བུ་མོ་འདུས་མོ་དང་གཞུང་སྨྲ་བ་རེའུ་ཁྱེའུ་ཀཱ་ཏྱ་ན་གསུམ་ཆར་གྱི་སྨོན་ལམ་བཞིན་དུ་འབྲས་བུ་མངོན་དུ་བྱས་ཚུལ།
༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། ཡུལ་ཏཀྵཱ་ཤཱི་ལ་ན། རྒྱལ་པོ་པདྨའི་སྙིང་པོ་ཅན་གྱི་བུ་མོ་འདུས་མོ་ཞེས་བྱ་བ་གཟུགས་བཟང་ཞིང་ལྟ་ན་སྡུག་པ། ཤེས་རབ་ཕུལ་དུ་གྱུར་པས་གཞུང་སྨྲ་བ་ཐམས་ཅད་ཚར་གཅོད་པ་ལ་ཐོགས་པ་མེད་པ་ཞིག་ཡོད་པ་དེས། རང་གི་ཕ་ལ་སུས་གཞུང་བརྩད་པས་བདག་ཐུབ་པར་ནུས་པ་དེ་ལ་བདག་སྩོལ་ཅིག་ཅེས་གསོལ་ཞིང་། ཡབ་རྒྱལ་པོས་ཀྱང་དེ་ལྟར་བསྒྲགས་པས། ཕྱོགས་ཐ་དག་ནས་གཞུང་སྨྲ་བ་རྣམས་འདུས་ཏེ་བརྩད་ཀྱང་ཐམས་ཅད་བུ་མོ་དེས་ཚར་བཅད་པར་བྱས་སོ། །དེའི་ཚེ་ལྷོོ་ཕྱོགས་ན་གཞུང་སྨྲ་བ་རེའུ་ཞེས་བྱ་བ་བསྟན་བཅོས་ཐམས་ཅད་ཁོང་དུ་ཆུད་ཅིང་གཟུགས་བྱད་བཟང་ལ་ལྟ་བས་ཆོག་མི་ཤེས་པ་ཞིག་ཡོད་པ་དེ་དེར་ཕྱིན་པ་ན། བུ་མོ་དེས་མཐོང་མ་ཐག་ཏུ་ཡིད་དབང་མེད་དུ་ཕྲོགས་ཏེ་བདག་གི་ཁྱིམ་ཐབ་འདི་འདྲ་བ་གཞན་གང་ནས་ཀྱང་མི་རྙེད་པས་འདི་འབའ་ཞིག་ཁྱིམ་ཐབ་ཏུ་དགུག་པར་བྱའོ་སྙམ་ནས། བརྩད་པ་ན་བདག་ཉིད་ཐུབ་པར་བྱས་སོ། །དེ་ནས་རྒྱལ་པོ་ཡང་མགུ་ནས་དེ་ལ་བྱིན་ཏེ་འབྱོར་པ་ཆེན་པོ་དང་ལྡན་པར་བྱས་སོ། །དེ་ནས་དེ་གཉིས་འདུས་པར་གྱུར་པ་ལས། ནམ་ཞིག་ན་ཁྱེའུ་ལྟ་ན་སྡུག་པ་ཞིག་བཙས་ཏེ་མིང་འདུས་པའི་ཀཱཏྱ་ན་ཞེས་བྱ་བར་བཏགས་སོ། །དེ་ཆེར་སྐྱེས་ནས་རིགས་པའི་གནས་བཅོ་བརྒྱད་ལ་བྱང་བར་བྱས་ཤིང་ལོ་བཅུ་དྲུག་ལོན་པ་ན་བསྟན་བཅོས་ཐམས་ཅད་རྟོགས་ཏེ། གཞུང་སྨྲ་བ་ཐམས་ཅད་ཚར་བཅད་ནས་འཛམ་བུའི་གླིང་ན་བདག་དང་མཉམ་པ་ཡང་མེད་ན་ལྷག་པ་ལྟ་ཅི་སྨོས་སྙམ་དུ་སྙེམས་པས་སྐྱེ་བོ་ཕལ་མོ་ཆེ་ཁྱད་དུ་གསོད་པར་བྱེད་པ་ན། དགེ་བསྙེན་ཞིག་གིས་དེའི་དྲེགས་པ་གཞོམ་པའི་ཕྱིར། སངས་རྒྱས་བཅོམ་ལྡན་འདས་ཀྱི་བསྔགས་པ་བརྗོད་པ་ན། དེ་སངས་རྒྱས་ཀྱི་མཚན་ཐོས་པ་ཙམ་གྱིས་དགའ་བ་ཆེར་སྐྱེས་ཏེ་ཕ་མ་ལ་གསོལ་ཞིང་། ཕ་མས་ཀྱང་ཁྱིམ་གྱི་ལོངས་སྤྱོད་མཐའ་དག་སྦྱིན་པ་དང་བསོད་ནམས་ཀྱི་ཞིང་དུ་བཏང་ནས། གསུམ་ཀ་ཡུལ་དབུས་སུ་དོང་སྟེ། རྒྱལ་བྱེད་ཀྱི་ཚལ་དུ་ཞུགས་པ་དང་། རྒྱང་མ་ནས་བཅོམ་ལྡན་འདས་ཀྱི་མཚན་དཔེའི་སྐུ་མཆོག་མཐོང་བ་ན། དགེ་སློང་བསམ་གཏན་ལ་ལོ་བཅུ་གཉིས་སུ་གོམས་པར་བྱས་པ་བས་ཀྱང་ཆེས་ཁྱད་པར་དུ་འཕགས་པའི་དགའ་བ་དང་བདེ་བ་སྐྱེས་དེ་དྲུང་དུ་ཕྱིན་ནས་ཞབས་ལ་ཕྱག་བྱས་ཏེ་འཁོད་པ་དང་། བཅོམ་ལྡན་འདས་ཀྱིས་ཀྱང་དེ་རྣམས་ཀྱི་བསམ་པ་དང་བག་ལ་ཉལ་དང་ཁམས་དང་རང་བཞིན་ཐུགས་སུ་ཆུད་ནས་དེ་དག་དང་མཐུན་པར་ཆོས་བསྟན་པས། དེ་རྣམས་སྟན་དེ་ཉིད་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་ཅིང་། ཀུན་གྱིས་རབ་ཏུ་བྱུང་བར་གསོལ་པ་དང་སྟོན་པས་ཚུར་ཤོག་གིས་གཉིས་པོ་བསྙེན་པ་རྫོགས་ཤིང་འདུས་མོ་ཡང་སྐྱེ་དགུའི་བདག་མོ་ཆེན་མོ་ལ་གཏད་དེ་བསྙེན་པར་རྫོགས་ནས། གསུམ་ཆར་གྱིས་བརྩོན་འགྲུས་བརྩམས་པས་དགྲ་བཅོམ་པའི་གོ་འཕང་ཐོབ་བོ། །དེའི་ཚེ་དགེ་སློང་རྣམས་ངོ་མཚར་དུ་གྱུར་ནས་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། བྲམ་ཟེའི་ཁྱེའུ་ཞིག་བསྟན་པ་ལ་དད་པ་རྙེད་ནས་རབ་ཏུ་བྱུང་ཞིང་དགེ་སློང་སྡེ་སྣོད་གསུམ་པ་ཆོས་སྨྲ་བ་པོར་གྱུར་ཏེ། དེས་རང་གི་ཕ་མ་གཉིས་དད་པ་ཕུན་སུམ་ཚོགས་པ་ལ་བཀོད་དེ་སྐྱབས་སུ་འགྲོ་བ་དང་བསླབ་པའི་གཞི་རྣམས་ལ་གནས་པར་བྱས་ནས། ཕྱིས་ཞིག་ན་དགེ་སློང་དེས་དགེ་འདུན་གྱི་ཞལ་ཏ་བ་བགྱིས་ཏེ། རང་གི་ཕ་མ་དང་སྦྱིན་བདག་གཞན་དག་ལ་ཡང་བསྐུལ་ནས། སངས་རྒྱས་འཁོར་དང་བཅས་པ་ལ་བསྙེན་བཀུར་ཞིང་། དབུ་སྐྲ་དང་སེན་མོའི་མཆོད་རྟེན་རྣམས་ལའང་བཀུར་སྟི་བྱས་ནས་སྨོན་ལམ་བཏབ་སྟེ། དེ་གང་ལས་རབ་ཏུ་བྱུང་བའི་མཁན་པོ་དེས་ནི་ལོ་བཅུ་དྲུག་ལོན་པ་ན་བསྟན་བཅོས་ཐམས་ཅད་རྟོགས་ནས་གཞུང་སྨྲ་བ་ཐམས་ཅད་ཚར་བཅད་ཅིང་། དེའི་ཕ་མ་གཉིས་ཀྱང་གཞུང་སྨྲ་བའི་མཆོག་ཏུ་གྱུར་ནསགཞུང་སྨྲ་བ་ཐམས་ཅད་ཚར་བཅད་པ་ཞིག་ཡིན་པས། མ་འོངས་པ་ན་བདག་ཀྱང་ཚུལ་དེ་དང་མཐུན་པར་གྱུར་ཏེ། སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ཞིང་དགྲ་བཅོམ་པ་ཐོབ་པར་གྱུར་ཅིག་ཅེས་བྱས་ལ། དེའི་ཕ་མ་གཉིས་ཀྱིས་ཀྱང་། དེའི་ཚེ་བདག་ཅག་གཉིས་ཀྱང་ཁྱོད་ཀྱི་ཕ་མ་དང་གཞུང་སྨྲ་བའི་མཆོག་ཏུ་གྱུར་ཅིང་ཁྱོད་ལ་བསྟེན་ནས་སངས་རྒྱས་མཉེས་པ་དང་ཆོས་ཐོས་ནས་དགྲ་བཅོམ་པའི་གོ་འཕང་མངོན་དུ་བྱེད་པར་གྱུར་ཅིག་ཅེས་སྨོན་ལམ་བགྱིས་པས་ད་ལྟ་གསུམ་ཆར་གྱིས་སྨོན་པ་བཞིན་དུ་འབྲས་བུ་མངོན་དུ་བྱས་པར་གསུངས་སོ། །