱའོ་སྙམ་དུ་བསམ་ནས། འབར་བ་དང་ཆར་འབབ་པ་དང་གློག་འབྱིན་པ་སོགས་ཆོ་འཕྲུལ་སྣ་ཚོགས་པ་བསྟན་ནས། ཕུང་པོ་ལྷག་མེད་ཀྱི་དབྱིངས་སུ་མྱ་ངན་ལས་འདས་སོ། །དེར་པུར་ཁྱོགས་ལ་བཞག་སྟེ་བཏེགས་ཀྱང་འདེགས་པར་མ་ནུས་ནས་འཕགས་པ་མ་འགགས་པ་ལ་ཞུས་ཤིང་དེས་མངོན་ཤེས་ཀྱིས་བརྟགས་པས་སྔོན་གྱི་སྨོན་ལམ་ལས་བྱུང་བར་རིགས་ནས། བཅོམ་ལྡན་འདས་ལ་གསོལ་པ་ན་བཅོམ་ལྡན་འདས་ཀྱིས་འཁོར་རྣམས་ལ། དགེ་སློང་དེའི་མཆོད་པའི་ལས་བྱེད་དུ་འདོང་ངོ་ཞེས་བཀའ་སྩལ་ཏེ་ཁྱིམ་བདག་དེའི་ཁྱིམ་དུ་གཤེགས་པ་ན་སྐྱེ་བོ་ཐམས་ཅད་ངོ་མཚར་དུ་གྱུར་ནས་ཕྱི་བཞིན་དུ་འབྲངས་ནས་དགེ་སློང་འདིའི་སྐུ་གདུང་གི་མཆོད་པ་བདག་ཅག་གི་བགྱིད་ཀྱིས་བཅོམ་ལྡན་འདས་འོ་བརྒྱལ་མི་འཚལ་ལོ་ཞེས་ཞུས་པ་ན། ཁྱིམ་བདག་མགོན་མེད་ཟས་སྦྱིན་ལ་གནང་ནས། དེ་ཉིད་དང་དགེ་བསྙེན་གཞན་དག་གིས་ཀྱང་བཏེགས་ཏེ་དུར་ཁྲོད་དུ་ཁྱེར་ནས་སངས་རྒྱས་འཁོར་དང་བཅས་པའང་ཕྱི་བཞིན་དུ་ཕེབས་ཏེ་བཞུས་ནས། གནས་དེར་མཆོད་རྟེན་ཀྱང་བྱས་སོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྟོན་པས་སྔོན་བསྐལ་པ་བཟང་པོ་འདིའི་ཚེ་ལོ་བཞི་ཁྲི་པའི་དུས་སུ་སངས་རྒྱས་འཁོར་བ་འཇིག་ཅེས་བྱ་བ་འཇིག་རྟེན་དུ་བྱོན་ཏེ། དེའི་ཚེ་དགེ་སློང་འདི་དེའི་གཅུང་དུ་གྱུར་ཅིང་བག་མེད་པས་འདོད་པ་ལ་ལོག་པར་གཡེམ་པ་དང་། སྲོག་གཅོད་པ་ལ་དགའ་བར་གྱུར་ཏེ་རི་དྭགས་མང་པོ་ཁ་འདོགས་པར་བྱེད་པ་ལ། བཅོམ་ལྡན་འདས་ཀྱིས་ཆོས་བསྟན་ནས་སྡིག་པའི་ལས་དེ་ལས་བཟློགས་ཏེ། སྐྱབས་སུ་འགྲོ་བ་དང་བསླབ་པའི་གཞི་རྣམས་ལ་འགོད་པར་མཛད་དོ། །དེས་ཀྱང་དགེ་འདུན་གྱི་གཙུག་ལག་ཁང་བྱས་ནས་སངས་རྒྱས་འཁོར་དང་བཅས་པ་ལ་ཡོ་བྱད་ཐམས་ཅད་ཀྱིས་བསྙེན་བཀུར་བར་བྱས་ཏེ། འཆི་ཁར་སྨོན་ལམ་བཏབ་བོ། །དེས་སྔར་སྲོག་བཅད་པས་གང་དང་གང་དུ་སྐྱེས་པ་དེར། ཚེ་ཐུང་ཞིང་ནད་མང་བར་གྱུར་ལ་གཙུག་ལག་ཁང་བཞེངས་ཤིང་མཆོད་པ་དང་སྨོན་ལམ་གྱི་དབང་གིས་གང་དུ་སྐྱེས་ཀྱང་ཕྱུག་ཅིང་ནོར་མང་བ་དང་གཟུགས་བཟང་ཞིང་ལྟ་ན་སྡུག་པར་གྱུར་ལ། ད་ལྟར་ངའི་བསྟན་པ་ལ་འབྲས་བུ་ཐོབ་པ་ཡིན་ཞིང་། མྱ་ངན་ལས་འདས་ཀྱང་འཁོར་རྣམ་བཞིས་མཆོད་པར་འགྱུར་བ་ནི། དགེ་སློང་འདི་སངས་རྒྱས་འོད་སྲུང་གི་བསྟན་པ་ལ་དགེ་སློང་ཞིག་ཏུ་གྱུར་ཏེ། དེ་ལས་ཁྱིམ་བདག་ཅིག་གི་ཁྱེའུ་རབ་ཏུ་བྱུང་སྟེ་དེས་བརྩོན་པ་བསྐྱེད་པས་དགྲ་བཅོམ་པའི་གོ་འཕང་ཐོབ་སྟེ་ཆོ་འཕྲུལ་མངོན་པར་བསྟན་ཏེ་སྐུ་གཤེགས་པ་ན། མཁན་པོ་དེས་ཕ་མ་ལ་སྦྲན་ཏེ་ཐམས་ཅད་ཀྱིས་སྐུ་གདུང་ལ་མཆོད་པ་བྱས་ཤིང་། མཁན་པོ་དེས། བདག་མ་འོངས་པ་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་ཡོན་ཏན་འདི་ལྟ་བུ་ཐོབ་སྟེ། མྱ་ངན་ལས་འདས་པ་ནའང་སངས་རྒྱས་འཁོར་རྣམ་བཞི་དང་བཅས་བྱོན་ཏེ་མཆོད་པའི་ལས་མཛད་པར་གྱུར་ཅིག་ཅེས་སྨོན་ལམ་བཏབ་པའི་དབང་གིས་གྱུར་ཏོ་གསུངས། འདིས་ནི་སྲོག་བཅད་པའི་ཉེས་དམིགས་དང་། བསླབ་གཞི་བསྲུང་ཞིང་གཙུག་ལག་ཁང་བཞེངས་པ་སོགས་ཀྱི་ཕན་ཡོན་བསྟན་པ་ཡིན་ནོ། །