ཚངས་སྤྱོད་ཀྱི་འབྲས་བུ་བསྟན་པ།

༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། ཡུལ་དེའི་བྲམ་ཟེ་འབྱུང་པོ་ཞེས་བྱ་བའི་བུ་ནག་པོ་ཞེས་བྱ་བ་རིག་པའི་གནས་བཅོ་བརྒྱད་ལ་བྱང་བ་ཞིག་རང་གི་ཕ་དེ་རྒས་པར་གྱུར་ནས་དེའི་སློབ་མ་བྲམ་ཟེའི་ཁྱེའུ་ལྔ་བརྒྱ་ཙམ་གྱི་སློབ་དཔོན་བྱེད་པ་ལས། བྲམ་ཟེ་རྣམས་ལ་རྩོད་པ་ཆེན་པོ་བྱུང་ནས་དེ་ཞི་བའི་ཐབས་རྩོམ་ཡང་ཞི་བར་བྱེད་མ་ནུས་པས་ཡིད་སྐྱོ་ནས་འཁོར་རྣམས་བོར་ཏེ་གཅིག་པུར་ནགས་ཁྲོད་ཅིག་ཏུ་སོང་ངོ་། །ནགས་དེ་ན་གནོད་སྦྱིན་ནག་པོ་ཞེས་བྱ་བ་སེམས་ཅན་གྱི་མདངས་འཕྲོག་ཅིང་སྲོག་ཆགས་སྟོང་ཕྲག་དུ་མ་ལ་སྡུག་བསྔལ་སྐྱེད་པ་ཞིག་ཀྱང་གནས་ཤིང་། དྲང་སྲོང་ཞིག་ཀྱང་གནས་ཏེ་དེ་གཉིས་ཕན་ཚུན་ཤིན་ཏུ་མཐུན་པ་ཞིག་གོ །དེ་ནས་བྲམ་ཟེ་ནག་པོ་དེ་དྲང་སྲོང་དེའི་ཐད་དུ་རབ་ཏུ་བྱུང་སྟེ། དེས་ཡིད་བྱེད་ཀྱི་ལུང་ཕོག་པས་ནག་པོས་ཀྱང་བསམ་གཏན་བཞི་དང་མངོན་ཤེས་ལྔ་ཐོབ་སྟེ་དྲང་སྲོང་རྒན་པོ་ཤི་བའི་འོག་ཏུ་གནས་དེར་འདུག་པར་བྱེད་དོ། །དེའི་ཚེ་བཅོམ་ལྡན་འདས་ལ་རྒྱལ་པོའི་ཁབ་ཀྱི་མི་རྣམས་ཀྱིས་གནོད་སྦྱིན་ནག་པོ་དེ་འདུལ་བར་གསོལ་བ་བཏབ་པས། བཅོམ་ལྡན་འདས་ཀྱིས་གནོད་སྦྱིན་དེ་རྫུ་འཕྲུལ་གྱིས་བཀུག་ནས་བཀའ་སྩལ་པ། ཀྱེ་སེམས་ཅན་རྣམས་ལ་གནོད་པ་མ་བྱེད་ཅིག སྡིག་པ་འདི་ཐོངས་ཤིག གནོད་སྦྱིན་གྱིས། བདག་ལ་ཇི་ལྟར་བཀའ་སྩལ་པ་དེ་བཞིན་དུ་འཚལ་ལོ་ཞེས་གསོལ་ནས་སྐྱབས་འགྲོ་དང་བསླབ་པའི་གཞི་བླངས་ནས་སླན་ཆད་རྒྱལ་པོའི་ཁབ་ཀྱི་མི་རྣམས་བསྲུང་བ་དང་བསྐྱབ་པར་ཁས་བླངས་སོ། །དེ་ནས་གནོད་སྦྱིན་དེ་རང་གནས་སུ་ཕྱིན་ཏེ་འདུག་པ་ན། དྲང་སྲོང་ནག་པོ་དེ་ཞག་བདུན་ན་འཆི་བར་མཐོང་ནས། དེ་ལ་སྙིང་བརྩེ་བའི་ཕྱིར་དེའི་ཐད་དུ་ཕྱིན་ནས་དོན་དེ་གོ་བར་བྱས་པས། དེ་མྱ་ངན་གྱིས་ནོན་ནས་རྫུ་འཕྲུལ་གྱི་སྟོབས་ཀྱང་ཉམས་ཏེ་སྨྲེ་སྔགས་འདོན་པ་ལ། གནོད་སྦྱིན་དེས་སངས་རྒྱས་ལ་སྐྱབས་སུ་འགྲོ་བར་བསྐུལ་བས། དྲང་སྲོང་ནག་པོས་དཀའ་ཐུབ་ཀྱི་ནགས་སྤངས་ནས་འོད་མའི་ཚལ་དུ་སོང་བ་ན། རྒྱང་མ་ནས་བཅོམ་ལྡན་འདས་ཀྱིས་འཁོར་རྣམས་ལ་ཆོས་བསྟན་པ་མཐོང་བས་དགེ་སློང་བསམ་གཏན་ལ་གནས་པ་བས་ཆེས་ཁྱད་པར་དུ་གྱུར་བའི་དགའ་བ་དང་བདེ་བ་སྐྱེས་ཏེ། དྲུང་དུ་ཕྱིན་ནས་བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་བྱས་ཏེ་ཆོས་ཉན་དུ་འཁོད་པ་ན། བཅོམ་ལྡན་འདས་ཀྱིས་མཐུན་པའི་ཆོས་བསྟན་པས་སྟན་དེ་ལ་འཁོད་བཞིན་དུ་བདེན་པ་མཐོང་བའི་མོད་ལ་ཕྱིར་མི་འོང་བའི་འབྲས་བུ་མངོན་དུ་བྱས་ཤིང་། དེ་ནས་སྟོན་པས་ཚུར་ཤོག་གིས་བསྙེན་པར་རྫོགས་པས་དགྲ་བཅོམ་པའི་བར་དུ་གྱུར་ཏོ། །དེར་དགེ་སློང་རྣམས་ངོ་མཚར་དུ་གྱུར་པ། སྔོན་ཡང་བཅོམ་ལྡན་འདས་ཉིད་དྲང་སྲོང་མངོན་ཤེས་ལྔ་དང་ལྡན་པ་ཞིག་ཏུ་གྱུར་པའི་ཚེ། དྲང་སྲོང་ནག་པོ་འདི་བྲམ་ཟེའི་ཁྱེའུ་ལེ་ལོ་ཅན་ཞིག་དུ་གྱུར་པ་ཞག་བདུན་ལས་ཚེ་མེད་པར་ཤེས་ནས། དེ་ལ་སྐྱོ་བ་བསྐྱེད་པའི་ཚིག་བརྗོད་པས། དེས་ཀྱང་བརྩོན་པས་བསམ་གཏན་དང་མངོན་ཤེས་ཐོབ་པའི་སྔོན་གྱི་རབས་གསུངས་ཤིང་། གཞན་ཡང་སངས་རྒྱས་འོད་སྲུང་གི་བསྟན་པ་ལ་འདི་ཉིད་རབ་ཏུ་བྱུང་ཞིང་ཚངས་པར་སྤྱད་པས་དབང་པོ་ཡོངས་སུ་སྨིན་པར་བྱས་པ་དེས་ད་ལྟ་རྣམས་པར་གྲོལ་བར་གྱུར་ཏོ་གསུངས། འདི་དག་གིས་ཀྱང་ཚངས་སྤྱོད་ཀྱི་འབྲས་བུ་བསྟན་ཏོ། །