སྐྱབས་སུ་འགྲོ་བ་དང་བསླབ་གཞི་བླང་བ་སྦྱིན་པའི་ཕན་ཡོན་རྣམས་བསྟན་པ།
༈ ཡང་གླིང་གཞི་མཉན་ཡོད་ན་བཞུགས་པའི་ཚེ། ཕྱིའི་རྒྱ་མཚོ་ཆེན་པོ་ན་ཀླུའི་རྒྱལ་པོ་དབྱིག་ཅེས་བྱ་བའི་བུ་དབྱིག་བཟང་ཞེས་བྱ་བ་ཡོད་དེ། ཀླུ་རྣམས་ཀྱི་ཆོས་ཀྱིས་ནི་ཉིན་དུས་གསུམ་མཚན་དུས་གསུམ་དུ་ལུས་ལ་བྱེ་ཚན་ལ་བབ་པས་སྡུག་བསྔལ་བར་འགྱུར་བ་ལས། བུ་དེས་ཕ་མ་ལ་དྲིས་པ། བདག་གིས་ཡུན་ཇི་སྲིད་ཅིག་གི་བར་འདིས་སྡུག་བསྔལ་མྱོང་། ཕ་མས་ཇི་སྲིད་དུ་སྐལ་བ་མཉམ་པ་འདི་ཡོད་པ་དེ་སྲིད་དུའོ། །དེ་ནས་བུ་དེས་བལྟས་པས། ཀླུ་ཆེན་པོ་ཁ་ཅིག་བྱེ་ཚན་དེ་མི་འབབ་པར་མཐོང་ནས། ཡང་དྲིས་པ། ལོག་པར་ལྟུང་བར་འདྲ་ན་ཀླུ་ཆེན་པོ་འདི་དག་ལ་བྱེ་མ་མི་འབབ་ལ། བདག་ཅག་ལ་འབབ། ཕ་མས་ཀླུ་ཆེན་པོ་འདི་དག་ཆེ་བར་གྲགས་པ་ཡིན་ཏེ་དེས་མི་འབབ་བོ། །ཡང་བལྟས་པས་རང་ལས་དམན་པ་ཁ་ཅིག་ལའང་མི་འབབ་པར་མཐོང་ནས་དྲིས་པས། དེ་དག་གིས་སྐྱབས་འགྲོ་དང་བསླབ་གཞི་བླངས་པས་མི་འབབ་བོ། །དེ་ཐོས་པས་དགའ་ནས་སྐྱབས་འགྲོ་དང་བསླབ་གཞི་ག་ལས་བྱུང་དྲིས་པས། ཡུལ་དབུས་ན་སངས་རྒྱས་བྱོན་ཏེ་དེས་ནི་བདུད་རྩིའི་ཆར་འབེབས་པས་དེ་ལས་སོ། །བུས་སྨྲས་པ། ཡབ་ཡུམ་གྱིས་བདག་ལ་གནང་བ་སྩོལ་དང་བདག་དེར་ཕྱིན་ནས་བླང་བར་བགྱིའོ། །ཕ་མས་སྨྲས་པ། བུ་མ་ལེན་ཅིག ལྷན་ཅིག་སྐྱེས་པའི་སྡུག་བསྔལ་འདི་ནི་ཆུང་གི། སྐྱབས་འགྲོ་དང་བསླབ་གཞི་བླངས་ཏེ་མ་བསྲུངས་ན་ངན་སོང་གསུམ་དུ་སྐྱེས་ཏེ། དེའི་སྡུག་བསྔལ་ནི་བཟོད་པར་དཀའ་འོ། །བུས་སྨྲས་པ། སྡུག་བསྔལ་འདི་ཞི་བའི་ཕྱིར་ཅི་ནུས་ཀྱིས་བསྲུང་བར་བགྱིའོ། །ཞེས་སྨྲས་ནས། ཀླུའི་བུ་དེས་ལྷའི་མེ་ཏོག་ཨུད་པ་ལ་དང་པདྨ་དང་ཀུ་མུ་དང་པདྨ་དཀར་པོ་རྣམས་ཀྱིས་ཐུ་བ་བཀང་སྟེ། རྒྱ་མཚོའི་ནང་ནས་མི་སྣང་བར་གྱུར་ནས་རྒྱལ་བྱེད་ཀྱི་ཚལ་དུ་ཕྱིན་པ་དང་། བཅོམ་ལྡན་འདས་ཀྱིས་འཁོར་མང་པོ་ལ་ཆོས་སྟོན་ཅིང་བཞུགས་པ་མཐོང་ངོ་། །དེ་མཐོང་བ་དང་དགའ་བ་ཆེར་སྐྱེས་ཏེ་མེ་ཏོག་རྣམས་སྐུ་ལ་གཏོར་ཞིང་ཞབས་ལ་ཕྱག་བྱས་ནས། སྐྱབས་སུ་འགྲོ་བ་དང་བསླབ་པའི་གཞི་རྣམས་མནོས་ཏེ་ཆོས་ཉན་པས། དེའི་ཀླུའི་བྱེ་མ་མེད་པར་གྱུར་པས་ལྷག་པར་ཡང་དགའ་སྟེ་སངས་རྒྱས་འཁོར་དང་བཅས་པ་ལ་ཇི་སྲིད་འཚོའི་བར་དུ་ཡོ་བྱད་ཐམས་ཅད་སྟོབ་པར་ཞུས་པས། གཞོན་ནུ་གཞན་དག་ལ་ཡང་ཕན་གདགས་དགོས་ཀྱིས་ཐོངས་ཤིག