རྫོགས་པའི་སངས་རྒྱས་དོན་གཟིགས་ཞེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་མཉན་ཡོད་དུ་བཞུགས་པའི་ཚེ། ཡུལ་དེའི་བྲམ་ཟེ་ཞིག་གི་ཆུང་མ་ལ་ཁྱེའུ་གཟུགས་བཟང་ཞིང་ལྟ་ན་སྡུག་པ་ཞིག་བཙས་ཏེ། དེར་ཆེར་སྐྱེས་པ་ན་བྲམ་ཟེ་ལས་དྲུག་པར་གྱུར་ཏེ་མཐར་གྱིས་རིག་པའི་གནས་བཅོ་བརྒྱད་ལ་བྱང་ཞིང་བསྟན་བཅོས་ཐམས་ཅད་ཁོང་དུ་ཆུད་ནས་གཞུང་སྨྲ་བ་ཐམས་ཅད་ཚར་བཅད་དོ། །དེ་ནས་ཕྱི་ཞིག་ན་དེའི་ཕ་མ་གཉིས་ཤི་བར་གྱུར་པའི་རྗེས་སུ་བྱད་གཟུགས་དང་ཐོས་པས་བདག་དང་མཚུངས་པ་ཡང་མེད་ན། ལྷག་པར་ལྟ་ག་ལ་ཡོད་སྙམ་མོ། །དེར་བྲམ་ཟེ་རྣམས་ཀྱིས་དེ་ལ་སྨྲས་པ། ཁྱེའུ་ཁྱེད་ཀྱི་ཕ་མ་ཡང་མཆོད་སྦྱིན་བྱེད་ཀྱིས་ཁྱོད་ཀྱིས་ཀྱང་ཕའི་ལུགས་མཐུན་པར་གྱིས་ཤིག ཁྱེའུ་དེ་ན་རེ་བྱད་གཟུགས་དང་ཐོས་པ་བདག་དང་མཚུངས་པ་མེད་ན། ཅིའི་ཕྱིར་བདག་གིས་འདི་ལ་སྦྱིན་པ་སྦྱིན་ཞེས་ཟེར་རོ། །དེར་བྲམ་ཟེ་དེ་དག་དེ་ལ་མི་དགའ་བར་གྱུར་ཏེ། ཕྱིན་ཆད་དེ་དང་མི་འདྲིལ་{འདྲུལ}བར་ནང་ཁྲིམས་བཅས་སོ། །དེ་ཡང་དེ་དག་ལ་མི་དགའ་བར་གྱུར་ནས་བདག་ལ་ཡོན་གནས་འདི་ལྟ་བུ་ཅི་དགོས་སྙམ་མོ། །དེ་ནས་བཅོམ་ལྡན་འདས་ཀྱིས་དེ་ཉིད་འདུལ་བའི་དུས་ལ་བབ་པར་གཟིགས་ནས། རྒྱལ་བྱེད་ཀྱི་ཚལ་ནས་མི་སྣང་བར་གྱུར་ཏེ། བྲམ་ཟེའི་ཁྱེའུ་དེའི་ཁྱིམ་དུ་ས་བརྟོལ་ཏེ་གྱེན་དུ་འཕགས་ནས་འོད་ཀྱིས་སྣང་བར་མཛད་པས། དེ་མཐོང་ནས་བྲམ་ཟེའི་ཁྱེའུ་དེ་རབ་ཏུ་དགའ་ནས་གདན་བཤམས་པ་ལ་བཞུགས་སུ་གསོལ་ཞིང་། བཅོམ་ལྡན་འདས་ཀྱིས་ཀྱང་དེ་ལ་སྦྱིན་པ་དང་ལྡན་པའི་ཆོས་བསྟན་ཏེ། དེ་ཡང་སྦྱིན་པ་ལ་སྤྲོ་བར་གྱུར་པ་ལ། བཅོམ་ལྡན་འདས་ཀྱིས་ཁྱིམ་དེ་ནས་གཏེར་ཀྱང་སྟོན་པར་མཛད་པས་དེ་ལྷག་པར་ཡང་དགའ་བར་གྱུར་ཏེ། སངས་རྒྱས་འཁོར་དང་བཅས་པ་ཟླ་བ་གསུམ་གྱི་བར་དུ་སྤྱན་དྲངས་ཤིང་། ཡ་མཚན་ཅན་རྣམས་ལའང་དེའི་བར་དུ་མཆོད་སྦྱིན་བྱེད་པར་དྲིལ་བསྒྲགས་པས། བྲམ་ཟེ་རྣམས་སྔར་གྱི་ནང་ཁྲིམས་ཀྱིས་མི་འོང་བར་གྱུར་པ་ན། དེས་གལ་ཏེ་ཁྱེད་རྣམས་ལོངས་སྤྱད་པར་མི་བྱེད་ན་ཁྱེད་རྣམས་ལ་བསྔོས་པའི་ཡོ་བྱད་རྣམས་ཀྱང་དགེ་སྦྱོང་ག་ཏ་མ་འཁོར་བཅས་ལ་ཕུལ་ནས། དེའི་བསྟན་པ་ལ་རབ་ཏུ་བྱུང་བར་བྱའོ་སྨྲས་པས། དེ་དག་གིས་དེ་ལྟར་ན་བདག་ཅག་ཡོན་གྱིས་ཕམ་པར་འགྱུར་རོ་སྙམ་སྟེ་ནང་ཁྲིམས་བཤིགས་ནས་དེར་སོང་སྟེ་ལོངས་སྤྱད་དོ། །དེར་བྲམ་ཟེའི་ཁྱེའུ་དེས་ཟླ་བ་གསུམ་གྱི་རིང་ལ་སངས་རྒྱས་འཁོར་དང་བཅས་པ་མཆོད་ཅིང་། ཡ་མཚན་ཅན་རྣམས་ཀྱང་བཟའ་བཏུང་གིས་ཚིམས་པར་བྱས་ཤིང་ཐམས་ཅད་ལ་ཡོན་ཕུལ་ནས་ཉིན་ཐ་མར་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ཞལ་ཟས་རོ་བརྒྱ་དང་ལྡན་པས་ཚིམས་པར་བྱས་ནས། བཅོམ་ལྡན་འདས་ལ་ན་བཟའ་འབུམ་རི་བ་དང་དགེ་སློང་གཞན་རྣམས་ལའང་རས་ཡུག་ཟུང་རེ་ཕུལ་ནས། བླ་ན་མེད་པའི་རྫོགས་པའི་བྱང་ཆུབ་ཏུ་སྨོན་ལམ་བཏབ་སྟེ། ཀྱེ་མ་དགེ་བའི་རྩ་བ་འདིས་ནི་བདག་འཇིག་རྟེན་ལོང་བ་འདྲེན་པ་མེད་པ་སྟོན་པ་མེད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིགས་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི། ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་གྱུར་ཅིག་ཅེས་བྱས་སོ། །དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་དེ་ལ་བཀའ་སྩལ་པ་ལེགས་སོ་ལེགས་སོ། །བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་འཇིག་རྟེན་ལོང་བ་འདྲེན་པ་མེད་པ་སྟོན་པ་མེད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གཟིགས་ཞེས་བྱ་བར་འགྱུར་རོ་ཞེས་ལུང་བསྟན་པར་མཛད་དོ། །