སངས་རྒྱས་འོད་སྲུང་གི་བསྟན་པ་ལ་འདི་ཉིད་དགེ་བསྙེན་དུ་གྱུར་ཏེ་ཚེ་གཅིག་ཏུ་སྐྱབས་འགྲོ་དང་བསླབ་གཞི་ཡང་དག་པར་བསྲུངས་ནས་འཆི་ཁར་སྨོན་ལམ་བཏབ་པ།

༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། བྲམ་ཟེ་འཛིན་བྱེད་ཀྱི་བུ་ཞེས་བྱ་བ། འཕགས་པ་ཤཱ་རིའི་བུས་ཕའི་གཉེན་གྱི་བུར་གྱུར་ཅིང་། ཤཱ་རིའི་བུ་དང་བྱིས་པའི་དུས་ཡི་གེའི་བསླབ་གྲྭར་མཉམ་དུ་ཞུགས་པ་ཞིག་ཡོད་པ་དེ། སྐབས་དེར་རྒྱལ་པོ་གཟུགས་ཅན་སྙིང་པོའི་བློན་པོར་གྱུར་ཏེ། དེས་རྒྱལ་པོའི་ཁབ་དེར་རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་ལེན་པར་བྱེད་དོ། །བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པར་བྱེད་དོ། །དེར་འཕགས་པ་ཤཱ་རིའི་བུས་དེ་ཉིད་འདུལ་བའི་དུས་ལ་བབ་པར་དགོངས་ཏེ་དེའི་གམ་དུ་བྱོན་པ་ན། དེས་ཀྱང་དགའ་བས་བསུས་ཤིང་གདན་བཤམས་ཏེ་བཤོས་གསོལ་བ་ན། ཤཱ་རིའི་བུས་ང་ལ་སེམས་དགའ་བར་བྱས་ཟིན་གྱིས་དེས་ཆོག་གོ །འཛིན་བྱེད་ཀྱི་བུས། ཁྱོད་ཡུན་རིང་མོ་ཞིག་ན་གདོད་བདག་གི་ཁྱིམ་དུ་ཕྱིན་ན་ཅིའི་ཕྱིར་ཟན་གཅིག་ཙམ་ཡང་ཟར་མི་བཏུབ། ཤཱ་རིའི་བུས། འདི་ལྟར་ཁྱོད་ནི་ངང་ཚུལ་འཆལ་ཞིང་ངང་ཚུལ་ཉམས་པ་ཡིན་ཏེ། རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་ལེན་པར་བྱེད་ལ། བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོའི་ནོར་ལེན་པར་བྱེད་པའི་ཕྱིར་རོ། །འཛིན་བྱེད་ཀྱི་བུས། བདག་ནི་ཁྱིམ་པ་སྟེ། ཁྱིམ་ལ་གནས་པ་ལགས་ན། བདག་གིས་ནི་བདག་ཉིད་དང་ཕ་མ་དང་ཆུང་མ་དང་བྲན་དང་ལས་བྱེད་དང་ཞོ་ཤས་འཚོ་བ་དང་མཛའ་བོ་དང་སྙིང་ཉེ་བ་དང་ཉེ་དུ་དང་རྒན་རབས་དག་ཀྱང་ཚིམ་པར་བྱ་དགོས་ཤིང་། རྒྱལ་པོ་ལ་ཡང་འབུལ་དགོས་ལ། སྔོན་གྱི་མཚུན་གཏོང་བ་དང་དགེ་སྦྱོང་དང་བྲམ་ཟེ་རྣམས་ལའང་ཟན་སྦྱིན་དགོས་ཏེ། བདག་གིས་ནི་ཆོས་བཞིན་དུ་བྱེད་པ་འབའ་ཞིག་གིས་བདེ་བླག་ཏུ་འབྱོར་མི་ནུས་སོ། །ཤཱ་རིའི་བུས་འོ་ན་ཁྱོད་ཉིད་ལ་འདྲི་བར་བྱ་ཡིས། ཁྱོད་ཀྱིས་ཇི་ལྟར་བཟོད་པ་དེ་བཞིན་ཏུ་ལན་ཐོབས་ཤིག