རྫོགས་པའི་བྱང་ཆུབ་ཆེན་པོ་དང་རྗེས་སུ་འབྲེལ་བའི་བླ་ན་མེད་པའི་དགེ་བའི་རྩ་བ་བསྐྱེད་པའི་འབྲས་བུ་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། བྱང་ཕྱོགས་ཀྱི་པན་ཙ་ལའི་རྒྱལ་པོ་དང་ལྷོ་ཕྱོགས་ཀྱི་པན་ཙ་ལའི་རྒྱལ་པོ་གཉིས་ཕན་ཚུན་མི་མཐུན་པར་གྱུར་ཏེ། དུས་དུས་སུ་སྐྱེ་བོ་ཕལ་མོ་ཆེ་ཁ་འདོགས་པར་བྱེད་དོ། །རྒྱལ་པོ་གསལ་རྒྱལ་དེ་གཉིས་ཀ་དང་བཤེས་པ་ཡིན་པས། དེས་བཅོམ་ལྡན་འདས་ལ་རྒྱལ་པོ་དེ་གཉིས་འདུལ་བར་གསོལ་བ་བཏབ་བོ། །དེར་བཅོམ་ལྡན་འདས་རྒྱལ་བྱེད་ཀྱི་ཚལ་དུ་མི་སྣང་བར་གྱུར་ཏེ་ཡུལ་དེ་གཉིས་ཀྱི་བར་དུ་བཞུགས་ནས། རྒྱལ་པོ་དེ་གཉིས་འཐབ་པར་བྱས་ཏེ། དེའི་ཚེ་སངས་རྒྱས་ཀྱི་མཐུས་རྒྱལ་པོ་རང་རང་གི་དཔུང་རྣམས་ཕམ་ནས་རང་ཉིད་གཅིག་པུར་ཐར་པ་དེ་ལྟ་བུར་མཐོང་བར་མཛད་ནས་རྒྱལ་པོ་གཉིས་ཤིང་རྟ་ལ་ཞུགས་ནས་བྲོས་ཏེ་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་འཁོད་པ་ལ། དེ་གཉིས་ཕན་ཚུན་གཅིག་གིས་གཅིག་མི་མཐོང་བར་བྱིན་གྱིས་བརླབས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོ་དེ་གཉིས་ལས་གཅིག་གིས་ནི་དགྲ་བཅོམ་པ་ཐོབ་པར་འགྱུར་བ་དང་། གཅིག་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་འགྱུར་བར་གཟིགས་ནས་གཅིག་ལ་ནི་འཕགས་པའི་བདེན་པ་བཞིའི་ཆོས་བསྟན་ཅིང་། གཅིག་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སྤྲོ་བར་འགྱུར་བའི་གཏམ་གསུངས་པས། ལྷོ་ཕྱོགས་ཀྱི་པན་ཙ་ལའི་རྒྱལ་པོ་ནི་ཚུར་ཤོག་གིས་རབ་ཏུ་བྱུང་ནས་དགྲ་བཅོམ་པ་ཉིད་མངོན་དུ་བྱས་ལ། བྱང་ཕྱོགས་ཀྱི་པན་ཙ་ལའི་རྒྱལ་པོས་ནི་སངས་རྒྱས་འཁོར་དང་བཅས་པ་སྤྱན་དྲངས་ཏེ། ཟླ་བ་གསུམ་གྱི་བར་དུ་ཡོ་བྱད་ཐམས་ཅད་སྦྱར་ནས་མངོན་པར་མཆོད་ཅིང་། ཉིན་ཐ་མ་ལ་ཞལ་ཟས་རོ་བརྒྱ་དང་ལྡན་པ་དང་། ན་བཟའ་འབུམ་རི་བ་སོགས་ཕུལ་ནས་བླ་ན་མེད་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། །དེའི་ཚེ་བཅོམ་ལྡན་འདས་ཀྱིས་རྒྱལ་པོ་དེ་ལ་ལེགས་སོ་བྱིན་ནས། ཁྱོད་མ་འོངས་པ་ན་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམ་པར་རྒྱལ་བ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །འདི་རྣམས་ཀྱིས་ནི་རྫོགས་པའི་བྱང་ཆུབ་ཆེན་པོ་དང་རྗེས་སུ་འབྲེལ་བའི་བླ་ན་མེད་པའི་དགེ་བའི་རྩ་བ་བསྐྱེད་པའི་འབྲས་བུ་བསྟན་པ་ཡིན་ནོ། །