སྦྱིན་པ་དང་ཚུལ་ཁྲིམས་བསྲུང་བའི་ཕན་ཡོན་དང་ངག་གི་ཉེས་པར་སྤྱོད་པའི་འབྲས་བུའང་བསྟན་པ།
༈ ཡང་སྟོན་པ་མཉན་ཡོད་དུ་བཞུགས་པའི་ཚེ། ཡུལ་སྲུང་བྱེད་ཀྱི་རི་ཁྲོད་ཅིག་ཏུ་ཁྱིམ་བདག་ཕྱུག་པོ་རྣམ་སྲས་ཀྱི་ནོར་དང་ལྡན་པ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་མདོག་བཟང་བ་པདྨའི་སྙིང་པོ་དང་འདྲ་བ་ཞིག་བཙས་ཏེ་མིང་པདྨའི་མདོག་ཅན་ཞེས་བྱ་བར་བཏགས་སོ། །དེ་ཆེར་སྐྱེས་པ་ན་སངས་རྒྱས་ཀྱི་བསྟན་པ་ལ་དད་པ་རྙེད་ནས། ཕ་མ་ལ་ཞུས་ཏེ་ཚེ་དང་ལྡན་པ་ཉེ་སྡེའི་ཐད་དུ་རབ་ཏུ་བྱུང་ཞིང་བསྙེན་པར་རྫོགས་སོ། །དེ་ནས་དེ་ཕྱིས་ཞིག་ན་མཁན་པོ་ལ་མ་ཞུས་པར་ལྗོངས་རྒྱུ་ཞིག་སོང་སོང་བ་ན་ཡུལ་བཅོམ་བརླག་ཏུ་ཕྱིན་ཏེ། དེར་བསོད་སྙོམས་ལ་ཕྱིན་པ་ན་སྤྱོད་ཡུལ་གྱི་རྒྱུས་མེད་པས་སྨད་འཚོང་མའི་ཁྱིམ་དུ་སོང་ངོ་། །དེར་སྨད་འཚོང་མ་གཞོན་ནུ་མོ་ཞིག་ཡོད་པ་དེ་དགེ་སློང་དེ་ལ་ལྷག་པར་ཡང་ཆགས་པར་གྱུར་ནས་གདན་བཤམས་ཏེ་དེ་ཉིད་ལ་བཞུགས་སུ་གསོལ་ནས། ཆགས་པའི་གཏམ་སྨྲས་པ་ན་དགེ་སློང་དེ་རྣ་བ་བཀབ་སྟེ་སྟན་ལས་ལངས་ནས་ཕྱིར་གཙུག་ལག་ཁང་དུ་བྲོས་སོ། །དེར་སྨད་འཚོང་མ་དེས་རིགས་ངན་མོ་སྔགས་ཀྱི་མཐུ་ཡོད་པ་ཞིག་བཀུག་ནས། དེ་ལ་གཏམ་དེ་རྒྱས་པར་བཤད་ནས་དེ་དང་བདག་གཉིས་ཕྲད་པར་གྱིས་དང་གསེར་མང་པོ་སྦྱིན་ནོ་ཞེས་སྨྲས་པས། རིགས་ངན་མོ་དེས་ཁས་བླངས་ཏེ། དེའི་ཁྱིམ་དུ་དཀྱིལ་འཁོར་བཤམས་ནས་སྦྱིན་སྲེག་བྱས་པས་རིག་སྔགས་ཀྱི་མཐུས་དགེ་སློང་དེ་དབང་མེད་དུ་དྲངས་ནས་དེར་ཕྱིན་ནོ། །དེ་ནས་རིགས་ངན་མོ་དེས། བཙུན་པ་པདྨའི་མདོག་ལ་ཁྱིམ་འདིར་འོང་བ་ལ་བྱ་བ་གཉིས་ཡོད་དེ། ཡང་ན་ནི་སྨད་འཚོང་མ་འདི་དང་ལྷན་ཅིག་ཏུ་ཉོལ་ཅིག ཡང་ན་ནི་མེ་འདིའི་ནང་དུ་མཆོངས་ཤིག ། ཅེས་སྨྲས་སོ། །དེ་ནས་པདྨའི་མདོག་གིས་བསམ་པ། དེ་བཞིན་གཤེགས་པ་ནི་འཇིག་རྟེན་དུ་བྱོན་པར་དཀའ་ལ། མིར་སྐྱེ་བ་ཡང་དཀའ་ཞིང་། ཡུལ་དབུས་སྐྱེ་བ་ཡང་རྙེད་པར་དཀའ་བས་ན། མེའི་ནང་དུ་མཆོང་བ་ནི་ལེགས་ཀྱི་འདི་དང་ཕྲད་པར་བྱ་བ་ནི་མ་ཡིན་ནོ། །སྙམ་དུ་བསམས་ནས། གོས་ཕུད་དེ་རིགས་ངན་མོ་ལ་གཏད་ནས། ཆེ་ཞེ་གོས་འདི་རྣམས་གཙུག་ལག་ཁང་དུ་ཁྱེར་ལ་བདག་གི་ཚངས་པ་མཚུངས་པར་སྤྱོད་པ་རྣམས་ལ་ཕུལ་ཅིག བདག་ནི་མེའི་ནང་དུ་མཆོང་བར་ཆད་དོ། །ཞེས་སྨྲས་པས། ཡོན་ཏན་དང་ལྡན་པར་རིགས་ནས། རིགས་ངན་མོ་དང་སྨད་འཚོང་མ་གཉིས་ཆར་འགྱོད་པའི་སེམས་སྐྱེས་ནས་ཉེས་པ་བཤགས་ཏེ་མདུན་དུ་འཁོད་པ་ལ། པདྨའི་མདོག་གིས་དེ་གཉིས་ལ་ཆོས་བསྟན་པས་གཉིས་ཀ་སྟན་དེ་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་མངོན་དུ་བྱས་ནས་རབ་ཏུ་བྱུང་བར་གསོལ་བ་དང་། བཙུན་པས་དེ་གཉིས་ཁྲིད་དེ་གཙུག་ལག་ཁང་དུ་དགེ་སློང་མ་རྣམས་ལ་གཏད་ནས་རབ་ཏུ་བྱུང་སྟེ་བསྙེན་པར་རྫོགས་པར་བྱས་ནས། དེས་དེ་གཉིས་ལ་ལུང་ཕོག་ཅིང་དེ་གཉིས་ཀྱིས་ཀྱང་བརྩོན་པས་མི་རིང་བར་དགྲ་བཅོམ་པ་མངོན་དུ་བྱས་སོ། །དེ་ནས་ཚེ་དང་ལྡན་པ་པདྨའི་མདོག་གིས་འདི་ལྟར་བདག་གིས་གཞན་གྱི་རྒྱུད་ནི་དག་པར་བྱེད་ནུས་ན་བདག་གི་རྒྱུད་དག་པར་བྱེད་མ་ནུས་སོ་སྙམ་དུ་བསམས་ནས། བརྩོན་པས་བསྒོམ་པ་ལ་ནན་ཏན་དུ་བྱས་པས་དགྲ་བཅོམ་པ་མངོན་དུ་བྱས་སོ། །དེ་ནས་ཕྱིས་ཞིག་ན་མཉན་ཡོད་དུ་འོང་ཏེ་གཏམ་རྣམས་རྒྱས་པར་བཤད་པ་དགེ་སློང་རྣམས་ངོ་མཚར་དུ་གྱུར་ནས་བཅོམ་ལྡན་འདས་ལ་ལས་ཀྱི་རྒྱུ་ཞུས་པ་ན། འདི་ནི་ཚེ་རབས་ལྔ་བརྒྱའི་བར་དུ་འདིའི་ཆུང་མར་གྱུར་ཏེ། དེའི་སྔོན་གྱི་བག་ཆགས་ཀྱི་གཞི་ཡོད་པས་ན་མཐོང་མ་ཐག་ཏུ་ཆགས་པར་གྱུར་ཏོ། །དེ་ཡང་སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། ཡུལ་ཝཱ་རཱ་ཎ་སཱི་ན་ཁྱིམ་བདག་གཅིག་ལ་ཆུང་མ་གཉིས་ཡོད་པ་ལས། ཁྱིམ་བདག་དེ་སངས་རྒྱས་ཀྱི་བསྟན་པ་ལ་དད་པ་རྙེད་ནས་རབ་ཏུ་བྱུང་བར་འདོད་ནས་ཆུང་མ་གཉིས་ལ་གཏམ་སྨྲས་པ་དང་། དེ་གཉིས་ཀྱང་རབ་ཏུ་བྱུང་བར་འདོད་པར་གྱུར་པས། སྔོན་ལ་ཆུང་མ་དེ་གཉིས་དགེ་སློང་མའི་གཙུག་ལག་ཁང་དུ་ཁྲིད་ནས་རབ་ཏུ་བྱུང་སྟེ་བསྙེན་པར་རྫོགས་པར་བྱས་ནས། དེའི་རྗེས་སུ་ཁྱིམ་བདག་དེ་ཁྱིམ་གྱི་ལོངས་སྤྱོད་ཐམས་ཅད་བསོད་ནམས་ཀྱི་ཕྱོགས་སུ་བཏང་ནས་རབ་ཏུ་བྱུང་ཞིང་སྡེ་སྣོད་ལ་བསླབ་པས། རིགས་པ་དང་གྲོལ་བའི་སྤོབས་པ་དང་ལྡན་པའི་ཆོས་སྨྲ་བར་གྱུར་ནས་འཚོ་བའི་ཡོ་བྱད་རྣམས་ཀྱང་རྙེད་པར་གྱུར་ཏོ། །དགེ་སློང་མ་དེ་གཉིས་ནི་འཐབ་ཀྲོལ་ཅན་ཁ་ཚས་ངན་པར་གྱུར་ནས། གཅིག་གིས་ནི་དགེ་སློང་མ་རྣམས་ལ་རིགས་ངན་མོ་ཞེས་སྨྲས་ཤིང་གཅིག་གིས་ནི་སྨད་འཚོང་མ་ཞེས་པའི་ཚིག་སྨྲས་སོ། །དེ་ནས་དགེ་སློང་དེས་དེ་གཉིས་འཐབ་ཀྲོལ་ཅན་དུ་གྱུར་པ་དེ་ལས་བཀག་ནས། སྦྱིན་པ་དང་སྦྱིན་པའི་བགོ་བཤའ་བྱེད་པ་ལ་བཙུད་དོ། །དེ་ནས་ཕྱིས་དགེ་སློང་དེས་སངས་རྒྱས་འཁོར་དང་བཅས་པ་ལ་བཤོས་དྲངས་ཤིང་དབུ་སྐྲ་དང་སེན་མོའི་མཆོད་རྟེན་ལ་ཡང་བཀུར་སྟི་བྱས་ཏེ་མ་འོངས་ཤཱཀྱའི་བསྟན་པ་ལ་འབྲས་བུ་ཐོབ་པར་སྨོན་ལམ་བཏབ་བོ། །དེའི་ཚེ་དགེ་སློང་མ་གཉིས་པོས་ཀྱང་། བདག་གཉིས་ཀྱང་འཕགས་པ་ཁྱེད་ཉིད་ལ་བརྟེན་ནས་སངས་རྒྱས་བཅོམ་ལྡན་འདས་དེ་མཉེས་པར་བྱེད་པར་གྱུར་ཅིག ཅེས་སྨོན་ལམ་བཏབ་བོ། །དེའི་དུས་ཀྱི་དགེ་སློང་དེ་ནི་པདྨའི་མདོག་འདི་ཉིད་ཡིན་ལ། དགེ་སློང་མ་གཉིས་པོ་ནི་ད་ལྟར་གྱི་འདི་གཉིས་ཏེ། དེའི་ཚེ་ཚིག་རྩུབ་སྨྲས་པའི་རྒྱུས་རིགས་ངན་དང་སྨད་འཚོང་མར་གྱུར་ཏོ། །གཞན་ཡང་དགེ་སློང་པདྨའི་སྙིང་པོ་འདི་ལོངས་སྤྱོད་ཆེ་ཞིང་གཟུགས་མཛེས་པ་ནི་སྔོན་ཀུན་དགའ་ར་བའི་སྲུང་མ་ཞིག་ཏུ་གྱུར་པའི་ཚེ། རང་སངས་རྒྱས་ཞིག་ལ་བཤོས་དང་ན་བཟའ་ཕུལ་ཞིང་། མེ་ཏོག་སྣ་ཚོགས་པས་གཏོར་ཏེ་སྨོན་ལམ་བགྱིས་པའི་འབྲས་བུ་ཡིན་པར་གསུངས་སོ། །འདིས་ནི་སྦྱིན་པ་དང་ཚུལ་ཁྲིམས་བསྲུང་བའི་ཕན་ཡོན་དང་ངག་གི་ཉེས་པར་སྤྱོད་པའི་འབྲས་བུའང་བསྟན་པ་ཡིན་ནོ། །