ཁྱོད་མ་འོངས་པ་ན་ཡང་དག་པར་རྫོགས་པའི་སངས་རྒྱས་ལེགས་མཐོང་ཞེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་ཁྱིམ་བདག་ཕྱུག་པོ་རྣམ་ཐོས་བུའི་ནོར་དང་ལྡན་པ་བྱམས་པ་དང་སྙིང་རྗེ་ལྡན་ཞིང་སེམས་ཅན་ཐམས་ཅད་ལ་མཉེས་གཤིན་པ། སྦྱིན་པ་ལ་སྲེད་ཅིང་སྦྱིན་པ་ལ་བློ་སྙོམས་པ་ཞིག་གནས་ཏེ། དེ་ནི་ཡ་མཚན་ཅན་རྣམས་དང་ལྟ་བ་མཚུངས་པ། དུས་དུས་སུ་མཆོད་སྦྱིན་ཆེན་པོ་བྱེད་ལ་བསྟན་བཅོས་སྤྱོད་པ་རྣམས་ཀྱི་གཞུང་སྤྱོད་པར་བྱེད་པ་ལས། དེས་བལྟས་པས་ཐམས་ཅད་ཀྱང་བདག་ལ་ནི་བསྟོད། གཞན་ལ་ནི་སྨོད་པར་བྱེད་པས་སེམས་མ་མགུ་ནས། ཕྱིས་ཞིག་ན་བཅོམ་ལྡན་འདས་ཀྱི་བསྔགས་པ་ཐོས་པས་སེམས་རབ་ཏུ་མགུ་བར་གྱུར་ནས་བཅོམ་ལྡན་འདས་དེ་བདག་གི་མཆོད་སྦྱིན་གྱི་གནས་འདིར་གཤེགས་ན་ཅི་མ་རུང་སྙམ་མོ། །དེའི་ཚེ་བཅོམ་ལྡན་འདས་ཀྱིས་དེའི་བླ་ན་མེད་པའི་དགེ་རྩ་བསྐྱེད་པར་དགོངས་ནས་རྒྱལ་བྱེད་ཀྱི་ཚལ་དུ་མི་སྣང་བར་གྱུར་ཏེ། ཁྱིམ་བདག་དེའི་མཆོད་སྦྱིན་གྱི་གནས་སུ་བཞུགས་པར་གྱུར་ཏེ་ཁྱིམ་བདག་དེ་བླ་ན་མེད་པའི་བྱང་ཆུབ་ཏུ་སྤྲོ་བ་བསྐྱེད་པས། ཁྱིམ་བདག་དེས་སངས་རྒྱས་དང་བཅས་པའི་དགེ་འདུན་ཐམས་ཅད་ཟླ་བ་གསུམ་གྱི་བར་དུ་སྤྱན་དྲངས་ནས་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ཏེ། ཐ་མའི་ཉིན་པར་ཁ་ཟས་རོ་བརྒྱ་དང་ལྡན་པ་དང་ན་བཟའ་འབུམ་རི་བ་སོགས་ཕུལ་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེར་བཅོམ་ལྡན་འདས་ཀྱིས་ཁྱིམ་བདག་དེ་ལ་ལེགས་སོ་བྱིན་ནས། ཁྱོད་མ་འོངས་པ་ན་ཡང་དག་པར་རྫོགས་པའི་སངས་རྒྱས་ལེགས་མཐོང་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །