རབ་ཏུ་བྱུང་བ་སོགས་ཡུལ་དམ་པ་ལ་ལྕག་གིས་གཞུས་པ་སོགས་ཁྲིམས་གཏད་པའི་ཉེས་དམིགས་ཀྱང་བསྟན་པ།

༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། ཡུལ་གྱེན་དུ་རྒྱལ་གྱི་རྒྱལ་པོ་རབ་སྣང་དང་། ཡུལ་དཔའ་རབ་ཀྱི་རྒྱལ་པོ་འཆར་ཀ་གཉིས་ཕན་ཚུན་མི་མཐུན་པར་གྱུར་ཏེ། དུས་དུས་སུ་སྐྱེ་བོ་ཕལ་མོ་ཆེ་ལ་འདོག་པར་བྱེད་དོ། །དེའི་ཚེ་འཕགས་པ་ཀཱ་ཱཏྱ་ཡ་ནའི་བུས། དགྲ་བཅོམ་པ་ཐོབ་སྟེ་སངས་རྒྱས་ལ་བྱས་པ་གཟོ་བའི་ཕྱིར། སེམས་ཅན་ལ་ཕན་འདོགས་པར་བྱའོ་སྙམ་དུ་རང་གི་འདུལ་སྐལ་གང་ཡོད་བརྟགས་པས། ཡུལ་དཔའ་རབ་ཀྱི་སྐྱེ་བོ་རྣམས་ལྷག་པར་གདུལ་དུ་རུང་བར་མཐོང་ནས་བཅོམ་ལྡན་འདས་ལ་ལྗོངས་རྒྱུ་བར་གསོལ་བས་བཀའ་སྩལ་པ། ཀཱ་ཏྱ་ཡ་ནའི་བུ་ཁྱོད་སོང་ལ་བདག་བརྒལ་ནས་གཞན་སྒྲོལ་ཅིག་བདག་གྲོལ་ནས་གཞན་གྲོལ་བར་གྱིས་ཤིག བདག་དབུགས་དབྱུང་ནས་གཞན་དབུགས་ཕྱུངས་ཤིག བདག་ཡོངས་སུ་མྱ་ངན་ལས་འདས་ནས་གཞན་ཡོངས་སུ་མྱ་ངན་ལས་ཟློས་ཤིག དེ་ནས་ཚེ་དང་ལྡན་པ་ཀཱ་ཏྱ་ཡ་ནའི་བུས་ཕྱག་བྱས་ཏེ། འཁོར་ལྔ་བརྒྱ་དང་བཅས་ལྗོངས་རྒྱུ་ཞིང་སོང་ནས། ཡུལ་གྱེན་དུ་རྒྱལ་དུ་རྒྱལ་པོ་གཏུམ་པོ་རབ་སྣང་སངས་རྒྱས་ཀྱི་བསྟན་པ་ལ་ཞུགས་པར་བྱས་ཤིང་། ཡུལ་དཔའ་རབ་ཏུ་སོང་ནས། རྒྱལ་པོ་འཆར་ཀ་དད་པ་ཕུན་སུམ་ཚོགས་པ་ལ་གནས་པར་བྱས་སོ། །སྐྱེ་བོ་ཕལ་མོ་ཆེ་ཡང་བཅོམ་ལྡན་འདས་ཀྱི་བསྟན་པ་ལ་དད་པར་བྱས་སོ། །དེའི་ཚེ་རྒྱལ་པོ་འཆར་ཀའི་བུ་ས་ར་ན་ཞེས་པ་བཟོ་དང་སྒྱུ་རྩལ་གྱི་གནས་མཐའ་དག་ལ་བྱང་བར་བྱས་པ་ཞིག་ཡོད་པ་དེ་བསྟན་པ་ལ་དད་པ་རྙེད་ནས་ཕ་མ་ལ་གནང་བ་ཞུས་ཏེ་ཚེ་དང་ལྡན་པ་ཀཱ་ཏྱ་ནའི་བུའི་ཐད་དུ་རབ་ཏུ་བྱུང་ཤིང་བསྙེན་པར་རྫོགས་སོ། །དེ་ནས་དེ་ཁྲིད་དེ་ཡུལ་གྱེན་དུ་རྒྱལ་དུ་སོང་ནས་འཁོད་པ་ན། ཚེ་དང་ལྡན་པ་ས་ར་ན་གྲོང་དུ་བསོད་སྙོམས་ལ་ཕྱིན་པ། རྒྱལ་པོའི་ཕོ་བྲང་དུ་སོང་ནས་རྒྱལ་པོའི་བཙུན་མོ་རྣམས་དད་པར་གྱུར་ཏེ་སྟན་བཤམས་ཤིང་བཟའ་བཅའ་མང་པོས་ཚིམས་པར་བྱས་ཏེ་ཆོས་ཉན་དུ་འཁོད་པ་ན། རྒྱལ་པོ་རབ་སྣང་གིས་མཐོང་སྟེ་ཁྲོས་ནས་ཚེ་དང་ལྡན་པ་ས་ར་ན་ལ་སྨྲས་པ། ཅི་ཁྱེད་དགྲ་བཅོམ་པ་ཡིན་ནམ། དེས་སྨྲས་པ། རྒྱལ་པོ་ཆེན་པོ་མ་ཡིན་ནོ། །དེ་བཞིན་དུ། ཕྱིར་མི་འོང་བ་དང་། ལན་ཅིག་ཕྱིར་འོང་བ་དང་། རྒྱུན་དུ་ཞུགས་པ་དང་། གཟུགས་མེད་པ་བཞི་དང་། བསམ་གཏན་བཞི་རྣམས་ཐོབ་པ་ཡིན་ནམ་ཞེས་དྲིས་པས། དེས་རྒྱལ་པོ་ཆེན་པོ་མ་ཡིན་ནོ་ཞེས་སྨྲས་སོ། །དེ་ནས་རྒྱལ་བ་དེས་ཞམ་རིང་བ་རྣམས་བོས་ནས་དགེ་སློང་དེ་ལྕག་གིས་ཞེན་པར་བཞུས་ཏེ་བཏང་ང་ོ། །དེ་ནས་དེ་ཁྲོས་ཏེ་བདག་མ་ཉེས་བཞིན་དུ་དུས་ངན་པའི་རྒྱལ་པོ་གཏུམ་པོ་འདིས་བརྡེགས་ཀྱིས། བདག་ཕའི་ཡུལ་དུ་སོང་ནས་དཔུང་གི་ཚོགས་ཡན་ལག་བཞི་བསགས་ཏེ་འདི་ཉིད་མེད་པར་བྱའོ་སྙམ་སྟེ་མཁན་པོའི་རྐང་པ་ལ་ཕྱག་བྱས་ནས་དོན་དེ་རྒྱས་པར་བསྙད་དེ་བསླབ་གཞི་རྣམས་བཞེས་པར་གསོལ་པས། མཁན་པོས་བུ་ཁྲོ་བའི་དབང་དུ་མ་འགྲོ་ཞིག་བཅོམ་ལྡན་འདས་ཀྱིས་རབ་ཏུ་བྱུང་བ་ནི། འཇིག་རྟེན་གྱི་ཆོས་བརྒྱད་དེ། རྙེད་པ་དང་། མ་རྙེད་པ་དང་། གྲགས་པ་དང་། གྲགས་པ་མ་ཡིན་པ་དང་། བསྟོད་པ་དང་། སྨད་པ་དང་། བདེ་བ་དང་། སྡུག་བསྔལ་བ་ཐམས་ཅད་བཟོད་པར་བྱའོ་ཞེས་མ་གསུངས་སམ་ཞེས་བྱས་ཏེ་ལན་དུ་མར་བཀག་ཀྱང་དགག་མ་ནུས་ནས། ཁྱོད་ཅིས་ཀྱང་འགྲོ་འདོད་ན་ད་ལྟར་ནམ་སྲོས་སུ་ཉེ་བས་གཅན་གཟན་སོགས་ལམ་གྱི་འཇིགས་པ་ཆེ་བས་དོ་ནུབ་འདིར་སྡོད་ལ་ནང་བར་སོངས་ཤིག དེས་ཀྱང་བཀའ་བཞིན་འཚལ་ལོ་ཞེས་བྱས་ཏེ་གནས་དེར་ཉལ་བ་ན། ཚེ་དང་ལྡན་པ་ཀཱ་ཏྱ་ཡ་ནའི་བུས་དེ་བཟློག་པའི་ཕྱིར་རྨི་ལམ་དུ་འདི་ལྟར་རྨི་བ་བྱིན་གྱིས་བརླབས་ཏེ། དེས་བསླབ་པ་ཕུལ་ཏེ་ཁྱིམ་དུ་ཕྱིན་ནས་རྒྱལ་སྲིད་ལ་དབང་སྒྱུར་ཞིང་དཔུང་གི་ཚོགས་བསགས་ཏེ། རྒྱལ་པོ་རབ་སྣང་གི་སྟེང་དུ་དྲངས་པ་ལས། དེས་རང་ཉིད་ཕམ་པར་བྱས་ཏེ་རྒྱལ་པོ་རབ་སྣང་གིས་བཟུང་སྟེ་གཤེད་མའི་མི་རྣམས་ཀྱིས་ཁྲིད་ནས་གསོད་སར་ཕྱིན་དུ་ཉེ་བ་ན་འཕགས་པ་ཀཱ་ཏྱ་ཡ་ནའི་བུ་གྲོང་དུ་བསོད་སྙོམས་བྱེད་ཅིང་འདུག་པར་གུས་བཏབ་སྟེ། མཁན་པོ་བདག་གི་སྐྱབས་མཛད་དུ་གསོལ། བདག་ལ་དཀའ་བ་མཛད་པ་དང་། སྲོག་ཕངས་པ་སྦྱིན་པར་མཛད་དུ་གསོལ་ཞེས་ཟེར་ཞིང་འདུག་པ་ན་རྨི་ལམ་སད་པར་མཛད་པས། དེ་རྨི་ལམ་སད་ནས་ཀྱང་དེ་སྐད