ཡང་གླེང་གཞི་སྔར་ལྟར་གྱིས་ཚེ་དང་ལྡན་པ་དགའ་བྱེད་ཡི་དྭགས་ཀྱི་གནས་སུ་བྱོན་པ།

༈ ཡང་གླེང་གཞི་སྔར་ལྟར་གྱིས་ཚེ་དང་ལྡན་པ་དགའ་བྱེད་ཡི་དྭགས་ཀྱི་གནས་སུ་བྱོན་པས། དེར་ཡི་དྭགས་མོ་སྒྲེན་མོར་འདུག་ལ་རང་གི་སྐྲས་གཡོགས་པ་སྡོང་པོ་མེས་རེག་མ་འདྲ་ལ་དམུས་ལོང་དུ་འདུག་པ་དེའི་ཁ་སྣ་ནས་སྲིན་བུ་མང་པོ་བྱུང་བ་དང་དེས་དཔག་ཚད་དུ་མར་དྲི་མནམ་པས་གང་བར་བྱེད་དེ་ཕན་ཚུན་རྒྱུག་ལ་དེ་གང་དུ་འགྲོ་བ་དེ་དང་དེར་ཁྱི་སྔོ་བཀྲ་དག་གིས་གཙེས་ནས་རྒྱུ་དེས་སྡུག་བསྔལ་མི་བཟད་པའི་ཚོར་བ་མྱོང་སྟེ། སྐད་ཆེན་པོས་ངུ་བ་མཐོང་ནས། དེའི་ལས་ཀྱི་རྒྱུ་བརྟགས་པས་རང་ཉིད་ཀྱིས་རྟོགས་པར་གྱུར་མོད། སྐྱེ་བོ་མང་པོ་ལ་ཕན་པའི་ཕྱིར་བཅོམ་ལྡན་འདས་ལ་ཞུས་པས། སྔོན་སངས་རྒྱས་འོད་སྲུང་གི་བསྟན་པ་ལ་དགེ་སློང་མ་སྡེ་སྣོད་གསུམ་ལ་མཁས་ཤིང་ཆོས་སྨྲ་བ་མོར་གྱུར་ཏེ་རྙེད་པ་ཆེན་པོ་བྱུང་ནས། དེས་སྦྱིན་བདག་རྣམས་ལ་བསྐུལ་ཏེ། གཙུག་ལག་ཁང་དང་མཆོད་རྟེན་བྱེད་དུ་བཅུག་ནས། སངས་རྒྱས་ལ་སོགས་པ་དང་དགེ་སློང་མའི་དགེ་འདུན་ལ་ཕུལ་ཏེ། དགེ་སློང་མ་རྣམས་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་ལས། དེ་བྱད་གཟུགས་དང་ལང་ཚོ་དང་ཆོ་རིགས་ཀྱིས་རྒྱགས་པས་དྲེགས་ནས་ཚུལ་ཁྲིམས་བསྲུང་མ་ནུས་ཏེ། དེས་དགེ་འདུན་གྱི་དཀོར་དང་མཆོད་རྟེན་གྱིས་དཀོར་དང་འཚོ་བ་ནར་མ་དང་ཕྱོགས་བཞིའི་དགེ་འདུན་གྱི་དཀོར་གྱི་དགའ་མགུར་སྤྱད་པས་དགེ་སློང་མ་རྣམས་ཀྱིས་ཚོར་ཏེ། དེ་དགེ་སློང་མའི་གནས་ནས་བསྐྲད་པས། དེ་ཁྲོ་བའི་སེམས་སྐྱེས་ཏེ་སློབ་པ་དང་མི་སློབ་པའི་དགེ་སློང་མ་མང་པོ་ཞིག་ལ་ཚིག་རྩུབ་ཀྱིས་སྤྱོས་ཤིང་སྦྱིན་བདག་གི་ཁྱིམ་དུ་ཡང་འདི་དག་ནི་ཚུལ་ཁྲིམས་འཆལ་བ་དང་སྡིག་པའི་ཆོས་ཅན་ཡིན་ནོ་ཞེས་བསྔགས་པ་མ་ཡིན་པ་བརྗོད་ལ། དེ་དག་གི་རྙེད་པ་དང་བཀུར་སྟིའི་བར་ཆད་ཀྱང་བྱས། སྡང་མིག་གིས་ཀྱང་བལྟས་པས་ལས་དེས་ཡི་དྭགས་སུ་སྐྱེས་ཏེ། དེ་ཡང་དེ་དག་གི་རྙེད་བཀུར་གྱི་བར་ཆད་བྱས་པས་ཡི་དྭགས་ཀྱི་རིས་དང་། ཚིག་རྩུབ་ཀྱི་སྤྱོས་པས་ཁ་སྣ་ནས་སྲིན་བུ་མང་པོ་བྱུང་བ་དང་། སྐུར་བ་བཏབ་པས་དཔག་ཚད་དུ་མར་དྲི་མ་ངན་པས་ཁྱབ་པ་དང་། སྡང་མིག་གིས་བལྟས་པས་དམུས་ལོང་དང་། དཀོར་ལ་སྤྱོད་པས་ཁྱི་སྔོ་བཀྲས་ཟ་བར་གྱུར་པར་གསུངས་སོ། །