བུ་མོ་བདེ་བྱེད་མ་ཞེས་བྱ་བ་སྟོན་པའི་སྤྱན་སྔར་རབ་ཏུ་བྱུང་ཚུལ།
༈ ཡང་སྟོན་པ་མཉན་ཡོད་དུ་བཞུགས་པའི་ཚེ། མཉན་ཡོད་ཀྱི་རྒྱལ་པོ་གསལ་རྒྱལ་དང་། ཝཱ་རཱ་ཎ་སཱིའི་རྒྱལ་པོ་ཚངས་པས་བྱིན་གཉིས་མི་མཐུན་པར་གྱུར་ནས། ཕན་ཚུན་གཡུལ་འཐབ་སྟེ་སྐྱེ་བོ་མང་པོ་ཁ་འདོགས་རེས་བྱེད་པ་ལས། ཕྱིས་ཞིག་ན་རྒྱལ་པོ་གསལ་རྒྱལ་ལ་བུ་མོ་བལྟ་བས་ཆོག་མི་ཤེས་པ་ཞིག་བྱུང་སྟེ་མིང་བདེ་བྱེད་མར་བཏགས་སོ། །དེ་དང་མཉམ་དུ་རྒྱལ་པོ་ཚངས་བྱིན་ལའང་བུ་གཟུགས་བཟང་ཞིང་ལྟ་ན་སྡུག་པ་ཞིག་བཙས་ཏེ་སོ་སོ་ནས་བཙས་སྟོན་རྒྱ་ཆེན་པོ་བྱས་པ་ན། གཏམ་དེ་ཕན་ཚུན་གཉིས་ཀས་གོ་ནས་ད་ནི་ཐབས་འདི་ལ་བརྟེན་ནས་ཕན་ཚུན་ཇི་སྲིད་འཚོ་བའི་བར་དུ་མཛའ་བར་འགྱུར་རོ་སྙམ་སྟེ་ཕོ་ཉ་བ་བཏང་སོ་སོའི་ཉེས་པ་བཤགས་ནས་དེ་གཉིས་ཆེར་སྐྱེས་པ་ན་གཉེན་བྱེད་པར་གཏམ་སྟེ་དེ་ཕྱིན་འཁྲུགས་རྩོད་ཞི་ནས་ཐམས་ཅད་བདེ་བར་གྱུར་ཏོ། །དེར་བདེ་བྱེད་མ་ཆེར་སྐྱེས་ནས་སངས་རྒྱས་ལ་དད་པ་རྙེད་དེ་བསླབ་གཞི་བླངས་ཤིང་། སྦྱིན་པ་དག་སྦྱིན་བསོད་ནམས་དག་བྱེད་དེ། རྒྱུན་མི་ཆད་པར་ཆོས་ཉན་ལ་ཕྱིན་པས་ཕྱིར་མི་འོང་བའི་འབྲས་བུ་མངོན་དུ་བྱས་ཤིང་རྫུ་འཕྲུལ་ཡང་གྲུབ་བོ། །དེ་ནས་ཕ་མ་གཉིས་ཀྱི་མདུན་དུ་རྫུ་འཕྲུལ་གྱི་བཀོད་པ་བསྟན་ནས། བདག་གིས་ཆོས་འདི་ལྟ་བུ་ཐོབ་པས་ཁྱིམ་དུ་གནས་པའི་སྐབས་མེད་ཀྱིས་རབ་ཏུ་བྱུང་བར་གསོལ་པ་ན། ཕ་མས་བདག་ཅག་གིས་སྔར་བཙས་མ་ཐག་པ་ནས་གཞན་ལ་བྱིན་ཟིན་པས་དབང་མེད་ཀྱི། དེ་དག་དང་ཕྱིས་འཁོན་པར་མི་འགྱུར་བར་བྱས་ལ་བག་མ་ལེན་སར་འོངས་ནས་ཁྱོད་ཉིད་ཀྱི་ཁྱིམ་ཐབ་ལ་གསོལ་བ་ཐོབ་ལ་རབ་ཏུ་འབྱུང་བར་གྱིས་ཤིག་ཅེས་སྨྲས་ནས། རྒྱལ་པོ་གསལ་རྒྱལ་གྱི་ཚངས་བྱིན་ལ་ཕོ་ཉ་བཏང་ནས། རྒྱལ་པོ་ཚངས་བྱིན་གྱི་བུ་འབྱོར་པ་ཆེན་པོ་དང་རྒྱལ་པོ་ཆེའི་