གཞན་གྱི་བསོད་ནམས་ཀྱི་གེགས་བགྱིས་པའི་ཉེས་དམིགས་དང་ཚུལ་ཁྲིམས་བསྲུང་ཞིང་སྨོན་པའི་ཕན་ཡོན་ཀྱང་བསྟན།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་བྲམ་ཟེ་དབུལ་པོ་རྒས་འཁོགས་ཤིག་ཡོད་པ་དེ་རྒྱལ་བྱེད་ཀྱི་ཚལ་དུ་སོང་བ་ན། བཅོམ་ལྡན་འདས་ཀྱིས་འཁོར་མང་པོ་ལ་ཆོས་སྟོན་པ་མཐོང་ནས། དེ་ལ་བུ་ཡི་འདུ་ཤེས་སྐྱེས་ཏེ། ངའི་བུ་ཞེས་བཅོམ་ལྡན་འདས་ཀྱི་ཐད་དུ་སོང་ནས་མགུལ་ལ་འཇུས་སོ། །དེ་དགེ་སློང་རྣམས་ཀྱིས་བཀག་པ་ན། བཅོམ་ལྡན་འདས་ཀྱིས་དེ་མ་བཀག་ཅིག བཀག་ན་དེ་ཁྲག་དྲོན་མོ་བསྐྱུགས་ནས་འཆི་བར་འགྱུར་རོ་གསུངས། དེ་ནས་བྲམ་ཟེ་དེས་མགུལ་ནས་འཁྱུད་ཟིན་ནས་ཆོས་མཉན་པའི་ཕྱིར་འཁོད་པ་ན་བཅོམ་ལྡན་འདས་ཀྱིས་དེ་དང་མཐུན་པར་ཆོས་བསྟན་པས་སྟན་དེ་ཉིད་དུ་རྒྱུན་དུ་ཞུགས་པ་ཐོབ་ཅིང་། སྟོན་པས་ཚུར་ཤོག་གིས་བསྙེན་པར་རྫོགས་པས་དགྲ་བཅོམ་པའི་གོ་འཕང་ཐོབ་བོ། །དེའི་ལས་ཀྱི་རྒྱུ་གསོལ་བ་ན། བཅོམ་ལྡན་འདས་ཀྱིས། བྲམ་ཟེ་འདི་ནི་བདག་གི་སྐྱེ་བ་ལྔ་བརྒྱའི་ཕ་ཡིན་ལ། དེའི་བག་ཆགས་ཡོད་པས་ད་ལྟར་མཐོང་བ་དང་བུའི་འདུ་ཤེས་སྐྱེ་བར་འགྱུར་བ་ཡིན་ལ། དེའི་ཚེ་ངེས་པར་འབྱུང་བ་དང་སྦྱིན་པའི་བར་ཆད་བྱས་པས། ཕྱིན་ཆད་འདི་ངའི་ཕར་མ་གྱུར་ཅིག་ཅེས་ངས་སྨོན་ལམ་བཏབ་པ་དང་། ཡབ་ཟས་གཙང་མས་སངས་རྒྱས་རྣམ་གཟིགས་ཀྱི་སྤྱན་སྔར་བདག་སངས་རྒྱས་ཀྱི་ཡབ་ཏུ་གྱུར་ཅིག་ཅེས་སྨོན་ལམ་བཏབ་པ་སྟེ་རྒྱུ་གཉིས་ཀྱིས་ད་ལྟར་གྱི་བསྐྱེད་ཡབ་ཏུ་མ་གྱུར་ཏོ། །སྔོན་བྱང་ཆུབ་སེམས་དཔའི་སྦྱིན་སོགས་ལ་བར་ཆད་བགྱིས་པས་ད་ལྟར་དབུལ་ཞིང་ཉམ་ཐག་སྟེ་རྒས་འཁོགས་སུ་གྱུར་པ་དང་། སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་ཚུལ་ཁྲིམས་གཙང་མར་བསྲུང་སྟེ་འཆི་ཁར་སྨོན་ལམ་བཏབ་པས་དགྲ་བཅོམ་པའི་བར་དུ་གྱུར་ཏོ་གསུངས། འདིས་གཞན་གྱི་བསོད་ནམས་ཀྱི་གེགས་བགྱིས་པའི་ཉེས་དམིགས་དང་ཚུལ་ཁྲིམས་བསྲུང་ཞིང་སྨོན་པའི་ཕན་ཡོན་ཀྱང་བསྟན་ཏོ། །