སྐྱབས་འགྲོ་དང་བསླབ་གཞི་སྲུང་བ་སོགས་ཀྱི་ཕན་ཡོན་བསྟན་པ།
༈ ཡང་བཅོམ་ལྡན་འདས་ཡུལ་ཨུ་དུམ་ན་བཞུགས་པའི་ཚེ། ཡུལ་དེའི་མཚོ་དལ་གྱིས་འབབ་པའི་འགྲམ་གྱི་ནགས་ཁྲོད་ཅིག་ན། དྲང་སྲོང་ཀཻ་ནེ་ཡ་ཞེས་པ་དང་། དེའི་སྲིང་མོའི་བུ་དྲང་སྲོང་རི་བོ་ཞེས་བྱ་བ་གཉིས་ཀ་འཁོར་ལྔ་བརྒྱ་ལྔ་བརྒྱ་དང་བཅས་ཏེ་གནས་སོ། །དེར་བཅོམ་ལྡན་འདས་ཀྱིས་དེ་གཉིས་འདུལ་བའི་དུས་ལ་བབ་ཅིང་། དེའང་རྒྱལ་པོ་ཆེན་པོ་བཞི་ལ་ཆོས་བསྟན་པའི་ཞར་ལ་ཐུལ་བར་འགྱུར་བར་དགོངས་ཏེ། འཇིག་རྟེན་པའི་ཐུགས་བསྐྱེད་པ་ན་རྒྱལ་པོ་ཆེན་པོ་བཞིས་དོན་དེ་རིགས་ཏེ་འཁོར་རྣམས་མངགས་ནས་མཚོ་དལ་འབབ་ཀྱི་འགྲམ་དུ་གདན་ཁྲིའི་བཀོད་པ་བཤམས་ཤིང་། དྲང་སྲོང་དེ་གཉིས་ལ་འཁོར་མི་མ་ཡིན་པའི་གནོད་པ་ལས་སྲུང་བར་བྱེད་པ་དག་ཀྱང་བསྐོས་སོ། །དེ་མཐོང་ནས་དྲང་སྲོང་ཀཻ་ནེ་ཡས། སུའི་ཕྱིར་གདན་བཤམས་དྲིས་པས། བཅོམ་ལྡན་འདས་ཀྱི་ཕྱིར་དུའོ། །འོ་ན་ཁྱེད་ངའི་ཕྱི་བཞིན་དུ་ཅིའི་ཕྱིར་འབྲང་། དྲང་སྲོང་ཁྱེད་ཉིད་བསྲུང་བའི་ཕྱིར་དུའོ། །དེ་དགོས་པའི་རྒྱུ་མཚན་ཅི་ཡིན། འབྱུང་པོ་མང་དུ་འདུ་བའི་ཕྱིར་རོ། །འོ་ན་ག་ཏ་མ་སུས་སྲུང་། དེ་ནི་གཞན་གྱིས་བསྲུང་མི་དགོས་ཏེ། དེ་ཉིད་ཀྱིས་གཞན་བསྲུང་བར་མཛད་དོ། །དེ་ནས་དེས་དགེ་སྦྱོང་ག་ཏ་མ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཞིག་གོ་སྙམ་མོ། །དེ་ནས་བཅོམ་ལྡན་འདས་འཁོར་དང་བཅས་པ་ཡུལ་ཨུ་དུམ་ནས་མི་སྣང་བར་མཚོ་དལ་འབབ་ཀྱི་འགྲམ་དུ་གཤེགས་ནས་གདན་བཤམས་པ་ལ་བཞུགས་སོ། །དེར་རྒྱལ་པོ་ཆེན་པོ་བཞི་འཁོར་དང་བཅས་པ་འོངས་ཏེ། ཤར་ཕྱོགས་ནས་རྒྱལ་པོ་ཆེན་པོ་ཡུལ་འཁོར་སྲུང་དྲི་ཟའི་འཁོར་དང་བཅས་ཏེ་ལྷ་རྫས་མེ་ཏོག་སྣ་ཚོགས་པ་དང་། ལྷོ་ནས་འཕགས་སྐྱེས་པོ་གྲུལ་བུམ་གྱི་འཁོར་དང་བཅས་ཏེ་རིན་པོ་ཆེ་སྣ་ཚོགས་པ་དང་། ནུབ་ནས་མིག་མི་བཟང་ཀླུ་ཡི་ཚོགས་དང་བཅས་ཏེ་མུ་ཏིག་དང་། བྱང་ནས་རྣམ་ཐོས་ཀྱི་བུ་གནོད་སྦྱིན་གྱི་འཁོར་དང་བཅས་ཏེ་གསེར་དངུལ་གྱིས་སོ་སོའི་ཐུ་བ་བཀང་སྟེ་བཅོམ་ལྡན་འདས་ཀྱི་སྐུ་ལ་གཏོར་ཞིང་ཕྱོགས་ཕྱོགས་སུ་འཁོད་དོ། །དེ་ལས་ཡུལ་འཁོར་སྲུང་དང་འཕགས་སྐྱེས་པོ་ནི་ཡུལ་དབུས་པའི་རིགས་ཡིན་ལ་མིག་མི་བཟང་དང་རྣམ་ཐོས་སྲས་ནི་མཐའ་འཁོབ་པའི་རིགས་ཡིན་པས་བག་ཆགས་སད་པའི་ཁྱད་པར་ཡོད་པ་དགོངས་ནས། སོ་སོའི་སྐད་ཀྱིས་ཆོས་བསྟན་པས་རྒྱལ་པོ་ཆེན་པོ་བཞིས་བདེན་པ་མཐོང་ཞིང་གཞན་ཡང་མི་མ་ཡིན་གྱི་འགྲོ་བ་དཔག་ཏུ་མེད་པ་ཞིག་སྨིན་ཅིང་གྲོལ་བར་མཛད་ནས་དེ་དག་རང་གི་གནས་སུ་སོང་ངོ་། །སྐབས་འདིར་སྟོན་པའི་བསྟན་པ་རྒྱལ་པོ་ཆེན་པོ་བཞི་སོགས་ལ་གཏད་པར་མཛད་པའི་ཚུལ་ནི་མདོ་གཞན་ལས་འབྱུང་བ་ཡིན་ནོ། །དེར་དགེ་སློང་རྣམས་ཀྱིས་རྒྱལ་པོ་ཆེན་པོ་བཞི་ལས་གཉིས་ནི་ཡུལ་དབུས་དང་གཉིས་ནི་མཐའ་འཁོབ་ཏུ་གྱུར་པ་དང་བདེན་པ་མཐོང་བའི་རྒྱུ་ཞུས་པ་ན་བཀའ་སྩལ་པ། སྔོན་སངས་རྒྱས་འོད་སྲུང་གི་དུས་སུ། རི་རབ་ཀྱི་བང་རིམ་ལ་ཀླུའི་རྒྱལ་པོ་དབུགས་དང་དབུགས་ཆེན་པོ་ཞེས་བྱ་བ་གཉིས་ཀྱང་གནས། བྱའི་རྒྱལ་པོ་ནམ་མཁའ་ལྡིང་སྒྲ་སྙན་དང་སྒྲ་ཆུང་ཞེས་བྱ་བ་གཉིས་ཀྱང་གནས་པ་ལས། ཀླུ་དེ་གཉིས་མཁའ་ལྡིང་དེ་གཉིས་ལ་སྐྲག་སྟེ་ཐུར་དུ་གསེར་གྱི་ས་གཞིའི་སྟེང་དུ་སོང་སྟེ་གནས་པ་ལས་ཕྱིས་ཞིག་ན་ཀླུ་དེ་གཉིས་སངས་རྒྱས་ཀྱི་བསྟན་པ་ལ་དགའ་བར་གྱུར་ནས། སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་པས་དེ་གཉིས་མཁའ་ལྡིང་གིས་མི་ཚུགས་པར་གྱུར་ནས་རྒྱ་མཚོའི་ནང་ནས་བྱུང་སྟེ་བག་ཡངས་སུ་འཁོད་དོ། །དེ་མཐོང་ནས་ནམ་མཁའ་ལྡིང་གཉིས་ཀྱིས་ཟ་བར་རྩོམ་པ་ན་འཚེ་ཞིང་གནོད་པར་བྱེད་མ་ནུས་སོ། །དེར་དེ་གཉིས་ངོ་མཚར་དུ་གྱུར་ནས་གཏམ་དྲིས་པ། ཀླུ་ཡི་རྒྱལ་པོ་གཉིས་ཀྱིས་སངས་རྒྱས་ལ་སྐྱབས་སུ་སོང་ཞིིང་བསླབ་པའི་གཞི་བླངས་པས་དེ་ལྟ་བུར་གྱུར་པ་རྒྱས་པར་བསྙད་དོ། །དེར་མཁའ་ལྡིང་གཉིས་ཀྱང་སངས་རྒྱས་འོད་སྲུང་གི་སྤྱན་སྔར་སོང་ནས་སྐྱབས་འགྲོ་དང་བསླབ་གཞི་བླངས་ནས་དེ་བཞི་མཐུན་པར་གྱུར་ཏེ་ལྷན་ཅིག་ཏུ་འགྲོགས་ཤིང་འཁོད་ནས་འཆི་ཀར་བདག་ཅག་སངས་རྒྱས་འོད་སྲུང་གི་བསྟན་པ་ལ་སྐྱབས་འགྲོ་དང་བསླབ་གཞི་བླངས་ཤིང་སྲུང་བའི་དགེ་བའི་རྩ་བས་གང་དུ་སྐྱེས་ཀྱང་དེའི་གཙོ་བོར་གྱུར་པ་དང་། མ་འོངས་པ་ན་སངས་རྒྱས་མཉེས་པར་བྱེད་པར་གྱུར་ཅིག