ངག་གི་ཉེས་པར་སྤྱོད་པའི་འབྲས་བུ་དང་ཚངས་སྤྱོད་ཀྱི་ཕན་ཡོན་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་ཁྱིམ་བདག་གཅིག་ལ་བུ་འཕྱེ་བོ་ཞིག་ཡོད་དེ་དེ་ཆེར་སྐྱེས་པ་ན་ཚེམ་བུ་བྱེད་པ་ལ་ཤིན་ཏུ་མཁས་པར་གྱུར་ནས་ལས་དེས་འཚོ་བ་ལ། དུས་ནམ་ཞིག་གི་ཚེ་ཁྱིམ་བདག་གཞན་ཞིག་གི་ཆུང་མས་ཞྭ་གོས་སོགས་གཞན་ལས་གཡར་ཏེ་དུས་སྟོན་ཞིག་ཏུ་ཕྱིན་པ་ན་དེའི་ཞྭ་སྟོར་བས་ཁྱིམ་ཐབ་གཞན་ཞིག་ཏུ་སོང་བའི་ཤུལ་དུ་ཚེམ་བུ་མཁན་དེ་ནང་དུ་བླངས་ནས་ཞྭ་དེ་དྲུབ་ཏུ་བཅུག་པ་ན་ཁྱིམ་ཐབ་དེ་འོང་ནས་སྒོ་བརྡུང་བ་ན། ཆུང་མ་དེ་ཤིན་ཏུ་སྐྲག་ནས་ཚེམ་བུ་མཁན་དེ་གཟེབ་གཅིག་གི་ནང་དུ་བཅུག་སྟེ་ཁ་རྒྱས་བཏབ་ནས་ཕུག་ཅིག་ཏུ་བཞག་གོ །དེ་ནུབ་རྐུན་པོ་ཞིག་བྱུང་ནས། ཁྱིམ་ཕུག་སྟེ་ནང་དུ་ཉུལ་བ་དང་། གཟེབ་དེ་ཟིན་ནས་ཁྱེར་ཏེ་ཕྱིན་པ་ན། ལམ་དུ་ཟླ་བའང་ཤར་བར་གྱུར་ཏེ། དེའི་ཚེ་གཟེབ་ཀྱི་ནང་ནས་འཕྱེ་བོས་གཅིན་ཤོར་ཏེ་ཕྱི་རོལ་དུ་ཟག་པ་ན། འདིའི་ནང་དུ་ནོར་བུ་ཆུ་ཤེལ་ཡོད་ངེས་བསམ་སྟེ་ཤིན་ཏུ་དགའ་ནས་ནགས་ཁྲོད་དུ་ཁྱེར་ཏེ་མི་རྒོད་གཞན་རྣམས་ཀྱི་སར་ཕྱིན་ནས་གཏམ་སྨྲས་ཏེ་གཟེབ་ཀྱི་ཁ་ཕྱེ་བ་ན་འཕྱེ་བོ་ཞིག་བཅུག་པར་མཐོང་ནས། མི་རྒོད་གཞན་རྣམས་ཀྱིས་དཔྱས་པས། དེ་ཁྲོས་པར་གྱུར་ཏེ་ད་ནི་མི་འདི་གནོད་སྦྱིན་ལ་མཆོད་པར་བྱའོ་ཞེས་སྨྲས་ཏེ། གནོད་སྦྱིན་དེའི་མདུན་དུ་སྦྱིན་སྲེག་གི་ཐབ་དང་རྫས་བསགས་ནས། རལ་གྲི་རྣོན་པོ་ཐོགས་ཏེ་མི་དེ་ཉིད་མཆོད་པར་རྩོམ་པ་ན། མི་དེས་ཀྱང་དེ་ལྟར་ཤེས་ནས་རབ་ཏུ་འཇིགས་ཤིང་སངས་རྒྱས་བཅོམ་ལྡན་འདས་ལ་སྐྱབས་སུ་གསོལ་པས། བཅོམ་ལྡན་འདས་ཀྱིས་ཀྱང་དེ་དག་འདུལ་བའི་དུས་ལ་བབ་པར་དགོངས་ནས་ལྷའི་ཆ་ལུགས་སུ་སྤྲུལ་ཏེ་དེར་བཞུགས་པ་ན། མི་རྒོད་ལྔ་བརྒྱ་པོས་བདག་ཅག་ལ་ལྷའི་གཟུགས་དངོས་སུ་བསྟན་ཏོ་སྙམ་དུ་སེམས་ཏེ་ཐལ་མོ་སྦྱར་ཏེ་བཀའ་ཅི་བ སྩལ་ཞེས་གསོལ་པ་དང་། ང་ལ་མིས་མཆོད་མི་དགོས་ཀྱི་འདི་ཐོངས་ལ་ཆོས་ཉོན་ཅིག་ཅེས་བཀའ་སྩལ་ཏེ་དེ་དག་གི་ཁམས་དབང་བསམ་པ་དང་མཐུན་པའི་ཆོས་བསྟན་པས་མི་རྒོད་ལྔ་བརྒྱ་པོ་སྟན་དེ་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་ཅིང་། འཕྱེ་བོ་དེས་ཀྱང་ཕྱིར་མི་འོང་བའི་འབྲས་བུ་མངོན་དུ་བྱས་སོ། །དེ་ནས་དེ་དག་གིས་བདེན་པ་མཐོང་བ་དང་ལྷའི་ཆ་ལུགས་དེ་མི་སྣང་བར་མཛད་ནས་བཅོམ་ལྡན་འདས་ཀྱི་སྐུ་དངོས་སུ་བསྟན་པས། དེ་དག་ལྷག་པར་ཡང་དགའ་བར་གྱུར་ནས་རབ་ཏུ་བྱུང་བར་གསོལ་པ་དང་། སྟོན་པས་མི་རྒོད་ལྔ་བརྒྱ་པོ་ཚུར་ཤོག་གིས་བསྙེན་པར་རྫོགས་ཤིང་ལུང་ཕོག་སྟེ། དེ་དག་གིས་འབད་པས་དགྲ་བཅོམ་པའི་གོ་འཕང་ཐོབ་བོ། །དེའི་ཚེ་འཕྱེ་བོས་ཀྱང་བདག་གི་ལུས་འདི་འདྲ་བར་མ་གྱུར་ན་རབ་ཏུ་བྱུང་བར་བྱ་སྟེ་སྙམ་པའི་མོད་ལ་ལུས་ཡོངས་སུ་རྫོགས་ཤིང་རངས་པར་གྱུར་ཏེ་རབ་ཏུ་དགའ་བའི་ཡིད་ཀྱིས་བསྙེན་པར་རྫོགས་ཏེ་དགྲ་བཅོམ་པའི་གོ་འཕང་མངོན་དུ་བྱས་སོ། །དེའི་ཚེ་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་བསྟན་པ་ལ། ཝཱ་རཱ་ཎ་སཱིར་ཁྱིམ་བདག་སྤུན་གཉིས་ཡོད་པའི་ཕུ་བོས་ནི་སངས་རྒྱས་ཀྱི་སྤྱན་སྔར་ཆོས་ཐོས་པས་ཕྱིར་མི་འོང་གི་འབྲས་བུ་མངོན་དུ་བྱས་ནས་ཁྱིམ་ན་འདུག་ཅིག་དགེ་བའི་ལ་ལ་བརྩོན་པར་བྱེད་དོ། །ནུ་བོས་ནི་ཞིང་ལས་བྱེད་དེ་ཤིན་ཏུ་ངལ་ཞིང་དུབ་པ་ན། ཕུ་བོ་ལ་ཁྲོས་ཏེ་བདག་ནི་འདི་བཞིན་དུ་སྡུག་བསྔལ་ཏེ་ལས་བྱེད་ན་ཁྱོད་ནི་འཕྱེ་བོ་སྟེ་ཞ་བོ་བཞིན་དུ་ཁྱིམ་ན་ཉལ་ཏེ་འདུག་གམ་ཞེས་སྨྲས་པས། ཕུ་བོ་ཕྱིར་མི་འོང་དེས་ནུ་བོ་ལ་བརྩེ་བའི་སླད་དུ། དེའི་མདུན་མཁར་རྫུ་འཕྲུལ་སྣ་ཚོགས