ཅེས་བཀའ་སྩལ་ཏེ་མ་གནང་ངོ་། དེ་ནས་བཅོམ་ལྡན་འདས་ཡུལ་མ་ག་དྷཱར་ལྗོངས་རྒྱུ་ཞིང་གཤེགས་པར་རིགས་ནས། དེའི་བར་གྱི་ལམ་ཀར་བསྙེན་བཀུར་བྱེད་པར་ཞུས་པར། ཅང་མི་གསུངས་པར་གནང་ངོ་། དེ་ནས་ཀླུའི་བུ་དེས་མཉན་ཡོད་ནས་རྒྱལ་པོའི་ཁབ་ཀྱིས་བར་གྱི་ལམ་ཐོག་ཐག་གསེག་མ་ལ་སོགས་ཀྱི་རྡུལ་ཉལ་ཉིལ་དང་མི་གཙང་བའི་རིགས་ཐམས་ཅད་མེད་པར་བྱས་ཏེ། ས་གཞི་ཐམས་ཅད་ནེའུ་གསེང་སྔོན་པོས་ཁྱབ་ཅིང་སྤོས་ཀྱི་ཆག་ཆག་བཏབ་པ། ངོས་གཡས་གཡོན་དུ་མེ་ཏོག་དང་འབྲས་བུ་ཅན་གྱི་ཤིང་རྣམ་པ་སྣ་ཚོགས་པ་བྱ་རིགས་སྣ་ཚོགས་སྐད་སྙན་པར་སྒྲོགས་པས་གང་བ་མཚེའུ་དང་ལྡེང་ཀ་དང་རྫིང་རྣམས་མེ་ཏོག་སྣ་ཚོགས་པ་དང་ཆུ་བྱ་སྣ་ཚོགས་པས་མཛེས་པར་སྤྲུལ་ཏེ་ལམ་ཐོག་ཐག་ཏུ་བུམ་པ་བཅུད་ཀྱིས་བཀོད་པ་དང་། གདུགས་དང་རྒྱལ་མཚན་བ་དན་རྔ་ཡབ་ལ་སོགས་པ་བསྒྲེངས་ཤིང་གློ་གཡས་གཡོན་དུ་གཟིམས་ཁྲི་དང་བླ་རེ་རིན་པོ་ཆེའི་དྲྭ་བ་དྲྭ་ཕྱེད་མེ་ཏོག་གི་ཆུན་འཕྱང་རྣམས་ཀྱིས་མཛེས་པར་སྤྲས་ཤིང་མི་མང་པོ་དག་ཀྱང་སྤྲུལ་ཏེ་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ལ་གདུགས་རྩིབས་བརྒྱ་པ་དང་བླ་རེ་འཛིན་ཅིང་རྔ་ཡབ་ནོར་བུའི་ཡུ་བ་ཅན་གཡོབ་པར་བྱེད་ལ་མེ་ཏོག་སྣ་ཚོགས་པའང་འཐོར་པར་བྱེད་དོ། །ཀླུའི་བུ་ཉིད་བཅོམ་ལྡན་འདས་ཀྱི་ཕྱིར་ལ་འབྲངས་ནས་སྤོས་དང་མེ་ཏོག་ལ་སོགས་པས་མཆོད་པར་བྱེད་ཅིང་། ཕྱོགས་གང་དུ་མཉེལ་གསོ་བའམ་བཞུགས་པར་བཞེད་པའི་ཕྱོགས་དེར། གདན་ཁྲི་དང་། གཞལ་མེད་ཁང་དང་། ཁ་ཟས་རྣམ་པ་སྣ་ཚོགས་པ་སོགས་ཇི་ལྟར་བཞེད་པ་ཐམས་ཅད་མ་ཚང་བ་མེད་པར་བྱས་ཤིང་བསྙེན་བཀུར་ཕུལ་ཞིང་མཐར་གྱིས་རྒྱལ་པོའི་ཁབ་ཏུ་བྱོན་ཏེ། འོད་མའི་ཚལ་བྱ་ཀ་ལན་ད་ཀ་གནས་པར་བཞུགས་སོ། །དེར་ཡང་ཟླ་བ་གསུམ་གྱི་བར་དུ་བསྙེན་བཀུར་བྱེད་པ་ཞུས་པས་གནང་སྟེ། ཀླུའི་རྒྱལ་པོས་ཡོད་བྱད་ཐམས་ཅད་སྦྱར་ཞིང་བསྙེན་བཀུར་ལ་ཉིན་ཐ་མར་བཅོམ་ལྡན་འདས་ལ་རས་ཡུག་འབུམ་རི་བའི་ན་བཟའ་དང་། དགེ་སློང་གཞན་རྣམས་ལའང་སོ་སོར་ཡོ་བྱད་ཐམས་ཅད་ཕུལ་ནས། སེམས་དད་པར་བྱས་ཏེ་སྤྱན་སྔར་འདུག་གོ ། དེར་བཅོམ་ལྡན་འདས་ཞལ་འཛུམ་པར་མཛད་པས། ཀུན་དགའ་བོས་རྒྱུ་རྐྱེན་གསོལ་བ་ན། ཀླུའི་བུ་འདི་དགེ་བའི་རྩ་བ་འདིས་བསྐལ་པ་བརྒྱའི་བར་དུ་ལོག་པར་ལྟུང་བར་མི་འགྱུར་རོ། །བསྐལ་པ་བརྒྱའི་བར་དུ་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་ཞིང་སྲིད་པ་ཐ་མ་པར་གྱུར་པ་ན་རང་སངས་རྒྱས་སྨོན་ལམ་ལེགས་པར་བཏབ་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །འདིས་ནི་སྐྱབས་སུ་འགྲོ་བ་དང་བསླབ་གཞི་བླང་བ་སྦྱིན་པའི་ཕན་ཡོན་རྣམས་བསྟན་པ་ཡིན་ནོ། །