ལས་དེའི་རྣམ་པར་སྨིན་པས་མཛའ་སྡེ་ལྔ་བརྒྱ་པོ་རྣམས་ཀྱིས་འདི་ལྟ་བུའི་མཆོད་པ་བྱས་པ།

༈ ཡང་སྟོན་པ་མཉན་ཡོད་ན་བསོད་སྙོམས་ལ་གཤེགས་པའི་ཚེ། མཛའ་སྡེ་ལྔ་བརྒྱ་ཙམ་ཞིག་སྐྱེད་མོས་ཚལ་དུ་རྩེར་འགྲོ་བས་མཇལ་ཏེ་ཤིན་ཏུ་དགའ་ཞིང་དད་པར་གྱུར་ནས་ཞབས་ལ་ཕྱག་འཚལ་ཞིང་མེ་ཏོག་རྣམ་པ་སྣ་ཚོགས་ཀྱིས་གཏོར། སིལ་སྙན་དང་རོལ་མོས་ཀྱང་མཆོད་ཅིང་བསྐོར་བ་ལན་གསུམ་དུ་བྱས་ཏེ་སོང་ངོ་། །དེར་བཅོམ་ལྡན་འདས་ཀྱིས་ཞལ་འཛུམ་པ་མཛད་པས། ཀུན་དགའ་བོས་རྒྱུ་རྐྱེན་གསོལ་བ་ན། མཛའ་སྡེ་ལྔ་བརྒྱ་པོ་འདི་བཅོམ་ལྡན་འདས་ལ་དད་པར་བྱས་ཏེ་བཀུར་སྟིས་མཆོད་པའི་ལས་དེའི་བསོད་ནམས་ཀྱིས་བསྐལ་པ་བཅུ་གསུམ་གྱི་བར་དུ་ངན་འགྲོ་ལོག་པར་མི་ལྟུང་ཞིང་ལྷ་དང་མིའི་གནས་སུ་བདེ་བ་མྱོང་སྟེ། མཐར་རང་སངས་རྒྱས་སྨོན་པ་མེད་པ་ཞེས་བྱ་བ་ཤ་སྟག་ཏུ་འགྱུར་རོ་ཞེས་ལུང་བསྟན་ཏོ། །དེར་དགེ་སློང་རྣམས་ཀྱིས་བཅོམ་ལྡན་འདས་ཀྱིས་སྔོན་ཕྲིན་ལས་ཅི་མཛད་ནས་འདི་ལྟ་བུའི་མེ་ཏོག་གིས་མཆོད་པར་གྱུར་ཅེས་གསོལ་པ་ན། བཅོམ་ལྡན་འདས་ཀྱིས་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པ་གཉིས་ལ་བབས་པ་ན། ཡང་དག་པར་རྫོགས་པའི་སངས་རྒྱས་མར་མེ་མཛད་འཇིག་རྟེན་དུ་བྱོན་ནོ། །དེའི་ཚེ་བཅོམ་ལྡན་འདས་ཉིད་བྲམ་ཟེའི་ཁྱེའུ་བློ་གྲོས་བཟང་པོ་ཞེས་བྱ་བ་གྱུར་ཏེ། རྒྱ་མཚོ་ཆེན་པོ་འཐུང་བ་དང་ནམ་མཁའ་ལ་འགྲོ་བ་དང་ཉི་ཟླ་ལག་ཏུ་ཐོགས་པ་སོགས་ཀྱི་རྨི་ལམ་གྱི་ལྟས་ཀྱིས་བསྐུལ་ནས། རྒྱལ་པོའི་ཕོ་བྲང་མར་མེ་ལྡན་དུ་སོང་སྟེ་བུ་མོ་ཞིག་ལ་ཨུད་པ་ལ་སྔོན་པོ་བདུན་ཡོད་པའི་ནང་ནས་ལྔ་བསླངས་ཏེ་སངས་རྒྱས་མར་མེ་མཛད་ཀྱི་སྐུ་ལ་གཏོར་བ་དབུའི་སྟེང་དུ་ཤིང་རྟའི་འཕང་ལོ་ཙམ་ཤ་སྟག་ཏུ་བླ་རེར་ཆགས་སོ། །དེ་མཐོང་བ་དང་བུ་མོ་དེས་ཀྱང་ཨུད་པ་ལ་གཉིས་པོ་བཅོམ་ལྡན་འདས་ལ་གཏོར་བས་སྙན་གྱི་གོང་དུ་ཤིང་རྟའི་འཕང་ལོ་ཙམ་དུ་ཆགས་པར་བྱིན་གྱིས་བརླབས་སོ། །དེ་ནས་བྲམ་ཟེའི་ཁྱེའུ་བློ་གྲོས་བཟང་པོས། ས་ཕྱོགས་འདམ་རྫབ་ཅན་དུ་རང་གི་སྐྲ་བཏིང་ནས། བློ་ལྡན་སད་མཛད་གལ་ཏེ་བདག ། བྱང་ཆུབ་ཏུ་ནི་འཚང་རྒྱ་ན། །སྐྱེ་རྒ་མེད་མཛད་ཞབས་གཉིས་ཀྱིས། །མྱུར་དུ་བདག་སྐྲ་བརྫི་བར་གསོལ། །ཞེས་ཞུས་པས། མར་མེ་མཛད་ཀྱིས་སྐྲའི་སྟེང་དུ་ཞབས་གཉིས་བཞག་སྟེ། ཁྱོད་ནི་ས་འདིར་འཇིག་རྟེན་རྣམས་ལ་ཕན་པའི་ཕྱིར། །སྟོན་པ་མངའ་མཛད་འཇིག་རྟེན་གསུམ་ལས་རྣམ་གྲོལ་བ། །ཤཱཀྱའི་སྲས་པོ་ཤཱཀྱ་ཐུབ་པ་ཞེས་བྱ་བ། །འཇིག་རྟེན་གསུམ་གྱི་སྙིང་པོ་འགྲོ་བའི་སྒྲོན་དུ་འགྱུར། །ཞེས་བྱང་ཆུབ་ཏུ་ལུང་བསྟན་མ་ཐག་ཏུ་བྲམ་ཟེ་ཁྱེའུ་དེ་ནམ་མཁའ་ལ་ཏ་ལ་བདུན་སྲིད་ཙམ་དུ་འཕགས་སོ། །དེ་ནས་དེའི་སྐྲ་བྱི་ནས་སྐྲ་གསར་ཁྱད་པར་དུ་འཕགས་པ་བྱུང་ངོ་། །དེ་ལྟར་དེ་ནམ་མཁའ་ལ་འདུག་པ་མཐོང་ནས་སྐྱེ་བོ་ཕལ་མོ་ཆེས། གང་གི་ཚེ་འདིས་བླ་ན་མེད་པའི་ཡེ་ཤེས་བརྙེས་པར་འགྱུར་བ་དེའི་ཚེ་བདག་ཅག་འདིའི་ཉན་ཐོས་སུ་གྱུར་ཅིག ཅེས་སྨོན་ལམ་དུ་བྱས་ཤིང་། སྔར་གྱི་བུ་མོ་དེས་ཀྱང་། ནམ་སངས་མ་རྒྱས་ཀྱི་བར་དུ་བྱང་ཆུབ་སེམས་དཔའི་བཙུན་མོ་བྱེད་པ་དང་སངས་རྒྱས་ནས་དེའི་ཉན་ཐོས་མར་སྨོན་ལམ་བཏབ་བོ། །དེའི་ཚེ་དབུ་སྐྲ་རྣམས་རྒྱལ་པོ་ནོར་ཅན་གྱི་བུས་བསྒོས་ཏེ། བློན་པོ་བརྒྱད་ཁྲི་ལ་སྐྲ་ཉག་མ་རེ་རེ་བྱིན་ནས་སོ་སོར་མཆོད་རྟེན་བྱས་སོ། །དེ་ནས་བྲམ་ཟེའི་ཁྱེའུ་བློ་གྲོས་བཟང་པོ་རབ་ཏུ་བྱུང་ཞིང་ཚངས་པར་སྤྱོད་པ་སྤྱད་པས་ཚེ་འཕོས་ནས་དགའ་ལྡན་གྱི་ལྷའི་རིས་སུ་སྐྱེས་སོ། །དེ་ལྟར་སངས་རྒྱས་མར་མེ་མཛད་ལ་ཨུད་པ་ལ་སྔོན་པོ་དག་གིས་མཆོད་པ་བྱས་པའི་ལས་དེའི་རྣམ་པར་སྨིན་པས། འཁོར་བ་ན་བདེ་བ་ཆེན་པོ་མྱོང་བར་གྱུར་ཏེ། དགེ་བའི་རྩ་བ་དེས་ནི་ངས་བླ་ན་མེད་པའི་བྱང་ཆུབ་ཀྱི་རྒྱུ་ཙམ་དང་རྐྱེན་ཙམ་དང་ཚོགས་ཙམ་དུ་གྱུར་ལ་ད་ལྟའི་དུས་ཀྱང་ལས་དེའི་རྣམ་པར་སྨིན་པས་མཛའ་སྡེ་ལྔ་བརྒྱ་པོ་རྣམས་ཀྱིས་འདི་ལྟ་བུའི་མཆོད་པ་བྱས་པ་ཡིན་ནོ་གསུངས།