་པ་བསྟན་ནས། ཁྱོད་ཀྱིས་ང་ལ་ཚིག་རྩུབ་སྨྲས་པའི་ཉེས་པ་དེ་བཤགས་པར་གྱིས་ཤིག་འཁོར་བ་ན་འཁོར་ཞིང་སྡུལ་བསྔལ་ཆེན་པོ་རྙེད་ཏ་རེ། ཞེས་གསུངས་པས་ནུ་བོ་དེ་ཡང་འགྱོད་པ་ཆེན་པོ་སྐྱེས་ཏེ་ཕུ་བོའི་རྐང་པར་ཕྱག་འཚལ་ནས་བཟོད་གསོལ་བྱས་སྟེ། གཉིས་ཀས་ཁྱིམ་སྤངས་ཏེ་རབ་ཏུ་བྱུང་བས་ཕུ་བོས་དགྲ་བཅོམ་པའི་གོ་འཕང་ཐོབ་ཅིང་། ནུ་བོས་ཚེ་གཅིག་ཏུ་ཚངས་པར་སྤྱོད་པ་སྤྱད་ནས་འཆི་ཀར་སྨོན་ལམ་བཏབ་སྟེ། བདག་གིས་ཕུ་བོ་ལ་ཚིག་ངན་པར་སྨྲས་པའི་རྣམ་སྨིན་ཉམས་སུ་མི་མྱོང་ཞིང་། གལ་ཏེ་མྱོང་ནའང་རབ་ཏུ་བྱུང་བར་འདོད་པའི་མོད་ལ་སངས་པ་དང་མ་འོངས་ཤཱཀྱའི་བསྟན་པ་ལ་འབྲས་བུ་ཐོབ་པར་གྱུར་ཅིག ཅེས་སྨོན་ནོ། །ལས་ཀྱི་རྒྱུ་དེས་གང་དུ་སྐྱེས་ཀྱང་འཕྱེ་བོར་གྱུར་ལ། སྨོན་ལམ་དང་ཚངས་པར་སྤྱོད་པའི་འབྲས་བུས་རབ་ཏུ་བྱུང་ནས་དགྲ་བཅོམ་པའི་གོ་འཕང་ཐོབ་པ་དང་། མི་རྒོད་ལྔ་བརྒྱ་པོ་འདི་ཐམས་ཅད་ད་ལྟ་འབའ་ཞིག་ཏུ་མ་ཟད་སྔོན་ཡང་འཕྱེ་བོ་འདི་ལ་བརྟེན་ནས་རབ་ཏུ་བྱུང་སྟེ་བསམ་གཏན་བཞི་དང་མངོན་ཤེས་ལྔ་ཡང་བསྐྱེད་པ་ཡིན་ཏེ། སྔོན་ནགས་ཁྲོད་གཅིག་ན་མི་རྒོད་ལྔ་བརྒྱ་པོ་འདི་དག་མི་རྒོད་དུ་གྱུར་ཅིང་། འཕྱེ་བོ་འདི་མི་ཞིག་ཏུ་གྱུར་པ་བཟུང་སྟེ་གནོད་སྦྱིན་མཆོད་པར་རྩོམ་པ་ན། མི་དེས་དཀའ་ཐུབ་ཀྱི་ནགས་ཤིག་ན་དྲང་སྲོང་ཞིག་ཡོད་པ་དེ་ལ་སྐྱབས་གསོལ་པ་ན། དྲང་སོང་དེ་ལ་དགའ་བའི་ལྷ་ཞིག་གིས་སྦྲན་ནས། མི་རྒོད་རྣམས་ཀྱང་ཐད་དུ་འོངས་ཏེ་ཆོས་བསྟན་པས། མི་རྒོད་དེ་དག་དད་ནས་དྲང་སྲོང་གི་ཐད་དུ་རབ་ཏུ་བྱུང་སྟེ། བསམ་གཏན་བཞི་དང་མངོན་ཤེས་ལྔ་བསྐྱེད་དོ། །དེའི་དུས་ཀྱི་དྲང་སྲོང་དེ་ནི་ང་ཉིད་ཡིན་ནོ་གསུངས། འདིས་ནི་ངག་གི་ཉེས་པར་སྤྱོད་པའི་འབྲས་བུ་དང་ཚངས་སྤྱོད་ཀྱི་ཕན་ཡོན་བསྟན་པ་ཡིན་ནོ། །