གཙུག་ལག་ཁང་དང་དགེ་འདུན་མཆོད་པའི་ཕན་ཡོན་ཀྱང་བསྟན་པ།

༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ་གྲོང་དེའི་ཁྱིམ་བདག་ཕྱུག་ཅིང་ནོར་མང་བ་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་ལས་ཁྱེའུ་གཟུགས་བཟང་ཞིང་ལྟ་ན་སྡུག་པ་ཞིག་བཙས་པས་མིང་ཡང་ལྟ་ན་སྡུག་ཅེས་པར་བཏགས་སོ། །དེ་ཆེར་སྐྱེས་པ་ན་རྒྱལ་པོའི་ཁབ་ཐམས་ཅད་དུ་དེའི་གྲགས་པས་ཁྱབ་ནས་ཐམས་ཅད་དེར་བལྟ་བར་འོང་བ་ལས། ཕྱིས་ཞིག་ན་བཅོམ་ལྡན་འདས་མངོན་པར་སངས་རྒྱས་ཏེ་རྒྱལ་པོའི་ཁབ་ཏུ་བྱོན་ནས་སྐྱེ་བོ་དཔག་ཏུ་མེད་པའི་དོན་མཛད་པས། རྒྱལ་པོའི་ཁབ་ཀྱི་མི་རྣམས་དེར་འདུས་ནས་ཁྱེའུ་ལ་ལྟ་བར་བྱེད་པ་མེད་པར་གྱུར་ནས། ཁྱེའུ་དེས་དེའི་རྒྱུ་དྲིས་པ་ན། སངས་རྒྱས་བཅོམ་ལྡན་འདས་ཀྱིས་བསྔགས་པ་ཐོས་ནས་དེ་རབ་ཏུ་དགའ་བར་གྱུར་ཏེ། ཕ་མ་དང་ལྷན་ཅིག་ཏུ་འོད་མའི་ཚལ་དུ་སོང་བ་ན། ཁྱེའུ་དེས་བཅོམ་ལྡན་འདས་ཀྱི་སྐུ་མཐོང་བ་ན་དེ་ལ་ཕ་ཡི་འདུ་ཤེས་སྐྱེས་ཏེ། ཕ་ཕ་ཞེས་བརྗོད་ཅིང་ཞབས་ལ་ཕྱག་བྱས་ཏེ་སྐུའི་དྲུང་ན་འདུག་གོ །དེར་བཅོམ་ལྡན་འདས་ཀྱིས་རྐྱེན་དང་འཚམ་པའི་ཆོས་བསྟན་པའི་འོག་ཏུ། ཕ་མ་གཉིས་ཀྱིས་ཁྱེའུའི་ལག་པ་ནས་བཟུང་སྟེ་ཁྱིམ་དུ་འགྲོ་བར་བྱས་ཀྱང་དེ་སངས་རྒྱས་ཀྱི་ཐད་ནས་དབྲལ་བར་མ་ནུས་སོ། །དེ་ནས་དེ་གཉིས་ཀྱིས་བསམ་པ། བཅོམ་ལྡན་འདས་བདག་ཅག་གི་ཁྱིམ་དུ་སྤྱན་དྲངས་ན་ཐབས་དེས་ཁྱིམ་དུ་ཁྲིད་ནུས་པར་འགྱུར་རོ་སྙམ་ནས། སངས་རྒྱས་འཁོར་དང་བཅས་པ་དགུང་བདུན་གྱི་བར་སྤྱན་དྲངས་ཤིང་མཆོད་ནས། བཅོམ་ལྡན་འདས་ཀྱིས་དེ་དག་དང་མཐུན་པའི་ཆོས་བསྟན་པས་ཁྱིམ་བདག་འཁོར་དང་བཅས་པ་བདེན་པས་མཐོང་ཞིང་། ཁྱེའུ་དེ་དགེ་སློང་ཚུར་ཤོག་གིས་བསྙེན་པར་རྫོགས་ཏེ་བརྩོན་པས་དགྲ་བཅོམ་པ་ཉིད་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་པ་ན། བཀའ་སྩལ་པ། ཁྱེའུ་འདི་ནི་ངའི་འདས་མ་ཐག་པའི་ཚེ་རབས་ལྔ་བརྒྱར་བུར་གྱུར་པས་ན། སྔོན་གྱིས་བག