འཆི་ཁར་སྨོན་ལམ་བཏབ་པའི་ལས་ཀྱི་རྒྱུ་དེས་ད་ལྟར་དགྲ་བཅོམ་པའི་བར་དུ་གྱུར་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ནགས་ཁྲོད་གཅིག་ན་དྲངས་སྲོང་ལྔ་བརྒྱ་ཙམ་གནས་ཏེ་མི་ཡི་སྦྱིན་སྲེག་བྱེད་དོ། །བཅོམ་ལྡན་འདས་ཀྱིས་དེ་ཉིད་འདུལ་བའི་དུས་ལ་བབ་པར་གཟིགས་ནས་། མེ་ཐབ་ཐམས་ཅད་ཀྱི་ནང་དུ་སངས་རྒྱས་ཀྱི་ཞབས་རྗེས་མཐོང་ལ། དེ་ཕྱིན་ཆད་མེ་སྦར་མི་ནུས་པར་བྱིན་གྱིས་བརླབས་སོ། །དེར་དྲང་སྲོང་རྣམས་ཀྱིས་རྗེས་འདིའི་མཐུས་བདག་ཅག་གིས་མེ་སྦར་མ་ནུས་ཏེ། འདི་ནི་མཐུ་ཆེ་བས་ན་ལྷ་ཆེན་པོའི་རྗེས་ཡིན་ཡང་དག་གོ་སྙམ་སྟེ། ཞབས་རྗེས་དེ་ཉིད་ལ་བསྲེག་རྫས་ཕུལ་བས་སངས་རྒྱས་ཀྱི་མཐུས་མེ་རང་འབར་དུ་བྱུར་ཏེ་ཚངས་པའི་འཇིག་རྟེན་ལ་ཐུག་གི་བར་སོང་བས། དྲང་སྲོང་རྣམས་ཡ་མཚན་དུ་གྱུར་ཏེ་གནས་པ་ན་རྗེས་དེ་ལྟ་བུ་མེ་ཐབ་ཀྱི་དྲུང་ནས་རྒྱལ་བྱེད་ཀྱི་ཚལ་ལ་ཐུག་གི་བར་དུ་མཐོང་བར་མཛད་པ་ན། དྲང་སྲོང་རྣམས་ཀྱང་དེའི་རྗེས་བཅད་དེ་རྒྱལ་བྱེད་ཀྱི་ཚལ་དུ་སོང་ངོ་། །དེར་བཅོམ་ལྡན་འདས་མཐོང་བས་ཤིན་ཏུ་དད་པ་ལ་ཡང་དག་པའི་ཆོས་གསུངས་པས་ཐམས་ཅད་ཀྱང་ཕྱིར་མི་འོང་བའི་འབྲས་བུ་ཐོབ། དེ་ནས་ཚུར་ཤོག་གིས་བསྙེན་པར་རྫོགས་ནས་མི་རིང་བར་དགྲ་བཅོམ་པའི་འབྲས་བུ་ཡང་མངོན་དུ་བྱས་སོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་ཆོ་འཕྲུལ་ཆེན་པོ་བསྟན་པ་དེའི་ཚེ་ས་ལ་ཞབས་རྗེས་བཞག་པས། དེའི་ཚེ་དྲང་སྲོང་ལྔ་བརྒྱ་སྟེང་གི་ནམ་མཁའ་ལ་འཕུར་ནས་འགྲོ་བ་ལ། ཞབས་རྗེས་ཀྱི་སྟེང་དུ་སོན་པ་ན་དེ་དག་འགྲོ་མ་ནུས་ཏེ་དེའི་རྒྱུ་རྟོག་པ་ན། ལྷ་ཞིག་གིས་བསྟན་པས་དེ་དག་ས་ལ་བབས་ཏེ་ཞབས་རྗེས་ལ་ཕྱག་བྱས་ཤིང་དེའི་རྗེས་བཅད་པས་སངས་རྒྱས་དང་མཇལ་ཏེ། དད་པས་རབ་ཏུ་བྱུང་ཞིང་ཚེ་གཅིག་ཚངས་པར་སྤྱད་ཀྱང་ཡོན་ཏན་གྱི་ཚོགས་མ་ཐོབ་ནས་འཆི་ཁར་སྨོན་ལམ་བཏབ་པའི་ལས་ཀྱི་རྒྱུ་དེས་ད་ལྟར་དགྲ་བཅོམ་པའི་བར་དུ་གྱུར་པར་གསུངས་སོ། །