ཚུལ་ཁྲིམས་མ་བསྲུངས་པའི་ཉེས་དམིགས་དང་བསླབ་གཞི་ཕྲ་མོ་བསྲུངས་པ་དང་སངས་རྒྱས་ལ་དད་པའི་ཕན་ཡོན་རྣམས་བསྟན་པ།

༈ ཡང་བཅོམ་ལྡན་འདས་མཉན་ཡོད་ནས་རྒྱལ་པོའི་ཁབ་ཏུ་གཤེགས་པའི་ལམ་ཞིག་ན་དགོན་པའི་གླང་པོ་ཆེ་ཞིག་སེང་གེ་ལ་འཇིགས་ནས་རང་གི་ཁྱུ་དེད་ནས་རིའི་རྩེ་མོར་འཛེགས་ཏེ་འཁོད་པ་ལས། གླང་པོའི་གཙོ་བོ་དེས་རྒྱང་མ་ནས་བཅོམ་ལྡན་འདས་མཐོང་བ་དང་རབ་ཏུ་དགའ་སྟེ། རི་དེ་ལས་བབས་ནས་ཤིང་ནྱ་གྲོ་དྷའི་ཡལ་ག་དག་ཁྱེར་ཏེ་བཅོམ་ལྡན་འདས་ལ་ཕྱག་དང་བསྐོར་བ་བྱས་ནས། སྐུ་ལ་ཉི་མའི་འོད་ཀྱིས་གདུང་བར་མི་འགྱུར་བར་བྱ་བའི་ཕྱིར་དབུའི་སྟེང་དུ་ནྱ་གྲོ་དྷའི་ཡལ་ག་འཛིན་ཅིང་། ཕྱི་བཞིན་དུ་འབྲངས་ནས་གྲོང་གཞན་དུ་གཤེགས་ཀྱི་བར་བསྐྱལ་ཏེ་ཕྱིར་ལོག་པ་ན། ལམ་དུ་སེང་གེས་བསད་དེ་ཚེ་འཕོས་ནས་ལྷའི་གནས་སུ་སྐྱེས་ཏེ། དེས་གནས་གསུམ་ལ་བརྟགས་པས་སྔོན་ཇི་ལྟར་གྱུར་པ་ཤེས་ནས་ཞག་མ་ལོན་པར་རྒྱལ་བྱེད་ཀྱི་ཚལ་དུ་འོངས་ནས། བཅོམ་ལྡན་འདས་ལ་ལྷའི་མེ་ཏོག་སྣ་ཚོགས་པས་མཆོད་ཅིང་ཆོས་ཉན་པས་རྒྱུན་དུ་ཞུགས་པའི་འབྲས་བུ་ཐོབ་སྟེ་དགའ་བའི་ཚིག་གསུམ་བརྗོད་པ། བཙུན་པ་བཅོམ་ལྡན་འདས་ཀྱིས་བདག་གི་ཁྲག་དང་མཆིལ་མའི་རྒྱ་མཚོ་བསྐམས་པ་དང་རུས་པའི་ལ་བརྒལ་བ་དང་། ངན་སོང་གི་སྒོ་བཅད་པ་དང་། མཐོ་རིས་དང་ཐར་པའི་སྒོ་རྣམས་ཕྱེ་བ་དང་། བདག་ལྷ་དང་མིའི་ནང་དུ་བཞག་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས་ལྷ་རྣམས་ཀྱིས་ཀྱང་མ་བགྱིས་ནང་མི་དང་གཉེན་གྱི་ཚོགས་རྣམས་ཀྱིས་ཀྱང་མ་བགྱིས། སྔོན་གྱི་མཚུན་རྣམས་ཀྱིས་ཀྱང་མ་བགྱིས་དགེ་སློང་དང་བྲམ་ཟེ་རྣམས་ཀྱིས་ཀྱང་མ་བགྱིས་ལགས་སོ། །ཉེས་པ་མང་པོར་ལྡན་པའི་ངན་སོང་ལམ། །ཤིན་ཏུ་མི་བཟད་ཁྱོད་ཀྱི་མཐུ་ཡིས་བཅད། །བསོད་ནམས་རབ་ལྡན་མཐོ་རིས་འགྲོ་བ་ཕྱེ། །མྱ་ངན་འདས་པའི་ལམ་ཡང་བདག་གིས་ཐོབ། །བདག་གིས་དེ་རིང་ཉེས་པ་སྤངས་པའི་མིག ། ཤིན་ཏུ་རྣམ་དག་ཁྱོད་ལ་བརྟེན་ནས་ཐོབ། །བདག་ནི་སྡུག་བསྔལ་རྒྱ་མཚོའི་ཕ་རོལ་བརྒལ། །འཕགས་པ་དགྱེས་པའི་ཞི་བའི་གོ་འཕང་འཐོབ། །མི་མཆོག་དབང་པོ་མི་དང་ལྷས་མཆོད་པ། །སྐྱེ་དང་རྒ་དང་འཆི་བའི་ནད་སྤངས་པ། །སྲིད་པ་སྟོང་དུ་མཐོང་བར་དཀའ་བ་ཡི། །ཐུབ་པ་ཁྱོད་ནི་དེང་མཐོང་འབྲས་བུ་ཡོད། །ཅེས་བརྗོད་ཅིང་ཞབས་ལ་ཕྱག་བྱས་ཏེ་ལན་གསུམ་བསྐོར་ནས་སླར་ལྷ་ཡུལ་དུ་སོང་ངོ་། །ཕྱིར་ནང་དགེ་སློང་རྣམས་ཀྱིས་དེའི་ལས་ཀྱི་རྒྱུ་གསོལ་པ་ན། བཅོམ་ལྡན་འདས་ཀྱིས་འདི་ལ་འདས་པའི་ལས་ཀྱི་ཤས་ཀྱང་ཡོད། ད་ལྟར་བྱུང་བའི་ལས་ཀྱི་ཤས་ཀྱང་ཡོད་དེ། འདས་པའི་ལས་ནི་འདི་ཉིད་སྔོན་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་དགེ་སློང་བསླབ་པ་ལ་མ་གུས་ཤིང་གཡེལ་བར་གྱུར་ཏེ་བསླབ་གཞི་ཆེ་ཕྲ་དུ་མ་ལས་འགལ་བས་དུད་འགྲོའི་ནང་དུ་སྐྱེས་ཤིང་། དེའི་ཚེ་བསླབ་གཞི་ཁ་ཅིག་བསྲུང་ཞིང་སྨོན་ལམ་བཏབ་པས་ད་ལྟར་ཆོས་ཐོས་ཤིང་བདེན་པ་མཐོང་བར་གྱུར་པའོ། །ད་ལྟར་བྱུང་བ་ནི། གླང་པོ་ཆེར་གྱུར་ནས་ང་ལ་བསྙེན་བཀུར་བྱས་ཏེ། སེམས་དགའ་བར་བྱེད་པ་དེས་ནི་ལྷའི་ནང་དུ་སྐྱེས་སོ་གསུངས། འདིས་ནི་ཚུལ་ཁྲིམས་མ་བསྲུངས་པའི་ཉེས་དམིགས་དང་བསླབ་གཞི་ཕྲ་མོ་བསྲུངས་པ་དང་སངས་རྒྱས་ལ་དད་པའི་ཕན་ཡོན་རྣམས་བསྟན་པའོ། །