ཚུལ་ཁྲིམས་དང་ལྡན་པས་ཇི་ལྟར་སྨོན་པ་བཞིན་དུ་འགྲུབ་པར་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེའི་བྲམ་ཟེ་ཆེ་ཞིང་མཐོ་བ་ཟླ་བ་བདེ་བ་ཞེས་པའི་ཆུང་མ་ལ་སྲིད་ཆགས་པས། དེའི་མཐུས་མ་དེས་ཀྱང་གཞུང་གི་རྩོད་པ་རྣམས་དང་ལྷན་ཅིག་ཏུ་གཏམ་ཟེར་ཡང་ཅི་མ་རུང་སྙམ་མོ། །དེ་ནས་དེ་ཟླ་དུས་ལ་བབས་པ་ན་བུ་མོ་གཟུགས་མཛེས་ཤིང་ལྟ་ན་སྡུག་པ་ཞིག་བཙས་ཏེ་མིང་ཟླ་བར་བཏགས་སོ། །དེ་ཆེར་སྐྱེས་པ་ན་ཡི་གེ་དང་བསྟན་བཅོས་མཐའ་དག་ཚར་རེས་ལོས་པར་གྱུར་ཏེ་གཞུང་གི་རྩོད་པ་ཐམས་ཅད་ཚར་བཅད་དོ། །དེ་ནས་ཕྱི་ཞིག་ལ་སངས་རྒྱས་བཅོམ་ལྡན་འདས་ལ་མངོན་པར་དད་པར་གྱུར་ཏེ་སྤྱན་སྔར་ཕྱིན་ཅིང་ཆོས་མཉན་པས་རྒྱུན་ཞུགས་ཀྱི་འབྲས་བུ་ཐོབ་ཅིང་། དེ་སྐྱེ་དགུའི་བདག་མོ་ཆེན་མོ་ལ་གཏད་དེ་རབ་ཏུ་བྱུང་ཞིང་བསྙེན་པར་རྫོགས་པས་དགྲ་བཅོམ་པའི་གོ་འཕང་མངོན་དུ་བྱས་སོ། །དེར་བཅོམ་ལྡན་འདས་ཀྱིས། དགེ་སློང་མ་རྣམས་ཀྱི་ལས་ལ་འདུ་བ་ལོགས་ཞིག་ཏུ་གྱིས་ཤིག་ཅེས་བཀའ་སྩལ་པས། སྐྱེ་དགུའི་བདག་མོས་སོ་ཐར་གྱི་མདོ་འདོན་པར་མ་ནུས་ནས། བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱི་དགེ་སློང་རྣམས་ལ་སོ་སོར་ཐར་པ་བསྟན། དགེ་སློང་མ་རྣམས་ལ་ནི་མ་བསྟན་ལགས་ན། བཅོམ་ལྡན་འདས་ཀྱིས་སོ་སོར་ཐར་པ་བསྟན་དུ་གསོལ། བཀའ་སྩལ་པ། གལ་ཏེ་ལན་གཅིག་སྨྲས་པས་འཛིན་ནུས་ན་ནི་བསྟན་པར་བྱའོ། །དེའི་ཚེ་དགེ་སློང་མ་ཟླ་བ་འཁོར་དེ་ཉིད་དུ་འདུས་པས་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་བར་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སོ་སོར་ཐར་པ་བསྟན་དུ་གསོལ། ལན་གཅིག་བཀའ་སྩལ་པས། བདག་གིས་བཟུང་བར་འཚལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་སོ་ཐར་གྱི་མདོ་བསྟན་ཏེ། ལན་གཅིག་པོ་དེས་དགེ་སློང་མ་ཟླ་བས་ལོབས་ཏེ་དེས་སྡེ་སྣོད་གསུམ་ཡང་ལོབས། ཚིག་ཏུ་བྱ་བ་ཅི་ཡང་རུང་བ་དེ་ཐམས་ཅད་ཀྱང་ཐོས་མ་ཐག་ཏུ་ལོབས་ནས། བཅོམ་ལྡན་འདས་ཀྱིས་དེ་ཐོས་པ་འཛིན་པ་རྣམས་ཀྱི་མཆོག་ཏུ་བསྟན་ཏོ། །དེར་དགེ་སློང་རྣམས་ཀྱིས་དེའི་རྒྱུ་ཞུས་པས་སྔོན་སངས་རྒྱས་འོད་སྲུང་གི་དུས་སུ་འདི་ཉིད་དགེ་སློང་མར་གྱུར་ཏེ། དེ་རབ་ཏུ་བྱུང་བའི་མཁན་མོ་དེ་སངས་རྒྱས་འོད་སྲུང་གིས་ཐོས་པ་འཛིན་པ་རྣམས་ཀྱི་མཆོག་ཏུ་ལུང་བསྟན་པ་ཡིན་ལ་དེའི་ཚེ་ཚེ་གཅིག་ཏུ་ཚངས་པ་མཚུངས་པར་སྤྱོད་པ་སྤྱད་ཀྱང་ཡོན་ཏན་གྱི་ཁྱད་པར་གང་ཡང་མ་ཐོབ་ནས། འཆི་ཀར་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་སྟེ་ཐོས་པ་འཛིན་པའི་མཆོག་ཏུ་ལུང་སྟོན་པར་གྱུར་ཅིག་ཅེས་སྨོན་ལམ་དུ་བྱས་སོ། །ལས་དེའི་རྒྱུས་ད་ལྟར་དགྲ་བཅོམ་པ་ཉིད་མངོན་དུ་བྱས་ནས་ངས་འདི་ཐོས་པ་འཛིན་པ་རྣམས་ཀྱི་མཆོག་ཏུ་བསྟན་ཏོ་གསུངས། འདིས་ནི་ཚུལ་ཁྲིམས་དང་ལྡན་པས་ཇི་ལྟར་སྨོན་པ་བཞིན་དུ་འགྲུབ་པར་བསྟན་པ་ཡིན་ནོ། །