ཅེས་སྨོན་ལམ་བཏབ་སྟེ། དེའི་ཚེ་ཀླུའི་རྒྱལ་པོ་དེ་གཉིས་ནི་ཡུལ་དབུས་པར་གྱུར་པ་འདི་གཉིས་ཡིན་ལ། ནམ་མཁའ་ལྡིང་གཉིས་ནི་མཐའ་འཁོབ་པ་གྱུར་པ་འདི་གཉིས་ཏེ། སྨོན་ལམ་གྱི་དབང་གིས་རྒྱལ་ཆེན་བཞིའི་རིས་ཀྱི་གཙོ་བོར་གྱུར་པ་དང་བདེན་པ་མཐོང་བ་ཡིན་ནོ་གསུངས། དེ་ཐམས་ཅད་ཀྱང་དྲང་སྲོང་ཀཻ་ནེ་ཡ་ཐག་མི་རིང་བར་འཁོད་པས་ཐོས་ནས་རབ་ཏུ་དགའ་བར་གྱུར་ནས་བཅོམ་ལྡན་འདས་ཀྱི་དྲུང་དུ་ཕྱིན་ནས་ཞབས་ལ་ཕྱག་བྱས་ཏེ་ཆོས་ཉན་དུ་འཁོད་པ་ན། བཅོམ་ལྡན་འདས་ཀྱིས་དེ་ལ་ཆོས་བསྟན་པས་བདེན་པ་མངོན་པར་རྟོགས་པའི་མོད་ལ་ཕྱིར་འོང་བའི་འབྲས་བུ་མངོན་དུ་བྱས་སོ། །དེ་ནས་དེས་སངས་རྒྱས་འཁོར་དང་བཅས་པ་ལ་དུས་མ་ལགས་པར་གསོལ་དུ་རུང་བའི་གུང་སྐྱེམས་སྦྱར་བར་གསོལ་ནས་ཀུ་ཤུ་དང་ཆུ་ཤིང་གི་འབྲས་བུ་དང་རྒྱ་ཤུག་གི་འབྲས་བུ་དང་ཨ་ཤད་ཐའི་འབྲས་བུ་དང་ཨུ་དུམ་ཝཱ་རའི་འབྲས་བུ་དང་པུ་རུ་ཤ་ཀའི་འབྲས་བུ་དང་འབྲ་གོ་དང་རྒུན་འབྲུམ་རྣམས་ཀྱི་ཁུ་བ་སྟེ་བཏུང་བའི་རྣམ་གྲངས་བརྒྱད་སྦྱར་ཏེ་ཕུལ་ཞིང་། བཅོམ་ལྡན་འདས་ཀྱིས་ཀྱང་བཞེས་ཏེ་དགེ་སློང་རྣམས་ལ་དུས་དང་དུས་མ་ལགས་པར་བཏུང་བའི་ཁྱད་པར་ཕྱེས་ཏེ་རྗེས་སུ་གནང་ངོ་། །དེ་ནས་དྲང་སྲོང་དེས་སང་གི་གདུགས་ཚོད་ལ་གཤེགས་པར་ཞུས་ནས་དེའི་སྟ་གོན་བརྩམས་པ་ན་དྲང་སྲོང་རི་བོས་མཐོང་ནས་ཅི་བྱེད་ཅེས་གཏམ་དྲིས་པས། སངས་རྒྱས་དགེ་འདུན་དང་བཅས་པ་སྤྱན་འདྲེན་ནོ། །ཡང་སྨྲས་པ། སངས་རྒྱས་དགེ་འདུན་བྱ་བ་སུ་ཞིག