སྦྱིན་པ་དང་ཚུལ་ཁྲིམས་ཀྱིི་ཕན་ཡོན་བསྟན་པ།

༈ ཡང་བྱང་ཆུབ་སེམས་དཔའ་ཁྱིམ་ན་བཞུགས་པའི་ཚེ། ཡུམ་སྒྱུ་འཕྲུལ་ཆེན་མོའི་མིང་པོར་གྱུར་པ་རྒྱལ་པོ་ལེགས་རྟོགས་ཀྱི་བུ་ལྷར་བཅས་ཞེས་བྱ་བ་འཕོང་གི་སློབ་དཔོན་འགྲན་ཟླ་དང་བྲལ་བ་ཞིག་ཡོད་པ་དེ། ཡབ་ཟས་གཙང་མས་རྒྱལ་བུ་དོན་གྲུབ་ལ་འཕོང་སློབ་པའི་སློབ་དཔོན་དུ་བཀུག་པའི་ཚེ་དེས་ཤེས་པ་ཐམས་ཅད་བྱང་ཆུབ་སེམས་དཔས་འབད་མེད་དུ་མཁྱེན་ཅིང་། དེས་མི་ཤེས་པ་ཡང་མང་པོ་མཁྱེན་པས་དེ་ངོ་མཚར་དུ་གྱུར་ནས། གཞོན་ནུ་ཉིད་ལས་སླར་སློབ་པར་བྱས་སོ། །དེ་ནས་བྱང་ཆུབ་སེམས་དཔས་ཁྱིམ་སྤངས་ཏེ་དཀའ་ཐུབ་ཀྱི་ནགས་ན་བཞུགས་པའི་ཚེ། ལྷར་བཅས་དེ་ཉིད་ཡངས་པ་ཅན་དུ་ཕྱིན་ནས་གཞོན་ནུ་ལྔ་བརྒྱ་ལ་གནས་ལྔ་བསླབས་པས་མཐར་ཕྱིན་པར་གྱུར་པས། དེ་དག་གཟུགས་དང་སྟོབས་ཀྱིས་དྲེགས་ཏེ་བདག་ཅག་དང་མཉམ་པ་གང་ནའང་མེད་དོ་སྙམ་སྟེ་གནས་པ་ལ། དེ་དག་གི་རྒྱགས་པ་ཞི་བའི་ཕྱིར་དུ། ལྷར་བཅས་ཀྱིས་བྱང་ཆུབ་སེམས་དཔའི་བསྔགས་པ་བརྗོད་པས་དེ་དག་གིས་བལྟ་བར་འདོད་པ་ན་ད་ལྟ་དཀའ་ཐུབ་ཀྱི་ནགས་སུ་གཤེགས་ཀྱིས་མཐོང་མི་ནུས་ཞེས་སྨྲས་སོ། །ཕྱིས་བྱང་ཆུབ་སེམས་དཔའ་མངོན་པར་སངས་རྒྱས་ནས་གདུལ་བྱ་འདུལ་བའི་སླད་དུ་མཐར་གྱིས་ཡངས་པ་ཅན་དུ་གཤེགས་པ་ན་ལྷར་བཅས་ཀྱིས་གཞོན་ནུ་ལྔ་བརྒྱ་པོ་ལ་སྦྲན་པས། དེ་དག་བཅོམ་ལྡན་འདས་ཀྱི་སྤྱན་སྔར་ཕྱིན་པ་ན་གཟུགས་ཀྱི་རྒྱགས་པ་ཞི་ནས། བྱད་གཟུགས་ནི་བདག་ཅག་པས་ཆེས་ལྷག་མོད་སྟོབས་ཀྱིས་ནི་དེ་ལྟར་མ་ཡིན་ནོ་སྙམ་པ་ན། བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པས་ལྷའི་དབང་པོ་བརྒྱ་བྱིན་གྱིས་མདའ་གཞུ་བླངས་ཏེ་དེར་འོངས་པར་གྱུར་ཏོ། །དེ་ནས་དེ་དག་གི་དྲེགས་པ་གཞོམ་པའི་ཕྱིར་སྐུ་དངོས་དེ་མི་སྣང་བར་མཛད་དེ་ལྷ་ཡི་ལུས་སུ་སྤྲུལ་ནས་མི་རིང་བ་ཞིག་ཏུ་ལྕགས་ཀྱི་ཏ་ལ་བདུན་དང་། འཁོར་ལོ་བདུན་དང་། རྔ་བོ་ཆེ་བདུན་དང་། ཕག་བདུན་རྣམས་སྤྲུལ་ནས་གཞོན་ནུ་དེ་དག་ལ། བུ་དག་ཁྱེད་ཀྱིས་མདའ་གཞུ་འདི་ལོངས་ལ་འབེན་འདི་ལ་མདའ་འཕོངས་ཤིག་ཅེས་གསུངས་པས། དེ་དག་གིས་གཞུ་བླངས་ཏེ་བདུང་བར་བརྩམས་པ་ན་བདུང་ཡང་མ་ནུས་སོ། །དེར་བཅོམ་ལྡན་འདས་ཀྱི་ཕྱག་གིས་བདུང་སྟེ་མདའ་འཕངས་པས་འབེན་དེ་ཐམས་ཅད་ཐལ་བྱུང་དུ་ཕུག་ནས་སའི་འོག་ཏུ་སོང་ངོ་། །དེ་མཐོང་བ་དང་དེ་ཐམས་ཅད་ཀྱི་སྟོབས་ཀྱི་རྒྱགས་པ་ཡང་མེད་པར་གྱུར་ནས་བཅོམ་ལྡན་འདས་ལ་མཆོག་ཏུ་དགའ་བ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་དག་ལ་མཐུན་པའི་ཆོས་བསྟན་པས་གཞོན་ནུ་ལྔ་བརྒྱ་པོ་སྟན་དེ་ལ་འཁོད་བཞིན་དུ་བདེན་པ་མཐོང་ཞིང་། དེ་ནས་སྟོན་པས་ཚུར་ཤོག་གིས་བསྙེན་པར་རྫོགས་པ་ནས་དགྲ་བཅོམ་པའི་བར་དུ་གྱུར་ཏོ། །དེར་དགེ་སློང་རྣམས་ངོ་མཚར་དུ་གྱུར་པ་ལ། སྔོན་བཅོམ་ལྡན་འདས་ཉིད་རྒྱལ་པོ་གངས་ཆེན་མཚོའི་ལྷ་ཞེས་བྱ་བའི་བུ་རྒྱ་མཚོའི་ལྷ་ཞེས་བྱ་བར་གྱུར་པའི་ཚེ་བཟོ་དང་སྒྱུ་རྩལ་རྒྱ་མཚོའི་ཕ་རོལ་དུ་སོན་ནས། ཕས་ཆོས་མིན་གྱིས་རྒྱལ་སྲིད་བྱེད་པར་མཐོང་བས་ཡིད་སྐྱོ་ནས་དཀའ་ཐུབ་ཀྱིས་ནགས་སུ་སོང་སྟེ་མངོན་ཤེས་ལྔ་དང་ལྡན་པའི་དྲང་སྲོང་དུ་གྱུར་ཏོ། །དེ་ནས་ཕྱི་ཞིག་ན་ད་ལྟའི་ཁྱེའུ་འདི་རྣམས་བློན་པོའི་བུ་ལྔ་བརྒྱར་གྱུར་ཏེ། ད་ལྟའི་སློབ་དཔོན་གང་ཡིན་དེ་དེ་དུས་ཀྱང་སློབ་དཔོན་དུ་གྱུར་ནས། གནས་ལྔ་ལ་བྱང་བའི་ཚེ་ང་རྒྱལ་གྱིས་དྲེགས་པ་ན་སློབ་དཔོན་གྱིས་རྒྱལ་བུ་དྲང་སྲོང་གི་བསྔགས་པ་བརྗོད་པས་དེ་དག་དེའི་དྲུང་དུ་ཕྱིན་ནས་སེམས་མགུ་བར་གྱུར་ཏེ་དྲང་སྲོང་གི་ཐད་དུ་རབ་ཏུ་བྱུང་བས་བསམ་གཏན་དང་མངོན་ཤེས་བསྐྱེད་པར་གསུངས་ཤིང་། གཞན་ཡང་གཞོན་ནུ་ལྔ་བརྒྱ་པོ་འདི་དག་སངས་རྒྱས་འོད་སྲུང་གི་བསྟན་པ་ལ་དགེ་སློང་དུ་གྱུར་ནས་བསླབ་ཁྲིམས་ཡང་དག་པར་བསྲུངས་ཤིང་སྨོན་ལམ་བཏབ་པས། ད་ལྟར་དགྲ་བཅོམ་པའི་བར་དུ་གྱུར་པར་གསུངས་སོ། །འདི་དག་གིས་ཀྱང་སྦྱིན་པ་དང་ཚུལ་ཁྲིམས་ཀྱིི་ཕན་ཡོན་བསྟན་ཏོ། །