མཐུ་དཔུང་དང་བཅས་ཏེ་ཕྱིན་པ་ན། བུ་མོ་དེ་སྟེང་གི་བར་སྣང་ལ་འཕགས་ཏེ་འབར་བ་དང་ལྷམ་མེར་འདུག་པ་སོགས་ཀྱི་ཆོ་འཕྲུལ་བསྟན་པ་དང་། ཁྱེའུ་དེས་བསམ་པ། འདི་ལྟ་བུའི་ཡོན་ཏན་དག་ཐོབ་པ་ཡིན་ན་འདོད་པ་ལས་ལོངས་སྤྱོད་པར་ག་ལ་འགྱུར་སྙམ་དུ་བསམ་ནས་ཅི་དགའ་བར་གནང་བས། བདེ་བྱེད་མ་རྒྱལ་བུ་རྒྱལ་བྱེད་ཀྱི་ཚལ་དུ་སོང་ནས་སྟོན་པའི་སྤྱན་སྔར་རབ་ཏུ་བྱུང་བར་གསོལ་བས། སྐྱེ་དགུའི་བདག་མོ་ལ་གཏད་ནས་རབ་ཏུ་བྱུང་ཞིང་བསྙེན་པར་རྫོགས་པས་དགྲ་བཅོམ་པའི་གོ་འཕང་མངོན་དུ་བྱས་སོ། །དེའི་ཚེ་རྒྱལ་བུ་དེས་ཀྱང་། བུད་མེད་ཀྱི་འདི་ལྟ་བུའི་ཆོས་རྟོགས་པར་གྱུར་ན་བདག་ཀྱང་ཅིའི་ཕྱིར་རབ་ཏུ་མི་འབྱུང་སྙམ་དུ་བསམ་ནས་ཕ་མ་ལ་གནང་བ་ཞུས་ནས་སྟོན་པའི་སྤྱན་སྔར་རབ་ཏུ་བྱུང་བས་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །དེའི་ཚེ་དགེ་སློང་དག་གིས་དེ་གཉིས་ཀྱི་ལས་ཀྱི་རྒྱུ་ཞུས་པ་ན། བཅོམ་ལྡན་འདས་ཀྱིས་སྔོན་སངས་རྒྱས་འོད་སྲུང་འཇིག་རྟེན་ན་བྱོན་པའི་ཚེ་འདི་གཉིས་ཡུལ་ཝཱ་རཱ་ཎ་སཱི་ན་ཁྱིམ་བདག་ཕྱུག་པོ་བཟའ་མི་གཉིས་སུ་གྱུར་ཏེ། དེ་གཉིས་ལ་བུ་ཚ་མེད་པས་ཤི་ནས་ནོར་རྣམས་རྒྱལ་པོ་ལ་དབང་བར་འགྱུར་བས། ད་ལྟ་ནས་འཇིག་རྟེན་ཕ་རོལ་དུ་བསྐྱལ་བར་བྱའོ་ཞེས་སྨྲས་ཏེ། གཙུག་ལག་ཁང་བརྩིགས་ནས་སངས་རྒྱས་འཁོར་དང་བཅས་པ་ལ་ཕུལ་ཏེ་ཡོ་བྱད་ཐམས་ཅད་ཀྱི་བསྙེན་བཀུར་བྱས་ཤིང་ཕྱིས་གཉིས་ཀ་རབ་ཏུ་བྱུང་ནས་ཚེ་གཅིག་ཚངས་པར་སྤྱོད་པ་སྤྱད་ཀྱང་ཡོན་ཏན་གྱི་ཁྱད་པར་གང་ཡང་མ་ཐོབ་ནས། དེ་གཉིས་ཀྱིིས་འཆི་ཁར་སྨོན་ལམ་ཡང་དག་པར་བཏབ་པས། ཚེ་རབས་ཐམས་ཅད་དུ་གཟུགས་བཟང་ཞིང་འབྱོར་པ་དང་ལྡན་པར་སྐྱེས་ལ། ད་རེས་ཀྱི་བསྟན་པ་འདི་ལ་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་དུ་བྱས་སོ་གསུངས།