ཁྱོད་མ་འོངས་པ་ན་འཇིག་རྟེན་ལོང་བ་འདྲེན་པ་མེད་པ་རྣམས་ལ་ལམ་སྟོན་པ་རྫོགས་པའི་སངས་རྒྱས་ཆུ་རླབས་ཞེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེའི་ཁྱིམ་བདག་ཞིག་གི་ཆུང་མ་ལ་ཁྱེའུ་གཟུགས་བྱད་ལྟ་ན་སྡུག་པ་ཞིག་སྐྱེས་ཏེ། དེ་ཉིད་ཆེར་སྐྱེས་པ་ན་རྒྱ་མཚོ་ན་རིན་པོ་ཆེ་ལེན་དུ་སོང་ངོ་། །དེའི་ཤུལ་དུ་ཁྱིམ་བདག་དེས་ཀྱང་ཁྱིམ་བདག་མགོན་མེད་ཟས་སྦྱིན་ལ་བརྟེན་ནས་སངས་རྒྱས་ཀྱི་བསྟན་པ་ལ་དད་པ་རྙེད་ནས་སྐྱབས་འགྲོ་དང་བསླབ་གཞི་བླང་ཞིང་། སངས་རྒྱས་འཁོར་དང་བཅས་པ་ཁྱིམ་དུ་སྤྱན་དྲངས་ཤིང་ཆོས་ཐོས་པས། ཁྱིམ་བདག་འཁོར་དང་བཅས་པ་དེས་རྒྱུན་དུ་ཞུགས་པའི་འབྲས་ཐོབ་ཅིང་། དུས་དུས་སུ་རྒྱལ་བྱེད་ཀྱིས་ཚལ་དུ་འོངས་ནས་བཅོམ་ལྡན་འདས་ལས་ཆོས་མཉན་པར་བྱེད་ཅིང་། བདག་གི་བུ་དེ་ཡང་འདིར་འོངས་ནས་སངས་རྒྱས་ལ་དད་པར་གྱུར་ན་ཅི་མ་རུང་སྙམ་མོ། །དེ་ནས་ཕྱི་ཞིག་ན་བུ་དེ་རྒྱ་མཚོ་ལས་དོན་གྲུབ་སྟེ་ཁྱིམ་དུ་འོང་བ་ན། ཕ་མ་གཉིས་ཆོས་ཉན་དུ་སོང་བ་དང་འགྲིགས་པས་བུ་དེ་ཡང་རིངས་པར་རྒྱལ་བྱེད་ཀྱི་ཚལ་དུ་འོངས་ནས། བཅོམ་ལྡན་འདས་ཀྱི་ཞབས་ལ་ཕྱག་བྱས་ཤིང་། ཕ་མ་གཉིས་ཀྱི་མགུལ་ནས་འཇུས་ནས་ཆོས་ཉན་པའི་ཕྱིར་འཁོད་པ་ལ། བཅོམ་ལྡན་འདས་ཀྱིས་བླ་ན་མེད་པའི་བྱང་ཆུབ་ཏུ་སྤྲོ་བ་སྐྱེད་པའི་ཆོས་ཀྱི་གཏམ་མཛད་པས་ཁྱེའུ་དེ་རྫོགས་པའི་བྱང་ཆུབ་ཏུ་འདུན་པ་སྐྱེས་སོ། །དེ་ནས་དེ་རྣམས་ཁྱིམ་དུ་ཕྱིན་པ་ན། ཕ་མ་གཉིས་ཀྱིས་བུ་ཁྱོད་ཀྱིས་ནི་རྒྱ་མཚོའི་ནང་དུ་སོང་ནས་སྡུག་བསྔལ་སྟོང་ཕྲག་མང་པོ་མྱོང་སྟེ་རིན་པོ་ཆེ་ཐ་མལ་པ་དག་ཁྱེར་ཏེ་འོངས་སོ། །བདག་གཉིས་ནི་འདི་ན་འདུག་བཞིན་དུ། ཚེགས་ཆུང་ངུས་རིན་པོ་ཆེ་རིན་ཐང་ཆེ་བ་དག་རྙེད་དོ་ཞེས་སྨྲས་ཏེ་བདེན་པ་མཐོང་ཟིན་པ་དེ་གོ་བར་བྱས་པས། ཁྱིམ་བདག་གི་བུ་དེ་ལྷག་པར་ཡང་དགའ་བར་གྱུར་ཏེ་སངས་རྒྱས་དང་བཅས་པའི་དགེ་འདུན་ཟླ་བ་གསུམ་གྱིས་བར་དུ་སྤྱན་དྲངས་ནས། དེའི་རིང་ལ་ན་བཟའ་དང་ཞལ་ཟས་དང་། གཟིམས་ཆ་དང་། གདན་དང་། བསྙུན་གསོས་དང་སྨན་ཟོང་སྟེ་མཁོ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ནས། ཐ་མའི་ཉིན་པར་ཞལ་ཟས་རོ་བརྒྱ་དང་ལྡན་པ་དང་། ན་བཟའ་འབུམ་རི་བ་ལ་སོགས་ཕུལ་ནས། བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེའི་ཚེ་བཅོམ་ལྡན་འདས་ཀྱིས་ཁྱིམ་བདག་གི་བུ་དེ་ལ་ལེགས་སོ་བྱིན་ནས། ཁྱོད་མ་འོངས་པ་ན་འཇིག་རྟེན་ལོང་བ་འདྲེན་པ་མེད་པ་རྣམས་ལ་ལམ་སྟོན་པ་རྫོགས་པའི་སངས་རྒྱས་ཆུ་རླབས་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །