དགེ་འདུན་གྱི་སྤྱི་རྫས་སྦས་པ་དང་ངག་གི་ཉེས་པར་སྤྱོད་པའི་འབྲས་བུ་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། དེའི་ཕྱི་སའི་འདམ་ཞིག་ཏུ་སྲིན་བུ་མགོ་བོ་དགེ་སློང་གི་མགོ་བོ་འདྲ་བ་ཞིག་བྱུང་སྟེ། དེའི་ལུས་ཐམས་ཅད་སྲིན་གྱིས་གང་སྟེ་བ་སྤུའི་གྲངས་སྙེད་ཀྱིས་ཟ་བར་བྱེད་པ་མ་བཟོད་དེ་ཕན་ཚུན་དུ་རྒྱུགས་ཅིང་འདམ་གྱི་ནང་ཐམས་ཅད་དཀྲུགས་ཤིང་ཟས་སུ་བཤང་གཅི་ཟ་བར་བྱེད་དོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་སྤྱན་གྱིས་གཟིགས་ཏེ་དེ་ལ་བརྟེན་ནས་སྐྱེ་བོ་མང་པོའི་དོན་འབྱུང་བར་དགོངས་ཏེ། འདམ་རྫབ་དེའི་དྲིས་མཉན་དུ་ཡོད་པ་ཐམས་ཅད་ཁྱབ་པར་བྱིན་གྱིས་བརླབས་པས། སྔོན་གྱི་དགེ་རྩས་བསྐུལ་ཏེ་སྐྱེ་བོ་སྟོང་ཕྲག་དུ་མ་དེར་འདུས་པར་གྱུར་ཏེ་སྲོག་ཆགས་དེ་མཐོང་ངོ་། །དེར་བཅོམ་ལྡན་འདས་དགེ་སློང་གི་ཚོགས་ཀྱི་ཞབས་འབྲིང་བྱས་ཏེ་ཕྱོགས་དེར་གཤེགས་ནས་གདན་བཤམས་པ་ལ་བཞུགས་ཏེ། སྲིན་དེ་ཡང་སྔོན་གྱི་ལས་དྲན་པ་དང་མིའི་སྐད་དུ་སྨྲ་ནུས་པར་བྱིན་གྱིས་བརླབས་ནས། སྲིན་དེ་ལ་བཀའ་སྩལ་པ། བཞིན་བཟང་ཁྱོད་སྡེ་སྣོད་གསུམ་པ་ཡིན་ནམ། གསོལ་པ་བཅོམ་ལྡན་འདས་བདག་སྡེ་སྣོད་གསུམ་པ་ལགས་སོ། །ཞེས་སོགས་ཀྱི་དྲི་བ་མཛད་ཅིང་ལན་གསོལ་པ་ན། སྐྱེ་བོ་ཐམས་ཅད་ཐེ་ཚོམ་དུ་གྱུར་ནས་ཀུན་དགའ་བོས་དོན་དེ་གསོལ་བ་ན། བཅོམ་ལྡན་འདས་ཀྱིས་སེམས་ཅན་འདི་ནི་སྡིག་པའི་ལས་མང་དུ་བྱེད་པ་ཡིན་ཏེ། སྔོན་འདས་པའི་དུས་སངས་རྒྱས་ཐམས་ཅད་མཆོག་ཅེས་བྱ་བ་འཇིག་རྟེན་དུ་བྱོན་ཏེ། དེའི་དུས་སུ་འདི་ཉིད་དགེ་སློང་སྡེ་སྣོད་གསུམ་པ་ཆོས་སྨྲ་བའི་སྤོབས་པ་དང་ལྡན་པར་གྱུར་ཏེ་ཟས་གོས་ལ་སོགས་པའི་རྙེད་པ་ཕུན་སུམ་ཚོགས་པ་དང་ལྡན་པར་གྱུར་ནས། སྦྱིན་བདག་དང་སྦྱིན་པ་པོ་རྣམས་ལ་བསྐུལ་ཏེ། དཀོན་མཆོག་གསུམ་ལ་བསྙེན་བཀུར་བྱེད་པ་ལ་ཞུགས་སོ། །དེའི་ཚེ་ནག་པོ་རི་ཞེས་བྱ་བའི་སྟེང་དུ་སློབ་པ་དང་མི་སློབ་པའི་དགེ་འདུན་བདུན་ཁྲི་བདུན་སྟོང་དབྱར་གནས་པར་འདོད་ནས་སྡེ་སྣོད་གསུམ་པ་འདི་ཀུན་ལ་གྲགས་པ་བསོད་ནམས་ཆེན་པོ་དང་ལྡན་པ་ཡིན་པས་འཚོ་བའི་ཡོ་བྱད་རྣམས་སྦྱར་བར་ནུས་སྙམ་ནས་དེ་ལ་སྤྲོ་བ་བསྐྱེད་དེ་ཞལ་ཏ་བར་བཅོལ་པ་དང་། དེས་ཀྱང་ཁས་བླངས་པས་དབྱར་གནས་པར་དམ་བཅས་སོ། །དེ་ནས་སྡེ་སྣོད་གསུམ་པ་དེ་སྤྱོད་ཡུལ་གྱི་གྲོང་དུ་ཆས་པ་ན། དེ་དང་མི་རིང་བ་ཞིག་ན་ཚོང་བ་ལྔ་བརྒྱ་ཙམ་རྒྱ་མཚོ་ནས་གྲུ་བདེ་བར་འཁོར་ཏེ་གནས་བཅས་པའི་སར་ཕྱིན་ཏེ་གཏམ་སྨྲས་པས། དེ་དག་ཤིན་ཏུ་དགའ་བར་གྱུར་ནས་གསེར་དངུལ་མང་དུ་ཕུལ་ཏེ་འདིས་དགེ་འདུན་པ་རྣམས་ཀྱི་ཡོ་བྱད་སྦྱོར་ལ། གལ་ཏེ་མ་འདང་ན། ད་དུང་ཡང་གསེར་དངུལ་ཇི་ཙམ་དགོས་པ་དེ་བདག་ཅག་གིས་འབུལ་ཞིང་། དབྱར་ཟིན་པའི་རྗེས་སུ་ན་བཟའ་ཡང་འབུལ་ལོ་ཞུས་པས། དེས་ཀྱང་དེ་ལྟར་བགྱིའོ། །ཞེས་སྨྲས་ཏེ་གསེར་དངུལ་རྣམས་གཙུག་ལག་ཁང་དུ་ཁྱེར་ཏེ་ཕྱིན་པ་ན། གསེར་དངུལ་རྣམས་ལ་བལྟས་པས་ཆགས་པ་སྐྱེས་ཏེ་དེ་དག་ཕག་ཏུ་སྦས་ནས། དགེ་སློང་རྣམས་ལ་ཟས་སྐོམ་ངན་ངོན་སྟོབ་པར་བྱེད་དོ། །དེ་ནས་ཕྱིས་དགེ་སློང་དེ་དག་གི་ཞལ་ཏ་བ་དེ་ལ། བདག་ཅག་ཟས་སྐོམ་ངན་པ་འདི་ལྟ་བུའི་འཚོ་མི་ནུས་སོ། །དེས་སྨྲས་པ། བདག་གི་རྙེད་པ་ནི་དེ་ཙམ་དུ་ཟད་ཀྱི། གལ་ཏེ་དེས་འཚོ་བར་མི་ནུས་ན་ཁྱེད་ཅག་གིས་སྦྱིན་བདག་གཞན་ལ་བསྐུལ་བར་གྱིས་ཤིག་ཅེས་བྱས་སོ། །དེ་ཐོས་པ་དང་དགེ་སློང་དེ་དག་གིས་ཚོང་པ་དེ་དག་ལ་ཁྱེད་ཀྱིས་དགེ་སློང་བདུན་ཁྲི་བདུན་སྟོང་གི་ཟས་སྐོམ་སྦྱར་བ་ནུས་སམ་ཞེས་སྨྲས་པ་དང་། ཚོང་པ་རྣམས་ཀྱིས་སྔར་གྱི་ལོ་རྒྱུས་དེ་རྣམས་ཞུས་ཏེ་སྣེ་སྣོད་གསུམ་པའི་ཐད་དུ་སོང་ནས། བདག་ཅག་གིས་ཡོ་བྱད་གང་དགོས་འབུལ་ཞེས་མ་སྨྲས་སམ། ཅིིའི་སླད་དུ་ཁྱོད་ཀྱིས་དགེ་སློང་རྣམས་ལ་ཟས་སྐོམ་ངན་པ་གསོལ་ཞེས་བྱས་སོ། །དེ་ཐོས་པ་དང་ཞལ་ཏ་བྱེད་པ་དེ་སྐྱེངས་ནས་ཁྲོས་ཏེ་ཕྱིན་ཆད་དགེ་སློང་དེ་དག་གི་ཞལ་ཏ་བྱེད་དུ་མ་བཏུབ་ཅིང་། ཁྱེད་ཀྱིས་ང་ཁོ་ནའི་དད་པས་བྱིན་པ་ལོངས་སྤྱོད་ལ་ང་ཉིད་དམའ་འབེབས་པར་བྱེད་པས་ནི་ཁྱེད་ཕྱི་སའི་འདམ་དུ་བྱིང་སྟེ་བཤང་གཅི་ཟ་བར་གྱུར་ཀྱང་སླའོ་ཞེས་སྨྲས་སོ། །དེ་ནས་དེ་ཕྱིས་ཞིག་འགྱོད་པར་གྱུར་ནས་དགེ་སློང་དེ་དག་ལ་བཟོད་པར་གསོལ་ནས། དེ་དག་གིས་སྨྲས་པ། བདག་ཅག་གིས་ནི་བཟོད་ན་ཁྱོད་ཀྱི་ལས་རྣམས་ཀྱིས་མི་བཟོད་པར་འགྱུར་རོ་ཞེས་བྱས་སོ། །དེས་དེ་ལྟར་སློབ་པ་དང་མི་སློབ་པའི་དེ་སྙེད་ཅིག་ལ་ཚིག་རྩུབ་སྨྲས་པའི་ལས་དེའི་རྣམ་པར་སྨིན་པས་འདི་དུད་འགྲོར་སྐྱེས་ཏེ། ཡང་དག་པར་རྫོགས་པའི་སངས་རྒྱས་ཐམས་ཅད་མཆོག་གི་རིང་ནས་བཟུང་ད་ལྟར་ཡན་ཆད་དུ་དུད་འགྲོ་ལས་ཤི་འཕོས་ཏེ་དུད་འགྲོ་འབའ་ཞིག་ཏུ་སྐྱེས་ཏེ། ཐམས་ཅད་དུ་ལུས་དང་གནས་དང་སྡུག་བསྔལ་འདི་ལྟ་བུ་འབའ་ཞིག་མྱོང་སྟེ་བཤང་གཅི་ཟ་བར་གྱུར་ཏེ། ད་དུང་ཡང་བསྐལ་པ་འདི་ལ་སངས་རྒྱས་ལྔ་བརྒྱ་འབྱུང་བར་འགྱུར་ཏེ་དེའི་རིང་ལའང་དེ་བཞིན་ཏེ། དེའི་འོག་ཏུ་སངས་རྒྱས་སྣང་མཛད་ཅེས་བྱ་བ་འཇིག་རྟེན་དུ་འབྱུང་སྟེ། དེའི་གསུང་རབ་ལ་འདི་དུད་འགྲོ་ལས་ཐར་ཏེ་མིའི་ལུས་ཐོབ་ནས་རབ་ཏུ་བྱུང་ནའང་རྟེན་དེར་མཚམས་མེད་པའི་ལས་བྱེད་པར་འགྱུར་རོ། །དེ་ནས་ཤི་འཕོས་ཏེ་སེམས་ཅན་དམྱལ་བ་རྣམས་སུ་སྐྱེས་ཏེ་ལོ་འབུམ་ཕྲག་དུ་མར་སྡུག་བསྔལ་མྱོང་བར་འགྱུར་རོ། །དེ་ནས་དེའི་ལས་ཟད་དེ་མི་གྱུར་ནས་སངས་རྒྱས་སྣང་མཛད་ཅེས་བྱ་བའི་བསྟན་པ་ལ་རབ་ཏུ་བྱུང་སྟེ་དགྲ་བཅོམ་པ་ཀུན་ལ་གྲགས་ཤིང་བསོད་ནམས་ཆེན་པོ་དང་ལྡན་པར་འགྱུར་ལ། དེས་སྐྱེ་བོ་མང་པོ་ལ་ཕན་བཏགས་ནས་ཕུང་པོ་ལྷག་མེད་ཀྱི་དབྱིངས་སུ་མྱ་ངན་ལས་འདས་པར་འགྱུར་ཏེ། འདིའི་སྡུག་བསྔལ་གྱི་མཐའ་ནི་དེར་ཟད་པར་འགྱུར་རོ་གསུངས་པས། དེར་འདུས་པའི་སྐྱེ་བོ་ཕལ་མོ་ཆེར་རབ་ཏུ་སྐྱོ་བར་གྱུར་ནས། དེ་དང་མཐུན་པར་ཆོས་བསྟན་པས་ཐེག་པ་གསུམ་གྱི་ལམ་ལ་གཞོལ་ཞིང་དགེ་བའི་རྩ་བ་དཔག་ཏུ་མེད་པ་བསྐྱེད་པར་འགྱུར་རོ། །འདིས་ནི་དགེ་འདུན་གྱི་སྤྱི་རྫས་སྦས་པ་དང་ངག་གི་ཉེས་པར་སྤྱོད་པའི་འབྲས་བུ་བསྟན་པ་ཡིན་ནོ། །