་ཟླ་བར་བྱེད་པ་ལ། འཕགས་པས་དེ་ལ། བུ་ཁྱོད་ཀྱིས་རྨི་ལམ་མཐོང་བར་ཟད་ཀྱིས་མ་འཇིགས་ཤིག་བྱས་པས་དེ་ཐོས་པ་དང་སེམས་རྣལ་དུ་བབས་ཏེ་མནོ་བསམ་བཏང་བས་དེ་ལྷག་པར་ཡང་སེམས་སྐྱོ་བར་གྱུར་པ་ལ། དེ་དང་མཐུན་པའི་ཆོས་བསྟན་པས་སྟན་དེ་ཉིད་ལ་འདུག་བཞིན་དུ་ས་ར་ནས་དགྲ་བཅོམ་པ་མངོན་དུ་བྱས་སོ། །དེར་རྒྱལ་པོ་རབ་སྣང་གིས་ཀྱང་གཏམ་ཐོས་ནས་བཟོད་པར་གསོལ་ཞིང་དེ་ལ་བརྟེན་ནས་ཀཱ་ཏྱ་ཡ་ནའི་བུ་ཞག་བདུན་གྱི་བར་དུ་བཤོས་ལ་སྤྱན་དྲངས་ཤིང་། དེ་ནས་རིམ་པར་རྒྱལ་པོའི་ཁབ་ཏུ་ཕྱིན་པས། དགེ་སློང་རྣམས་ཀྱིས་དེའི་གཏམ་ཐོས་ནས་བཅོམ་ལྡན་འདས་ལ་བཙུན་པ་ས་ར་ནའི་ལས་ཀྱི་རྒྱུ་ཞུས་པར། བཀའ་སྩལ་པ། བཙུན་པ་ས་ར་ན་འདི་སྔོན་ཝཱ་རཱ་ཎ་སཱིར་རྒྱལ་པོ་ཚངས་བྱིན་ཞེས་བྱ་བར་གྱུར་ཏེ། དེ་སྐྱེད་མོས་ཚལ་དུ་རྒྱུ་བ་ལས། དེར་རང་སངས་རྒྱས་ཞིག་བཞུགས་པ་ལ་བཙུན་མོའི་འཁོར་རྣམས་དད་ནས་ཕྱག་བྱས་ཏེ་དྲུང་དུ་འཁོད་པ་ན། རྒྱལ་པོ་དེ་ཉིད་ཁྲོས་ཏེེ་རང་སངས་རྒྱས་དེ་ལྕག་གིས་ཞེན་པར་བཞུས་སོ། །དེ་ནས་རང་སངས་རྒྱས་དེས་དེ་ལ་ཐུགས་བརྩེ་བའི་སླད་དུ་སྟེང་གི་ནམ་མཁའ་ལ་འཕགས་ཏེ་འབར་བ་ལ་སོགས་པའི་ཆོ་འཕྲུལ་སྣ་ཚོགས་པ་བསྟན་པས་རྒྱལ་པོ་དེར་རབ་ཏུ་དད་ནས་འགྱོད་པ་ཆེན་པོས་ནོངས་པ་བཤགས་ཤིང་སྐྱེད་མོས་ཚལ་དེར་སྤྱིལ་པོ་ཕུབ་ནས་ཇི་སྲིད་འཚོ་བའི་བར་དུ་བསྙེན་བཀུར་ཕུལ་ཞིང་། དེ་མྱ་ངན་ལས་འདས་ནས་སྐུ་གདུང་ལ་མཆོད་རྟེན་བྱས་ཏེ་བཀུར་སྟི་ཆེན་པོས་མཆོད་པར་བྱས་ནས་སྨོན་ལམ་བཏབ་བོ། །དེའི་ཚེ་རང་སངས་རྒྱས་དེ་ལ་ལྕག་གིས་གཞུས་པས་ཚེ་རབས་ཐམས་ཅད་དུ་ལྕག་གི་འོག་ཏུ་ཤི་བར་གྱུར་ལ། སླར་འགྱོད་ཚངས་ཕུལ་ནས་བསྙེན་བཀུར་བས་ཕྱུག་ཅིང་ནོར་མང་བ་དང་། སྨོན་ལམ་གྱི་དབང་གིས་སངས་རྒྱས་མཉེས་པར་བྱས་ཏེ་མི་མཉེས་པར་མ་བྱས་སོ། །གཞན་ཡང་འདི་སངས་རྒྱས་འོད་སྲུང་གི་བསྟན་པ་ལ། རབ་ཏུ་བྱུང་ཞིང་ཚངས་པར་སྤྱད་ནས་དབང་པོ་དུལ་བར་བྱས་པའི་རྒྱུས་ད་ལྟར་རྣམ་པར་གྲོལ་ལོ་གསུངས། འདིས་ནི་རབ་ཏུ་བྱུང་བ་སོགས་ཡུལ་དམ་པ་ལ་ལྕག་གིས་གཞུས་པ་སོགས་ཁྲིམས་གཏད་པའི་ཉེས་དམིགས་ཀྱང་བསྟན་པ་ཡིན་ནོ། །