བདག་གི་མཁན་པོ་བཞིན་དུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ་བྲམ་ཟེ་ཞིག་ལ་ཁྱེའུ་ཚོ་ཞིང་པགས་པ་དང་ཤ་ཁྲག་རྒྱས་པ་ཞིག་བཙས་པས་མིང་གེལ་པོར་བཏགས། དེ་ཆེར་སྐྱེས་པ་ན་བྲམ་ཟེ་ལས་དྲུག་པར་གྱུར་ཏེ་མཐར་གྱིས་རིག་པའི་གནས་བཅོ་བརྒྱད་ལ་མཁས་པར་གྱུར་ཏོ། །དེ་ཁྱིམ་བདག་མགོན་མེད་ཟས་སྦྱིན་དང་འགྲོགས་པས་བཅོམ་ལྡན་འདས་ཀྱི་བསྟན་པ་ལ་ཡང་དགའ་བར་གྱུར་ཅིང་ཕྱིས་ཕ་མ་གཉིས་ཤི་བ་ན་མཉན་ཡོད་དང་ཤུར་པ་ར་ཀའི་གྲོང་ཁྱེར་གྱི་རི་སུལ་ཞིག་ན་དྲང་སྲོང་ཞིག་ཡོད་པ་དེའི་ཐད་དུ་རབ་ཏུ་བྱུང་ཞིང་ནགས་ཁྲོད་དེ་ན་གནས་ཀྱང་ཡོན་ཏན་གྱིས་ཁྱད་པར་ཅིའང་མ་ཐོབ་བོ། །དེ་ནས་དྲང་སྲོང་དེ་ཡང་ཤི་ནས་གེལ་པོ་དཀའ་ཐུབ་ཀྱི་གནས་དེར་གནས་པ་ན་བཅོམ་ལྡན་འདས་ཤུར་པ་ར་ཀར་གཤེགས་པ་མཐོང་ནས་བསྙེན་བཀུར་བྱ་བར་འདོད་དེ། དེ་ཡང་བྲག་དེ་ལ་རྐང་པས་བབ་ན་ནི། བཅོམ་ལྡན་འདས་ཐལ་བར་འགྱུར་བ་མཐོང་ནས། བྲག་དེ་ལས་མཆོངས་པ་ན་སངས་རྒྱས་ཀྱིས་བྱིན་གྱིས་བརླབས་ཏེ་ཅི་ཡང་མ་གནོད་པར་བདེ་བར་ཕྱིན་ནོ། །དེར་བཅོམ་ལྡན་འདས་ཀྱིས་ཞབས་ལ་ཕྱག་བྱས་ནས་ཕྱི་བཞིན་དུ་འབྲང་བ་ལ་བཅོམ་ལྡན་འདས་ཕྱོགས་གཅིག་ཏུ་བཞུགས་ནས་དེ་ལ་ཆོས་བསྟན་པས་དེ་ཉིད་སྟན་དེ་ལ་འཁོད་བཞིན་དུ་བདེན་པ་རྟོགས་པའི་མོད་ལ་ཕྱིར་མི་འོང་གི་འབྲས་བུ་མངོན་དུ་བྱས་སོ། །དེ་ནས་དེ་སྟོན་པས་ཚུར་ཤོག་གིས་རབ་ཏུ་བྱུང་གི་བསྙེན་པར་རྫོགས་ནས་གདམས་ངག་བསྟན་པས་དགྲ་བཅོམ་པ་མངོན་དུ་བྱས་ཏེ། བཅོམ་ལྡན་འདས་ཀྱིས་དེ་དད་པ་དང་མོས་པ་དང་ལྡན་པ་རྣམས་ཀྱི་མཆོག་ཏུ་བསྟན་ནོ། །དེ་ནས་དགེ་སློང་རྣམས་ཀྱིས་དེའི་ལས་ཀྱི་རྒྱུ་གསོལ་པ་ན། བཅོམ་ལྡན་འདས་ཉིད་སྔོན་དྲང་སྲོང་དུ་གྱུར་པའི་ཚེ། འདི་ཉིད་དཀའ་ཐུབ་པ་ཞིག་ཏུ་གྱུར་ནས་དད་དེ་བྲག་གཡང་ལ་མཆོངས་པ་དྲང་སྲོང་གི་ཕྱག་གིས་བཟུང་སྟེ་བླངས་ནས་བསམ་གཏན་དང་མངོན་ཤེས་བསྐྱེད་པར་གསུངས་ཤིང་། ད་ལྟར་དགྲ་བཅོམ་པ་ཐོབ་སྟེ་དད་མོས་དང་ལྡན་པའི་མཆོག་ཏུ་ལུང་བསྟན་པའི་རྒྱུ་ནི། སྔོན་སངས་རྒྱས་འོད་སྲུང་གི་དུས་སུ། དྲང་སྲོང་ལྔ་བརྒྱ་མངོན་པར་དད་ནས། དཀའ་ཐུབ་ཀྱི་ནགས་སུ་སངས་རྒྱས་འོད་སྲུང་འཁོར་དང་བཅས་པ་སྤྱན་དྲངས་ནས་རྩ་བ་དང་འབྲས་བུའི་མཆོད་ནས་ཆོས་ཉན་པ་ན། སངས་རྒྱས་འོད་སྲུང་གིས་ཆོས་བསྟན་པས་དེའི་ནང་ནས་གཅིག་མ་གཏོགས་གཞན་ཀུན་གྱིས་བདེན་པ་རྟོགས་པའི་མོད་ལ་ཕྱིར་མི་འོང་བའི་འབྲས་བུ་ཐོབ་ནས། སླར་ཐམས་ཅད་ཀྱིས་རབ་ཏུ་བྱུང་བར་གསོལ་བས་དྲང་སྲོང་ལྔ་བརྒྱ་པོ་དགེ་སློང་རྣམས་ལ་གཏད་ནས་རབ་ཏུ་བྱུང་ཞིང་བསྙེན་པར་རྫོགས་ཏེ་དེ་དག་ལ་ལུང་ཕོག་ཅིང་བརྩོན་པས་གཞན་ཀུན་གྱིས་དགྲ་བཅོམ་པའི་གོ་འཕང་ཐོབ་ལ། དེ་ལས་དྲང་སྲོང་གཅིག་གིས་ནི་ཐ་ན་དྲོ་བ་ཙམ་གྱི་ཡོན་ཏན་ཡང་མ་ཐོབ་བོ། །དེ་གང་ལས་རབ་ཏུ་བྱུང་བའི་མཁན་པོ་དེ་ནི་སངས་རྒྱས་འོད་སྲུང་གིས་དད་པ་དང་མོས་པ་དང་ལྡན་པ་རྣམས་ཀྱིས་མཆོག་ཏུ་བསྟན་པ་ཡིན་པས། དེས་ཚེ་གཅིག་ལ་ཚངས་པར་སྤྱོད་པ་སྤྱད་ནས་འཆི་ཁར་མ་འོངས་པ་ན་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ཞིང་དགྲ་བཅོམ་པའི་གོ་འཕང་ཐོབ་ནས། བདག་གི་མཁན་པོ་བཞིན་དུ་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པར་གསུངས་སོ། །