ཁྱོད་མ་འོངས་པའི་དུས་སུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་ཅེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ་ཡུལ་དེ་ན་བྲམ་ཟེ་དབུལ་པོ་བཟའ་བྲན་མང་པོ་དང་ལྡན་པ་ཞིག་ཡོད་པ་དེས། བདག་ཁྱིམ་བདག་ཕྱུག་པོ་ཞིག་ལ་བརྟེན་ནས་འཚོ་བ་བཙལ་བར་བྱའོ་སྙམ་སྟེ། ཁྱིམ་བདག་མགོན་མེད་ཟས་སྦྱིན་གྱི་ཕྱི་བཞིན་དུ་འབྲངས་ནས་དོན་དེ་བསྙད་པས། མགོན་མེད་ཟས་སྦྱིན་གྱིས་དེ་ལ་མཁོ་བ་རྣམས་བྱིན་ནོ། །ཁྱིམ་བདག་མགོན་མེད་ཟས་སྦྱིན་ནི་ཉིན་རེ་བཞིན་དུ་འཁོར་ལྔ་བརྒྱ་ཙམ་རེ་ཁྲིད་ནས་རྒྱལ་བྱེད་ཀྱི་ཚལ་དུ་འགྲོ་ཞིང་རང་ཉིད་ཀྱིས་ཕྱག་དར་བྱེད་པ་ལས་བྲམ་ཟེ་དེའང་དེའི་ནང་དུ་ཁྲིད་དོ། །ཉིན་གཅིག་ཁྱིམ་བདག་ལ་བྱ་བ་ཞིག་བྱུང་ནས་མགྱོགས་པར་ཁྱིམ་དུ་འགྲོ་དགོས་པ་བྱུང་བས་བྲམ་ཟེ་དེ་རྡུལ་ཕྱག་བྱེད་པར་བཞག་པས། བཅོམ་ལྡན་འདས་ཀྱིས་བྲམ་ཟེ་དེ་ལ་བླ་ན་མེད་པའི་དགེ་བའི་རྩ་བ་བསྐྱེད་པར་དགོངས་ནས། དེས་ཇི་ཙམ་ཕྱག་པ་དེ་དེ་མ་ཐག་ཏུ་རྡུལ་གྱིས་གང་ནས་ཅུང་ཟད་ཙམ་ཡང་ཕྱག་དར་བྱས་པ་མི་མངོན་པ་དེ་ལྟར་བྱིན་གྱིས་བརླབས་ནས། དེ་དེས་གཡེངས་ཏེ་ཉི་མ་ཐལ་ནས། དེ་ནུབ་ཁྱིམ་དུ་མ་ཕྱིན་པར་རྒྱལ་བྱེད་ཀྱི་ཚལ་དེར་ཉལ་བ་ན། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་ཏེ། རྒྱལ་བྱེད་ཀྱི་ཚལ་གྱི་ནང་དུ་བྲམ་ཟེ་དེའི་མལ་ཆོས་ལ། ཁྱེད་ཀྱང་དེའི་འདབས་སུ་འདུག་སྟེ། དེས་ཅི་དང་ཅི་དྲིས་པ་ལ་ལན་ཐོབ་ཅིག གཞན་དགེ་སློང་ཁྱེད་རྣམས་ཀྱིས་ཀྱང་བྲམ་ཟེ་འདི་ལ་བརྩེ་བའི་ཕྱིར་དུ་རང་རང་གི་རྫུ་འཕྲུལ་ཅི་དང་ཅི་ཐོབ་པ་དེ་དོ་ནུབ་འདིའི་མདུན་དུ་སྟོན་པར་གྱིས་ཤིག་གསུངས་པས། ཐམས་ཅད་ཀྱིས་བཀའ་བཞིན་དུ་འཚལ་ལོ་ཞེས་བྱས་ཏེ་དེ་ལྟར་གྱིས་རང་རང་གི་བྱ་བ་ལ་ཞུགས་པ་ན། བྲམ་ཟེ་དེས་དགེ་སློང་རྣམས་ཀྱི་རྫུ་འཕྲུལ་སྣ་ཚོགས་པ་སྟོན་པར་མཐོང་ནས་ཀུན་དགའ་བོ་ལ། འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་འདི་དག་སུ་ཞིག་ཅེས་དྲིས་པས། ཀུན་དགའ་བོས། བཅོམ་ལྡན་འདས་ཀྱི་ཉན་ཐོས་རྣམས་ཡིན་ནོ། །དེའི་བསམ་པ་འཁོར་སློབ་མ་རྣམས་ཀྱང་འདི་འདྲ་ན། དགེ་སྦྱོང་ག་ཏ་མ་ལྟ་ཅི་སྨོས་ཏེ་དེ་ཅི་འདྲ་བ་ཞིག་གུ་སྙམ་མོ། །དེར་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པས། སྲོད་ལ་རྒྱལ་པོ་ཆེན་པོ་བཞི་དང་། ནམ་ཕྱེད་ལ་ལྷའི་དབང་པོ་བརྒྱ་བྱིན་དང་། ཐོ་རངས་ན་མི་མཇེད་ཀྱི་བདག་པོ་ཚངས་པ་རྣམས་བཅོམ་ལྡན་འདས་ཀྱི་མདུན་དུ་འོངས་པ་ན། དེ་དག་བྲམ་ཟེས་མཐོང་ནས་ཀུན་དགའ་བོ་ལ་དྲིས་པས། དེ་དང་དེའོ་ཞེས་བཤད་པས། བྲམ་ཟེ་དེ་རབ་ཏུ་དགའ་ནས། མིར་གྱུར་པ་ལའང་འདི་ལྟ་བུ་གནས་ཐོབ་པ་ཡོད་པ་ལྟར། ཀྱེ་མ་བདག་ཀྱང་སངས་རྒྱས་སུ་གྱུར་ཏེ། འཇིག་རྟེན་དུ་འབྱུང་བར་གྱུར་ཅིག འོན་ཀྱང་བདག་གི་ཡིད་སྨོན་ཙམ་གྱིས་འགྲུབ་པར་མི་འགྱུར་གྱི། བདག་གིས་སྦྱིན་པ་དག་བྱིན་བསོད་ནམས་དག་བྱས་ནས་གཟོད་སྨོན་ལམ་གདབ་པར་བྱའོ་སྙམ་སྟེ་ནམ་ལངས་པ་ན་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་ཕྱིར་མཉན་ཡོད་ཀྱི་གྲོང་དུ་ཆས་པ་ན། ཁྱིམ་བདག་མགོན་མེད་ཟས་སྦྱིན་གྱིས་བྲམ་ཟེ་དེ་ལ། ཁྱོད་ཀྱིས་རྒྱལ་བྱེད་ཀྱི་ཚལ་དུ་དེའི་བར་ལ་ངོ་མཚར་བའི་ལྟད་མོ་ཅི་མཐོང་དྲིས་པས་དེས་ཀྱང་རྒྱས་པར་བཤད་དོ། །དེར་བྲམ་ཟེ་ཁྱེད་ཀྱིས་ངོ་མཚར་རྨད་དུ་བྱུང་བ་དེ་ལྟ་བུ་དག་མཐོང་ན། ཁྱོད་ཅི་འདོད་པར་གྱུར་སྨྲས་པས། བྲམ་ཟེས། བདག་བླ་ན་མེད་པའི་བྱང་ཆུབ་འདོད་མོད་ཀྱི། གནས་དེ་ཡིད་སྨོན་ཙམ་གྱིས་འགྲུབ་པར་མི་འགྱུར་བས། བདག་གིས་སློང་མོ་བྱས་ལ་སྦྱིན་པ་དང་བསོད་ནམས་བྱ་བར་འདོད་དོ། །དེ་ཁྱིམ་བདག་མགོན་མེད་ཟས་སྦྱིན་གྱིས་ཐོས་ནས། བྲམ་ཟེ་དེ་ལ་ནོར་གྱི་ཕུང་པོ་ཆེན་པོ་བྱིན་ནོ། །དེ་ནས་བྲམ་ཟེ་དེས་སངས་རྒྱས་ལ་སོགས་པའི་དགེ་སློང་གི་དགེ་འདུན་ཟླ་བ་གསུམ་དུ་སྤྱན་དྲངས་ཏེ། རྒྱལ་བུ་རྒྱལ་བྱེད་ཀྱི་ཚལ་དུ་ཡོ་བྱད་ཐམས་ཅད་སྦྱར་ནས་བསྙེན་བཀུར་བགྱིས་ཏེ། ཐ་མའི་ཉིན་པར་ཁ་ཟས་རོ་བརྒྱ་པ་དང་། ན་བཟའ་འབུམ་རི་བ་སོགས་ཕུལ་ནས། བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེའི་ཚེ་བཅོམ་ལྡན་འདས་ཀྱིས་བྲམ་ཟེ་དེ་ལ་ལེགས་སོ་བྱིན་ནས། ཁྱོད་མ་འོངས་པའི་དུས་སུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་ཅེས་བྱ་བར་འགྱུར་རོ་ཞེས་ལུང་བསྟན་ཏོ། །