ཐོས་པས་དྲེགས་པའི་ཉེས་དམིགས་དང་། དོན་ལ་སེམས་པའི་ཕན་ཡོན་ཀྱང་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ་རིའི་སུལ་ཞིག་ན་དྲང་སྲོང་འཁོར་ཁྲི་ཉིས་སྟོང་ཡོད་པ་ཞིག་གནས་ཏེ། དྲང་སྲོང་དེ་ནི་བསྟན་བཅོས་ཐམས་ཅད་ཀྱི་མཐར་ཕྱིན་པ། རྫུ་འཕྲུལ་ཆེ་ཞིང་མཐུ་ཆེ་བ་ཞིག་སྟེ་དེས་བྲམ་ཟེ་ཁྲི་ཉིས་སྟོང་པོ་དེ་དག་བསམ་གཏན་བཞི་དང་། མངོན་པར་ཤེས་པ་ལྔ་ལ་བཀོད་དོ། །ནམ་ཞིག་གི་ཚེ་བཅོམ་ལྡན་འདས་འཁོར་ལྔ་བརྒྱ་དང་བཅས་ཏེ་མཚོ་མ་དྲོས་པ་ནས་རྒྱལ་བྱེད་ཀྱི་ཚལ་དུ་ནམ་མཁའ་ལས་གཤེགས་པར་མཐོང་ནས། དྲང་སྲོང་རྣམས་མངོན་པར་དགའ་སྟེ་ཕྱི་བཞིན་དུ་འབྲང་སྟེ། རྒྱལ་བྱེད་ཀྱི་ཚལ་དུ་ཞུགས་ནས་སྟོན་པའི་སྤྱན་སྔར་ཆོས་མཉན་པའི་ཕྱིར་འཁོད་པ་ན། བཅོམ་ལྡན་འདས་ཀྱིས་མཐུན་པའི་ཆོས་བསྟན་པས། དྲང་སྲོང་ཁྲི་ཉིས་སྟོང་པོ་ནི་སྟན་དེ་ལ་འཁོད་བཞིན་དུ་ཕྱིར་མི་འོང་གིས་འབྲས་བུ་མངོན་དུ་བྱས་ལ། དྲང་སྲོང་གཙོ་བོ་དེ་ནི་ཐོས་པས་དྲེགས་ཏེ་ཅི་ཡང་མ་ཐོབ་བོ། །དེར་དྲང་སྲོང་ཁྲི་ཉིས་སྟོང་པོ་ཚུར་ཤོག་གི་བསྙེན་པར་རྫོགས་ཏེ་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དྲང་སྲོང་གཙོ་བོ་དེ་ནི་རབ་ཏུ་བྱུང་ཡང་ཅི་ཡང་མ་ཐོབ་སྟེ། དེ་ཐོས་པ་ལ་ཞུགས་པས་རིང་པོར་མ་ལོན་པར་སྡེ་སྣོད་གསུམ་ལོབས་ནས་རིག་པ་དང་གྲོལ་བའི་སྤོབས་པ་ཅན་དུ་གྱུར་ནས་སེམས་ཅན་སྟོང་ཕྲག་དུ་མ་ལ་ཆོས་སྟོན་པར་བྱེད་པ་ལས། ཕྱིས་ཞིག་ན་བདག་གི་གྲོགས་པོ་རྣམས་ཀྱིས་ནི་དགྲ་བཅོམ་པ་ཐོབ་ལ་བདག་གིས་ནི་ཅི་ཡང་མ་ཐོབ་བོ་སྙམ་དུ་སྐྱོ་སྟེ་ཆོས་སྟོན་པ་ལ་སྤྲོ་བ་མེད་པར་གྱུར་ཏེ། དོན་ལ་སེམས་ཤིང་རབ་ཏུ་བརྩོན་པ། མཐར་གྱིས་དགྲ་བཅོམ་པ་མངོན་དུ་བྱས་སོ། །དེར་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་དྲང་སྲོང་དེ་ཐོས་པའི་རྒྱགས་པས་དྲེགས་ནས་ཅི་ཡང་མ་ཐོབ་ལ། སླད་ཀྱི་ཐོས་པ་དེ་ཉིད་སེམས་པ་དང་། འཇལ་བ་དང་། ཉེ་བར་བརྟགས་པས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཐོབ་པ་ལ་གཟིགས། བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། སྔོན་འདས་པའི་དུས་ན་ཡང་འདི་ཉིད་བྲམ་ཟེ་འོད་སྲུང་གཙོ་བོ་ཞེས་བྱ་བར་གྱུར་ཏེ། དེ་རི་སུལ་ཞིག་ན་དྲང་སྲོང་འཁོར་ཁྲི་ཉིས་སྟོང་ཡོད་པ་ཞིག་གི་ཐད་དུ་རབ་ཏུ་བྱུང་ཞིང་བསྟན་བཅོས་ཐམས་ཅད་ཁོང་དུ་ཆུད་པར་བྱས་སོ། །དེ་ནས་ཕྱིས་ཞིག་ན་དྲང་སྲོང་གཙོ་བོ་དེ་འདས་ནས། དེའི་འཁོར་བྲམ་ཟེའི་ཁྱེའུ་ཁྲི་ཉིས་སྟོང་པོ་མྱ་ངན་གྱིས་ནོན་པ་ན། དེ་ཐམས་ཅད་འོད་སྲུང་གཙོ་བོས་བསྐྱངས་ཏེ་དེ་དག་ལ་ཡིད་བྱེད་ཀྱི་ལུང་ཕོག་པས། དེ་ཐམས་ཅད་ཀྱིས་བསམ་གཏན་བཞི་དང་། མངོན་ཤེས་ལྔ་བསྐྱེད་དོ། །དེ་ནས་ཕྱི་ཞིག་ན་འོད་སྲུང་གཙོ་བོས་བསམ་པ་བདག་གི་སློབ་མ་འདི་རྣམས་ཀྱིས་ནི་བདག་གི་ཡིད་ལ་བྱེད་པས་ཆོས་འདི་ལྟ་བུ་རྟོགས་པར་གྱུར་ལ། བདག་ནི་ཐོས་པའི་རྒྱགས་པས་དྲེགས་པས་ཅི་ཡང་མ་ཐོབ་ན། བདག་ལ་ཐོས་པ་འདི་ཅི་དགོས་སྙམ་ནས། ངེས་ཀྱང་སེམས་པ་དང་། འཇལ་བ་དང་། ཉེ་བར་བརྟགས་པས་བསམ་གཏན་བཞི་དང་། མངོན་ཤེས་ལྔ་བསྐྱེད་དེ་དེའི་ཚེ་ཡང་ཐོས་པས་དྲེགས་ནས་ཅིའང་མ་ཐོབ་པ་ལ། ཕྱིས་ཐོས་དོན་སེམས་པས་བསམ་གཏན་དང་མངོན་ཤེས་བསྐྱེད་པར་གསུངས་སོ། །དེར་དགེ་སློང་རྣམས་ཀྱིས་དྲང་སྲོང་དེ་རྣམས་ཀྱི་ལས་ཀྱི་རྒྱུ་ཞུས་པ་ན། དེ་ནི་སྨོན་ལམ་གྱི་དབང་གིས་ཏེ། སྔོན་བསྐལ་པ་བཟང་པོ་འདིའི་སྐྱེ་དགུ་རྣམས་ཚེ་ལོ་བཞི་ཁྲི་ཐུབ་པའི་དུས་སུ་སངས་རྒྱས་འཁོར་བ་འཇིག་འཇིག་རྟེན་དུ་བྱོན་ནས་སྐུ་མྱ་ངན་ལས་འདས་པའི་སྐུ་གདུང་ལ་རྒྱལ་པོ་མཛེས་ལྡན་གྱིས་མཆོད་རྟེན་བཞེངས་ཏེ་དུས་སྟོན་གྱི་མཆོད་པ་བཙུགས་པ་ན། རི་ཁྲོད་ཀྱི་རྒྱལ་པོ་འཁོར་ཁྲི་ཉིས་སྟོང་དང་ལྡན་པ་ཞིག་གིས་ཀྱང་མངོན་པར་མཆོད་ནས། སྟོན་པ་འདི་འདྲ་བའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་པར་གྱུར་ཅིག་བྱས་སོ། །འཁོར་རྣམས་ཀྱིས་ཀྱང་། བདག་ཅག་རྣམས་ཀྱང་ཁྱོད་ལ་བརྟེན་ནས་སྟོན་པ་འདི་འདྲ་བ་མཉེས་པར་བྱས་ཏེ། དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག་ཅེས་སྨོན་ལམ་བྱས་སོ། །དེའི་དུས་ཀྱི་རྒྱལ་པོ་ནི་དྲང་སྲོང་འདི་ཉིད་ཡིན་ལ། འཁོར་ཁྲི་ཉིས་སྟོང་པོ་ནི་བྲམ་ཟེའི་ཁྱེའུ་འདི་རྣམས་ཡིན་ལ། གཞན་ཡང་འདི་ཐམས་ཅད་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་དབང་པོ་ཡོངས་སུ་སྨིན་པར་བྱས་པས་ད་ལྟར་དགྲ་བཅོམ་པ་ཉིད་མངོན་དུ་བྱས་སོ་གསུངས་སོ། །འདིས་ནི་ཐོས་པས་དྲེགས་པའི་ཉེས་དམིགས་དང་། དོན་ལ་སེམས་པའི་ཕན་ཡོན་ཀྱང་བསྟན་པ་ཡིན་ནོ། །