མ་འོངས་པ་ན་ཡང་དག་པར་རྫོགས་པའི་སངས་རྒྱས་བརྩོན་འགྲུས་དང་མཐུ་རྩལ་དང་ཤིན་ཏུ་ལྡན་པ་ཞེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ཀྱི་ཚོང་དཔོན་རྣམ་ཐོས་བུའི་ནོར་དང་ལྡན་པ་ཞིག་ལ་བུ་མེད་ནས་ཡུན་རིང་གདུང་བ་ལ། ཕྱིས་ཞིག་ནས་དེའི་ཆུང་མ་ལ་ཁྱེའུ་ལྟ་ན་སྡུག་པ་ཞིག་བཙས་ཏེ་ཆེར་སྐྱེས་ཏེ་ལོ་ལྔ་དྲུག་ཙམ་ལོན་པ་ན་ལེ་ལོ་རབ་ཏུ་ཆེ་བར་གྱུར་ཏེ་སྟན་ལས་ལྡང་བ་ཙམ་ཡང་མི་འདོད་ཅིང་། དེ་བློ་གསལ་བར་གྱུར་པ་ཁྱིམ་གྱི་ནང་ན་འདུག་བཞིན་དུ་བསྟན་བཅོས་རྣམས་བསླབས་སོ། །དེའི་ཕ་དེ་རྫོགས་བྱེད་ལ་དགའ་བས་སྟོན་པ་དྲུག་བོས་ཏེ་ཟན་བྱིན་ཀྱང་། ཁྱེའུ་དེ་མིག་གིས་ལྟ་བ་ཙམ་ཡང་མ་འདོད་ན་ལྡང་བ་དང་ཞེ་ས་བྱེད་པ་སོགས་ལྟ་ཅི་སྨོས། དེར་ཕ་དེ་མྱ་ངན་གྱིས་རབ་ཏུ་ནོན་པ་ན། བཅོམ་ལྡན་འདས་ཀྱིས་གཟིགས་ཏེ་མུ་སྟེགས་ཅན་རྣམས་ཀྱི་རྒྱགས་པ་དང་དྲེགས་པ་བཅད་པ་དང་། ཁྱེའུ་དེའི་རྒྱུད་ལ་བླ་ན་མེད་པའི་དགེ་རྩ་བསྐྱེད་པའི་ཕྱིར་གསེར་མདོག་ལྟ་བུའི་འོད་ཀྱིས་སྣང་བ་བཀྱེ་སྟེ་དེའི་ཁྱིམ་ཀུན་སྣང་བར་བྱས་ཤིང་། བསྐལ་པ་དུ་མར་བྱམས་པའི་ཐུགས་བསྒོམས་པའི་མཐུས་འོད་དེས་རེག་པའི་སྐྱེ་བོ་ཐམས་ཅད་ཀྱི་ལུས་སེམས་རབ་ཏུ་སིམ་པར་གྱུར་པས་འདི་སུ་ཞིག་གི་མཐུའོ་སྙམ་སྟེ་ཕན་ཚུན་དུ་ལྟ་བར་བྱེད་པ་ན། སངས་རྒྱས་དགེ་སློང་གི་འཁོར་དང་བཅས་པ་ཁྱིམ་དེར་གཤེགས་པས། ཁྱེའུ་དེར་རབ་ཏུ་དགའ་ནས་རང་ཉིད་ཀྱིས་བསུས་ཤིང་། གདན་བཤམས་ཏེ་བཞུགས་སུ་གསོལ་ནས་ཞབས་ལ་ཕྱག་བྱས་ཏེ་ཆོས་མཉན་པར་འཁོད་པ་ན། བཅོམ་ལྡན་འདས་ཀྱིས་དེ་ལ་ལེ་ལོའི་ཉེས་པ་དང་བརྩོན་འགྲུས་ཀྱི་ཕན་ཡོན་རྣམ་པ་དུ་མ་བཀའ་སྩལ་ནས། ཙནྡན་གྱི་དབྱུག་གུ་ཞིག་ཀྱང་དེ་ལ་བྱིན་ཏེ་ཁྱེའུ་དབྱུག་གུ་འདི་རྡུངས་ཤིག་ཅེས་བཀའ་སྩལ་ཏོ། །དེ་ནས་དེས་དབྱུག་གུ་དེ་བརྡུངས་པ་དང་། སྒྲ་སྙན་པ་ཐོས་པར་གྱུར་ལ་རིན་པོ་ཆེའི་གཏེར་སྣ་ཚོགས་ཀྱང་མཐོང་ངོ་། །དེ་ནས་བརྩོན་འགྲུས་ཀྱི་ཁྱད་པར་མཐོང་ནས་སེམས་ལྷག་པར་སྤྲོ་བར་གྱུར་ཏེ། ཐམས་ཅད་ལ་དྲིལ་བསྒྲགས་ཏེ་རང་ཉིད་ཀྱིས་དེད་དཔོན་བྱས་ནས་རྒྱ་མཚོ་ཆེན་པོར་ལན་དྲུག་གི་བར་དུ་ཕྱིན་ཏེ་བདེ་བར་འཁོར་ནས་སངས་རྒྱས་འཁོར་དང་བཅས་པ་ཁྱིམ་དུ་སྤྱན་དྲངས་ཏེ་བཤོས་གསོལ་ནས། བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེའི་ཚེ་བཅོམ་ལྡན་འདས་ཞལ་འཛུམ་པ་དང་བཅས། མ་འོངས་པ་ན་ཡང་དག་པར་རྫོགས་པའི་སངས་རྒྱས་བརྩོན་འགྲུས་དང་མཐུ་རྩལ་དང་ཤིན་ཏུ་ལྡན་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །འདི་གོང་གི་ལས་བརྒྱ་པའི་ནང་གི་དེ་དང་ཕྱོགས་འདྲ་ཡང་ཁྱད་པར་ཅུང་ཟད་སྣང་ངོ་། །