དཔེར་ན་མི་ཞིག་གི་ཕ་མ་སོགས་དེ་དག་གི་ཕྱིར་ཆོས་མ་ཡིན་པ་སྤྱོད་ཅིང་ལོག་པར་སྤྱོད་དེ། ཤི་འཕོས་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེས་ནས། དེ་སེམས་ཅན་དམྱལ་བའི་སྲུང་མ་རྣམས་ཀྱིས་བཟུང་སྟེ། སྡུག་བསྔལ་དྲག་པོ་མི་བཟད་པ་མྱོང་དུ་བཅུག་ན་དམྱལ་སྲུང་དེ་དག་ལ་བདག་ལ་གནོད་པ་འདི་ལྟ་བུ་མ་བྱེད་ཅིག ཅིའི་ཕྱིར་ན་བདག་གིས་ཕ་མ་སོགས་དེ་དག་གི་ཕྱིར་ཆོས་མ་ཡིན་པ་སྤྱད་ཅིང་ལོག་པར་སྤྱད་པའི་དབང་གིས་འདིར་སྐྱེས་པར་ཟད་དོ་ཞེས་ཟེར་ན། མི་དེས་སེམས་ཅན་དམྱལ་བའི་སྲུང་མ་ལས་དོན་དེ་འགྲུབ་པར་འགྱུར་རམ། འཛིན་བྱེད་ཀྱི་བུས། དེ་ནི་མི་འགྲུབ་བོ། །ཤཱ་རིའི་བུས། དད་པ་དང་ལྡན་པའི་རིགས་ཀྱི་བུས་ཆོས་དང་ལྡན་པ་དང་། ལས་ཀྱི་ཡོན་ཏན་དག་གིས་ལོངས་སྤྱོད་རྣམས་བསྒྲུབས་ཏེ། ཕ་མ་སོགས་ལ་དུས་དང་དུས་སུ་ཡང་དག་པར་རི་མོར་བྱེད། བསྙེན་བཀུར་བྱེད། བདེ་བས་བསྟེན་པར་བྱེད་དེ། སྡིག་པའི་ལས་ཅུང་ཟད་ཀྱང་མི་བྱེད་ལ། བསོད་ནམས་ཀྱི་ལས་ཡང་དག་པར་བླངས་ཏེ་འདུག་ན་དེ་ལ་ཕ་མ་སོགས་ཀྱང་སླར་སྙིང་བརྩེ་བར་བྱེད་དེ། དགེ་བའི་ཆོས་རྣམས་འཕེལ་བ་འབའ་ཞིག་ཏུ་འགྱུར་ཏེ་ཡོངས་སུ་འགྲིབ་པར་མི་འགྱུར་རོ། །ཞེས་སྨྲས་པས། བྲམ་ཟེ་འཛིན་བྱེད་ཀྱི་བུ་ངུས་ཏེ་མཆི་མ་བླགས་ཤིང་བསླབ་པའི་གཞི་ལྔ་ལེགས་པར་བླངས་སོ། །དེ་ནས་དེ་ཕྱིས་བྲོ་ནད་ཀྱིས་ཟིན་པར་གྱུར་པ་ན། འཕགས་པ་ཤཱ་རིའི་བུས་གཏམ་དེ་ཐོས་པས་བྲམ་ཟེ་དེའི་ཁྱིམ་དུ་ཕྱིན་ནས་དེ་ལ་ཆོས་བསྟན་པས་ཚངས་པའི་གནས་པ་བཞི་ལ་བཀོད་ནས་སླར་བྱོན་ནོ། །དེར་བཅོམ་ལྡན་འདས་ཀྱིས་དེ་ཚངས་པའི་གནས་པ་ཙམ་ལ་བཀོད་པ་བས་བདེན