ངག་གི་རྫུན་སྤངས་ཤིང་བདེན་པར་སྨྲ་བ་དང་བྱམས་སེམས་བསྒོམས་པའི་འབྲས་བུའང་བསྟན་པ།
༈ ཡང་བཅོམ་ལྡན་འདས་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་དང་། ཚོང་པ་ལྔ་བརྒྱ་དང་། སྤྲང་པོ་ལྔ་བརྒྱ་དང་། ཐབས་ཅིག་ཏུ་ལྗོངས་རྒྱུ་ཞིང་གཤེགས་པ་ལས། ནགས་ཁྲོད་ཅིག་ཏུ་ནགས་ལ་མེ་ཆེན་པོ་འབར་བས་སྐྱེ་བོ་ཐམས་ཅད་འཇིགས་ཤིང་སྐྲག་པར་གྱུར་པ་ན། བཅོམ་ལྡན་འདས་མགྲོན་པོ་རྣམས་ཀྱི་མདུན་ལོགས་སུ་གཤེགས་པ་ལས། སངས་རྒྱས་ཀུན་གྱི་སྟོབས་གང་དང་། །དགྲ་བཅོམ་གང་གི་སྟོབས་གང་དང་། །སངས་རྒྱས་དཀོན་མཆོག་གཟི་བྱིན་གྱིས། །མེ་ཁྱོད་ལམ་ནི་དབྱེ་བར་གྱིས། །དེ་བཞིན་དུ་གཞན་འདྲ་བ་ལས། རྐང་པ་གསུམ་པའི་གནས་སུ། དམ་ཆོས་དང་། དགེ་འདུན་ཞེས་ཁ་བསྒྱུར་བའི་ཚིགས་སུ་བཅད་པ་གསུམ་གསུངས་པས་དེའི་མོད་ལ་མེ་ཞི་བར་གྱུར་པས། ཚོང་པ་དེ་དག་རབ་ཏུ་དགའ་ནས་བཅོམ་ལྡན་འདས་ཀྱི་སྤྱན་སྔར་འཁོད་ནས་ཆོས་མཉན་པས་ནི་དེ་དང་མཐུན་པའི་ཆོས་གསུངས་པས་དེ་དག་ཐེག་པ་གསུམ་གྱི་ལམ་ལ་སྨིན་པར་བྱས་ཏེ་འབྲས་བུ་ཐོབ་པ་ཡང་མང་ངོ་། །དེར་དགེ་སློང་རྣམས་ངོ་མཚར་དུ་གྱུར་པ་ལ། བཅོམ་ལྡན་འདས་ཀྱིས། ད་ལྟར་འབའ་ཞིག་མ་ཡིན་ཏེ། སྔོན་འདས་པའི་དུས་ནའང་། ནགས་ཁྲོད་གཅིག་ན་བྱ་མང་པོ་གནས་པ་ལས། ནགས་ལ་མེ་ཤོར་ཏེ་བྱ་དེ་དག་གི་ནང་ནས་འགྲོ་ནུས་པ་རྣམས་བྲོས། འགྲོ་མི་ནུས་པ་དང་། སྒོ་ང་རྣམས་དེ་ཉིད་དུ་བོར་རོ། །དེའི་ཚེ་བྱང་ཆུབ་སེམས་དཔའ་གོང་མ་སྲེག་ཅིག་ཏུ་སྐྱེ་བ་བཞེས་ཏེ། དེས་དེ་ལྟར་མཐོང་ནས་སྙིང་རྗེ་ཆེན་པོ་སྐྱེས་ཏེ། བདག་གིས་འདི་རྣམས་ཀྱི་ཕྱིར་ཡང་བརྩོན་འགྲུས་མ་བསྐྱེད་ན་སེམས་ཅན་རྣམས་འཁོར་བ་ལས་ཇི་ལྟར་བསྒྲལ་བར་བྱ་སྙམ་སྟེ། འདབ་མ་ཆུ་སྦངས་ནས། མེ་ཆེན་པོའི་སྟེང་གི་ནམ་མཁའ་ལ་འདུག་སྟེ་འདབ་མ་སྤྲུགས་ནས་ཚིགས་སུ་བཅད་དེ་སྨྲས་པ། འདི་དག་འདབ་མ་ཡོད་མོད་ཀྱི། །འདི་དག་ད་དུང་འཕུར་མི་ནུས། །འདི་དག་རྐང་པ་ཡོད་མོད་ཀྱི། །འདི་དག་ད་དུང་འགྲོར་མི་ནུས། །འདི་རྣམས་ཕ་མ་འཕུར་ཏེ་སོང་། །མེ་ཁྱོད་སྡོད་ལ་མ་འགུལ་ཅིག ། བདེན་དང་བདེན་ཚིག་གང་ཡིན་པ། །བདག་གིས་བྱམས་སེམས་རབ་བསྒོམས་པའི། །བདེན་པའི་ཚིག་ནི་འདི་ཡིས་ནི། །མེ་ཁྱོད་སྡོད་ལ་མ་འགུལ་ཅིག ། དེར་ལྷའི་དབང་པོ་བརྒྱ་བྱིན་གྱིས་མཐོང་ནས་བྱང་ཆུབ་སེམས་དཔའི་གྲོགས་བྱའོ་སྙམ་སྟེ་ཆར་ཆེན་པོ་ཕབ་པས་མེ་ཞི་བར་གྱུར་ཏེ་དེ་དག་འཇིགས་པ་ལས་ཐར་པར་བྱས་སོ། །དེའི་དུས་ཀྱི་གོང་མ་སྲེག་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ང་ཉིད་ཡིན་ལ། དེའི་ཚེ་ནགས་ཁྲོད་ན་གནས་པའི་སེམས་ཅན་རྣམས་ནི་སྐྱེ་བོ་ཕལ་མོ་ཆེ་འདི་དག་གོ །གཞན་ཡང་འདི་རྣམས་སངས་རྒྱས་འོད་སྲུང་གི་དུས་སུ་ཁ་ཅིག་རབ་ཏུ་བྱུང་བ་དང་། ཁ་ཅིག་དགེ་བསྙེན་དུ་གྱུར་ནས་ཚངས་པར་སྤྱོད་པ་སྤྱད་ཅིང་དབང་པོ་ཡོངས་སུ་སྨིན་པར་བྱས་པ་དེས་ད་ལྟར་རྣམ་པར་གྲོལ་ལོ་གསུངས། འདིས་ནི་ངག་གི་རྫུན་སྤངས་ཤིང་བདེན་པར་སྨྲ་བ་དང་བྱམས་སེམས་བསྒོམས་པའི་འབྲས་བུའང་བསྟན་པ་ཡིན་ནོ། །