ངག་བག་མེད་པའི་ཉེས་པ་དང་ཆོས་ཐོས་པ་སོགས་ཀྱི་ཕན་ཡོན་འཆི་ཀ་མའི་དུས་ཀྱི་ཀུན་སློང་གཙོ་ཆེ་བར་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། རྒྱལ་བྱེད་ཚལ་དང་མི་རིང་བ་ཞིག་ན། བ་ལང་གི་ཁྱུ་གཅིག་འཁོད་དེ། དེར་གླང་ཁྱུ་མཆོག་གཉིས་འཐབ་ནས་གཅིག་གི་གཅིག་བརྡུང་ནས་གཅིག་གི་ལྟོ་དྲལ་ཏེ་དེའི་རྒྱུ་མ་ས་ལ་ལྷུང་ནས་ཟླ་དེ་ལ་སྡང་བའི་སེམས་སྐྱེས་ཏེ་ས་ལ་འགྱེལ་{སྒྱེེལ} ཏོ། །དེར་སངས་རྒྱས་ཀྱི་སྤྱན་གྱིས་གཟིགས་པས། གལ་ཏེ་གླང་དེ་ད་ལྟའི་སྐབས་སུ་ཤི་བར་གྱུར་ན་ནི། སེམས་ཅན་དམྱལ་བར་འགྲོ་བར་འགྱུར་ཏེ། འདི་ངན་སོང་ལས་དབྱུང་བའི་དུས་ལ་བབས་སོ་སྙམ་དུ་དགོངས་ནས་དེའི་དྲུང་དུ་གཤེགས་ཏེ་གླང་དེའི་རྒྱུ་མ་རྣམས་ཕྱིར་ལྟོ་བའི་ནང་དུ་བཅུག་སྟེ། རྨ་ཁ་དྲུབ་ནས་རྩྭ་དང་ཆུ་ཡང་བྱིན་ཏེ། བཀའ་སྩལ་པ། བཞིན་བཟང་འདི་ལྟར་འདུ་བྱེད་ཐམས་ཅད་ནི་མི་རྟག་གོ །ཆོས་ཐམས་ཅད་ནི་བདག་མེད་དོ། །མྱ་ངན་ལས་འདས་པ་ནི་ཞི་བའོ། །ང་ལ་སེམས་དགའ་བར་གྱིས་ཤིག་དང་དུད་འགྲོའི་སྐྱེ་གནས་དང་བྲལ་བར་གྱུར་ཡང་སྲིད་དོ་ཞེས་གསུངས་ཤིང་གླང་དེ་ཡང་བཅོམ་ལྡན་འདས་ལ་སེམས་དགའ་བར་གྱུར་ཏེ་ཚེ་འཕོས་ནས་མཉན་ཡོད་དུ་ཚོང་དཔོན་ཞིག་གི་ཁྱེའུ་གཟུགས་བྱད་མཛེས་ཤིང་ཡིད་དུ་འོང་བ་ཞིག་ཏུ་སྐྱེས་ཏེ། ལོ་བདུན་ལོན་པ་ན་སངས་རྒྱས་ལ་དད་པ་རྙེད་ནས་རབ་ཏུ་བྱུང་ཞིང་ལོ་དེ་ཉིད་དུ་དགྲ་བཅོམ་པ་ཐོབ་ནས་རྫུ་འཕྲུལ་གྱིས་འགྲོ་ཞིང་། གནས་གཞན་དང་གཞན་དག་ནས་ལོ་མའི་ནང་དུ་མེ་ཏོག་དང་འབྲས་བུ་རྣམས་བཅུག་སྟེ་ཁྱེར་ནས་འོང་ཞིང་དགེ་འདུན་ལ་འབུལ་བར་བྱེད་དོ། །དེ་དགེ་སློང་རྣམས་ཀྱིས་མཐོང་ནས་ཡ་མཚན་དུ་གྱུར་ཏེ་དགེ་ཚུལ་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་སྟེ་དགེ་སློང་ཆུའི་ཞལ་ཏ་བྱེད་པར་གྱུར་ཏེ། དེས་དགེ་འདུན་ལ་རིལ་བ་སྤྱི་བླུགས་ཀྱིས་ཆུ་འབྲིམ་པ་ལས། དགེ་སློང་དགྲ་བཅོམ་པ་ཞིག་གཞན་ཞིག་ལ་ཡེངས་པར་གྱུར་ཏོ། །དེ་དེ་དང་ཐུག་ནས་རིལ་པ་ལག་ནས་ཤོར་ཏེ་ཆག་པས། དེ་ཁྲོས་ནས་དགྲ་བཅོམ་པ་དེ་ལ། འདི་ནི་གླང་དིར་པོ་བཞིན་དུ་ཆེ་ཞིང་ཚོར་ཕྲིག་མེད་པ་ཞིག་གོ་སྨྲས་པས། དེ་ཐོས་ནས་དགྲ་བཅོམ་པ་དེས་དེ་ཉིད་ལོགས་ཤིག་ཏུ་ཁྲིད་ནས་ཉེས་པ་བཤགས་སུ་བཅུག་ཅིང་། དེས་ཀྱང་འགྱོད་ཚངས་ཕུལ་ནས་ཚེ་གཅིག་ཏུ་ཚངས་པར་སྤྱད་ནས་འཆི་ཁར་སྨོན་ལམ་བཏབ་བོ། །སྔར་གྱི་ལས་དེས་སྐྱེ་བ་ལྔ་བརྒྱའི་བར་དུ་གླང་འབའ་ཞིག་ཏུ་སྐྱེ་བ་བླངས་ཤིང་། ཕྱིས་ཀྱི་དེས་བཅོམ་ལྡན་འདས་ལས་ཆོས་ཚིག་གསུམ་དེ་ཐོས་ནས་སེམས་དགའ་བར་བྱས་པས་དུད་འགྲོའི་སྐྱེ་གནས་ལས་ཐར་ཏེ་དགྲ་བཅོམ་པའི་བར་དུ་གྱུར་ཏོ་གསུངས། འདིས་ནི་ངག་བག་མེད་པའི་ཉེས་པ་དང་ཆོས་ཐོས་པ་སོགས་ཀྱི་ཕན་ཡོན་འཆི་ཀ་མའི་དུས་ཀྱི་ཀུན་སློང་གཙོ་ཆེ་བར་བསྟན་པའོ། །