ལོག་གཡེམ་གྱི་ཉེས་པ་དང་། ཚུལ་ཁྲིམས་བསྲུང་བ་དང་བྱམས་པ་བསྒོམ་པ་སོགས་ཀྱི་ཕན་ཡོན་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། རྒྱལ་པོ་ཚངས་བྱིན་གྱི་བུ་མོ་བདེ་བྱེད་མ་ཞེས་བྱ་བ་རྒྱལ་པོ་གསལ་རྒྱལ་གྱི་བཙུན་མོར་བླངས་ཏེ། དེའི་ཚེ་བདེ་བྱེད་མའི་མིང་པོ་རྒྱལ་བུ་བདེ་བྱེད་ཅེས་པའང་དེ་དང་འབྲལ་མ་ཐུབ་སྟེ་མཉན་ཡོད་དུ་ཕྱིན་ནས། དེ་ཆེར་སྐྱེས་པ་ན་འཕྱོན་མ་ལ་ཞུགས་ཏེ། ཡུལ་དེར་ཚུལ་མ་ཡིན་པ་བརྒྱ་ཙམ་བྱས་ཏེ། བདེ་བྱེད་མ་དང་རྒྱལ་པོ་གསལ་རྒྱལ་དང་རྒྱལ་པོ་ཚངས་སྦྱིན་ཐམས་ཅད་ཀྱིས་བཟློགས་ཀྱང་མ་ཐུབ་པས། རྒྱལ་པོ་ཚངས་སྦྱིན་གྱིས་ཀྱང་བུ་མ་ཡིན་པར་བསྒྲགས་ལ། རྒྱལ་པོ་གསལ་རྒྱལ་གྱིས་ཀྱང་ཕོ་བྲང་དུ་འོང་མི་ཆོག་པར་བྱས་སོ། །དེ་ནས་རྒྱལ་བུ་དེས་རྒྱལ་པོ་གསལ་རྒྱལ་གསོད་པའི་ཕྱིར་ཕོ་བྲང་གི་ཡང་སྟེང་དུ་འདུག་པ་ལ་མདའ་འཕངས་ཏེ་རྒྱལ་པོས་པི་ཝཾ་སྒྲོགས་པའི་རྒྱུད་བཅད་དེ་ས་ལ་ལྷུང་ངོ་། །དེ་ནས་རྒྱལ་པོ་གསལ་རྒྱལ་ཤས་ཆེར་ཁྲོས་ཏེ་གྲོང་མི་ཐམས་ཅད་བསྡུས་ཏེ་དེའི་མདུན་དུ་རྒྱལ་བུ་དེ་ཤགས་ཀྱིས་ཕམ་པར་བྱས་ནས་གཤེད་མ་ལ་གཏད་དེ་ལམ་གྱི་གཞི་མདོར་ཁྲིད་པ་ན་གསོད་སར་ཕྱིན་དུ་ཉེ་བའི་ཚེ་ཁྱེའུ་བདེ་བྱེད་སྙིང་རྗེའི་སྐད་དུ་ངུ་ཞིང་སྨྲེ་ངག་འདོན་པ་ན། བཅོམ་ལྡན་འདས་ཀྱིས་དེ་ཉིད་འདུལ་བའི་དུས་ལ་བབས་པར་གཟིགས་ནས་གྲོང་དུ་བསོད་སྙོམས་ལ་གཤེགས་ཏེ་དེ་དང་མི་རིང་བར་བྱོན་པས་ཁྱེའུ་བདེ་བྱེད་ཀྱིས་མཐོང་སྟེ་བཅོམ་ལྡན་འདས་ལ་སྐྱབས་ཞུས་ཤིང་། བཅོམ་ལྡན་འདས་ཀྱིས་རྒྱལ་པོ་གསལ་རྒྱལ་ལ། རྒྱལ་པོ་ཆེན་པོ་ཁྱེའུ་དེ་ཐོངས་ཤིག