ང་རྒྱལ་དང་ངག་བག་མེད་པའི་ཉེས་པ་དང་། སྦྱིན་པ་དང་ཚུལ་ཁྲིམས་སོགས་ཀྱི་འབྲས་བུ་བསྟན་པ།

༈ ཡང་མཉན་ཡོད་ན་བཞུགས་པའི་ཚེ། ཡུལ་དེའི་ཁྱིམ་བདག་གཅིག་ལ་ཁྱེའུ་རོ་སྟོད་གཟུགས་བཟང་ཞིང་ལྟ་ན་སྡུག་པ་མཛེས་ལ། རོ་སྨད་ཡན་ལག་མ་ཚང་བ་ཞིག་བྱུང་བས་མིང་འཕྱེ་བོར་བཏགས། དེ་བཙས་པའི་ཚེ་ཁྱིམ་དེར་དོན་ཐམས་ཅད་གྲུབ་ཅིང་འབྱོར་པར་གྱུར་ཏེ། དེ་ཇི་ཙམ་ཆེར་སྐྱེས་པ་དེ་ཙམ་དུ་ཁྱིམ་བདག་དེའི་ཁྱིམ་འབྱོར་ཞིང་རྒྱས་པར་གྱུར་པས་ཁྱེའུ་འདི་ནི་དཔལ་ཡོན་ཅན་ཞིག་ཡིན་ཞེས་ཀུན་ཏུ་གྲགས་པར་གྱུར་པས། མཉན་ཡོད་ན་གནས་པའི་སྐྱེ་བོ་མང་པོ་དག་དུས་དུས་སུ་དེ་ལ་བལྟར་འགྲོ་ཞིང་། དོན་ཅི་རྩོམ་པ་དེ་དག་ཐམས་ཅད་དེའི་མིང་གིས་རྩོམ་པར་བྱེད་དེ། དེས་དོན་རྣམས་གྲུབ་པར་གྱུར་པས་ལྷག་པར་ཡང་མཉན་དུ་ཡོད་པ་ཐོག་ཐག་ཏུ་གྲགས་པར་གྱུར་ཏོ། །དེ་ནས་དེས་ཡིག་རྩིས་དང་བརྟག་པ་བརྒྱད་སོགས་ལའང་ཤིན་ཏུ་བྱང་བར་བྱས་ཤིང། ཕྱིས་ཞིག་ན་དེ་རིན་པོ་ཆེའི་ཁྱོགས་ལ་ཞོན་ཏེ་སྐྱེ་བོ་ཕལ་མོ་ཆེས་གཡོག་བྱས་ནས། སྐྱེད་མོས་ཚལ་དུ་སོང་བ་ལས་སྐྱེ་བོ་མང་པོ་རྒྱལ་བྱེད་ཀྱིས་ཚལ་དུ་འགྲོ་བར་མཐོང་ནས་དེ་དག་ལ་གཏམ་དྲིས་པས། བཅོམ་ལྡན་འདས་བཞུགས་པར་ཐོས་ཏེ་དེར་ཕྱིན་པ་ན། རྒྱང་མ་ནས་མཚན་དཔེའི་སྐུ་མཆོག་མཐོང་བས་དགེ་སློང་བསམ་གཏན་ལ་གནས་པ་བས་ཆེས་ཁྱད་པར་དུ་འཕགས་པའི་དགའ་བདེའི་ཉམས་སྐྱེས་ཤིང་དྲུང་དུ་འཁོད་དེ་ཆོས་མཉན་པ་ན་བཅོམ་ལྡན་འདས་ཀྱིས་དེ་དང་མཐུན་པའི་ཆོས་བསྟན་པས་སྟན་དེ་ཉིད་དུ་བདེན་པ་མཐོང་ཞིང་། ལུས་འདི་ལྟར་མ་གྱུར་ན་རབ་ཏུ་བྱུང་བ་ལ་སྙམ་པའི་མོད་ལ་ལུས་ཀྱིས་ཡན་ལག་རངས་པར་གྱུར་ཏོ། །དེར་སྟོན་པས་ཚུར་ཤོག་གིས་རབ་ཏུ་བྱུང་བ་ནས་དགྲ་བཅོམ་པའི་བར་དུ་གྱུར་ཏོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། འདི་ཉིད་དགེ་བསྙེན་མང་དུ་ཐོས་པ། རིག་པ་དང་གྲོལ་བའི་སྤོབས་པ་དང་ལྡན་པའི་ཆོས་སྨྲས་པ། དགེ་བསྙེན་གྱི་སྐྱེ་བོ་ཐམས་ཅད་ཀྱིས་བཀུར་སྟིར་བྱེད། བླ་མར་བྱེད། རི་མོར་བྱེད། མཆོད་པ་བྱེད་པ་ཞིག་ཏུ་གྱུར་ཏེ། དེའི་ཚེ་དགེ་བསྙེན་དེ་དག་གིས་དགེ་བསྙེན་དེ་ལས་ཆོས་ཉན་ཞིང་ཡོན་ཀཪྵ་པ་ཎ་ལྔ་བརྒྱ་རེ་འབུལ་བར་བྱེད་ལ། དེས་ཀྱང་དགེ་འདུན་རྣམས་ལ་འབུལ་བར་བྱེད་དེ། དེ་ནས་ཕྱི་ཞིག་ན་དགེ་བསྙེན་དེ་དགེ་བསྙེན་གྱིས་སྡེ་ཚན་དེ་དག་དང་ལྷན་ཅིག་ཏུ་གཙུག་ལག་ཁང་དུ་དོང་ངོ་། །དེའི་ཚེ་དགེ་སློང་གི་དགེ་འདུན་རྣམས་འདུལ་བའི་ཆོ་གའི་ལས་བྱ་བ་ཞིག་བྱུང་ནས་གཙུག་ལག་ཁང་སྐྱོང་གིས་དགེ་བསྙེན་ཐམས་ཅད་གཙུག་ལག་ཁང་གི་ཕྱི་རོལ་དུ་བསྐྲད་དེ། འདི་ཁྱེད་ཀྱིས་མཉན་པར་མ་བྱེད་ཅིག་ཅེས་བྱས་སོ། །དེ་ནས་དགེ་བསྙེན་སྡེ་ཚན་དེ་དག་གིས་དགེ་བསྙེན་དེ་ལ་སྨྲས་པ། དེ་ལྟར་བདག་ཅག་ནི་དགེ་སློང་རྣམས་ཀྱིས་བསྐྲད་དུ་རུང་ན་ཁྱོད་ལྟ་བུ་མང་དུ་ཐོས་པ། རིག་པ་དང་གྲོལ་བའི་སྤོབས་པ་དང་ལྡན་པའི་ཆོས་སྨྲ་བ་ཡིན་ན་ཅི་སྟེ་བསྐྲད་ཅེས་ཟེར་ནས། དེ་དག་དེ་ལ་མཁས་པར་འཛིན་པ་གང་ཡིན་པ་དེ་མེད་པར་གྱུར་ཏོ། །དེ་ནས་དགེ་བསྙེན་དེ་གཞི་དེ་ལས་ཁྲོས་ཏེ། དགེ་སློང་རྣམས་ལ་སྨྲས་པ། ངས་ནི་འཕྱེ་བོ་ཁྲི་ལ་འདུག་པ་ཁྱེད་རྣམས་ལ་ཅི་རྙེད་པ་བསྒྲུབས་ཏེ་བྱིན་ན་ཁྱེད་ཀྱིས་བདག་གཅིག་པུ་ལ་མི་ཟེར་བར་མང་པོའི་ནང་དུ་དམའ་ཕབ་བོ་ཞེས་བྱས་སོ། །དེ་ནས་ཕྱིས་དགེ་བསྙེན་དེ་ཉིད་འགྱོད་པར་གྱུར་ནས་ཉེས་པ་ལ་ཉེས་སོ་ཞེས་བཤགས་ནས། སྦྱིན་པ་དག་སྦྱིན་བསོད་ནམས་དག་བྱས་ཏེ་ཚེ་གཅིག་ཏུ་སྐྱབས་སུ་འགྲོ་བ་དང་བསླབ་པའི་གཞི་རྣམས་བསྲུངས་ནས་འཆི་ཀར་སྨོན་ལམ་བཏབ་པ། ཀྱེ་མ་འདི་ལྟར་བདག་གིས་སེམས་ཅན་དག་པ་འདི་ལྟ་བུ་ལ་ཚིག་རྩུབ་སྨྲས་པའི་རྣམ་སྨིན་ཉམས་སུ་མི་མྱོང་ཞིང་། གལ་ཏེ་མྱོང་ནའང་རབ་ཏུ་བྱུང་བའི་སེམས་བསྐྱེད་མ་ཐག་ཏུ་བདག་གི་བཀྲ་མི་ཤིས་པ་དེ་མེད་པར་གྱུར་ཏེ་བཀྲ་ཤིས་པར་གྱུར་ཅིག བདག་གིས་དཀོན་མཆོག་མཆོད་ཅིང་སྦྱིན་པ་གཏོང་བ་དང་། སྐྱབས་འགྲོ་དང་བསླབ་གཞི་བསྲུངས་པའི་དགེ་བའི་རྩ་བ་འདིས་གང་དུ་སྐྱེ་བར་འགྱུར་བ་དེར་ཕྱུག་ཅིང་ནོར་མང་བ་དང་། བདག་གི་མིང་འཇིག་རྟེན་པ་ཀུན་གྱིས་བཀྲ་ཤིས་པར་འཛིན་ཅིང་། ཅི་བསམ་པ་དང་ཅི་འདོད་པ་དེ་དག་ཐམས་ཅད་འབྱོར་ཞིང་གྲུབ་པར་གྱུར་ཅིག ཅེས་བྱས་སོ། །དེའི་ཚེ་དགེ་སློང་ལ་ཚིག་རྩུབ་སྨྲས་པའི་རྒྱུ་དེས་ཚེ་རབས་ལྔ་བརྒྱར་འཕྱེ་བོར་གྱུར་ལ། སྦྱིན་པ་དང་ཚུལ་ཁྲིམས་ཀྱི་འབྲས་བུ་སྨོན་པ་བཞིན་དུ་གང་དང་གང་དུ་སྐྱེས་པ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ་འཇིག་རྟེན་ཐམས་ཅད་ཀྱི་བཀྲ་ཤིས་སུ་གྱུར་ནས། འདིར་ཡང་ང་མཉེས་པར་བྱས་ཏེ་མི་མཉེས་པར་མ་བྱས་ལ། རབ་ཏུ་འབྱུང་བའི་སེམས་བསྐྱེད་མ་ཐག་ཏུ་བཀྲ་མི་ཤིས་པ་མེད་པར་གྱུར་ཏེ། བཀྲ་ཤིས་པ་བྱུང་བར་གྱུར་ནས་ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་སོ་གསུངས། འདིས་ནི་ང་རྒྱལ་དང་ངག་བག་མེད་པའི་ཉེས་པ་དང་། སྦྱིན་པ་དང་ཚུལ་ཁྲིམས་སོགས་ཀྱི་འབྲས་བུ་བསྟན་པ་ཡིན་ནོ། །