དཀོན་མཆོག་མཆོད་པ་སོགས་སྦྱིན་པའི་འབྲས་བུ་བསྟན་པ།

༈ ཡང་གླེང་གཞི་མཉན་ཡོད་ན་བཞུགས་པའི་ཚེ། གྲོང་དེ་ན་ཁྱིམ་བདག་ཕྱུག་པོ་རྣམ་ཐོས་ཀྱི་བུའི་ནོར་ལ་འགྲན་བཟོད་པ་ཞིག་ལ། ཁྱེའུ་གཟུགས་བཟང་ཞིང་ལྟ་ན་སྡུག་པ་ཞིག་བཙས་ཏེ། དེ་ཉིད་ཆེར་སྐྱེས་ཏེ་ཡིག་རྩིས་དང་བརྟག་པ་བརྒྱད་སོགས་ལ་ཤིན་ཏུ་བྱང་བར་གྱུར་ཅིང་། དེ་ཉིད་དགུན་དང་སོས་ཀ་དང་དབྱར་གསུམ་དུ་སྡོད་གནས་ཀྱི་ཁྱིམ་ཁ་གསུམ་དུ་བརྩིགས་ཤིང་། སྐྱེད་མོས་ཚལ་གསུམ་དང་ཆུང་མ་ཡང་གསུམ་བླངས་ཏེ་ཁང་བཟང་གི་སྟེང་ན་འདུག་ཅིང་བུད་མེད་འབའ་ཞིག་གི་རོལ་མོས་རྩེ་ཞིང་དགའ་མགུར་སྤྱོད་དེ་རང་གི་བསོད་ནམས་ཀྱི་འབྲས་བུ་མྱོང་ངོ་། །དེ་ནས་ཕྱི་ཞིག་ན་དཔྱིད་ཀྱི་དུས་སུ་བབ་སྟེ་སྐྱེད་མོས་ཚལ་གྱི་ནགས་ཁྲོད་དུ་གཡོག་འཁོར་དང་བཅས་པ་དོང་ནས་རྩེ་ཞིང་གནས་པའི་ཚེ། བཅོམ་ལྡན་འདས་ཀྱིས་དེ་ཉིད་འདུལ་བའི་དུས་ལ་བབ་པར་གཟིགས་ནས། སྐྱེད་མོས་ཚལ་དེ་དང་ཉེ་བ་ཞིག་ཏུ་སྐྱེད་མོས་ཚལ་གཅིག་སྤྲུལ་ནས་དེར་འཁོར་མང་པོ་ལ་ཚངས་པའི་གསུང་གིས་ཆོས་སྟོན་པར་མཛད་དོ། །དེ་ནས་ཁྱིམ་བདག་གི་བུ་དེ་སངས་རྒྱས་ཀྱི་གསུང་གི་གདངས་དེ་ཐོས་པས། སྔོན་ཆད་འདི་ལྟ་བུ་མ་ཐོས་པས་སུ་ཡིན་བལྟ་བར་བྱའོ་སྙམ་དུ་འཁོར་དང་བཅས་པ་སྐྱེད་མོས་ཚལ་ཅིག་ཤོས་ཀྱི་ལོགས་སུ་ཕྱིན་པས། སངས་རྒྱས་ཀྱི་མཚན་དཔེའི་སྐུ་མཐོང་བ་ན་སྔོན་གྱི་དགེ་བའི་རྩ་བའི་མཐུས་དགེ་སློང་བསམ་གཏན་ལ་གནས་པའི་བདེ་བ་ལས་ཁྱད་པར་དུ་འཕགས་པའི་དགའ་བ་དང་བདེ་བ་སྐྱེས་ཏེ་ཕྱག་བྱས་ནས་ཆོས་ཉན་པར་འཁོད་པ་ན། བཅོམ་ལྡན་འདས་ཀྱིས་ཀྱང་དེའི་ཁམས་དབང་དང་མཐུན་པར་ཆོས་བསྟན་པས། ཁྱིམ་བདག་གི་བུ་དེ་སྟན་དེ་ཉིད་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་བོ། །དེ་ནས་དེས་ཕ་མ་ལ་ཞུས་ཏེ། སྟོན་པས་ཚུར་ཤོག་གིས་བསྙེན་པར་རྫོགས་ཤིང་ལུང་ཕོག་པས་དགྲ་བཅོམ་པ་མངོན་དུ་བྱས་ཏེ། དེས་ཕ་མ་གཉིས་པོའང་བདེན་པ་རྣམས་ལ་བཀོད་དེ་སྦྱིན་པ་དང་སྦྱིན་པའི་བགོ་བཤའ་རྣམས་ལ་ཡང་བཙུད་ནས་ཁྱིམ་དེ་ཆུ་དོང་ལྟ་བུར་གྱུར་པར་བྱས་སོ། །དེ་ནས་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། བཅོམ་ལྡན་འདས་ཀྱིས། འདི་སྨོན་ལམ་གྱི་དབང་ལས་གྱུར་ཏེ་སྔོན་བྱུང་བ་འདས་པའི་དུས་ན་བསྐལ་པ་དགུ་བཅུ་རྩ་གཅིག་པ་ལ་སྐྱེ་དགུའི་ཚེ་ལོ་བརྒྱད་ཁྲི་ཐུབ་པ་ན་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་ཏེ་མྱ་ངན་ལས་འདས་པར་གྱུར་པ་ན། གྲོང་ཁྱེར་གཉེན་ལྡན་གྱི་རྒྱལ་པོས་དེའི་སྐུ་གདུང་གི་མཆོད་རྟེན་བརྩེགས་ཏེ་མཆོད་རྟེན་ལ་སྲོག་ཤིང་གཟུགས་པར་བསམས་ནས་དེར་སྐྱེ་བོ་ཕལ་པོ་ཆེ་འདུས་པ་དང་། རྒྱལ་པོ་དེས་མཆོད་རྟེན་འདི་ལ་ནོར་མང་དུ་བསྐྱེད་པར་བྱེད་པ་དེ་མཆོད་རྟེན་འདི་ལ་སྲོག་ཤིང་ཚུགས་ཤིག་ཅེས་བསྒོའོ། །དེ་ཁྱིམ་བདག་ཅིག་གི་བུས་ཐོས་ཏེ། བདག་གིས་མཆོད་རྟེན་འདི་ལ་ནོར་ཆེས་མང་དུ་བསྐྱེད་དེ་སྲོག་ཤིང་གཟུགས་པར་བྱ་ན། བདག་ལ་དེ་ཙམ་གྱི་འབྱོར་པ་དག་ནི་མེད་ཀྱིས་བདག་གི་ཉེ་དུ་རྣམས་ཀྱི་ཐད་དུ་སོང་ལ་བཙལ་ཏེ་ནོར་བསྐྱེད་པར་བྱའོ་སྙམ་ནས་ཉེ་དུ་རྣམས་ཀྱི་སར་ཕྱིན་ནས་སྨྲས་པས། དེ་དག་གིས་ཀྱང་ཇི་ཙམ་བསྐྱེད་པ་དེ་སྙེད་སྦྱིན་པར་ཁས་བླངས་སོ། །དེ་ནས་ཁྱེའུ་དེ་དང་རྒྱལ་པོ་གཉིས་འགྲན་པར་བྱས་ཏེ་གོང་ནས་གོང་དུ་བསྐྱེད་དེ། གསེར་བྱེ་བ་དྲུག་ཅུའི་བར་བསྐྱེད་དོ། །དེ་ནས་གཞི་དེ་ལས་རྒྱལ་པོ་དེ་མི་དགའ་ཞིང་སེམས་ཁོང་དུ་ཆུད་པ་ལ། བློན་པོ་རྣམས་ཀྱིས་སྤྲོ་བ་བསྐྱེད་ནས་ནོར་གང་དགོས་སོ་སོ་ནས་ཕུལ་བར་ཞུས་ཤིང་། ཁྱེའུ་དེ་ལ་ཡང་གཉེན་འདུན་རྣམས་ཀྱིས། རྒྱལ་པོ་འདིའི་ཐུགས་བསྲུང་དགོས་ཀྱིས་རྒྱལ་པོ་དང་མ་འགྲན་ཅིག་ཅེས་བྱས་པས་དེས་ཀྱང་བཞག་གོ །དེར་རྒྱལ་པོ་ཡང་དགའ་བར་གྱུར་ནས་ཁྱེའུ་དེ་ལ་ཡང་ནོར་མང་དུ་བྱིན་ཅིང་མཆོད་རྟེན་དེའི་སྲོག་ཤིང་བཙུགས་ནས་མཐར་ཕྱིན་པར་བྱས་ཏེ་དུས་སྟོན་ཀྱང་བྱས་སོ། །དེ་ནས་ཁྱིམ་བདག་གི་བུ་དེས་མཆོད་རྟེན་ལ་བསྔོས་པའི་གསེར་བྱེ་བ་དྲུག་ཅུ་པོ་འདི་བདག་ཉིད་ཀྱིས་ལོངས་སྤྱད་པར་མི་ཕོད་པས་མཆོད་རྟེན་འདི་ཉིད་ལ་ཐམས་ཅད་འབུལ་བར་བྱའོ་སྙམ་ནས། ཁྱེའུ་དེ་ཉེ་དུ་དང་བཅས་པས་མཆོད་རྟེན་དེ་ལ་བཀུར་སྟི་ཆེན་པོ་བྱས་ཏེ། བདག་གང་དུ་སྐྱེས་པ་དེར་ཕྱུག་ཅིང་ནོར་མང་ལ་རིགས་མཐོ་ཞིང་གཟུགས་བཟང་བ་དང་སྟོན་པ་འདི་ལྟ་བུ་དང་ཕྲད་ནས་རབ་ཏུ་བྱུང་ཞིང་དགྲ་བཅོམ་པའི་གོ་འཕང་ཐོབ་པར་གྱུར་ཅིག ཅེས་སྨོན་ལམ་བྱས་ཤིང་། ཉེ་དུ་རྣམས་ཀྱིས་ཀྱང་། བདག་ཅག་རྣམས་ཀྱང་ཁྱོད་ཁོ་ན་ལ་བརྟེན་ནས། སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག ཅེས་བྱས་སོ། །དེའི་དུས་ཀྱི་ཁྱིམ་བདག་གི་ཁྱེའུ་དེ་ནི་འདི་ཉིད་ཡིན་ཏེ་ལས་ཀྱི་རྒྱུ་དེས་གང་དང་གང་དུ་སྐྱེས་ཀྱང་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ནས། གཟུགས་བཟང་ཞིང་ལྟ་ན་སྡུག་ལ་མཛེས་པར་གྱུར་ཏེ། ད་ལྟར་དགྲ་བཅོམ་པའི་གོ་འཕང་མངོན་དུ་བྱས་སོ། །དེའི་དུས་ཀྱི་ཉེ་དུ་རྣམས་ཀྱང་ད་ལྟར་གྱི་ཉེ་དུ་འདི་རྣམས་ཏེ། ང་ཉིད་མཉེས་པར་བྱས་ཏེ་མི་མཉེས་པར་མ་བྱས་སོ་གསུངས། འདིས་ནི་དཀོན་མཆོག་མཆོད་པ་སོགས་སྦྱིན་པའི་འབྲས་བུ་བསྟན་པ་ཡིན་ནོ། །