དམ་པའི་ཆོས་ཡོངས་སུ་འཛིན་པར་སྨོན་ལམ་བཏབ་པའི་ཕན་ཡོན་གྱི་ཁྱད་པར་ཡང་བསྟན་པ།
༈ ཡང་གང་གི་ཚེ་ཚེ་དང་ལྡན་པ་ཀུན་དགའ་བོར་རབ་ཏུ་བྱུང་སྟེ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལོབས་ནས། བཅོམ་ལྡན་འདས་ཀྱིས་ཀྱང་། ཐོས་པ་འཛིན་པ་རྣམས་དང་། ཐོས་པ་བསགས་པ་རྣམས་ཀྱི་མཆོག་ཏུ་བསྟན་པ་དང་། ཚེ་དང་ལྡན་པ་འོད་སྲུང་ཆེན་པོ་ཡང་། བཅོམ་ལྡན་འདས་ཀྱིས་སྦྱངས་པའི་ཡོན་ཏན་དང་ལྡན་པ་རྣམས་ཀྱི་མཆོག་ཏུ་ལུང་བསྟན་ཞིང་བདག་ཉིད་དང་འདྲ་བར་ཆེ་བ་དང་རྒྱ་ཆེ་བར་སྟོན་པ་དེའི་ཚེ། དེ་གཉིས་ལྷ་དང་བཅས་པའི་འཇིག་རྟེན་གྱི་བླ་མར་གྱུར་ཏོ། །དེ་ནས་བཅོམ་ལྡན་འདས་ཀྱིས། དགེ་སློང་འདི་གཉིས་ཀྱིས་ནི་ང་ཡོངས་སུ་མྱ་ངན་ལས་འདས་ནས་བསྟན་པའི་དོན་བྱེད་ནུས་པར་འགྱུར་ཏེ། གཅིག་གིས་ནི་ཐོས་པའི་མཛོད་སྲུང་བར་ནུས་སོ། །གཅིག་གིས་ནི་བསྟན་པའི་དོན་བྱེད་ནུས་པར་འགྱུར་རོ་སྙམ་དུ་དགོངས་ནས་ཀུ་ཤའི་གྲོང་ཁྱེར་དུ་གཤེགས་ཏེ། དེ་ཡང་མི་འབའ་ཞིག་དང་མི་མ་ཡིན་པ་འབའ་ཞིག་ལ་བསྟན་པ་གཏད་ན་ཡང་ཡུན་རིང་དུ་གནས་པར་མི་འགྱུར་གྱི་དེ་བས་གཉིས་ཀ་ལ་གཏད་པར་བྱའོ་དགོངས་ནས། ཚེ་དང་ལྡན་པ་འོད་སྲུང་ལ་བཀའ་སྩལ་པ། ང་ཡོངས་སུ་མྱ་ངན་ལས་འདས་པའི་འོག་ཏུ་བསྟན་པའི་དོན་བྱས་ཏེ། སྡེ་སྣོད་གསུམ་ཡང་དག་པར་བསྡུས་ནས། དགེ་སློང་ཀུན་དགའ་བོས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་ཀྱི་བར་དུ་མྱ་ངན་ལས་འདའ་བར་མ་བྱེད་ཅིག དེར་ཀུན་དགའ་བོ་ལ་བཀའ་སྩལ་པ། ཁྱོད་ཀྱང་དྲང་སྲོང་ཉི་མ་གུང་པ་རབ་ཏུ་མ་བྱུང་གི་བར་དུ་མྱ་ངན་ལས་འདའ་བར་མ་བྱེད་ཅིག དེ་ལའང་ཁྱེད་ཀྱིས་འདི་སྐད་ཅེས་གྱིས་ཤིག ཀླུའི་རྒྱལ་པོ་ཧུ་ལུ་རུ་བཏུལ་ཏེ། ཁ་ཆེའི་ཡུལ་བཙུགས་ནས་དེར་བསྟན་པ་གནས་པར་བྱས་ཏེ་རྒྱས་པར་བྱས་ནས། དེ་བཞིན་དུ་ཁྱིམ་བདག་གསོ་མ་ཅན་རབ་ཏུ་བྱུང་སྟེ། དེས་ཀྱང་ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱས་ཏེ། དེ་ལ་ཁྱོད་ཀྱི་ཐོས་པ་རྣམས་མ་གཏད་ཀྱི་བར་དུ་མྱ་ངན་ལས་འདའ་བར་མ་བྱེད་ཅིག གསོ་མ་ཅན་ལ་ཡང་འདི་སྐད་གྱིས་ཤིག་ཁྱོད་ཀྱིས་ཀྱང་ཀླུའི་རྒྱལ་པོ་གར་མཁན་དཔའ་བོ་གཉིས་བཏུལ་ཏེ། གར་མཁན་དང་དཔའ་བོའི་དགོན་པའི་གནས་བཙུགས་ནས། དེ་བཞིན་དུ་ཡུལ་བཅོམ་བརླག་ཏུ་སྤོས་འཚོང་སྲུང་བ་ཞེས་བྱ་བ་ཞིག་ཡོད་དེ། དེའི་བུ་ཉེ་སྲུང་ཞེས་བྱ་བ་ཞིག་འབྱུང་བར་འགྱུར་བ་དེ་རབ་ཏུ་བྱུང་ནས་དེས་ཀྱང་དགྲ་བཅོམ་པ་ཉིད་མངོན་དུ་བྱས་ནས། དེ་ལ་ཡང་ཐོས་པ་རྣམས་མ་གཏད་ཀྱི་བར་དུ་ཡོངས་སུ་མྱ་ངན་ལས་འདའ་བར་མ་བྱེད་ཅིག ཉེ་སྲུང་ལའང་འདི་སྐད་ཅེས་གྱིས་ཤིག ཁྱོད་ཀྱིས་ཀྱང་རིགས་ཀྱི་བུ་བློ་ལྡན་རབ་ཏུ་བྱུང་སྟེ་དེས་ཀྱང་དགྲ་བཅོམ་པ་ཉིད་མངོན་སུམ་དུ་བྱས་ཏེ། དེ་ལ་ཡང་ཐོས་པ་རྣམས་མ་གཏད་ཀྱི་བར་དུ་ཡོངས་སུ་མྱ་ངན་ལས་འདའ་བར་མ་བྱེད་ཅིག དེ་ལའང་འདི་སྐད་ཅེས་གྱིས་ཤིག ཁྱོད་ཀྱིས་ཀྱང་ཡུལ་དམར་བུ་ཞེས་བྱ་བར་ཟས་དུག་ཅན་གྱི་བསམ་པ་མ་བྱས་ཀྱི་བར་དུ་ཡོངས་སུ་མྱང་ངན་ལས་འདའ་བར་མ་བྱེད་ཅིག་ཅེས་གྱིས་ཤིག་ཅེས་གསུངས་སོ། །དེ་ནས་དེ་གཉིས་ཀྱིས་ཀྱང་། བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་བཞིན་དུ་འཚལ་ལོ་ཞེས་གསོལ་ཏོ། །དེའི་འོག་ཏུ་བཅོམ་ལྡན་འདས་ཀྱིས་འཇིག་རྟེན་གྱི་ཐུགས་བསྐྱེད་པས། ལྷའི་དབང་པོ་བརྒྱ་བྱིན་དང་། རྒྱལ་པོ་ཆེན་པོ་བཞི་འོངས་ནས་སྤྱན་སྔར་འཁོད་པ་ན་བཀའ་སྩལ་པ། དབང་པོ་དག་དེ་བཞིན་གཤེགས་པ་ནི་རིང་པོར་མི་ཐོགས་པར། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་གྱིས། ང་ཡོངས་སུ་མྱ་ངན་ལས་འདས་པའི་འོག་ཏུ་ཁྱེད་ཀྱིས་བསྟན་པ་སྲུང་བར་གྱིས་ཤིག ཅེས་སོགས་བསྟན་པ་ཡུལ་གང་དུ་ནུབ་པ་དང་། ཇི་ལྟར་ནུབ་པའི་རྐྱེན་སོགས་རྒྱས་པར་བསྟན་ནས། དབང་པོ་དག་ཕྱི་མའི་དུས་ན་གང་དུ་བསྟན་པ་ལ་གནོད་པ་ཆེན་པོ་འབྱུང་བར་འགྱུར་བ་དེར། ཁྱེད་གཅིག་ཏུ་བསྡོམས་ལ་བསྟན་པ་སྲུང་བར་གྱིས་ཤིག ཅེས་གསུངས་པས། རྒྱལ་པོ་ཡུལ་འཁོར་སྲུང་གིས་ཤར་ཕྱོགས་ནས་དང་། འཕགས་སྐྱེས་པོས་ལྷོ་ཕྱོགས་ནས་དང་། མིག་མི་བཟང་གིས་ནུབ་ཕྱོགས་ནས་དང་། རྣམ་ཐོས་སྲས་ཀྱིས་བྱང་ཕྱོགས་ནས་དང་། བརྒྱ་བྱིན་གྱིས་ཐམས་ཅད་ནས་བསྲུང་བར་འཚལ་ལོ་ཞེས་དམ་བཅས་ཏེ་རང་གི་གནས་སུ་སོང་ངོ་། །དེ་ལྟར་འོད་སྲུང་དང་ཀུན་དགའ་བོ་ལ་བསྟན་པ་གཏད་པ་དེའི་ཚེ་དགེ་སློང་རྣམས་ཀྱིས་གསོལ་པ། བཙུན་པ་བཅོམ་ལྡན་འདས་ཀྱིས་དགེ་སློང་འོད་སྲུང་ལ་བསྟན་པ་གཏད་དེ། ཀུན་དགའ་བོ་ལ་ཐོས་པའི་མཛོད་གཏད་ནས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་འོག་ཏུ་འདི་གཉིས་ཀྱིས་བསྟན་པ་རྒྱས་པར་བགྱིད་པར་འགྱུར་བ་ལ་གཟིགས། བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། ཇི་ལྟར་འདས་པའི་དུས་ན་ཡང་ངས་དགེ་སློང་འོད་སྲུང་ལ་དཔུང་གི་ཚོགས་ཡན་ལག་བཞི་དང་ཡུལ་གཏད་དེ་ཀུན་དགའ་བོ་ལ་ནོར་གྱི་བང་མཛོད་གཏད་ནས་འདི་གཉིས་ཀྱིས་ང་ཤི་བའི་འོག་ཏུ་བསྲུངས་ཏེ་རྒྱལ་པོའི་ཕོ་བྲང་རྒྱས་པར་བྱས་པ་ཡིན་ཏེ། སྔོན་གྲོང་ཁྱེར་མི་ཐི་ལ་ན། རྒྱལ་པོ་ལྷ་ཆེན་པོ་ཞེས་བྱ་བའི་རྒྱལ་སྲིད་བྱེད་པ་ལས། རྒྱལ་པོ་དེ་ཉིད་སྐུ་བགྲེས་པར་གྱུར་ཏེ། སྲས་རྒྱལ་བུ་ཆུང་ངུ་ཞིག་ལས་མེད་པས། བློན་པོའི་མཆོག་དགའ་བོ་དང་ཉེ་དགའ་ཞེས་བྱ་བ་གཉིས་ཡོད་པ་དེ་བཀུག་ནས་གཅིག་ལ་རྒྱལ་པོའི་བུ་དང་དཀོར་མཛོད་གཏད། གཅིག་ལ་དཔུང་གི་ཚོགས་ཡན་ལག་བཞི་དང་ཡུལ་གཏད་དེ། ང་འདས་པའི་འོག་ཏུ་ཁྱེད་གཉིས་ཀྱིས་རྒྱལ་པོའི་ཕོ་བྲང་སྲུངས་ལ། རྒྱས་པར་གྱིས་ཤིག་ཅེས་བསྒོ་ནས། རྒྱལ་པོ་དེས་བུ་རྒྱལ་སར་བཅུག་སྟེ་དུས་ལས་འདས་སོ། །དེའི་འོག་ཏུ་བློན་པོ་མཆོག་གཉིས་ཀྱིས་དེ་ལྟར་བསྲུངས་ཏེ། རྒྱལ་བུ་ཉིད་ཤེད་བྱེ་ཞིང་མཐུ་དང་ལྡན་པར་གྱུར་པ་ན་དེ་གཉིས་ཀྱིས་དཀོར་མཛོད་དཔུང་བཅས་འབུལ་བར་བྱས་སོ། །དེའི་དུས་ཀྱི་རྒྱལ་པོ་བགྲེས་པོ་ནི་ང་ཉིད་ཡིན་ལ། བློན་པོ་གཉིས་ནི་འོད་སྲུང་དང་ཀུན་དགའ་བོ། རྒྱལ་བུ་དེ་ནི་གསོ་མ་ཅན་ཡིན་ནོ། །གཞན་ཡང་དགེ་སློང་འདི་གཉིས་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་སྟེ་དེ་གཉིས་གཅིག་གི་མཁན་པོ་ནི་སངས་རྒྱས་འོད་སྲུང་གིས་ཐོས་པ་འཛིན་པའི་མཆོག་དང་། གཅིག་གི་མཁན་པོ་ནི་སྦྱངས་པའི་ཡོན་ཏན་ལ་གནས་པའི་མཆོག་ཏུ་ལུང་བསྟན་པ་ཡིན་པས། དེ་གཉིས་ཀྱིས་ཀྱང་ཚེ་གཅིག་ཏུ་ཚངས་པར་སྤྱོད་པ་སྤྱད་ནས་འཆི་ཁར་སྨོན་ལམ་དུ་མ་འོངས་པ་ན་སངས་རྒྱས་ཤཱཀྱ་ཐུབ་པའི་བསྟན་པ་ལ་དགྲ་བཅོམ་པའི་གོ་འཕང་ཐོབ་ནས་རང་རང་གི་མཁན་པོ་ལ་སངས་རྒྱས་འོད་སྲུང་གིས་ཇི་ལྟར་ལུང་བསྟན་པ་དེ་བཞིན་དུ་བསྟན་པར་གྱུར་ཅིག ཅེས་བྱས་ཤིང་། ཁྱད་པར་ཀུན་དགའ་བོས། དེ་ཡོངས་སུ་མྱ་ངན་ལས་འདས་པའི་འོག་ཏུ་ཡང་བདག་གིས་ཐོས་པའི་མཛོད་རྒྱས་པར་བྱེད་པར་གྱུར་ཅིག་ཅེས་དང་། འོད་སྲུང་དེ་ནས་འཕོས་ཏེ་རྒྱལ་པོ་ཀྲྀ་ཀཱིའི་བློན་པོའི་བུར་གྱུར་ཏེ། དེའི་ཚེ་སངས་རྒྱས་འོད་སྲུང་མྱ་ངན་ལས་འདས་ནས་རྒྱལ་པོ་ཀྲྀ་ཀཱིས་དེའི་སྐུ་གདུང་ལ་མཆོད་རྟེན་བྱས་ཏེ། དུས་སྟོན་གྱི་ཚེ་དགེ་སློང་རྣམས་སྤྱན་འདྲེན་པར་འདོད་པ་ན། སངས་རྒྱས་མྱ་ངན་ལས་འདས་ཏེ་ཞག་བདུན་ནས་བསྟན་པའང་ནུབ་པར་གྱུར་ཏེ། དགེ་སློང་དབང་ཐོབ་པ་རྣམས་ནི་སྟོན་པ་འདས་ནས་ཐམས་ཅད་ཡོངས་སུ་མྱང་ངན་ལས་འདས་པར་གྱུར་ཅིང་། སོ་སོ་སྐྱེ་བོ་དག་ནི་ཁྱིམ་པར་གྱུར་ཏོ། །དེས་ན་དེའི་ཚེ་དགེ་སློང་གཅིག་ཀྱང་མ་རྙེད་པས། རྒྱལ་པོས་དེའི་བསྟན་པ་འཛིན་པར་འགྱུར་བ་གཅིག་ཀྱང་མེད་དོ་ཞེས་སྨྲས་ཏེ། མཆོད་པ་བྱས་ཏེ་སོང་ངོ་། །དེའི་ཚེ་བློན་པོའི་བུ་དེས་མཆོད་རྟེན་དེ་ལ་བཀུར་སྟི་ཆེན་པོ་བྱས་ཏེ། བདག་གིས་སངས་རྒྱས་ཤཱཀྱ་ཐུབ་པ་དེ་ཡོངས་སུ་མྱ་ངན་ལས་འདས་ནས་བསྟན་པ་འཛིན་པར་གྱུར་ཅིག་ཅེས་སྨོན་ལམ་བཏབ་པའི་ལས་ཀྱི་རྒྱུས་ད་ལྟར་དེ་བཞིན་དུ་གྱུར་པར་གསུངས་སོ། །འདིས་ནི་དམ་པའི་ཆོས་ཡོངས་སུ་འཛིན་པར་སྨོན་ལམ་བཏབ་པའི་ཕན་ཡོན་གྱི་ཁྱད་པར་ཡང་བསྟན་པ་ཡིན་ནོ། །