དེར་སངས་རྒྱས་དང་དགེ་འདུན་གྱི་བསྔགས་པ་བརྗོད་པས། དྲང་སྲོང་རི་བོ་སེམས་དགའ་བར་གྱུར་ཏེ་བཅོམ་ལྡན་འདས་ཀྱིས་སྤྱན་སྔར་ཕྱིན་པ་དང་། རྒྱང་མ་ནས་སངས་རྒྱས་ཀྱི་སྐུ་མཐོང་བས་དགེ་སློང་བསམ་གཏན་ལ་གནས་པ་བས་ཁྱད་པར་དུ་འཕགས་པའི་དགའ་བ་དང་བདེ་བ་སྐྱེས་ཏེ་ཞབས་ལ་ཕྱག་བྱས་ཏེ་འཁོད་པ་ན། དེ་ལ་བཅོམ་ལྡན་འདས་ཀྱིས་ཆོས་བསྟན་པས་སྟན་དེ་ཉིད་དུ་འཁོད་བཞིན་པར་ཕྱི་མི་འོང་བའི་འབྲས་བུ་མངོན་དུ་བྱས་སོ། །དེར་རབ་ཏུ་བྱུང་བར་གསོལ་པ་དང་། སྟོན་པས་འཁོར་རྣམས་ལ་གོ་བར་བྱོས་ལ་དྲིས་ཤིག དེ་ནས་དྲང་སྲོང་རི་བོ་བྲམ་ཟེའི་ཁྱེའུ་རྣམས་ཀྱི་སར་ཕྱིན་ནས་སྨྲས་པ། ཁྱེད་རྣམས་ཤེས་པར་གྱིས་ཤིག བདག་ནི་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འདོད་ན་ཁྱེད་ཇི་ལྟར་བྱེད། དེ་དག་གིས། བདག་ཅག་ཀྱང་མཁན་པོའི་རྗེས་སུ་རབ་ཏུ་བྱུང་བར་འཚལ་ལོ། །དེ་རྣམས་ཐམས་ཅད་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། སྟོན་པས་ཚུར་ཤོག་གི་སྒོ་ནས་བསྙེན་པར་རྫོགས་སོ། །དེ་ནས་ཕྱིར་ཉིན་གདུགས་ཚོད་ལ་གཤེགས་པ་ན་དྲང་སྲོང་ཀཻ་ནེ་ཡས་དྲང་སྲོང་རི་བོ་འཁོར་ལྔ་བརྒྱ་དང་བཅས་པ་རབ་ཏུ་བྱུང་ནས་གྲལ་དུ་འཁོད་པ་མཐོང་ནས། ཁྱོད་རབ་ཏུ་བྱུང་ངམ། བྱུང་ངོ་། །དེར་ཀཻ་ནེ་ཡས་ཀྱང་སྟོན་པ་འཁོར་དང་བཅས་པ་བཤོས་གསོལ་ཟིན་པའི་འོག་ཏུ་གོང་བཞིན་འཁོར་རྣམས་ལའང་གོ་བར་བྱས་ཏེ་འཁོར་ལྔ་བརྒྱ་དང་བཅས་སྟོན་པས་ཚུར་ཤོག་གིས་བསྙེན་པར་རྫོགས་ནས་དྲང་སྲོང་གཙོ་བོ་དེ་གཉིས་ལ་བཅོམ་ལྡན་འདས་ཀྱིས་གདམས་ངག་བྱིན་ནས། དེ་གཉིས་ཀྱིས་ཀྱང་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དགེ་སློང་ལྷག་མ་དེ་དག་ལས་ལྔ་བརྒྱ་ནི་ཚེ་དང་ལྡན་པ་ཀ་པི་ལ་ཆེན་པོ་ལ་གཏད། ཕྱེད་དང་གཉིས་བརྒྱ་ནི་མོའུ་འགལ་གྱི་བུ་ལ་གཏད། ཕྱེད་དང་ཉིས་བརྒྱ་ནི་ཤཱ་རིའི་བུ་ལ་གཏད་ནས་དེ་དག་ཆུ་ཀླུང་གསེར་ལྡན་གྱིས་འགྲམ་དུ་དབྱར་གནས་པར་དམ་བཅས་སོ། །དེ་རྣམས་ཀྱིས་སོ་སོར་གདམས་ངག་བསྟན་པས་ཀ་པི་ནིའི་རྣམས་ཀྱིས་དགྲ་བཅོམ་པ་ཐོབ། མོའུ་འགལ་གྱི་བུ་རྣམས་ཀྱིས་ཕྱིར་མི་འོང་དང་། ཤཱ་རིའི་བུ་རྣམས་ཀྱིས་རྒྱུན་དུ་ཞུགས་པ་ཐོབ་པར་གྱུར་ནས། དབྱར་གྲོལ་བ་ན་བཅོམ་ལྡན་འདས་ཀྱི་སྤྱན་སྔར་ཕྱིན་ཞིང་། བཅོམ་ལྡན་འདས་ཀྱིས་ཀྱང་དེ་དག་ལ་གོང་མའི་ཡིད་ལ་བྱེད་པའི་ལུང་ཕོག་ཅིང་། དེ་དག་གིས་ཀྱང་བརྩོན་པས་ཐམས་ཅད་ཀྱིས་དགྲ་བཅོམ་པ་ཉིད་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་པ་ལ། སྔོན་ཚེ་དང་ལྡན་པ་ཀ་པི་ན་ཆེན་པོ་སོགས་གསུམ་པོ། འདི་དྲང་སྲོང་ཞིག་གི་སློབ་མའི་གཙོ་བོ་མཆོག་གསུམ་དུ་གྱུར་ནས། དེ་གསུམ་ལ་དྲང་སྲོང་དེས་འཁོར་རྣམས་བགོས་ཏེ། གཅིག་ལ་ལྔ་བརྒྱ་དང་། གཞན་གཉིས་ལ་ཉིས་བརྒྱ་ལྔ་བཅུ་རེ་གཏད་པ་ལས། ལྔ་བརྒྱས་བསམ་གཏན་བཞི་དང་མངོན་ཤེས་ལྔ་རྣམས་ཐོབ་ཅིང་ཕྱེད་དང་སུམ་བརྒྱས་གཟུགས་མེད་དང་། ཕྱེད་དང་སུམ་བརྒྱས་གཟུགས་ཀྱི་སེམས་ཐོབ་པར་གསུངས་ཤིང་། གཞན་ཡང་དགེ་སློང་དེ་རྣམས་དབང་པོ་རྣོ་རྟུལ་གྱིི་ཁྱད་པར་ཡིན་ཏེ། དབང་པོ་རྟུལ་པོ་དག་ཤཱ་རིའི་བུའི་བསྐྱངས་པས་རྒྱུན་ཞུགས་ཐོབ་ཅིང་། ཀ་པི་ན་ལྟ་བུ་གཞན་གྱིས་བསྐྱངས་ན་དྲོད་ཙམ་ཡང་ཐོབ་པར་མི་འགྱུར་རོ་གསུངས། ཡང་དེ་དག་གི་སྔོན་གྱི་ལས་ཀྱི་རྒྱུ་གསོལ་བ་ན། སྔོན་སངས་རྒྱས་འོད་སྲུང་གི་དུས་སུ་དྲང་སྲོང་འདི་གཉིས་ཝཱ་རཱ་ཎ་སཱིར་ཁྱིམ་བདག་མཛའ་བཤེས་གཉིས་སུ་གྱུར་ཏེ། ཕྱིས་གཉིས་ཀས་ཁྱིམ་སྤངས་ནས་རབ་ཏུ་བྱུང་ཞིང་སྡེ་སྣོད་ལ་བསླབས་པས་གཉིས་ཀ་ཆོས་སྨྲ་བའི་སྤོབས་པ་ཅན་དུ་གྱུར་ཏེ་ཟས་གོས་སོགས་མཐུན་རྐྱེན་གྱིས་འབྱོར་བས་སོ་སོར་སློབ་མ་ལྔ་བརྒྱ་རེ་བསྡུས་ནས་ཚེ་གཅིག་ཏུ་ཚངས་པར་སྤྱོད་དོ། །དེ་གཉིས་འཆི་ཁར་མ་འོངས་པ་ན་སངས་རྒྱས་ཤཱཀྱ་ཐུབ་པའི་བསྟན་པ་ལ་དགྲ་བཅོམ་པ་ཐོབ་པར་སྨོན་ལམ་བཏབ་ཅིང་། དེའི་སློབ་མ་རྣམས་ཀྱང་། བདག་ཅག་གིས་ཀྱང་ཁྱེད་ལ་བརྟེན་ནས། སངས་རྒྱས་བཅོམ་ལྡན་འདས་མཉེས་པར་བྱས་ཏེ་འབྲས་བུ་ཐོབ་པར་གྱུར་ཅིག་ཅེས་སྨོན་ལམ་དུ་བྱས་པས་དེ་དག་ད་ལྟར་དྲང་སྲོང་འཁོར་བཅས་སུ་གྱུར་ཏེ་འབྲས་བུ་ཐོབ་པར་གསུངས་སོ། །འདིས་ནི་སྐྱབས་འགྲོ་དང་བསླབ་གཞི་སྲུང་བ་སོགས་ཀྱི་ཕན་ཡོན་བསྟན་པ་ཡིན་ནོ། །