སེར་སྣའི་དབང་གིས་བྱིན་པ་སླར་ཕྲོགས་པ་སོགས་ཀྱི་ཉེས་དམིགས་དང་སྦྱིན་པ་དང་ཚུལ་ཁྲིམས་ཀྱི་ཕན་ཡོན་ཀྱང་བསྟན་པ།
༈ ཡང་བཅོམ་ལྡན་འདས་ཡུལ་གར་ག་ཞེས་བྱ་བར་ལྗོངས་རྒྱུ་ཞིང་གཤེགས་པ་ལས། ཤི་ཤུ་མ་རིའི་རི་ལ་བྱོན་ནས། འཇིགས་བྱེད་ཀྱི་ཚལ་རི་དྭགས་ཀྱི་ནགས་ན་བཞུགས་སོ། །དེའི་ཚེ་ཡུལ་དེ་ན་ཁྱིམ་བདག་རྣམ་སྲས་ཀྱི་ནོར་དང་ལྡན་པ་ཞིག་གི་ཆུང་མ་ལ་ཁྱེའུ་མི་སྡུག་པའི་སྣ་གྲངས་བཅོ་བརྒྱད་དང་ལྡན་པ་ཞིག་བཙས་པས་ཕ་མ་གཉིས་ཤིན་ཏུ་སྡུག་བསྔལ་བར་གྱུར་ཏེ། ཕས་ཁྱི་ལ་སྦྱིན་པར་བརྩམས་ཀྱང་། མ་དེས་ལྐོག་ཏུ་གསོས་ཏེ་ཆེར་སྐྱེས་པ་ན་མིང་མི་སྡུག་པར་བཏགས་ནས་ཁྱིམ་ནས་བསྐྲད་དོ། །དེ་བཀྲེས་སྐོམ་གྱིས་ལུས་རིད་པར་གྱུར་ཏེ་མཁར་བ་ཐོགས་ནས་སློང་དུ་ཕྱིན་པ་ན། གྲོང་མིའི་བྱིས་པ་རྣམས་ཀྱིས་དེ་ལ་ཁུ་ཚུར་དང་ཐལ་ལྕག་དབྱུག་པ་དང་བོང་བ་རྣམས་ཀྱི་བརྡེགས་ཏེ་འདྲེ་འོངས་སོ། །ཞེས་སྐྲོད་པར་བྱེད་དོ། །དེ་ནས་དེ་གྲོང་དུ་འགྲོ་མ་ནུས་ནས་སྐྱེད་མོས་ཚལ་གྱི་ནང་དུ་སློང་བར་ཕྱིན་པ་དང་། དེ་དག་གིས་ཀྱང་འདྲེ་ཡིན་ནོ་སྙམ་ནས་བརྡུང་ཞིང་བསྐྲད་དོ། །དེ་ནས་དེ་མི་ལ་འཇིགས་ནས་ཉིན་པར་ཚལ་གྱིས་གསེབ་ཏུ་ཡིབ་ཅིང་། མུན་རུབ་པ་ན་སྐྱེད་མོས་ཚལ་དེ་དང་དེ་དག་ཏུ་སོང་ནས་དེ་དག་ཏུ་ཁ་ཟས་བྲུལ་བ་དག་བཙལ་ཏེ་དེ་ཙམ་གྱིས་འཚོ་བར་བྱེད་དོ། །དེ་སྲིད་པ་ཐ་མ་པ་ཡིན་པས་སྲོག་དང་ནི་བྲལ་བར་མ་གྱུར་ཏོ། །དེར་བཅོམ་ལྡན་འདས་ཀྱི་ཡེ་ཤེས་ཀྱིས་གཟིགས་པས་དེ་ཉིད་འདུལ་བའི་དུས་ལ་བབ་པར་དགོངས་ཏེ། བཅོམ་ལྡན་འདས་ཉིད་དེ་བས་ཀྱང་ཆེས་མི་སྡུག་པ་ཞིག་ཏུ་སྤྲུལ་ཏེ་བཟའ་བ་དང་བཅའ་བས་གྱོ་མོ་བཀང་ནས་ས་ཕྱོགས་དེར་གཤེགས་པས་མི་སྡུག་པས་ཐག་རིང་མོ་ནས་མཐོང་སྟེ། འདིས་ཀྱང་བརྡུང་འོང་ངོ་སྙམ་སྟེ་བྲོས་པར་བརྩམས་ཀྱང་དེ་བྲོས་མི་ནུས་པར་བྱིན་གྱིས་བརླབས་སོ། །དེ་ནས་དེས་ཕྱིར་ལོག་སྟེ་འདི་སུ་ཡིན་པ་ལྟ་བར་བྱའོ་སྙམ་སྟེ་འོང་བ་ན། སྤྲུལ་པ་དེ་མི་སྡུག་པ་ལ་བྲོས་པའི་ཚུལ་བསྟན་པས། མི་སྡུག་པས་སྨྲས་པ། ཁྱོད་བདག་ལ་ཅི་ཕྱིར་འབྲོས། སྤྲུལ་པས། བདག་སྔོན་ལས་ཀྱི་ལུས་འདི་འདྲ་བར་གྱུར་པས་ཁྱོད་ཀྱིས་འདྲེ་ཡིན་ནམ་སྙམ་སྟེ་བརྡུང་གིས་དོགས་སོ། །མི་སྡུག་པས། བདག་ཀྱང་དེ་འདྲ་བར་གྱུར་ནས་མིས་བརྡེགས་པས་སྐྲག་ནས་ཚང་ཚིང་འདིར་ཞུགས་ཀྱིས་ཁྱོད་ཀྱང་ཚུར་ཤོག་དང་ལྷན་ཅིག་ཏུ་འགྲོགས་པར་བྱའོ། །སྤྲུལ་པས་ཀྱང་དེ་ལྟར་བྱའོ་ཞེས་སྨྲས་ཏེ་དེར་སོང་བས་དེ་ལ་ཁ་ཟས་ཀྱི་བགོ་བཤའ་བྱས་པས། དེ་འགྲངས་ཤིང་ངོམས་ལ་དབང་པོ་བརྟས་ནས་སྤྲུལ་པ་དེ་ལ་སེམས་དགའ་བར་གྱུར་པ་ན། བཅོམ་ལྡན་འདས་ཀྱིས་མཚན་དཔེའི་སྐུ་དངོས་སུ་བསྟན་པས། ཁྱེའུ་མི་སྡུག་པ་ཆེས་དགའ་བར་གྱུར་ཏེ་དགེ་སློང་བསམ་གཏན་ལ་གནས་པའི་བདེ་བ་ལས་ཁྱད་པར་དུ་འཕགས་པའི་ཉམས་སྐྱེས་ཏེ་ཞབས་ལ་ཕྱག་བྱས་ཏེ་ཆོས་མཉན་པའི་ཕྱིར་འཁོད་པ་ན། བཅོམ་ལྡན་འདས་ཀྱིས་དེའི་ཁམས་དབང་དང་མཐུན་པར་ཆོས་བསྟན་པས་སྟན་དེ་ཉིད་དུ་འཁོད་བཞིན་དུ་བདེན་པ་མཐོང་ཞིང་། བདག་ལུས་འདི་ལྟར་མ་གྱུར་ན་རབ་ཏུ་བྱུང་བར་བྱ་སྟེ་སྙམ་པའི་མོད་ཉིད་ན་དེའི་མི་སྡུག་པ་མེད་པར་གྱུར་ཏེ་གཟུགས་བྱད་ཕུན་སུམ་ཚོགས་པར་གྱུར་ཏོ། །དེ་ནས་དེ་སྟོན་པས་ཚུར་ཤོག་གིས་རབ་ཏུ་བྱུང་སྟེ་བསྙེན་པར་རྫོགས་པར་མཛད་ནས་ལུང་ཕོག་སྟེ། དེས་ཀྱང་བརྩོན་པས་དགྲ་བཅོམ་པ་ཉིད་མངོན་དུ་བྱས་སོ། །དེ་ནས་དགེ་སློང་རྣམས་ཀྱི་དེའི་ལས་ཀྱི་རྒྱུ་ཞུས་པས་ན། སྔོན་རི་ཁྲོད་ཀྱི་གྲོང་ཞིག་ན་ཁྱིམ་བདག་སེར་སྣ་ཅན་འཇུངས་པ་ཡོ་བྱད་ཀུན་ཏུ་འཛིན་པ་ཞིག་ཡོད་པ་དེ་ཁྱིམ་ན་འཁོད་པའི་ཚེ། རང་སངས་རྒྱས་ཤིག་དེར་བྱོན་པ་ལ་ཐོག་མར་བསོད་སྙོམས་ཕུལ་ནས། སླར་འགྱོད་པ་སྐྱེས་ཏེ་ཁ་ཟས་རྣམས་ཕྱིར་ཕྲོགས་ནས་ལུས་དང་ངག་གི་ལས་ཚུལ་མི་སྡུག་པས་ཐོ་བཙམས་ནས་ཁྱིམ་ནས་བསྐྲད་དོ། །དེ་ནས་རང་སངས་རྒྱས་དེས་དེ་ཉིད་ལ་ཐུགས་བརྩེ་བའི་སླད་དུ་ནམ་མཁའ་ལ་འཕགས་ནས་འབར་བ་ལ་སོགས་པའི་ཆོ་འཕྲུལ་བསྟན་པས། དེ་དད་ནས་འགྱོད་པར་གྱུར་ཏེ་ཞབས་ལ་ཕྱག་བྱས་ཤིང་བཟོད་པར་གསོལ་ནས། སླར་བསོད་སྙོམས་ཕུལ་ཏེ་སྨོན་ལམ་བཏབ་བོ། །དེའི་དུས་ཀྱི་ཁྱིམ་བདག་དེ་ནི་མི་སྡུག་པ་འདི་ཡིན་ཏེ། དེའི་ཚེ་རང་སངས་རྒྱས་ལས་བསོད་སྙོམས་ཕྱིར་ཕྲོགས་ཤིང་ལུས་ངག་གི་ཐོ་བཙམས་{བརྩམས}ཏེ་ཁྱིམ་ནས་བསྐྲད་པས། གང་དུ་སྐྱེས་པ་དེར་གཟུགས་མི་སྡུག་པར་གྱུར་ཏེ་ཁྱིམ་ནས་བསྐྲད་དོ། །སླར་འགྱོད་དེ་བསོད་སྙོམས་ཕུལ་ཞིང་སྨོན་ལམ་བཏབ་པས་གང་དུ་སྐྱེས་པ་དེར་ཕྱུག་པོའི་ཁྱིམ་དུ་སྐྱེས་ཤིང་། ད་ལྟར་སངས་རྒྱས་དང་ཕྲད་ནས་རབ་ཏུ་བྱུང་བར་འདོད་པའི་མོད་ལ་མི་སྡུག་པ་སངས་པ་དང་འབྲས་བུ་ཐོབ་ཀྱི་བར་བྱུང་བ་དང་། གཞན་ཡང་འདི་ཉིད་སྔོན་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་ཚངས་པར་སྤྱད་ནས་སྨོན་ལམ་བཏབ་པའི་འབྲས་བུ་ཡིན་པར་གསུངས་སོ། །འདིས་ནི་སེར་སྣའི་དབང་གིས་བྱིན་པ་སླར་ཕྲོགས་པ་སོགས་ཀྱི་ཉེས་དམིགས་དང་སྦྱིན་པ་དང་ཚུལ་ཁྲིམས་ཀྱི་ཕན་ཡོན་ཀྱང་བསྟན་ནོ། །