་ཆགས་དེ་ཁོ་ནས་འདིས་ང་ལ་མཇལ་བར་བྱེད་དོ། །དེ་ནས་དེའི་ལས་ཀྱི་རྒྱུ་གསོལ་པ་ན། སྨོན་ལམ་གྱིས་དབང་ལས་གྱུར་ཏེ། སྔོན་འདས་པའི་དུས་བསྐལ་པ་བཟང་པོ་འདི་ཉིད་ཀྱི་མི་རྣམས་ཀྱི་ཚེ་ལོ་བཞི་ཁྲི་ཐུབ་པ་ན་སངས་རྒྱས་འཁོར་བ་འཇིག་འཇིག་རྟེན་དུ་བྱོན་ཏེ། དེའི་ཚེ་རྒྱལ་པོ་མཛེས་པས་གཙུག་ལག་ཁང་རྣམ་པ་ཐམས་ཅད་ཡོངས་སུ་རྫོགས་པ་ཞིག་བྱས་ནས་སངས་རྒྱས་འཁོར་དང་བཅས་པ་ལ་ཕུལ་ཏེ། ཉིན་རེ་བཞིན་རྒྱལ་པོ་རང་ཉིད་འཁོར་དང་བཅས་པ་སོང་ནས་གཙུག་ལག་ཁང་གི་བྱི་དོར་བྱེད་པ་ལས། ཉིན་ཞིག་རྒྱལ་པོ་དེ་ལ་བྲེལ་བ་ཞིག་བྱུང་སྟེ། རང་གི་བུ་ཐུ་བོ་དེ་བྱི་དོར་བྱེད་པར་བསྐོས་པ་ལས། དེས་བྱི་དོར་བྱེད་པ་ན་སངས་རྒྱས་འཁོར་བ་འཇིག་གིས་ཉི་མ་ནུབ་ཀྱི་བར་དུ་བྱི་དོར་བྱེད་མི་ནུས་པ་དེ་ལྟར་བྱིན་གྱིས་བརླབས་པས། རྒྱལ་བུ་དེ་གཙུག་ལག་ཁང་དེར་དགོང་མལ་བཏབ་པ་ན། དེ་ནུབ་རྒྱལ་བུ་དེས་དགེ་སློང་རྣམས་རྫུ་འཕྲུལ་སྟོན་པའང་མཐོང་། བརྒྱ་བྱིན་དང་ཚངས་པ་སོགས་ཀྱང་འོང་བར་མཐོང་བས། དེ་བཅོམ་ལྡན་འདས་ལ་ཤིན་ཏུ་དགའ་བར་གྱུར་ཏེ། གྲོང་ཁྱེར་དུ་ཕྱིར་འགྲོ་མི་འདོད་པར་གྱུར་ནས། གཙུག་ལག་ཁང་དེ་ཉིད་དུ་ལོ་ལྔ་སྟོང་གི་བར་དུ་གནས་ནས་གཙུག་ལག་ཁང་དང་དགེ་སློང་རྣམས་ལ་རིམ་གྲོ་བགྱིས་ཤིང་། བྱམས་པའི་ཏིང་ངེ་འཛིན་ཀྱང་བསྐྱེད། སྐྱབས་སུ་འགྲོ་བ་དང་བསླབ་པའི་གཞི་རྣམས་བསྲུངས་ནས་འཆི་ཁར། བདག་གང་དུ་སྐྱེས་པ་དེར་གཟུགས་བཟང་བ་ལྟ་ན་སྡུག་པ་དང་། སྟོན་པ་འདི་ལྟ་བུ་མཉེས་པར་བྱས་ནས་རབ་ཏུ་བྱུང་ཞིང་ཉོན་མོངས་པ་སྤངས་ནས་དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག་ཅེས་སྨོན་ལམ་བཏབ་སྟེ། དེའི་དུས་ཀྱི་རྒྱལ་པོའི་བུར་གྱུར་པ་དེ་འདི་ཁོ་ནའོ། །གཞན་ཡང་སངས་རྒྱས་འོད་སྲུང་གི་དུས་སུ་རབ་ཏུ་བྱུང་ཞིང་ཚུལ་ཁྲིམས་བསྲུངས་ལ་དབང་པོ་སྨིན་པར་བྱས་པས་ད་ལྟར་རྣམ་པར་གྲོལ་ལོ་གསུངས། འདིས་ནི་གཙུག་ལག་ཁང་དང་དགེ་འདུན་མཆོད་པའི་ཕན་ཡོན་ཀྱང་བསྟན་ཏོ། །