ཆོས་བཞིན་དུ་ཞལ་ཏ་བགྱིས་པ་དང་དཀོན་མཆོག་མཆོད་པའི་ཕན་ཡོན་སོགས་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་ཁྱིམ་བདག་ཕྱུག་པོ་རྣམ་སྲས་ཀྱི་ནོར་ལ་འགྲན་པ་ཞིག་གི་ཆུང་མ་དེ་སེམས་ཅན་དང་ལྡན་པར་གྱུར་པ་ན། འཕགས་པ་མ་འགགས་པས་དེ་ཉིད་རང་གི་འདུལ་སྐལ་དུ་གཟིགས་ནས། གཡོག་མེད་པར་ཁྱིམ་བདག་དེའི་ཁྱིམ་དུ་བྱོན་པས། ཁྱིམ་བདག་དེས་བདག་གི་མཆིས་འབྲང་འདི་ལ། གལ་ཏེ་ཁྱེའུ་ཞིག་བཙས་ན་འཕགས་པའི་ཞབས་འབྲིང་དུ་འབུལ་ལོ་ཞུས། དེ་ནས་ཟླ་དུས་ཚང་བ་ན། ཁྱེའུ་གཟུགས་བྱད་ལྟ་ན་སྡུག་པ་ལུས་ལ་སྣ་མའི་མེ་ཏོག་གི་དྲི་ཞིམ་བྲོ་བ་ཞིག་བཙས་ཏེ། དེ་ཉིད་སྔར་མངལ་དུ་ཞུགས་པ་དང་ཕྱིས་བཙས་པའི་དུས་གཉིས་ཀར་དེའི་ཁྱིམ་དུ་སྣ་མའི་མེ་ཏོག་གི་ཆར་ཡང་འབབ་པར་གྱུར་པས་མིང་སྣ་མའི་མེ་ཏོག་ཏུ་བཏགས། དེ་ཆེར་སྐྱེས་པ་ན་ཡིག་རྩིས་དང་བརྟག་པ་བརྒྱད་སོགས་ལ་ཤིན་ཏུ་བྱང་བར་གྱུར་ཅིང་། དེར་འཕགས་པ་མ་འགགས་པས་སྔར་གྱི་དམ་བཅའ་དྲན་པར་བསྐུལ་ཏེ། ཕ་མ་གཉིས་ལ་བསླངས་ནས་གཙུང་ལག་ཁང་དུ་ཁྲིད་དེ། རབ་ཏུ་བྱུང་བ་དང་བསྙེན་པར་རྫོགས་པར་བྱས་ནས་ལུང་ཕོག་ཅིང་། དེས་ཀྱང་བརྩོན་པས་དགྲ་བཅོམ་པའི་གོ་འཕང་ཐོབ་སྟེ། དེ་ཡང་རྫུ་འཕྲུལ་དང་མཐུ་ཆེ་ཞིང་། བསམ་གཏན་དང་རྣམ་ཐར་སོགས་ཀྱི་ཏིང་ངེ་འཛིན་ལ་སྙོམས་པར་འཇུག་པ་དང་ལྡང་བ་ལ་མྱུར་ཏེ། ཁབ་ལན་རེ་འཛུགས་པའི་ཡུན་ཙམ་ལ་ཡང་ཏིང་ངེ་འཛིན་གྱི་སྒོ་དུ་མ་ལ་འཇུག་ཅིང་ལྡང་བར་བྱེད་དོ། །དེ་ནས་ཕྱིས་ཞིག་ན་སྣ་མའི་མེ་ཏོག་དེས་བསམ་པ། བདག་གིས་བཅོམ་ལྡན་འདས་ཀྱི་བཀའ་དྲིན་བསབ་པར་བྱས་ཏེ། སངས་རྒྱས་འཇིག་རྟེན་དུ་བྱོན་པ་ནི་སེམས་ཅན་ལ་ཕན་པའི་དོན་དུ་ཟད་ཀྱི། བདག་གིས་ཀྱང་སེམས་ཅན་ལ་ཕན་པར་བྱའོ་སྙམ་སྟེ། མངོན་ཤེས་ཀྱིས་བརྟགས་པས་ཐོག་མར་རང་གི་ཕ་མ་གཉིས་གདུལ་བར་མཐོང་ནས། རྒྱལ་བུ་རྒྱལ་བྱེད་ཀྱི་ཚལ་ནས་མི་སྣང་བར་གྱུར་ཏེ། རང་གི་ཁྱིམ་དུ་ཕ་མ་གཉིས་ཀྱི་མདུན་ལོགས་ལས་ས་བརྟོལ་ཏེ་བྱང་ནས་སྟེང་གི་ནམ་མཁའ་ལ་འདུག་སྟེ། འབར་བ་ལ་སོགས་པའི་ཆོ་འཕྲུལ་སྣ་ཚོགས་པ་བསྟན་ནས་སྟན་ལ་བབས་ཏེ། ཆོས་བསྟན་པས་ཕ་མ་འཁོར་དང་བཅས་པ་སྟན་དེ་ཉིད་དུ་འཁོད་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ནས་སྐྱབས་སུ་འགྲོ་བ་དང་། བསླབ་པའི་གཞི་རྣམས་ལ་གནས་པར་བྱས་ཏེ། སྦྱིན་པ་དག་སྦྱིན་ཞིང་བསོད་ནམས་དག་བྱེད་པར་གྱུར་ཏོ། །དེར་དགེ་སློང་རྣམས་ཀྱིས་བཅོམ་ལྡན་འདས་ལ་དེའི་ལས་ཀྱི་རྒྱུ་ཞུས་པས། དེ་ནི་སྨོན་ལམ་གྱི་དབང་གིས་ཏེ། སྔོན་སངས་རྒྱས་འོང་སྲུང་འཇིག་རྟེན་དུ་བྱོན་པའི་ཚེ། ཡུལ་ཝཱ་རཱ་ཎ་སཱིའི་ཁྱིམ་བདག་ཕྱུག་པོ་ཞིག་གི་ཁྱེའུ་གྱུར་ཏེ་དེ་ཆེར་སྐྱེས་པ་ན་སངས་རྒྱས་ཀྱི་བསྟན་པ་ལ་དད་པས་རབ་ཏུ་བྱུང་ཞིང་། སྡེ་སྣོད་གསུམ་ལ་བསླབས་པས་རིགས་པ་དང་གྲོལ་བའི་སྤོབས་པ་ཅན་དུ་གྱུར་ནས། ཕ་མ་གཉིས་ཀྱང་དད་པ་ཕུན་སུམ་ཚོགས་པ་ལ་བཀོད་དེ་སྐྱབས་འགྲོ་དང་བསླབ་པའི་གཞི་རྣམས་ཀྱང་བྱིན་ནས། བསོད་ནམས་ཀྱི་ལས་ལ་བསྐུལ་ལོ། །ཕྱིས་ཞིག་ན་དེས་བསམ་པ་བདག་གི་ཐོས་པའི་སྒོ་ནས་བྱ་བ་གང་ཡིན་པ་དེ་ནི་བྱས་ཟིན་གྱིས། ད་ནི་བདག་གིས་དགེ་འདུན་གྱི་ཞལ་ཏ་བྱའོ་སྙམ་ནས། ཕ་མ་གཉིས་དང་བྲམ་ཟེ་དང་ཁྱིམ་བདག་དད་པ་ཅན་གཞན་དག་ལ་བསྐུལ་ཏེ། དགེ་འདུན་རྣམས་ལ་ཁ་ཟས་རྣམ་པ་སྣ་ཚོགས་པ་དང་གོས་དང་མལ་སྟན་ན་བའི་གསོས་སྨན་གྱི་རིགས་དང་ཁབ་ཀྱང་ཕུལ་ལོ། །དེ་བཞིན་དུ་ད བུ་སྐྲ་དང་སེན་མོའི་མཆོད་རྟེན་རྣམས་ལ་ཏིལ་མར་དང་སྤོས་ཀྱིས་བྱུག་པ་དང་། མར་མེ་དང་སྣ་མའི་མེ་ཏོག་ཕྲེང་བ་སོགས་ཀྱིས་མཆོད་ཅིང་། དགེ་བའི་རྩ་བ་དེས། གང་དུ་སྐྱེས་ཀྱང་རིགས་མཐོ་བར་སྐྱེས་ཏེ་ཕྱུག་ཅིང་ལོངས་སྤྱོད་དང་ལྡན་པ་དང་། ལུས་ལ་སྣ་མའི་དྲི་བྲོ་ཞིང་ཁྱིམ་དུ་སྣ་མའི་མེ་ཏོག་གིི་ཆར་འབབ་པ་དང་། སངས་རྒྱས་ཤཱཀྱ་ཐུབ་པ་མཉེས་པར་བྱས་ནས། བསྟན་པ་ལ་རབ་ཏུ་བྱུང་ཞིང་དགྲ་བཅོམ་པ་ཐོབ་སྟེ་ཤེས་རབ་རྣོ་བ་དང་སྙོམས་འཇུག་གྲུབ་སྟེ་ཁབ་ལན་རེ་འཛུགས་པའི་ཡུན་ཙམ་ལའང་ཏིང་ངེ་འཛིན་གཞན་དང་གཞན་ལ་འཇུག་ཅིང་ལྡང་བར་གྱུར་ཅིག་ཅེས་སྨོན་ལམ་དུ་གདབ་ཅིང་། ཕ་མ་གཉིས་ཀྱིས་ཀྱང་། ཁྱོད་ཁོ་ན་བདག་གཉིས་ཀྱིས་བུར་གྱུར་ཅིང་ཁྱོད་ལ་བརྟེན་ཏེ་སངས་རྒྱས་བཅོམ་ལྡན་འདས་མཉེས་པར་བྱེད་པར་གྱུར་ཅིག་ཅེས་སྨོན་ལམ་བཏབ་པ་སྟེ། དེའི་དུས་ཀྱི་དགེ་སློང་དེ་ནི་སྣ་མའི་མེ་ཏོག་དང་། དེ་དུས་ཀྱི་ཕ་མ་གཉིས་པོའང་ད་ལྟའི་ཕ་མ་གཉིས་ཏེ་ཇི་ལྟར་སྨོན་པ་བཞིན་གྲུབ་བོ་གསུངས། འདིས་ཀྱང་ཆོས་བཞིན་དུ་ཞལ་ཏ་བགྱིས་པ་དང་དཀོན་མཆོག་མཆོད་པའི་ཕན་ཡོན་སོགས་བསྟན་པ་ཡིན་ནོ། །