སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་ཚེ་གཅིག་ཏུ་ཚངས་པར་སྤྱད་དེ་འཆི་ཀར་སྨོན་ལམ་བཏབ་པའི་འབྲས་བུ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། བྲམ་ཟེའི་ཁྱེའུ་ཞིག་སྐྱོ་སངས་དུ་ཕྱིན་པས། རྒྱལ་བྱེད་ཀྱི་ཚལ་དུ་བཅོམ་ལྡན་འདས་ཀྱིས་འཁོར་མང་པོ་ལ་ཆོས་སྟོན་པ་མཐོང་ནས་དད་པར་གྱུར་ཏེ་སྐྱབས་འགྲོ་དང་བསླབ་གཞི་རྣམས་བླངས་སོ། །དེ་ནས་ཕྱིས་བྲམ་ཟེའི་ཁྱེའུ་དེས་མཆོད་སྦྱིན་བྱེད་པ་ན། བདག་གི་ཁྱིམ་དུ་བཅོམ་ལྡན་འདས་གཤེགས་ཏེ་མཆོད་སྦྱིན་གྱི་ཡོ་བྱད་དག་བཞེས་ན་ཅི་མ་རུང་སྙམ་པའི་མོད། བཅོམ་ལྡན་འདས་དེར་བྱོན་ཏེ་གྲལ་གྱི་གོང་དུ་བཞུགས་ལ་ཁྱེའུ་དེས་མཐོང་ཞིང་བྲམ་ཟེ་གཞན་རྣམས་ཀྱིས་མི་མཐོང་བར་བྱིན་གྱིས་བརླབས་ནས་བཤོས་གསོལ་བའི་འོག་ཏུ་མཆོད་སྦྱིན་གྱི་གནས་སུ་འོད་ཟེར་ཆེན་པོ་བཏང་ནས་སྐུ་མི་སྣང་བར་རྒྱལ་བྱེད་ཀྱིས་ཚལ་དུ་གཤེགས་སོ། །དེར་བྲམ་ཟེ་རྣམས་ཀྱིས་འོད་དེ་མཐོང་བས་ཁ་ཅིག་གིས་བདག་གི་མཆོད་སྦྱིན་གྲུབ་བོ་ཟེར། ཁ་ཅིག་གིས་མི་མཇེད་ཀྱི་བདག་པོ་ཚངས་པ་བྱུང་ངོ་ཟེར། དེ་བཞིན་དུ་དབང་ཕྱུག་དང་ཁྱབ་འཇུག་སོགས་བྱུང་ངོ་ཟེར་བ་ལ། བྲམ་ཟེའི་ཁྱེའུ་དེས་བཅོམ་ལྡན་འདས་གཤེགས་སོ། །གལ་ཏེ་ཁྱེད་ཡིད་མི་ཆེས་ན་བདག་གིས་སང་ནང་པར་མངོན་དུ་འགྱུར་བར་བྱའོ་སྨྲས་སོ། །དེའི་ཕྱིར་ཉིན་བྲམ་ཟེ་ཐམས་ཅད་འཚོགས་པའི་ནང་དུ། ཁྱེའུ་དེས་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ནས་རྒྱལ་བྱེད་ཀྱི་ཚལ་གྱི་ལོགས་སུ་ཐལ་མོ་སྦྱར་ཏེ། བཙུན་པ་བཅོམ་ལྡན་འདས་འདི་ལྟ་སྟེ་འདས་པ་དང་། མ་འོངས་པ་དང་། ད་ལྟར་བྱུང་བ་ཅི་ཡང་མི་མཁྱེན་པའམ། མི་གཟིགས་པའམ། མི་རྟོགས་པའམ། ཐུགས་སུ་མི་ཆུད་པ་ཅིའང་མི་མངའ་ན། ཀྱེ་མ། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་བདག་གི་མཆོད་སྦྱིན་གྱི་གནས་འདིར་གཤེགས་ཏེ་ལོངས་སྤྱོད་པར་གསོལ་ཞེས་བྱས་སོ། །དེའི་མོད་ལ་བཅོམ་ལྡན་འདས་དགེ་སློང་མང་པོས་ཞམ་རིང་བྱས་ཏེ་ནམ་མཁའ་ལས་མཆོད་སྦྱིན་གྱི་གནས་དེར་གཤེགས་ཏེ་གཞན་གྱིས་མི་མཐོང་བར་གདན་ལ་བཞུགས་སོ། །དེ་ནས་བྲམ་ཟེའི་ཁྱེའུས་མཐོང་སྟེ་ཞབས་ལ་ཕྱག་འཚལ་བ་ན། བྲམ་ཟེ་གཞན་དག་གིས་ཁྱེའུ་འདི་སྨྱོས་ཏེ་ཅི་ཡང་བླ་ཞིང་འདུག་གོ་ཟེར་རོ། །དེར་བྲམ་ཟེའི་ཁྱེའུས། བདག་སྨྱོས་པ་མ་ཡིན་ཏེ། བཅོམ་ལྡན་འདས་དགེ་སློང་གི་དགེ་འདུན་གྱི་འཁོར་དང་བཅས་མཆོད་སྦྱིན་གྱི་དབུས་ན་བཞུགས་སོ། །ཞེས་སྨྲས་པས། དེའི་མོད་ལ་ཐམས་ཅད་ཀྱིས་ཇི་ལྟ་བ་བཞིན་དུ་མངོན་སུམ་དུ་མཐོང་ངོ་། །དེ་ནས་བྲམ་ཟེའི་ཁྱེའུ་དེས་ཀུན་གྱི་མཐོང་བར་བཟའ་བཅའ་གཙང་མ་སྣ་ཚོགས་པས་སངས་རྒྱས