སྐྱབས་འགྲོ་སོགས་ཀྱི་ཕན་ཡོན་དང་ངག་གི་ཉེས་པར་སྤྱོད་པའི་རྣམ་སྨིན་བསྟན་པ།

༈ ཡང་བཅོམ་ལྡན་འདས་གྲོང་ཁྱེར་གྱེན་དུ་རྒྱལ་ཞེས་བྱ་བ་ན་གྲོང་གི་བྱང་ཕྱོགས་ཤིང་ཤ་པའི་ཚལ་ན་བཞུགས་སོ། །དེའི་ཚེ་ཡུལ་དེའི་རྒྱལ་པོ་གཏུམ་པོ་རབ་སྣང་བྱ་བས། ཨ་མྲའི་སྐྱེད་ཚལ་སྲུང་བ་ལ་ཡུལ་དེའི་གདོལ་པ་རྣམས་བསྐོས་པས། དེ་དག་གིས་ཨ་མྲ་རྐུས་པ་རྒྱལ་པོས་ཚོར་ཏེ་མི་རྣམས་ཁྱིམ་དུ་བཅུག་ནས་ཕྱི་རོལ་ནས་མེ་སྦར་ཏེ་དེ་དག་འཁོར་དང་བཅས་པ་བསྲེགས་སོ། །གྲོང་དེའི་ནང་ནས་གདོལ་པའི་ཁྱེའུ་གཅིག་གདོལ་པའི་ལས་ཀྱི་ངོ་ཚ་ནས་ལྷོ་ཕྱོགས་སུ་སོང་སྟེ་བྲམ་ཟེའི་ཆ་ལུགས་སུ་བསྒྱུར་ནས་ལུས་མི་སྣང་བར་འགྱུར་བའི་རིགས་སྔགས་བསླབས་ནས་ཕྱིར་འོང་བ་ན། གདོལ་པའི་གྲོང་རྣམས་མེར་བསྲེགས་པ་མཐོང་ནས་གཏམ་དྲིས་པས་ཇི་ལྟར་གྱུར་པ་བཤད་པས་དེ་མྱ་ངན་དུ་གྱུར་ཅིང་ཁྲོས་ཏེ་རྒྱལ་པོ་ལ་ལན་གླན་པར་བྱའོ་སྙམ་དུ་ལུས་མི་སྣང་བར་བྱས་ནས་རྒྱལ་པོའི་ཕོ་བྲང་དུ་སོང་སྟེ། རྒྱལ་པོའི་མགོ་ལ་ལྕག་གིས་གཞུས་ཏེ། དུས་ངན་པའི་རྒྱལ་པོ་ཁྱོད་ལ་གདོལ་པ་དེ་དག་གིས་ཉེས་པ་ཅི་ཞིག་བྱས། རྒྱལ་པོས་སྨྲས་པ། དེ་དག་གིས་ངའི་ཨ་མྲ་རྣམས་མེད་པར་བྱས་སོ། །གདོལ་པའི་ཁྱེའུས་སྨྲས་པ། གལ་ཏེ་སྐྱེས་པ་རྣམས་ཀྱི་ཉེས་སུ་ཟིན་ཀྱང་བུད་མེད་དང་ཁྱེའུ་དང་བུ་མོ་རྣམས་ཀྱི་ཉེས་པ་ཅི་བྱས། ད་ནི་རྒྱལ་པོ་འཆལ་བ་ཁྱོད་བྱ་བ་ཅི་ཡོད་པ་དང་དོན་ཅི་ཡོད་པ་དེ་བྱོས་ཤིག ཁྱོད་གསོན་པའི་དུས་ཟད་དེ་ཞག་བདུན་ན་འཆི་དགོས་སོ་ཞེས་བྱས་ནས་ཁྱེའུ་དེ་ཉིན་རེ་བཞིན་དུ་ཕོ་བྲང་དུ་ཕྱིན་ནས་རྒྱལ་པོ་ལ་རྡེག་ཅིང་། ཆེ་གེ་མོའི་ཉིན་པར་ཁྱོད་མེད་པར་བྱའོ་ཞེས་སྨྲས་པས། རྒྱལ་པོ་འཇིགས་ཤིང་སྐྲག་པར་གྱུར་པ་ལ་བློན་པོ་རྣམས་ཀྱིས་དབུགས་དབྱུང་ནས་འཕགས་པ་ཀཱ་ཏྱ་ཡ་ན་ལ་རྒྱལ་པོ་མི་མ་ཡིན་གྱི་གནོད་པ་ལས་སྐྱབས་པར་གསོལ་བ་གདབ་པས། འཕགས་པས་ཁྱེའུ་དེའི་རིགས་སྔགས་ཀྱི་ནུས་པ་བཤིག་ནས་ཕྱིན་ཆད་མི་སྣང་བར་བྱེད་མི་ནུས་པར་བྱས་སོ། །དེ་ནས་དེས་བསམ་པ། བདག་གི་རིགས་སྔགས་སུ་ཞིག་གིས་མ་རུངས་པར་བྱས་སྙམ་ནས། བློན་པོ་རྣམས་ལ་ཀྱེ་རྒྱལ་པོ་མི་མ་ཡིན་པའི་འཇིགས་པ་དེ་ལས་སུ་ཞིག་གི་སྐྱབས་བྱས་ཞེས་དྲིས་པས། འཕགས་པ་ཀཱ་ཏྱ་ཡ་ནས་བྱས་སོ། །ཞེས་པ་ཐོས་ནས། ཁྱེའུ་དེ་ཀཱ་ཏྱ་ཡ་ནའི་དྲུང་དུ་ཕྱིན་ཏེ། བཙུན་པ་ཁྱོད་ཀྱིས་ཅིའི་སླད་དུ་བདག་གི་རིག་སྔགས་རེངས་བར་མཛད། ཀཱ་ཏྱ་ཡ་ནས། བུ་འདུག་ཅིག་དང་ཁྱོད་ལ་རྒྱས་པར་བསྙད་པར་བྱའོ། །དེ་ནས་གདོལ་པའི་ཁྱེའུ་དེས་འཕགས་པ་ལ་ཕྱག་བྱས་ནས་འདུག་པ་ན། འཕགས་པས་ཀྱང་དེ་དང་མཐུན་པའི་ཆོས་བསྟན་པས་དེ་ཉིད་སྟན་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་ཅིང་། སླར་དེ་ཉིད་ཀྱི་དྲུང་དུ་རབ་ཏུ་བྱུང་བ་དང་བསྙེན་པར་རྫོགས་ཏེ་བསྒོམས་པས་དགྲ་བཅོམ་པ་མངོན་དུ་བྱས་སོ། །གཏམ་དེ་རྒྱལ་པོས་ཐོས་པ་དང་རབ་ཏུ་དགའ་ནས་འཕགས་པ་ཀཱ་ཏྱ་ཡ་ནའི་དྲུང་དུ་ཕྱིན་ནས་ཕྱག་བྱས་ཏེ་དྲིན་ལན་དུ་འཕགས་པ་འཁོར་དང་བཅས་པ་བདག་གི་ཁྱིམ་དུ་དགུང་བདུན་དུ་བཤོས་གསོལ་བར་ཞུས་པ་ན། འཕགས་པ་ཀཱ་ཏྱ་ཡ་ནས། ལྷ་གནས་འདིར་བཅོམ་ལྡན་འདས་བཞུགས་ཀྱིས། དེ་སྤྱན་དྲངས་ཤིག་གསུངས་པས། རྒྱལ་པོས་ཀྱང་སངས་རྒྱས་འཁོར་དང་བཅས་པ་སྤྱན་དྲངས་ཤིང་དགུང་བདུན་གྱི་བར་དུ་བཤོས་ཕུལ་ཞིང་། ཉིན་ཐ་མར་བཅོམ་ལྡན་འདས་ལ་ན་བཟའ་འབུམ་རི་བ་དང་། དགེ་སློང་གཞན་རྣམས་ལའང་རས་ཡུག་ཟུང་རེ་ཕུལ་ཏེ་ཆོས་ཉན་པ་ལ། བཅོམ་ལྡན་འདས་ཀྱིས་ཀྱང་ཆོས་གཏམ་ཡང་དག་པས་མགུ་བར་མཛད་དོ། །དེར་དགེ་སློང་རྣམས་ཀྱིས་གདོལ་པའི་ཁྱེའུའི་ལས་ཀྱི་རྒྱུ་ཞུས་པར། སྔོན་སངས་རྒྱས་རྣམ་གཟིགས་འཇིག་རྟེན་དུ་བྱོན་ནས་མྱ་ངན་ལས་འདས་པའི་ཚེ་ས་ཕྱོགས་དབེན་པ་ཞིག་ཏུ་སྐུ་གདུང་ཞུགས་ལ་བཞོན་ཏེ། རིང་བསྲེལ་རྣམས་བསྲུང་བའི་ཕྱིར་དེ་ནས་ཐག་མི་རིང་བ་ཞིག་ཏུ་གདོལ་པ་དག་གཅིག་ཉལ་བ་ལ། དེ་ནུབ་གཅིག་སྟག་གིས་ཟོས་པས། དེའི་རོགས་གདོལ་པ་གཞན་ཞིག་སྐྲག་སྟེ་སངས་རྒྱས་ལ་ཕྱག་འཚལ་ལོ་ཞེས་བརྗོད་པས་མ་གནོད་དོ། །དེ་ནས་ཕྱིས་རྒྱལ་པོ་མཉན་ཡོད་ཀྱིས་སྐུ་གདུང་གི་མཆོད་རྟེན་ལེགས་པར་བཞེངས་གྲུབ་ནས་དུས་སྟོན་གྱི་མཆོད་པའི་ཉིན། སྔར་གྱི་གདོལ་པ་དེས། བདག་གསོན་པོར་ཡོད་པ་འདི་སངས་རྒྱས་ཀྱི་མཐུ་ཡིན་ནོ་སྙམ་དུ་རིགས་ནས་མཆོད་རྟེན་དེ་ལ་བཀུར་སྟི་ཆེན་པོ་བྱས་ཏེ་བདག་སྟོན་པ་འདི་ལྟ་བུ་དང་ཕྲད་ནས་མཉེས་པ་བྱེད་པར་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་གདོལ་པ་དེ་ནི་ད་ལྟའི་གདོལ་པའི་ཁྱེའུ་འདི་ཡིན་ནོ། །གཞན་ཡང་འདི་སངས་རྒྱས་འོད་སྲུང་གི་བསྟན་པ་ལ་དགེ་སློང་འཐབ་ཀྲོལ་ཅན་དུ་གྱུར་ཏེ། དགེ་སློང་མང་པོ་ལ་ཁྲོས་ཏེ་གདོལ་པ་ཞེས་བརྗོད་པས་སྐྱེ་བ་ལྔ་བརྒྱའི་བར་དུ་གདོལ་པའི་རིགས་སུ་སྐྱེས་པ་དང་། དེའི་ཚེ་འགྱོད་པ་སྐྱེས་ཏེ་དེ་དག་ལ་བཟོད་གསོལ་བྱས་ཤིང་ཚེ་གཅིག་ཏུ་ཚངས་པར་སྤྱོད་ནས་འཆི་ཁར་སྨོན་ལམ་བཏབ་པས། ད་ལྟར་དགྲ་བཅོམ་པ་མངོན་དུ་བྱས་སོ་གསུངས། འདིས་ནི་སྐྱབས་འགྲོ་སོགས་ཀྱི་ཕན་ཡོན་དང་ངག་གི་ཉེས་པར་སྤྱོད་པའི་རྣམ་སྨིན་བསྟན་ཏོ། །