རྒྱལ་པོས་གསོལ་པ། གལ་ཏེ་རབ་ཏུ་བྱུང་ན་ནི་བཏང་བར་འཚལ་ལོ། །དེ་ནས་བཅོམ་འདས་ཀྱིས་ཁྱེའུ་དེ་རྒྱལ་བྱེད་ཀྱི་ཚལ་དུ་ཁྲིད་དེ་རབ་ཏུ་བྱུང་ཞིང་བསྙེན་པར་རྫོགས་པར་མཛད་ནས་ལུང་ཡང་ཕོག་ཅིང་། དེས་ཀྱང་བརྩོན་པས་དགྲ་བཅོམ་པ་ཐོབ་བོ། །དེར་དགེ་སློང་རྣམས་ངོ་མཚར་དུ་གྱུར་པ་ལ། བཅོམ་ལྡན་འདས་ཀྱིས་ད་ལྟར་འབའ་ཞིག་ཏུ་མ་ཟད་སྔོན་ཡང་རྒྱལ་པོའི་འཇིགས་པ་ལས་བསྐྱབས་ཏེ་བསམ་གཏན་བཞི་དང་མངོན་པར་ཤེས་པ་ལྔ་ལ་བཞག་པ་ཡིན་ཏེ། སྔོན་ཝཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་པས་རྒྱལ་སྲིད་བྱེད་པའི་ཚེ། མི་ཞིག་མ་གྲངས་ཤིང་མ་དུལ་བའི་མིང་ངོ་མཆན། གཡེམ་པར་གྱུར་པས་རྒྱལ་པོས་གསོད་དུ་བཏང་བའི་ཚེ། དེ་ནས་དྲང་སྲོང་མངོན་ཤེས་ལྔ་དང་ལྡན་པ་རྫུ་འཕྲུལ་དང་མཐུ་ཆེ་བ་ཞིག་ཡོད་པ་དེས། རྒྱལ་པོ་ལ་གསོལ་ནས་དཀའ་ཐུབ་ཀྱི་ནགས་སུ་ཁྲིད་ནས་རབ་ཏུ་བྱུང་ཞིང་ལུང་ཕོག་པས་མི་དེས་བསམ་གཏན་བཞི་དང་མངོན་པར་ཤེས་པ་ལྔ་ཡང་ཐོབ་བོ། །དེའི་དུས་ཀྱི་དྲང་སྲོང་དེ་ནི་ང་ཡིན་ལ། མི་དེ་ནི་ཁྱེའུ་བདེ་བྱེད་དང་། རྒྱལ་པོ་དེ་ནི་གསལ་རྒྱལ་ཡིན་ནོ། །གཞན་ཡང་ཁྱེའུ་བདེ་བྱེད་འདི་སྔོན་སངས་རྒྱས་འོད་སྲུང་གི་དུས་སུ་དགེ་སློང་ཞལ་ཏ་བར་གྱུར་ཏེ། དེའི་ཚེ་ཆོས་བཞིན་དུ་ཞལ་ཏ་བྱས་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་པ་དང་། བྱམས་པའི་སེམས་ཀྱི་ཏིང་ངེ་འཛིན་བསྒོམས་པས་གཟུགས་བཟང་ཞིང་ལྟ་ན་སྡུག་པ་དང་། ཚངས་པར་སྤྱད་ནས་སྨོན་ལམ་བཏབ་པས་ད་ལྟར་དགྲ་བཅོམ་པའི་གོ་འཕང་ཐོབ་པར་གསུངས་སོ། །འདིས་ནི་གཡེམ་གྱི་ཉེས་པ་དང་། ཚུལ་ཁྲིམས་བསྲུང་བ་དང་བྱམས་པ་བསྒོམ་པ་སོགས་ཀྱི་ཕན་ཡོན་བསྟན་པ་ཡིན་ནོ། །