་པ་ལ་མ་སྦྱར་བར་གཟིགས་ནས་འོད་མའི་ཚལ་དུ་མི་སྣང་བར་གྱུར་ཏེ་བྲམ་ཟེ་འཛིན་བྱེད་ཀྱི་ཁྱིམ་དུ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་ལ་མཐུན་པའི་ཆོས་བསྟན་པས། དེ་ཉིད་སྟན་དེ་ལ་འཁོད་བཞིན་དུ་ཕྱིར་མི་འོང་གི་འབྲས་བུ་ཐོབ་བོ། །དེ་ལྟར་དེ་བདེན་པ་ལ་བཀོད་ནས་སྐུ་ཉིད་དེར་མི་སྣང་བར་གྱུར་ཏེ་འོད་མའི་ཚལ་དུ་གདན་ལ་བཞུགས་པར་གྱུར་ཏེ། མི་རིང་བར་བྲམ་ཟེ་དེ་ཡང་ཚེ་འཕོས་ཏེ་ཚངས་པའི་འཇིག་རྟེན་དུ་སྐྱེས་སོ། །དེ་ནས་བཅོམ་ལྡན་འདས་ཀྱིས་ཤཱ་རིའི་བུ་ལ་དོན་དེ་རྒྱས་པར་བཀའ་སྩལ་པ་ན། དགེ་སློང་རྣམས་ཀྱིས་དེའི་ལས་ཀྱི་རྒྱུ་གསོལ་བ་ན། སྔོན་གྲོང་ཁྱེར་འཐབ་མེད་ཅེས་བྱ་བ་ན་རྒྱལ་པོ་ཀླུ་ཡི་ལྷ་ཞེས་པས་རྒྱལ་སྲིད་བྱེད་པའི་ཚེ། དེའི་མདུན་ན་འདོན་གྱི་འབྱོར་པའི་ཁྱད་པར་དག་བྲམ་ཟེ་དབུལ་པོ་ཞིག་གིས་མཐོང་ནས། འདི་ལྟ་བུའི་དཔལ་ཉམས་སུ་མྱོང་བ་ནི་སྦྱིན་པ་དང་། དུལ་བ་དང་། ཡང་དག་པར་སྡོམ་པའི་ལས་རྣམ་པ་གསུམ་གྱི་འབྲས་བུ་ཡིན་གྱིས། བདག་གིས་ཀྱང་དགེ་བའི་རྩ་བ་ཅུང་ཟད་ཅིག་བྱས་ན་དབུལ་བ་འདི་རྒྱུན་ཆད་པར་འགྱུར་རོ་སྙམ་ནས། རང་སངས་རྒྱས་ཞིག་ལ་བསོད་སྙོམས་ཕུལ་ཏེ། དགེ་བའི་རྩ་བ་འདིས། བདག་གང་དུ་སྐྱེས་པ་དེར་ཕྱུག་ཅིང་ནོར་མང་བའི་རིགས་སུ་སྐྱེས་ཤིང་། རྒྱལ་པོ་ལ་བརྟེན་ཅིང་བྲམ་ཟེ་དང་ཁྱིམ་བདག་རྣམས་ཀྱི་ནོར་ལེན་པ་དང་། བྲམ་ཟེ་དང་ཁྱིམ་བདག་རྣམས་ལ་བརྟེན་ཅིང་རྒྱལ་པོ་ལས་ནོར་ལེན་པ་དང་། འདི་བས་ཀྱང་ཆེས་ཁྱད་པར་འཕགས་པའི་སྟོན་པ་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་བྲམ་ཟེ་དབུལ་པོ་དེ་ནི་འདི་ཉིད་ཡིན་ནོ། །གཞན་ཡང་སངས་རྒྱས་འོད་སྲུང་གི་བསྟན་པ་ལ་འདི་ཉིད་དགེ་བསྙེན་དུ་གྱུར་ཏེ་ཚེ་གཅིག་ཏུ་སྐྱབས་འགྲོ་དང་བསླབ་གཞི་ཡང་དག་པར་བསྲུངས་ནས་འཆི་ཁར་སྨོན་ལམ་བཏབ་པར་གསུངས་སོ། །