་འཁོར་དང་བཅས་པ་མཆོད་ཅིང་ཆོས་ཉན་པའི་མཐར་སངས་རྒྱས་འཁོར་དང་བཅས་པ་གདན་ལས་བཞེངས་ཏེ་གཤེགས་ཟིན་པའི་འོག་ཏུ། བྲམ་ཟེ་དེ་དག་ཁྲོས་ནས་ངེད་ཀྱི་ཕྱིར་བཟའ་བཅའ་བཤམས་པ་དེ་དག་དགེ་སྦྱོང་ག་ཏ་མ་ལ་བྱིན་ནོ། །ཞེས་ཟེར་ཞིང་ཁྱེའུ་དེ་གསོད་པར་བརྩམས་པ་ན། དེ་འཇིགས་ནས་བྲོས་ཏེ་རྒྱལ་བྱེད་ཀྱི་ཚལ་དུ་སོང་ནས་སྟོན་པའི་སྤྱན་སྔར་འདུག་པ་ལ། དེ་དང་མཐུན་པའི་ཆོས་བསྟན་པས་རྒྱུན་དུ་ཞུགས་པ་ཐོབ་ཅིང་། དེ་ཚུར་ཤོག་གིས་བསྙེན་པར་རྫོགས་ནས་དགྲ་བཅོམ་པ་མངོན་དུ་བྱས་སོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་གསོལ་པ་ན། སྔོན་སངས་རྒྱས་འོད་སྲུང་གི་དུས་སུ་ཝཱ་རཱ་ཎ་སཱིའི་བྲམ་ཟེ་ཞིག་གིས་མཆོད་སྦྱིན་བྱས་ཏེ། ཡོན་འགྱེད་པའི་ཚེ་འཐབ་མོ་ཆེན་པོ་བྱུང་ནས་དེ་ཉིད་གསོད་པར་བརྩམས་པ་ན། དེ་སྐྲག་ནས། དྲང་སྲོང་སྨྲ་བའི་གནས་སུ་བྲོས་ཏེ། སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་ཚེ་གཅིག་ཏུ་ཚངས་པར་སྤྱད་དེ་འཆི་ཀར་སྨོན་ལམ་བཏབ་པའི་འབྲས་བུར་གསུངས་སོ། །ཡང་སྟོན་པ་མཉན་ཡོད་ན་བཞུགས་པའི་ཚེ། བྲམ་ཟེ་ཞིག་གིས་མཆོད་སྦྱིན་བྱས་ཏེ་གསེར་དངུལ་མང་པོ་བྲམ་ཟེ་རྣམས་ལ་ཡོན་དུ་ཕུལ་བ་ལས་དེ་འགྱེད་པའི་ཚེ་འཐབ་མོ་ཆེན་པོ་བྱུང་སྟེ། རྩོད་པར་གྱུར་པ་ན། བཅོམ་ལྡན་འདས་ཀྱིས་དེ་རྣམས་འདུལ་བའི་དུས་ལ་བབས་པར་དགོངས་ནས་དགེ་སློང་དགེ་འདུན་དང་བཅས་ཏེ། མཆོད་སྦྱིན་གྱི་གནས་སུ་གཤེགས་ཏེ། འཐབ་མོའི་རྩ་བ་ཆགས་པ་དེ་ཉིད་སྤངས་པ་ལས་བརྩམས་ནས་དེ་དང་མཐུན་པའི་ཆོས་བསྟན་པས་བྲམ་ཟེ་བརྒྱ་ཕྲག་དུ་མ་སྟན་དེ་ཉིད་དུ་འཁོད་བཞིན་དུ་ཁ་ཅིག་དྲོད་དང་ཁ་ཅིག་རྩེ་མོ་དང་དེ་བཞིན་དུ་བཟོད་དང་ཆོས་མཆོག་དང་། རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་དགྲ་བཅོམ་པའི་བར་གྱི་འབྲས་བུ་ཐོབ་ཅིང་། དེ་བཞིན་དུ་འཁོར་ལོས་སྒྱུར་བའི་རྒྱལ་པོ་དང་། སྟོབས་ཀྱི་འཁོར་ལོས་སྒྱུར་བ་དང་། བརྒྱ་བྱིན་དང་། ཚངས་པར་འགྱུར་བ་དང་། དེ་བཞིན་དུ་ཉན་ཐོས་དང་རང་སངས་རྒྱས་དང་། བླ་ན་མེད་པའི་རྫོགས་པའི་བྱང་ཆུབ་ཀྱི་ས་བོན་བསྐྱེད་དེ། འཁོར་དེ་དག་གི་ནང་ནས་ཕལ་ཆེར་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་འབབ་པར་མཛད་ནས་སླར་གཙུག་ལག་ཁང་དུ་གཤེགས་སོ། །དེར་དགེ་སློང་རྣམས་ཀྱིས་དེ་དག་གི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་བསྟན་པ་ལ་དེ་རྣམས་ཁ་ཅིག་དགེ་བསྙེན་དུ་གྱུར། ཁ་ཅིག་རབ་ཏུ་བྱུང་ནས་ཚེ་གཅིག་ཏུ་སྐྱབས་འགྲོ་དང་། བསླབ་པའི་གཞི་རྣམས་བསྲུངས་ཏེ། དབང་པོ་རྣམས་ཡོངས་སུ་སྨིན་པར་བྱས་པ་དེས། ད་ལྟར་རྣམ་པར་གྲོལ་བར་གྱུར་ཏོ་གསུངས།