རང་སངས་རྒྱས་བསྐོར་བྱེད་ཅེས་བྱ་བ།
༈ ཡང་སྟོན་པ་མཉན་ཡོད་དུ་བཞུགས་ཏེ་གྲོང་ཁྱེར་དུ་བསོད་སྙོམས་ལ་གཤེགས་པའི་ཚེ། བྲམ་ཟེ་ཞིག་མཆོད་སྦྱིན་བྱེད་པར་འདོད་དེ་ཤིང་རྟ་ལ་ཞོན་ནས་འོང་བ་དང་ལམ་དུ་ཕྲད་ནས། བྲམ་ཟེ་དེ་དགའ་བ་སྐྱེས་ཏེ་བཅོམ་ལྡན་འདས་ལ་བསྐོར་བ་བྱས་ནས་སོང་ངོ་། །དེའི་སྐབས་སུ་བཅོམ་ལྡན་འདས་ཀྱིས་ཞལ་འཛུམ་པ་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་ཞལ་འཛུམ་པ་མཛད་པའི་ཆོས་ཉིད་དེ། དེའི་ཚེ་ཞལ་ནས་འོད་ཟེར་སྔོན་པོ་དང་སེར་པོ་དང་། དམར་པོ་དང་། དཀར་པོ་རྣམས་བྱུང་ནས་ཁ་ཅིག་ནི་འོག་ཏུ་འགྲོ། ཁ་ཅིག་ནི་སྟེང་དུ་འགྲོའོ། །འོག་ཏུ་འགྲོ་བ་གང་ཡིན་པ་དེ་དག་ནི་སེམས་ཅན་དམྱལ་བའི་རིས་རྣམས་སུ་སོང་ནས། དེ་དག་ཚ་གྲང་གི་སྡུག་བསྔལ་སོགས་ཞི་བར་བྱས་ཏེ། དེ་དག་སངས་རྒྱས་ལ་དམིགས་པའི་དྲན་པ་རྙེད་དེ་དགའ་བའི་སེམས་བསྐྱེད་པས་མཐོ་རིས་ལྷ་དང་མི་རྣམས་ཀྱི་ནང་དུ་འཕོས་ཏེ་བདེན་པ་མཐོང་བའི་སྣོད་རུང་བྱེད་དོ། །སྟེང་དུ་འགྲོ་བ་རྣམས་འགོ་རྣམས་འོག་མིན་གྱི་ལྷ་རྣམས་ཀྱི་བར་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་སྒྲ་སྒྲོགས་ཤིང་། ངེས་པར་འབྱུང་བ་བརྩམ་པར་གྱིས། །སངས་རྒྱས་བསྟན་ལ་སྦྱོར་བར་གྱིས། །འདམ་བུའི་ཁྱིམ་ན་གླང་ཆེན་བཞིན། །འཆི་བདག་སྡེ་ནི་གཞོམ་པར་གྱིས། །གང་ཞིག་ཆོས་འདུལ་འདི་ཉིད་ལ། །བག་ཡོད་སྤྱོད་པར་བྱེད་པ་ནི། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཟད་པར་བྱེད་པར་འགྱུར། །ཞེས་ཚིགས་སུ་བཅད་པ་གཉིས་པོའང་བརྗོད་པར་བྱེད་དོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བསྐོར་ནས། བཅོམ་ལྡན་འདས་ཀྱི་ཕྱི་བཞིན་འབྲང་སྟེ། གལ་ཏེ་བཅོམ་ལྡན་འདས་ཀྱིས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་ཏེ་རྒྱབ་ལོགས་མི་སྣང་བར་འགྱུར་རོ། །དེ་བཞིན་དུ་མ་འོངས་པའི་ལས་ལུང་སྟོན་པར་མདུན་ལོགས་སུ་དང་། སེམས་ཅན་དམྱལ་བར་སྐྱེ་བར་ལུང་སྟོན་པར་ཞབས་ཀྱི་མཐིལ་དུ་དང་། དུད་འགྲོ་སྐྱེ་བར་ཞབས་ཀྱིི་རྟིང་པར་དང་། ཡི་དྭགས་སྐྱེ་བར་ཞབས་ཀྱི་མཐེ་བོང་དང་། མིར་སྐྱེ་བར་པུས་མོ་གཉིས་སུ་དང་། སྟོབས་ཀྱི་འཁོར་ལོས་སྒྱུར་བར་ཕྱག་གཡོན་པའི་མཐིལ་དང་། འཁོར་ལོས་སྒྱུར་བའི་རྒྱལ་པོར་ཕྱག་གཡས་པའི་མཐིལ་དང་། ལྷར་སྐྱེ་བར་ལྟེ་བ་དང་། ཉན་ཐོས་ཀྱི་བྱང་ཆུབ་ཏུ་ཞལ་དང་། རང་སངས་རྒྱས་ཀྱི་བྱང་ཆུབ་ཏུ་སྨིན་མཚམས་ཀྱི་མཛོད་སྤུར་དང་། བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་དབུའི་གཙུག་ཏོར་དུ་མི་སྣང་བར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་སྤུར་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ། ཚིགས་སུ་བཅད་པའི་དབྱངས་ཀྱིས་བསྟོད་པ་སྔོན་དུ་འགྲོ་བས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་སྟོན་པར་མི་མཛད། འཛུམ་པ་མཛད་པའི་རྒྱུ་གང་ལགས་རྐྱེན་གང་ལགས་ཞེས་གསོལ་པ་དང་། བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ་དེ་བཞིན་གཤེགས་པ་རྣམས་ནི་རྒྱུ་དང་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ། བྲམ་ཟེ་གང་གིས་དེ་བཞིན་གཤེགས་པ་ལ་བསྐོར་བ་བྱས་ཏེ་སོང་བ་དེའི་དགེ་བའི་རྩ་བས་བསྐལ་པ་བཅུ་གསུམ་གྱི་བར་དུ་ལོག་པར་ལྟུང་བར་མི་འགྱུར་ཏེ། ལྷ་དང་མིའི་ནང་དུ་ཉིང་མཚམས་སྦྱར་ཞིང་སྲིད་པ་ཐ་མར་ཡང་མིར་སྐྱེ་བ་ཐོབ་སྟེ་རབ་ཏུ་བྱུང་བར་འགྱུར་ལ། དེས་སློབ་དཔོན་མེད་པ་དང་མན་ངག་མེད་པར་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་མངོན་དུ་བྱས་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱེད་པར་འགྱུར་ཏེ། རང་སངས་རྒྱས་བསྐོར་བྱེད་ཅེས་བྱ་བར་འགྱུར་རོ། །འདིའི་སྦྱིན་པར་བྱས་པའི་ཆོས་ནི་དེ་ཡིན་ནོ་གསུངས།