བུ་མོ་ཀཱ་ཤི་མཛེས་ལྡན་མ་ཞེས་བྱ་བ་སྟོན་པའི་སྤྱན་སྔར་རབ་ཏུ་བྱུང་ཚུལ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ་གྲོང་ཁྱེར་ཝཱ་རཱ་ཎ་སཱི་ན་རྒྱལ་པོ་ཚངས་པས་བྱིན་ལ། བུ་མོ་ཀཱ་ཤི་མཛེས་ལྡན་མ་ཞེས་བྱ་བ་གཟུགས་བཟང་ཞིང་ལྟ་ན་སྡུག་པ་ཞིག་ཡོད་པ་དེའི་གྲགས་པས་ཀུན་ཏུ་ཁྱབ་པར་གྱུར་ཏེ། ཉི་འོག་གི་རྒྱལ་པོ་དྲུག་གིས་བསླངས་ཤིང་སོ་སོ་ནས་དཔུང་དང་བཅས་ཏེ་གྲོང་ཁྱེར་གྱི་མཐའ་བསྐོར་བ་ན། རྒྱལ་པོ་ཚངས་བྱིན་གྱིས་གཅིག་ལ་བྱིན་ན་གཞན་ཀུན་དང་དགྲ་ཟླར་གྱུར་པས་ཅི་བྱ་མ་འཚལ་ཏེ་སེམས་ཁོང་དུ་ཆུད་པ་ན། བུ་མོ་རང་ཉིད་ཀྱིས་ཁྱིམ་ཐབ་འདོམ་པར་བྱས་ཏེ། དེ་དག་ཐམས་ཅད་སོ་སོའི་དཔུང་བཅས་རྒྱན་གྱིས་བརྒྱན་པར་བྱས་ཏེ་འཁོད་པ་ན་བུ་མོ་དེ་ཤིང་རྟ་བཟང་པོ་ལ་ཞོན་ནས། བདག་ནི་སངས་རྒྱས་བཅོམ་ལྡན་འདས་དེ་ལ་སྐྱབས་སུ་མཆིའོ། །ཞེས་སྨྲས་ནས། ཤིང་རྟའི་ཁ་དྲང་སྲོང་སྨྲ་བའི་ལོགས་སུ་གཏད་ནས་སོང་སྟེ་སྟོན་པའི་སྤྱན་སྔར་རབ་ཏུ་བྱུང་བར་གསོལ་བས། སྐྱེ་དགུའི་བདག་མོ་ཆེན་མོ་ལ་གཏད་དེ་བསྙེན་པར་རྫོགས་ནས་དགྲ་བཅོམ་པའི་གོ་འཕང་མངོན་དུ་བྱས་སོ། །དེར་རྒྱལ་པོ་དྲུག་སོགས་སྐྱེ་བོ་ཐམས་ཅད་ངོ་མཚར་དུ་གྱུར་ནས་སྟོན་པའི་སྤྱན་སྔར་ཆོས་ཉན་ནས་རང་ཡུལ་དུ་སོང་ངོ་། །དེར་དགེ་སློང་རྣམས་ཀྱིས་ལས་ཀྱི་རྒྱུ་ཞུས་པ་ན། བཅོམ་ལྡན་འདས་ཀྱིས་སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། ཀཱ་ཤི་མཛེས་ལྡན་མ་འདི་ཁྱིམ་བདག་ཕྱུག་པོ་རྣམ་ཐོས་སྲས་ཀྱི་ནོར་ལ་འགྲན་པ་ཞིག་གི་བུ་མོར་སྐྱེས་ཏེ། དེས་ཕ་མ་ལ་གསོལ་ཏེ་གཙུག་ལག་ཁང་ཆེན་པོ་བརྩིགས་ནས། སངས་རྒྱས་འཁོར་དང་བཅས་པ་ལ་ཕུལ་ཞིང་བསྙེན་བཀུར་བྱས་ཏེ། རབ་ཏུ་བྱུང་ནས་སྡེ་སྣོད་གསུམ་ལ་བསླབ་ཅིང་ཏིང་ངེ་འཛིན་བསྒོམས་པར་བྱས་ནས་འཆི་ཁར་སྨོན་ལམ་བཏབ་པས། གང་དང་གང་དུ་སྐྱེས་པ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། གཟུགས་བཟང་ཞིང་ལྟ་ན་སྡུག་ལ་མཛེས་པ་དཔེ་ཟླ་མེད་པར་གྱུར་ཏེ། བསྟན་པ་འདི་ལ་དགྲ་བཅོམ་པའི་འབྲས་བུ་མངོན་དུ་བྱས་པར་གསུངས་སོ། །