ཁྱོད་མ་འོངས་པ་ན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཞེས་བྱ་བར་འགྱུར་རོ། །ཞེས་ལུང་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། དེད་དཔོན་ཞིག་ཟོང་ཁྱེར་ཏེ། རྒྱ་མཚོ་ཆེན་པོར་འགྲོ་བ་ལ། མཉན་དུ་ཡོད་པའི་ཕྱི་སྒོ་ཆེན་མོ་ལས་བྱུང་སྟེ། ལམ་པོ་ཆེར་ཞུགས་པ་ན། གལ་ཏེ་བདག་རྒྱ་མཚོ་ཆེན་པོའི་ནང་ནས་བདེ་བར་འཁོར་ཞིང་གྲུའི་དོན་གྲུབ་ན་སྒོ་འདིར་བདག་གི་སྒོའི་དུས་སྟོན་བྱ་ཞིང་། ལམ་པོ་ཆེ་འདིར་ཡང་ལམ་གྱི་དུས་སྟོན་བྱའོ། །ཞེས་བྱས་ཏེ་རྒྱ་མཚོ་ཆེན་པོར་སོང་བ་ལས། རིན་པོ་ཆེའི་གླིང་དུ་ཕྱིན་ནས་བདེ་བར་རྒྱ་མཚོའི་འགྲམ་དུ་བྱུང་བ་དང་། འགྲམ་དེར་རྒྱ་མཚོའི་ལྷ་དང་གྲུ་བོ་ཆེ་ལ་གནས་པའི་ལྷ་རྣམས་ལ་བཀུར་སྟི་ཆེན་པོ་བྱས་ཏེ། མཉན་ཡོད་དུ་ཆས་ཏེ་ཕྱིན་པ་ན། ཟོང་རྣམས་དེར་བཞག་ནས་གྲོང་ཁྱེར་གྱི་སྒོ་ཆེན་པོ་དང་ལམ་པོ་ཆེའི་ལྷ་རྣམས་ལ་མཆོད་པ་བྱས་ཤིང་། སྦྱིན་པ་དག་སྦྱིན་ཞིང་བསོད་ནམས་དག་བྱེད་པ་ལ་ཞུགས་ཏེ། དེས་རིན་པོ་ཆེའི་ཕུང་པོ་ཆེན་པོ་སྤུངས་ནས། དགེ་སྦྱོང་དང་བྲམ་ཟེ་དང་། སྤྱོད་པ་བ་དང་ཀུན་ཏུ་རྒྱུ་དང་། སྡུག་ཅིང་ཕོངས་པ་དང་། བཀྲེས་པ་རྣམས་ལ་སྦྱིན་པ་བྱེད་པ་ལ་ཞུགས་སོ། །དེར་བཅོམ་ལྡན་འདས་ཀྱི་དེད་དཔོན་དེ་བླ་ན་མེད་པའི་བྱང་ཆུབ་ལ་གཟུད་པར་དགོངས་ནས་སངས་རྒྱས་འཁོར་དང་བཅས་པ་སྒོ་དེ་ཉིད་ནས་མཉན་དུ་ཡོད་པའི་ནང་དུ་གཤེགས་པ་ན་དེད་དཔོན་གྱིས་དེ་མཐོང་ནས་དགའ་བ་ཆེན་པོ་སྐྱེས་ཏེ་རིན་པོ་ཆེ་སྦར་གྱིས་བཏབ་སྟེ་བཅོམ་ལྡན་འདས་ལ་གཏོར་བས་དེ་དག་སངས་རྒྱས་ཀྱི་མཐུས། བཅོམ་ལྡན་འདས་ཀྱི་སྐུའི་སྟེང་དུ་ལྡིང་ཁང་དུ་གྱུར་ཏེ་གཤེགས་ན་འགྲོ་བཞུགས་ན་སྡོད་པར་གྱུར་ཏོ། །དེ་མཐོང་བས་ལྷག་པར་ཡང་དགའ་བ་སྐྱེས་ཏེ། སངས་རྒྱས་འཁོར་དང་བཅས་པ་ཟླ་བ་གསུམ་གྱི་བར་དུ་སྤྱན་དྲངས་ནས་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ནས། ཐ་མའི་ཉིན་དེར་ཁ་ཟས་རོ་བརྒྱ་བ་དང་། ན་བཟའ་འབུམ་རི་བ་སོགས་ཕུལ་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེའི་ཚེ་བཅོམ་ལྡན་འདས་ཀྱིས་དེད་དཔོན་དེ་ལ་ལེགས་སོ་བྱིན་ནས། ཁྱོད་མ་འོངས་པ་ན་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །