མ་འོངས་པ་ན་ཡང་དག་པར་རྫོགས་པའི་སངས་རྒྱས་སྟོབས་དང་བརྩོན་འགྲུས་ཀྱི་རྩལ་དང་ལྡན་པ་ཞེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་མཉན་ཡོད་དུ་བཞུགས་པའི་ཚེ། ཡུལ་དེའི་ཁྱིམ་བདག་ཕྱུག་པོ་རྣམ་ཐོས་བུའི་ནོར་དང་ལྡན་པ་ཞིག་ལ་ཁྱེའུ་ལྟ་ན་སྡུག་པ་ཞིག་བྱུང་བ་དེར་ཆེར་སྐྱེས་པ་ན། ལེ་ལོ་ཅན་མཆོག་ཏུ་ལེ་ལོ་ཅན་ཞིག་སྟེ་ཁྲི་ལ་ཉལ་ནས་ཁྲི་ལས་ལྡང་དུ་མི་བཏུབ་པ་ཞིག་བྱུང་བས་དེ་ལ་ཕ་མ་གཉིས་ཀྱིས་ཐབས་སྣ་ཚོགས་པས་བསྒོ་ཡང་ལན་ཡང་སྨྲར་མི་བཏུབ་ཅིང་། དེ་སྨན་པ་རྣམས་ལ་བསྟན་པ་ན་དེ་ལེ་ལོས་ལྡང་མི་མོས་པ་ལས་ལུས་སེམས་ཀྱི་གདུང་བ་ཅིའང་མེད་དོ། །ཞེས་སྨྲས་སོ། །དེ་ནས་ཕྱི་ཞིག་ན་ཡོན་གནས་དག་སྤྱན་དྲངས་ལ་བཤོས་གསོལ་ན། དེ་དག་མཐོང་ན་ཞེ་ས་བསྐྱེད་དེ་ལྡང་སྲིད་དོ་སྙམ་ནས། དེ་དག་གིས་སྟོན་པ་སྡེ་དྲུག་ག་ཡར་དྲངས་ཏེ་ཟན་བྱིན་པས་ཁྱེའུ་དེས་དེ་དག་མཐོང་ཡང་མ་ལངས་སོ། །དེ་ནས་སངས་རྒྱས་བཅོམ་ལྡན་འདས་འཁོར་དང་བཅས་པ་སྤྱན་དྲངས་པས། ཁྱེའུ་དེས་རྒྱང་རིང་པོ་ནས་མཐོང་བས་གུས་པར་སྒྲིམ་པའི་ཤུགས་ཀྱིས་སྟན་ལས་ལངས་ནས། བཅོམ་ལྡན་འདས་ཀྱི་སྤྱན་སྔར་ཕྱིན་ནས་ཞབས་ལ་ཕྱག་བྱས་ཤིང་། ཕ་མ་དང་ལྷན་ཅིག་ཏུ་རང་གི་ལག་གིས་བཟའ་བཅའ་སྣ་ཚོགས་པ་ཅི་བཞེད་པ་བསྟབས་ནས་ཆོས་ཉན་པར་འཁོད་པ་ན་བཅོམ་ལྡན་འདས་ཀྱིས་ཁྱེའུ་དེ་ལ་བརྩོན་འགྲུས་ཀྱི་བསྔགས་པ་བརྗོད་དེ། བུ་བརྩོན་འགྲུས་ཀྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཐོབ་པར་འགྱུར་རོ་ཞེས་བཀའ་སྩལ་པས། ཁྱེའུ་དེས། བདག་བརྩོན་འགྲུས་ཞན་པས་བླ་མའི་ཁྱད་པར་ཐོབ་མི་ནུས་ཀྱིས། ད་བདག་རྒྱ་མཚོར་སོང་སྟེ་དོན་བསྒྲུབས་ནས། དཀོན་མཆོག་གསུམ་ལ་བཀུར་སྟི་བྱའོ་སྙམ་སྟེ། དེ་རྒྱ་མཚོ་ཆེན་པོར་ཕྱིན་ནས་གྲུའི་དོན་ལེགས་པར་གྲུབ་པ་དང་། མཉན་ཡོད་དུ་ཕྱིན་ནས་སངས་རྒྱས་འཁོར་དང་བཅས་པ་སྤྱན་དྲངས་ཏེ་ཟླ་བ་གསུམ་གྱི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བ་བྱས་ཏེ། ཐ་མའི་ཉིན་པར་ཁ་ཟས་རོ་བརྒྱ་དང་ལྡན་པ་དང་ན་བཟའ་འབུམ་རི་བ་སོགས་ཕུལ་ནས། བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེ་ནས་བཅོམ་ལྡན་འདས་ཀྱིས་དེ་ལ་ལེགས་སོ་ཞེས་བྱ་བ་བྱིན་ནས། མ་འོངས་པ་ན་ཡང་དག་པར་རྫོགས་པའི་སངས་རྒྱས་སྟོབས་དང་བརྩོན་འགྲུས་ཀྱི་རྩལ་དང་ལྡན་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །