བྱམ་སྙིང་རྗེ་དང་དགེ་བཅུའི་འབྲས་བུ་བསྟན།

༈ ཡང་སྐབས་འདིར་འཁོར་ལྔ་སྡེ་བཟང་པོ་དགྲ་བཅོམ་པ་ལ་བཀོད་པའི་གླེང་གཞི་ལས་འཕྲོས་ཏེ་རྒྱལ་པོ་བྱམས་པའི་སྟོབས་ཀྱི་རྟོགས་བརྗོད་འབྱུང་སྟེ། སྤྱི་ཁོག་གོང་དུ་མཛངས་བླུན་ལས་གསུངས་པ་དང་མཚུངས་ལ། དེར་རྒྱལ་པོ་རྣམ་ཐོས་བུའི་བཙོན་ར་ནས་གཟི་བྱིན་འཕྲོག་པའི་གནོད་སྦྱིན་ལྔ་བྲོས་ཏེ་དེར་འོང་ནས། ཡམས་ནད་བཏང་བས་ཡུལ་དེའི་དུད་འགྲོ་ཡན་ཆད་རྒྱལ་པོའི་བྱམས་པ་ཆེན་པོའི་མཐུས་བསྲུང་བས་གནོད་པར་མ་ནུས་ནས། རྒྱལ་པོའི་སྤྱན་སྔར་བྲམ་ཟེའི་ཆ་ལུགས་སུ་སྤྲུལ་ནས། འཕྲལ་དུ་ཕྱུང་བའི་ཁྲག་དྲོན་མོ་གནང་བར་ཞུས་པས། རྒྱལ་པོས་དེ་དག་མི་མ་ཡིན་དུ་རིགས་ནས་རང་གི་ཁྲག་སྦྱིན་པར་ཆད་པ་ན། སྨན་པ་རྣམས་བོས་ཀྱང་དེ་དག་གིས་རྒྱལ་པོའི་སྐུ་མཚལ་ཕྱུང་འདོད་པ་སུ་ཡང་མ་བྱུང་བས། རྒྱལ་པོ་རང་ཉིད་ཀྱིས་མེ་ལོང་བླངས་ནས་རང་གི་རྩ་ཆེན་ལྔ་ལ་ཁྲག་གཏར་ནས་བྱིན་པས། ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་དཀའ་བ་སྤྱད་པར་མཐོང་སྟེ་ཧ་ཅང་ཡུན་རིང་བར་འོ་བརྒྱལ་ན་མི་རུང་ངོ་སྙམ་ནས། བྱང་ཆུབ་སེམས་དཔའི་ལུས་ལ་ལྷའི་གཟི་བྱིན་བསྣན་ནས། གཏར་ཀ་དེ་དག་ཀྱང་ཆེ་རབ་ཏུ་སྤྲུལ་ནས་གནོད་སྦྱིན་ལྔ་པོ་དེ་དཀའ་བ་མེད་པར་ཚིམས་པར་བྱས་སོ། །དེའི་ཚེ་བྱང་ཆུབ་སེམས་དཔས། སྦྱིན་པ་ཆེན་པོར་གྱུར་པ་འདི་ཡིས་ནི། །འགྲོ་བ་རང་བྱུང་སངས་རྒྱས་འགྱུར་བར་ཤོག ། སྔོན་གྱི་རྒྱལ་དབང་རྣམས་ཀྱིས་མ་བསྒྲལ་གང་། །སྐྱེ་བོ་སྲིད་པའི་ཆུ་ལས་སྒྲོལ་བར་ཤོག ། ཅེས་སྨོན་ལམ་བྱས་སོ། །དེ་ནས་གནོད་སྦྱིན་དེ་དག་གིས། སྙིང་རྗེ་ཆེན་པོ་ཁྱོད་རྩོལ་བ་འདིས་ཅི་ཞིག་སྒྲུབ། བྱང་ཆུབ་སེམས་དཔས། བླ་ན་མེད་པའི་བྱང་ཆུབ་སྒྲུབ་བོ། །དེ་དག་གིས་བདག་ཅག་ཁྱོད་ཀྱི་ཉན་ཐོས་ཀྱི་དང་པོར་གྱུར་ཅིག བྱང་ཆུ་སེམས་དཔས། ཁྱེད་རྣམས་ནི་སྲོག་གཅོད་པ་ཕ་རོལ་གྱི་སྲོག་འཕྲོག་པ་ཡིན་ན། ཇི་ལྟར་ངས་དེ་འདྲ་བདག་ཉན་ཐོས་ཀྱི་དང་པོར་བྱ། དེ་དག་གིས་སྨྲས་པ། སྙིང་རྗེ་ཆེན་པོ་བདག་ཅག་ལ་བཀའ་ཅི་སྩལ། བྱང་ཆུབ་སེམས་དཔས། དགེ་བ་བཅུའི་ལས་ཀྱི་ལམ་ཡང་དག་པ་བླངས་ཏེ་གནས་པར་བྱིན་གྱིས་ཤིག དེ་ཐོས་པ་དང་གནོད་སྦྱིན་རྣམས་ཀྱིས་དགེ་བཅུའི་ལས་ཀྱི་ལམ་ཡང་དག་པར་བླངས་ནས། ཀྱེ་མ་དགེ་བའི་རྩ་བ་འདིས་ནི་གང་གི་ཚེ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེའི་ཚེ་བདག་ཅག་འདིའི་ཉན་ཐོས་ཀྱི་དང་པོར་གྱུར་ཅིག ཅེས་སྨོན་ལམ་དུ་བྱས་པར་གསུངས་སོ། །འདིས་ནི་བྱམ་སྙིང་རྗེ་དང་དགེ་བཅུའི་འབྲས་བུ་བསྟན་ཏོ། །